Nukae Kpɔa Ŋusẽ Ðe Wò Nɔnɔme Dzi?

ANYE ƒe 2,700 enye sia la, agbalẽŋlɔla aɖe si gbɔgbɔ ʋã ŋlɔ lododo sia si naa wobua tame be: “Nu vlo wɔwɔ nye [fefenu] na bometsila.” (Lododowo 10:23) Tso esime gbɔdɔdɔ ŋuti nukpɔsusu ƒe tɔtrɔ la va koŋ ye nya sia ƒe nyateƒenyenye dze kɔte. Hafi ne AIDS ƒe ŋɔdzi la naxɔ aƒe la, ame geɖe ƒe susue nye ‘vivisesefefe si woawɔ faa’ ye gbɔdɔdɔ nye eye ‘nuka ke wòagblẽ o,’ ele be woawɔ ɖe gbɔdɔdɔ ƒe dzodzro la dzi. Ðe nɔnɔme sia trɔa? Ne míagblɔe tututu la, metrɔ o.

Egbea gbɔdɔdɔ ƒe tsukuku wɔe be amewo kpɔtɔ nye “amesiwo ɖekadzedze alo tugbedzedze kpɔkpɔ hoa gbɔdɔdɔ ƒe dzodzro na vevie,” ‘srɔ̃maɖevɔlawo,’ kple “gbɔdɔdɔmedzidzelawo,” amesiwo ʋlia nya be amesiame ƒe nyae wònye be eya ŋutɔ natso nya me le agbe si dze eŋu wòanɔ ŋuti eye be amesiame ko gbɔdɔdɔ sɔ. Wogblɔna be amesiame si dze ame ŋu ko gbɔdɔdɔ ‘megblẽa nu le ame aɖeke ŋu o,’ ne wonya nye ame tsitsi siwo lɔ̃ ɖe edzi na wo nɔewo ko. Le ƒe 1964 me la, Iowa Nutome Yunivɛsiti ƒe hadomegbenɔnɔ ŋuti nunyala Ira Reiss yɔe be “mɔɖeɖeɖenugbegblẽŋu si ŋu lɔlɔ̃ kpe ɖo.”

Edze abe susu ma kee le Edinburgh, Scotland, ƒe Anglikan bisiɔp hã si ene, elabena egblɔ be ɖe wowɔ amegbetɔ be wòadze ahiã zã. Egblɔ le nuƒo aɖe si wòƒo le gbɔdɔdɔ kple Kristotɔnyenye ŋu me be: “Mawu nya be esi yewɔ mí la, yewɔ gbɔdɔdɔ ƒe dzodzro de mía me be míaheyi aƒã míaƒe nukuwo. Ena dɔdɔ yakayaka ƒe ŋusẽ mí. Mexɔ se be anye vodada be ha la nabu fɔ amesiwo wɔa nu ɖe woƒe lãmenusese nu.”

Ðe nukpɔsusu sia sɔa? Nukae amesiame ko gbɔdɔdɔ gblẽna? Ðe ahiãwɔwɔ kple ame vovovo naa ame ƒe dzi dzea eme eye wokpɔa dzidzɔa?

Nulɔdɔwo ƒe gbagba ɖe xexeame katã kple gbɔmeyafufɔla miliɔn nanewo, vevietɔ ƒewuiviwo tɔ, ɖo kpe edzi be vavãe, nukpɔsusu sia meɖea vi o. Newsweek magazine gblɔ be ƒewuivi siwo wosusu be woade miliɔn etɔ̃ ye lɔa nu ƒe sia ƒe le United States ɖeɖe dzaa. Tsɔ kpe ɖe eŋu la, ‘ʋuɖekametsotsolɔlɔ̃’ aɖeke mele “ame tsitsi siwo lɔ̃ ɖe edzi na wo nɔewo” me na fu si tsoa eme zi geɖe la o eye womesena le wo ɖokui me hã be eƒe agba aɖeke le yewo dzi o, eye kasia ko wodi be yewoaɖe fua xoxo. (Timoteo II, 3:3) Esia naa woɖea ɖevia ƒe agbe ɖa ŋutasesẽtɔe le dadaa ƒe dɔme. Nusi wòagblẽ le vidada matsimatsia ŋu ate ŋu anye be ato blanuiléle kple fɔbubuameɖokui gã aɖe si anɔ fuɖeɖe nɛ dzi le eƒe agbenɔɣi mamlɛa me la me.

