“Menye Amesiamee Kpɔ Gome le Wo Zazã me O”
DUKƆ ƑOƑUAWO ƒe Ŋgɔyidɔwo Dzikpɔha alo UNDP ƒe ƒe sia ƒe nyatakaka si nye Human Development Report 1998 ƒo nu tso nuwo zazã ƒe dzidziɖedzi si ɖeke mesɔ kplii o ŋu. Egblɔ be le xexeame katã la, fifia míeƒlea nu zi gbɔ zi ade wu alesi míeƒlee le ƒe 1950 me kple zi gbɔ zi eve wu alesi míeƒlee le ƒe 1975 me. Togbɔ be nuwo ƒeƒle dzi ɖe edzi hã la, James Gustave Speth si nye UNDP ƒe dɔnunɔlagã gblɔ be: “Menye amesiamee kpɔ gome le wo zazã me o.”
Le kpɔɖeŋu me, tɔmelã si amesiwo da ahe kolikoli le xexeame ƒe akpa 20 le alafa me ɖuna la teƒe adre sɔŋ ye amesiwo kpɔ ho wu le xexemenɔlawo dome ƒe akpa 20 ɖuna. Ame 20 le alafa me siwo kpɔ ho wu ɖua ʋulɛ̃ zi gbɔ zi 11 wu, wozãa elektrik kple ŋusẽ bubuwo zi gbɔ zi 17 wu, telefon zi gbɔ zi 49 wu, wozãa pepa zi gbɔ zi 77 wu, eye lɔri zi gbɔ zi 149 wu xexeamenɔla siwo da ahe wu la ƒe akpa 20 le alafa me.
Esi Dukɔ Ƒoƒua ƒe Radio nɔ nu ƒom tso nya sia ŋu la, egblɔ be ne woate ŋu aɖe nusiwo le anyigba dzi zazã dzi akpɔtɔ la, ke ele be dukɔ deŋgɔwo natrɔ alesi wozãa nuwoe. Le ɣeyiɣi ma ke me la, ele be dukɔ deŋgɔwo natsɔ woƒe kesinɔnu geɖe akpe ɖe ame dahe siwo le xexeame ŋu ale be woawo hã nate ŋu akpɔ viɖe le nusiwo le anyigba dzi la zazã me. Kesinɔnu nenie wòahiã be woatsɔ akpe ɖe wo ŋu?
Aƒetɔ Speth bu akɔnta be ne dukɔ deŋgɔwo dzi kpekpeɖeŋu si wonana be woatsɔ awɔ ŋgɔyidɔwo ɖe edzi zi gbɔ zi eve—tso dɔlar biliɔn 50 vaseɖe dɔlar biliɔn 100 ƒe ɖeka la—ame dahe siwo katã le xexeame akpɔ woƒe nuɖuɖu, lãmesẽ, sukudede, kple dɔƒe ƒe kuxiwo gbɔ. Ga dɔlar biliɔn 50 adze abe ga home gã aɖee. Gake Aƒetɔ Speth gblɔ be: “Ga home mae Europatɔwo zãna ɖe sigaret ŋu ƒe sia ƒe, eye eƒe afãe United States zãna ɖe ahamuamewo ŋu egbea.”
Edze ƒã be ne wodze agbagba be woamã nusiwo le anyigba sia dzi sɔsɔe la, ate ŋu awɔ geɖe le ahedada si hea vevesese vɛ la ɖeɖeɖa me. Nukae hiã hafi esia nate ŋu ava eme? Dukɔ Ƒoƒuawo ƒe amegã aɖe gblɔ be: “Nu vevitɔ si hiã enye amewo ƒe dzi, susu, kple didiwo tɔtrɔ.” Ame geɖewo lɔ̃ ɖe edzi, gake wokpɔe dzesii hã be ɖoɖowɔha siwo li egbea mete ŋu trɔa amewo alea o, kaka ne woayi nɔnɔmewo abe ŋukeklẽ ene ɖe ge ɖa o, eɖanye susu nyui kawoe anɔ wo si o.
Ke hã mɔkpɔkpɔ le amesiwo tsɔ ɖe le ameƒomea kple míaƒe anyigba ƒe etsɔme me la si. Enye dzidzɔ be míanya be Amesi wɔ anyigba la do ŋugbe be yeakpɔ amegbetɔwo ƒe kuxiwo gbɔ le mɔ nyuitɔ nu. Hakpala la gblɔe ɖi be: “Anyigba mie eƒe nukuwo. Mawu, mía Mawu la, ayra mí. Bli ado kpekpekpe le anyigba dzi kple towo tame.” (Psalmo 67:7; 72:16) Ẽ, ekema anyigbadzinɔla ɖesiaɖe ‘akpɔ gome le wo zazã me’!