Hiãkame—‘Hiahiã Kpata si Ŋu Womeƒoa Nu le O’
DUKƆ ƑOƑUAWO ƒe aɖaŋuɖola Ðk. Mahbub Ul-Haq gblɔ be: “Míesena woƒoa nu tso anyigba ƒe dzoxɔxɔ, ɖiƒoƒo ya si léa ɣe ƒe keklẽ sesẽa kple atsiaƒua ŋu ɣesiaɣi be wonye hiahiã kpatawo,” gake egagblɔ be: “Anyigba ƒe dzoxɔxɔ kple hiahiã kpata bubu geɖe siwo ŋu woƒoa nu le la mewu ame aɖeke haɖe o [evɔ] hiahiã kpata siwo ŋu womeƒoa nu le o ya le ame geɖe wum gbesiagbe le dukɔ madeŋgɔwo me.” Ðk. Ul-Haq yɔ hiahiã kpata mawo siwo ŋu womeƒoa nu le o dometɔ ɖeka. Ebe: “Hiãkame ye nye vɔ̃ɖitɔ si wua ame wu.” Aleke wɔ?
Hiãkame zu afɔku gã dziŋɔ aɖe na ame biliɔn 1.3 siwo nɔa agbe ɖe dɔlar ɖeka alo esi mede nenema o nu gbeɖeka le xexeame la dometɔ geɖe. Magazine si nye UN Chronicle ka nya ta be “hiãkame” wua amesiwo ade miliɔn 18 ƒe sia ƒe. Xexlẽme sia sɔ gbɔ loo! Tsɔe le kpɔɖeŋu me be le ƒe ɖeka me dɔ wu Australiatɔwo katã siwo ade miliɔn 18 woku, kpɔ alesi woagblɔe le nyadzɔdzɔwo me “kakakae” ɖa! Gake Dukɔ Ƒoƒuawo gblɔ le Radio dzi be “womegblɔa” ame dahe miliɔn gbogbo siawo ƒe ku ya “fũ o.” Le nyateƒe me la, enye ‘afɔku si ŋu womeƒoa nu le o.’
Bene woaƒo nu le eŋu azɔ la, amedɔdɔ siwo tso dukɔ 117 me de Xexeame Hadomeŋgɔyiyi Takpekpe la gblɔ mɔ siwo dzi woato akpɔ ahedada ƒe kuxia gbɔ le xexeame. James Gustave Speth si nye Dukɔ Ƒoƒuawo ƒe Ŋgɔyidɔwo dzikpɔla la he susu yi edzi be: “Ƒe alafa ɖeka kple blaatɔ̃ enye si va yi la, xexeame ho aʋa ɖe kluvisitsatsa ŋu. Egbea ele be míaho aʋa ɖe amehawo ƒe ahedada ŋu le xexeame.” Nukata wòhiã? Exlɔ̃ nu be hiãkame “he mɔkpɔkpɔbuɖeame kple tamebubu vɛ eye [ele] míaƒe xexeame dem afɔku me.”
Gake esi amedɔdɔawo le alesi woawɔ aɖe hiãkame ɖa ŋu bum la, ‘hiãkame ƒe gaƒoɖokui’ si le ɖevi xexlẽme si dzim wole ɖe ƒome dahewo me gbesiagbe xlẽm la ɖee fia be hiãkamea nu le sesẽm ɖe edzi le xexeame. Gaƒoɖokui sia si nɔ takpekpewɔƒea ɖee fia be le kwasiɖa ɖeka si wowɔ takpekpea me la, wogadzi ɖevi 600,000 ɖe ame dahe siwo le dzidzim ɖe edzi la dome. Le takpekpea ƒe ŋkeke mamlɛa ƒe nuwuwu la, wona gaƒoɖokuia tɔ; gake le nyateƒe me abe alesi Speth de dzesii ene la, “gaƒoɖokuia gale dɔ dzi.” Biabia si li fifia enye be, Ðe woatso ɖe eŋua?