Le ƒe 1990 ƒeawo ƒe titina la, Ðk. Patrick Dixon bu akɔnta be le Britain ɖeɖe la, kɔba si yia nugbe ɖe gbɔdɔdɔ ŋuti nukpɔsusu ƒe tɔtrɔa ŋu nye ga nagbonagbo si nye dɔlar biliɔn 20 ƒe sia ƒe. Ðk. Dixon fia alesi wòwɔ ke ɖe ga ma ŋu le akɔntabubua me ɖe eƒe agbalẽ si nye The Rising Price of Love me, eyae nye be ebu ga si wogblẽna ɖe nulɔdɔwo, si me AIDS hã le, dada ŋu; ga si wogblẽna le srɔ̃tɔwo dome gbegblẽ ta; ga si dzila ɖekawo ƒe vinyinyi gblẽna na amewo; kpakple ga si wozãna ɖe ƒomedzikpɔkpɔ kple ɖe ɖeviwo ƒe atikefewo ŋu. Canadatɔwo ƒe nyadzɔdzɔgbalẽ The Globe and Mail gblɔ be Ðk. Dixon ƒo nya ta be: “Gbɔdɔdɔ ŋuti nukpɔsusuwo ƒe tɔtrɔ si do ablɔɖe ŋugbe la wɔ ame geɖe kluvii, le xexe si me gbɔdɔdɔ ƒe tɔtɔ, vɔ̃dzɔɖeamedziwo, akogotsitsi, nuteɖeamedzi, ŋutasesẽnuwɔwɔ, kple dzu le nu gblẽm le me.”

Gake nukatae amewo aɖe mɔ gbɔdɔdɔ nado aɖaʋa wo, gbɔdɔdɔ yakatsyɔe boŋ nadze wo ŋu wu, eye woatsɔ amesiame ƒomevi ko gbɔdɔdɔ aɖo dɔe evɔ woahaɖe ta le emetsonuwo te? Le nu gbegblẽ siwo gbegbe gbɔdɔdɔ ƒe tsukuku gblẽnu sia dzi le ƒe blaetɔ̃ kple edzivɔ siwo va yi me la kpɔkpɔ me la, nukae ganɔa amewo tutum de eme kokoko?

Gbɔdɔdɔ Ðeɖefia Troa Amewo ƒe Susu

Wogblɔ be gbɔdɔdɔ ƒe nuwɔnawo (alo amamaɖeɖe) ɖeɖefia nye nusiwo ƒlɔa dzo ɖe gbɔdɔdɔ ƒe tsukuku gɔme dometɔ ɖeka. Ŋutsu aɖe si ŋutɔ lɔ̃ ɖe edzi be gbɔdɔdɔtsukunɔe yenye la ŋlɔ ɖe The Toronto Star nyadzɔdzɔgbalẽ me be: “Meɖe asi le sigaretnono ŋu ƒe atɔ̃e nye sia, ƒe evee nye sia meɖe asi le ahasesẽnono ŋu, gake naneke mesẽ nam le agbe me de asiɖeɖe le gbɔdɔdɔ kple amamaɖeɖefotowo kpɔkpɔ ŋu nu o.”

Eka ɖe edzi hã be ƒewuivi siwo tsɔa gbɔdɔdɔ nuwɔnawo kpɔkpɔ ɖoa dɔe ƒe susu le gbɔdɔdɔ ŋu trona. Wotea gbɔdɔdɔ ƒe nudzroame siwo vaa susu me na wo la kpɔ eye ne wova ɖe srɔ̃ ŋutɔ la, wokpɔnɛ be yewo kple yewo srɔ̃ dome ƒomedodo nyuitɔ tɔtɔna eye wòsesẽna na yewo. Enaa woɖea wo ɖokui ɖe aga tso wo srɔ̃wo gbɔ tsɔ kpe ɖe kuxi bubuwo ŋu, wo dometɔ vevi ɖekae nye be ƒomedodo si me lɔlɔ̃ si nɔa anyi didina le mete ŋu nɔa wo kple wo srɔ̃wo dome o.

Modzakaɖenuwɔlawo Tsɔ Gbɔdɔdɔ Le Ga Wɔmee

Dɔdɔ kple ame vovovo, ameawo ɖaɖe srɔ̃ alo wonye trewo o, bɔ eye modzakaɖelawo ɖenɛ fiana ŋutɔ. Gbɔdɔdɔ nuwɔna ɖeɖefia lɔlɔ̃manɔmee kple gbɔɖiametɔe le television dzi hoa gbɔdɔdɔ ƒe dzodzro sesẽ ɖe ame me eye wònaa dzidzime sia ƒe susu trona le alesi wòle be amegbetɔ ƒe gbɔdɔdɔ nanɔ ŋu. Zi geɖe la, modzakaɖelawo tsɔa amefuflu ɖea amesiwo meɖe wo nɔewo o ƒe gbɔdɔdɔ fiana abe gbɔdɔdɔ si me lɔlɔ̃ le ye wònye ene. Edzena abe ɖe amesiwo doa vivi ɖe fefewɔlawo ŋu mete ŋu dea vovototo fieŋufieŋui kple lɔlɔ̃, ɣeyiɣi kpui aɖe ko ƒe ahiãwɔwɔ kple srɔ̃ɖetamkaka na ame nɔewo si nɔa anyi didina, alo nudzroame si vaa susu me na ame kple nu ŋutɔŋutɔ dome o ene.

