Xexe si me Ŋukeklẽ Manɔ O

“NE AMEGBETƆ metrɔ tamesusu kaba le xexeame godoo o la, naneke manyo na mí amegbetɔwo o, eye míate ŋu asi le afɔku gã si gbɔ míaƒe xexeame ɖo tae . . . nu o.”—Václav Havel si nye Czech Dukɔa kplɔla.

Ame geɖe kpɔe dze sii be fifi xexemenuɖoanyia mate ŋu anɔ anyi o. Ame aɖewo abe Václav Havel ene kpɔe be nusi ko akpɔ egbɔ enye be amegbetɔ natrɔ eƒe tamesusu kple nuwɔna le xexeame katã. Le kpɔɖeŋu me, amesiwo léa ŋku ɖe fifi xexemenudzɔdzɔwo ŋu dometɔ ɖeka gblɔ be: “Le hiãtɔ kolikoli miliɔn alafa geɖe gome la, nuɖuɖu kple agbemenuhiahiã bubuwo kpɔkpɔ manyo ɖe edzi o . . . dzaa ɖe xexemedukɔwo ɖoe kplikpaa trɔ nɔnɔme siwo li fifia hafi.”—Food Poverty & Power.

Gake ɖe susu anɔ eme be míada míaƒe mɔkpɔkpɔ ɖe tɔtrɔ tɔxɛ aɖe si amegbetɔ awɔ le eƒe nɔnɔme ŋu dzi be eyae ana míatsi agbea? Ðe míate ŋu aka ɖe dziɖuɖuwo dzi be ‘woaɖoe kplikpaa atrɔ nɔnɔme siwo li fifia’? Emae nye ame aɖewo ƒe susu. Wogblɔna be, ‘Mawu na tiatiawɔblɔɖe mí, eyata ekpo ɖe mía gbɔ be míatrɔ nuwo.’ Gake nya gã siwo dzɔ le ŋutinya me fɔ biabia veviwo ɖe te le amegbetɔ ƒe didi kple eƒe ŋutete be wòawɔ tɔtrɔ siwo hiã la ŋu. Menye mɔkpɔkpɔbuɖeame ƒe nya o, ke boŋ nya ŋutɔŋutɔe. Ne ènya be amekola aɖe ƒe dɔnɔ siwo katã va do ŋgɔ ku la, àyi be newɔ dɔ na yea?

Nufiafia Amewo ƒe Nya Yea?

Ted Trainer gblɔ ɖe Developed to Death—Rethinking Third World Development me be: “Nufiafia amewo ƒe nyae.” Egblɔ be ne womefia nu amewo wokpɔe be tɔtrɔ veviwo wɔwɔ hiã o la, “míate ŋu akpɔ mɔ be míatrɔ xexemenuɖoanyi sia wòanyo o.” Ðikeke mele eme o be ehiã be woafia nu amewo woakpɔe be tɔtrɔwɔwɔ le agbenɔnɔ kple nuwɔna me le vevie eya ko hafi xexeame ate ŋu anɔ anyi. Le nyateƒe me la, ehiã vevie ŋutɔ, eye Biblia ƒo nu tso nufiaɖoɖo ma ŋu. Egblɔ be “sidzedze Yehowa [axɔ]” anyigba katã dzi. Ekema ame aɖeke ‘mawɔ vɔ̃ aɖeke alo ahe gbegblẽ’ ava anyigba ƒe akpa aɖeke ‘o.’—Yesaya 11:9.

Gake aleke gbegbe wofia nu amewoe o, nenye Mawu ƒe nufiafiae woxɔ hã, eya ɖeɖe mate ŋu ana ŋuklẽla siwo wɔa nuvevi amewo hegblẽa nu le teƒe geɖewo la navɔ le anyigba dzi o. Amesiwo di be yewoatrɔ, amesiwo di be yewoazɔ ɖe Mawu ƒe dzidzenuwo dzi koe woafia nui woatrɔ. Yesu Kristo gblɔ be womesɔ gbɔ o. (Mateo 7:13, 14) Eyata tɔtrɔ si ŋugbe Biblia do la menɔ te ɖe mɔkpɔkpɔ fluame aɖe dzi be ameƒomea katã afɔ gbeɖeka ko akpɔ alesi gbegbe kuxia sesẽe eye woatrɔ woƒe agbenɔnɔ o. Egblɔ be Mawu ŋutɔe atso aɖe ŋuklẽlawo ɖa le anyigba dzi.

