Norway Ʋɔnudrɔ̃ƒe Kɔkɔtɔ De Mawusubɔsubɔ Ƒe Gomenɔamesiwo Dzi

NƆNƆME kawoe ate ŋu ana be dzila madze akpɔ vi dzi o? Wohea glãka le biabia sia ŋu vevie le dzila si gbɔ ɖevi anɔ ƒe nyawo me le xexeame katã. Wobua nu geɖe ŋu, eye woléa ŋku ɖe dzila ƒe lã­mesẽ, nɔnɔme si me wòle, kple ƒomedodo si le wo kple ɖevia dome ŋu.

Ke mawusubɔsubɔ hã ɖe? Ðe woate ŋu agblɔ be dzila medze o le eƒe xɔse ta koa? Biabia sia mee wodzro le dzila si gbɔ ɖevi anɔ ƒe nyaʋiʋli aɖe si ku ɖe Yehowa Ðasefo aɖe ŋu me le Norway. Ƒe eve kple edzivɔwo va yi eye wodrɔ̃ nya la zi etɔ̃ hafi wova kpɔ egbɔ le Norway ƒe Ʋɔnudrɔ̃ƒe Kɔkɔtɔ.

Edze egɔme le ƒe 1988 me. Dzilaawo klã keŋkeŋ le ƒe 1989 ƒe March me, eye wo vinyɔnuvia nɔ dadaa gbɔ. Vifofoa tsɔ nya la yi ʋɔnu hegblɔ be yee nye dzila si dze akpɔ nyɔnuvia dzi koŋ. Egblɔ be vidada la mate ŋu anyi ɖevia le mɔ nyui si sɔ nu o eye le ema ta esasrãkpɔ ƒe mɔ koe wòle be woanae. Nukata wògblɔ nya ma? Le esi nyɔnua le ha dem kple Yehowa Ðasefowo tae.

Vifofo la na amesiwo tsi tre ɖe Yehowa Ðasefowo ŋu va ɖi ɖase “nyuie” be yeatsɔ aɖee fia ʋɔnua be Yehowa Ðasefowo ƒe nufiafiawo kple agbenɔnɔ tsi tre ɖe nɔnɔme kple gɔmeɖose nyui siwo hiã na dzilanyuinyenye la ŋu. Nutoa me ʋɔnudrɔ̃ƒea ƒe ʋɔnudrɔla 2 lɔ̃ ɖe edzi eye 1 gbe be ele be ɖevia nanɔ dadaa gbɔ be wòalé be nɛ gbesiagbe, eye wogblɔ na vifofoa be ate ŋu ava nɔ esrãm kpɔ. Vifofoa tsɔ nya la yi ʋɔnudrɔ̃ƒe gã be woagbugbɔe adrɔ̃. Le afisia hã la, ʋɔnudrɔ̃la 2 de nyɔnua ƒe beléle na ɖevia gbesiagbe dzi eye 1 gbe. Gake fifia wodzi sasrãkpɔ ƒe gome si le vifofoa si la ɖe edzi. Tsɔ kpe ɖe eŋu la, edze abe ɖikekewo nɔ ʋɔnudrɔ̃la siwo tso nya me de nyɔnua dzi gɔ̃ hã me ɖe ɖevia ƒe etsɔme ŋu ene. Esi esia gado ŋusẽ vifofoa ta la, etsɔ nya la yi Norway Ʋɔnudrɔ̃ƒe Kɔkɔtɔ.

Le afisia hã la, vifofo la gadi be yeaƒo nu gbegblẽ le Yehowa Ðasefowo ƒe dzixɔsewo ŋu. Egblɔ be afɔku anɔ eme be ye vinyɔnu natsi le ŋusẽkpɔɖeamedzi sia te.

Gake Ʋɔnudrɔ̃ƒe Kɔkɔtɔ la bu nya la ŋu le mɔ bubu nu. Ʋɔnudrɔ̃ƒea ƒe ʋɔnudrɔ̃la gbãtɔ nɔ te ɖe nyametsotso si wowɔ le August 26, 1994 dzi gblɔ be: “Vidadaa ƒe Yehowa Ðasefo nyenye mexe mɔ be woana mɔnukpɔkpɔe be wòalé be na ɖevia gbesiagbe o.” Egblɔ hã be: “Mekpɔ be ɖevia le tsitsim nyuie eye wònye nyɔnuvi si kpɔa dzidzɔ. Edze abe ete ŋu kpɔ kuxi siwo anya do mo ɖa le esi fofoa kple dadaa ƒe nukpɔsusu le agbe ŋu to vovo ta la gbɔ nyuie ene.” Ʋɔnudrɔ̃la ene bubuawo katã da asi ɖe eƒe nyataƒoƒoa dzi.

Nyateƒelɔ̃la siwo le Norway kpɔ dzidzɔ ɖe alesi Ʋɔnudrɔ̃ƒe Kɔkɔtɔ la ƒe ʋɔnudrɔ̃lawo lé ŋku ɖe nya la ŋu tututu togbɔ be amewo tso Yehowa Ðasefowo nu alakpatɔe hã la ŋu ŋutɔ. Ʋɔnudrɔ̃ƒea to nyametsotso sia me ɖo kpe edzi be ablɔɖe le amesiame si be wòasubɔ Mawu ahana vividoɖeameŋu ƒe hehe si nɔ te ɖe Biblia ƒe gɔmeɖosewo dzi viawo.a

[Etenuŋɔŋlɔ]