Nenema ke modzakaɖelawo lɔ̃a gbɔdɔdɔ tsɔtsɔ do boblo adzɔnuwoe akpa. Gbɔdɔdɔ dɔdamɔnufiala aɖe gblɔ be etrɔ zu “adzɔnu makpɔmakpɔ aɖe si ƒe taɖodzinue nye be wòadi asi na nudzadzrawo.” Boblodolawo tsɔ gbɔdɔdɔ wɔ gae eye wobunɛ be enye agbe dzedziname nɔnɔ ƒe akpa aɖe, gake abe alesi magazine si nye Family Relations gblɔe ene la, ƒe alafa 20 lia me “gbɔdɔdɔ ŋuti nukpɔsusu totro” bubu koe esia hã nye.

Agbenɔnɔ ƒe Tɔtrɔwo Trɔ Gbo Amewo ƒe Susu

Tɔtrɔ siwo va le hadomegbenɔnɔ me kple mɔxexenafutikekuiwo toto vɛ kple wo dzadzra le ƒe 1960 ƒe ƒeawo me trɔ nyɔnu miliɔn geɖe ƒe gbɔdɔdɔgbenɔnɔ. Atikekuia na nyɔnuwo bui be yewo sɔ kple ŋutsuwo, be ablɔɖe alo ɖokuisinɔnɔ si mesu yewo si kpɔ o la va su yewo si azɔ. Fifia woawo hã woate ŋu awɔ ahiã faa, elabena womegale fufɔfɔ vɔ̃m o. Esi ŋutsuwo kple nyɔnuwo siaa va le mimlim le gbɔdɔdɔblɔɖe si me wobe yewoɖo me la, wotutu alesi ƒomegbenɔnɔ nɔna kple nɔƒe si wòle be gbɔdɔdɔ nanɔ da ɖe axadzi kura.

Ƒe alafa gbãtɔ me Biblia-ŋlɔla aɖe gblɔ le ame mawo tɔgbe ŋu be: “Ŋku, siwo yɔ taŋ kple ahasiwɔwɔ, eye nuvɔ̃wɔwɔ metea ŋu ɖia kɔ na wo o la, li na wo; . . . dzi, si ŋukeklẽ mã ŋutɔ la, li na wo, . . . Esi wogblẽ mɔ dzɔdzɔe la ɖi la, wotre mɔ.”—Petro II, 2:14, 15.

Gbɔdɔdɔ Ŋuti Nufiafia le Suku

Numekuku aɖe si wowɔ le United States le ɖetugbivi tre 10,000 siwo ɖo kɔledzidede me ŋu fia be “sidzedze, si su ame si to gbɔdɔdɔ ŋu nyawo fiafia le suku me kple esi woawo ŋutɔ gblɔ be yewonya xoxo le mɔxexeɖefufɔfɔnu ŋu le yewo ɖokui si” la mexe mɔ na tre ƒewuiviwo ƒe fufɔfɔ o. Ke hã nusi dziɖuɖu suku aɖewo le wɔwɔm le nɔnɔme vɔ̃ sia ŋue nye be womãa kɔndɔm na woƒe sukuviwo femaxee, togbɔ be wole nya hem le wɔna sia ŋu vevie hã.

Nyɔnuvi ƒe 17 vi aɖe si Calgary Herald nyadzɔdzɔgbalẽ bia gbee la gblɔ be: “Nyateƒee, ƒewuivi siwo le suku kɔkɔ ƒe akpa gãtɔ dɔa wo nɔewo gbɔ . . . kple ƒe 12 vi aɖewo gɔ̃ hã le eme.”

Nukae Nye Lɔlɔ̃ Kple Srɔ̃ɖetamkaka?

Lɔlɔ̃, kaka ɖe ame nɔewo dzi, kple anyinɔnɔ kple ame nɔewo si me vivisese le menye nusiwo tsoa ame nɔewo ƒe nu ƒe dzi léle na ame alo gbɔdɔdɔ gbɔ dzro o. Gbɔdɔdɔ ɖeɖe mate ŋu ana lɔlɔ̃ vavãtɔ naɖo ame dome o. Lɔlɔ̃ kple ɖekawɔwɔ kplikplikpli xɔa aƒe ɖe dzi me na ame eve siwo tsɔ ɖe le eme na wo nɔewo eye wodi be ƒomedodo nanɔ yewo dome ɖaa.