Mawu ƒe Nudede Eme

Ame geɖe tsɔnɛ be drɔ̃e alo ameflunu ko wònye be woagblɔ be Mawu ŋutɔ ade nu eme. World Hunger: Twelve Myths gblɔ be: “Nunyalawo ƒe ŋgɔgbedede le ƒe alafa wuienyilia me zi mía dzi be míeɖe nufiafia fakɔname si nye be Mawu ade nu eme eye wòaɖɔ nuwo ɖo na ameƒomea la ɖa le susu me.” Gake ɖe wòle be míaxɔ nunyala siwo mexɔe se be “Mawu ade nu eme o” la ƒe nyagbɔgblɔwo kple nufiafiawo dzi asea? Menye ameflunu koe egbɔkpɔnu siwo wogblɔ la nye oa?

Ẽ nunya le eme wu be míada míaƒe agbetsitsi ƒe mɔkpɔkpɔ ɖe nyagblɔɖi matrɔmatrɔ siwo le Biblia me, esiwo gblɔ be Mawu ade nu eme la dzi. Menye “nufiafia fakɔname” dzro koe wònye be míaxɔ Mawu ƒe ŋugbedodowo dzi ase o—eya koe nye agbetsitsi ƒe mɔkpɔkpɔ vavã si le mía si!

‘Atsrɔ̃ Amesiwo le Anyigba Gblẽm’

Nuka tututu ŋugbee Mawu do? Ðekae nye be edo ŋugbe be yeatsrɔ̃ amesiwo ƒoa ɖi anyigba hegblẽa yame la ɖa. Nyaɖeɖefia 11:18 gblɔ be ‘ɣeyiɣi ɖoɖi’ le esi be ‘wòatsrɔ̃ amesiwo le anyigba la gblẽm.’ Nukae adzɔ? Aɖe amesiwo katã le ame dahewo kple wɔnamanɔŋutɔwo tem ɖe to fifia la ɖa. Mawu “atso afia na dukɔ la ƒe hiãtɔwo, axɔ na ame daheviwo, eye wòato ŋutasẽla nyanyanya.” Atsrɔ̃ ŋuklẽlawo eye wòana nu nadze edzi na ame ɖihiã siwo kpea fu le wo si me. “Aɖe ame dahe, si le ɣli dom . . . Aɖe woƒe luʋɔ tso teteɖeanyi kple ŋutasesẽ me.”—Psalmo 72:4, 12-14.

Tɔtrɔ ka gbegbee nye si wòanye! Le apostolo Petro ƒe nya nu la, tɔtrɔ sia akpe nusianu ɖo ale gbegbe be awɔ “dziƒo yeye kple anyigba yeye.” (Petro II, 3:13) Anyigba ƒe kutsetse ade amesiame nu pɛpɛpɛ le “anyigba yeye” ma dzi. (Mixa 4:4) Fifia gɔ̃ hã la, nuɖuɖu li fũ amesiame nakpɔ aɖu hafi. Esi womemãa nuawo dedie o tae. Anne Buchanan gblɔ le eƒe agbalẽ si nye Food Poverty & Power me be: “Wobu akɔnta be míate ŋu ade agbledenyigba siwo le xexeame wòawɔ nuɖuɖu wòasu na ame biliɔn 38-48.”

Anyigba sia magblẽ o. Ewɔla ‘mewɔe be wòatsi ƒuƒlu o, ke boŋ ɖe wòmèe be woanɔ edzi.’ (Yesaya 45:18) Afɔ si Mawu aɖe ɖe ŋuklẽlawo ŋu anye “xaxa gã” si ava ɣeyiɣi kpui aɖe. (Mateo 24:21) Ɣemaɣi amesiwo atsi agbe le xaxa ma me ase vivi le paradisonyigba dzi, afisi ŋuklẽla aɖeke manɔ o. (Psalmo 37:10, 11; 104:5) Anɔ abe alesi Biblia do ŋugbee ene be: “Yehowa atutu aɖatsi ɖa le ŋkuwo katã me.”—Yesaya 25:8.

Àte ŋu anɔ dzidzɔtɔ siwo ta Mawu aɖe afɔ aɖe ŋukeklẽ ɖa le anyigba dzi la dome. Ne èdi vavã be yeawɔ Mawu ƒe lɔlɔ̃nu la, ke wɔ ɖoɖo siwo katã li bene woakpe ɖe ŋuwò be nàtsi agbe fifia le ŋukeklẽ ƒe xexe sia me la ŋudɔ. Dze agbagba be nàtsi agbe le “xaxa gã” la me. Yehowa Ðasefowo le klalo be yewoakpe ɖe ŋuwò nàsrɔ̃ nusi wòle be nànya. Te ɖe wo ŋu faa le Fiaɖuƒe Akpata si le mia gbɔ me, alo ŋlɔ agbalẽ ɖo ɖe adrɛs siwo le axa 5 la dometɔ si te ɖe ŋuwò wu.