Ahiãwɔwɔ va naa wòwɔna na ame be womele dedie o, wotsi akogo, eye ɖewohĩ woalɔ nu abe AIDS ene. Petro II, 2:19 me nyawo asɔ na ahiãwɔwɔ taʋlilawo nyuie, be: “Wodo ablɔɖe ŋugbe na wo, wònye woa ŋutɔwo la gbegblẽ ƒe dɔlawo wonye hafi; elabena amesi ɖu ame aɖe dzi la, eya ke wɔnɛ kluvi.”

England Sɔlemeha ƒe hadomegbanɔamedziwo gbɔkpɔha ŋlɔ le eƒe nyatakaka si woɖe ɖe go le June 1995 me, si ƒe tanyae nye “Nane si Ŋu Wòle Be Woado Vivi Ðo.” Nusi sɔlemea ƒe dɔdzikpɔha gblɔ la tsi tre ɖe Biblia ƒe nuxlɔ̃ame ŋu kura, be, “woadzudzɔ nya si nye ‘nuvɔ̃gbenɔnɔ’ gbɔgblɔ eye womeganɔ fɔ bum amesiwo le nɔewo gbɔ srɔ̃maɖemaɖee o. Nyatakakaa kafui na “hamewo be woaxɔ ahiãwɔlawo, aɖo to wo, asrɔ̃ nu le wo gbɔ, . . . ale be amewo katã nakpɔ Mawu ƒe anyinɔnɔ le woƒe agbenɔnɔ me.”

Ŋkɔ kae Yesu ayɔ na subɔsubɔhakplɔla mawo? Míake eŋu ɖi aɖeke o be “mɔfiala ŋkuagbãtɔwo” ye. Ke amesiwo dze wo yome hã ɖe? Eɖe nu me be: “Ke ne ŋkuagbãtɔ le mɔ fiam ŋkuagbãtɔ la, wo kpakple eve la katã woayi aɖadze do me.” Mègake ɖi aɖeke le nya sia ŋu o, Yesu gblɔe kɔte be “ahasiwɔwɔwo” kple “matrewɔwɔwo” nye “nusiwo ƒoa ɖi ame” ƒe ɖewo.—Mateo 15:14, 18-20.

Esi nu gbogbo siawo gbegbe li trɔa gbɔdɔdɔ ŋuti nukpɔsusu hezãnɛ ɖe mɔ madzemadze nu la, ke aleke woate ŋu awɔ, vevietɔ sɔhɛwo, be gbɔdɔdɔ magaxɔ susu me na ame o? Nuka gbɔe srɔ̃ɖeɖe si me dzidzɔ le eye wònɔa anyi didina la tsona? Nyati si kplɔe ɖo aƒo nu tso nusi dzilawo ate ŋu awɔ atsɔ akpe ɖe wo viwo ŋu be woadzra ɖo ɖe woƒe etsɔme ŋu la ŋuti.

[Nya si ɖe dzesi si le axa 5]

Ƒewuivi siwo wosusu be woade miliɔn etɔ̃ ye lɔa nu ƒe sia ƒe le United States ɖeɖe dzaa

[Aɖaka si le axa 6]

Gbɔdɔdɔgbenɔnɔwo

Amesiwo Ðeka alo Tugbe Dzedze Kpɔkpɔ Hoa Gbɔdɔdɔ ƒe Dzodzro na Vevie: Ahiãwɔwɔ zu kɔsɔkɔsɔ wode wo ale be kaka woƒe dzodzro nu nafa ɖe woƒe ahiãvi aɖe ŋu ko woawoe nye ma gadze ahiã bubu xoxo. Ðk. Michael Liebowitz si le New York Nutome Tagbɔdɔ Ŋuti Nusrɔ̃ƒe ye kpa ŋkɔ sia na wo.

Srɔ̃maɖevɔlawo: Aleae hadomegbenɔnɔ ŋuti nunyalawo yɔa amesiwo nɔa ahiãwɔwɔ dzi eye wonɔa setɔwo hã gbɔ yim na srɔ̃ɖeɖe, srɔ̃gbegbe, kple srɔ̃gbugbɔgaɖee.

Gbɔdɔdɔmedzidzelawo: Ƒome ŋuti nusɔsrɔ̃ fiala kple gbɔdɔdɔdɔdala Luther Baker gblɔ be wodina be yewoanɔ tsatsam le ŋutsuwo alo nyɔnuwo dzi atsɔ aɖe yewoƒe gbɔdɔdɔŋutete afia. Fifia wova le ŋkɔ sia yɔm na ɖevigbɔdɔlawo hã.

[Nɔnɔmetata si le axa 7]

Agbegbegblẽnɔnɔ ŋu nyawo xɔxɔ de susu me mãa ame hetroa ame ƒe susu le gbɔdɔdɔ ŋu