ŊKULÉLE ÐE XEXEA ME ŊU

Asia Ƒe Anyieheɣedzeƒe

Xexea Me Ƒe Dzɔdzɔmenuwo Dzikpɔha gblɔ be le ƒe 1997 kple ƒe 2011 dome la, wova ke ɖe ati kple lã yeye gbogbo aɖewo ŋu le Mekong Gã ƒe nutoa me eye wo dometɔ ɖekae nye ƒli ƒomevi aɖe. Nuto sia keke tso Cambodia, Laos, Myanmar, Thailand, Vietnam va ɖo Yunnan-nuto si le China la me. Le ati kple lã vovovo siwo ŋu woke ɖo le ƒe 2011 ɖeɖe ko me la, wokpɔ ati 82, da ƒomevi 21, tɔmelã 13, akpɔkplɔ ƒomevi 5 kpakple lã siwo naa no wo viwo ƒomevi 5.

Europa

Woka nya ta le The Moscow Times nyadzɔdzɔgbalẽ me be amegbetɔdzadzra va zu taɖui na “Europa-dukɔwo ƒe Ðekawɔha bliboa.” Amedzralawo dzraa amewo wozua gbolowo kple kluvidɔwɔlawo, eye “wodzraa wo na amegbetɔ ƒe ŋutinu dzralawo gɔ̃ hã, si nye nu si ŋuti se meɖe mɔ ɖo o.” Amegbetɔdzrala siawo tea ŋu wɔa amewo ƒe ahedada, dɔmakpɔwɔe kple ale si womebua nyɔnuwo ɖe ɖeke me o la ŋu dɔ tsɔ flua amewo ɖadzrana.

New Zealand

Ame siwo kua nu me tso ɖeviwo kple sɔhɛwo ƒe televisionkpɔkpɔ ŋu gblɔ be televisionkpɔkpɔ akpa gbɔe “wòtso be nuwɔna siwo tsi tre ɖe hadomegbenɔnɔ ŋu le dzidzim ɖe edzi le ɖekakpui kple ɖetugbuiwo dome.” Numekulawo gblɔ be yewoƒe numekukua ɖo kpe nya si wogblɔ be mele be ɖeviwo nakpɔ “wɔna tuameɖowo gɔ̃ hã le television dzi wòawu gaƒoƒo 1 alo 2 gbe sia gbe o” la dzi.

Alaska

“Alaskavi dzidziwo ƒe kɔƒewo” katã kloe le ƒuta alo tɔwo to, eye tsi ɖea kɔƒe siawo dometɔ 86 le alafa me hekplɔa kewo dzonɛ. Wogblɔ be yame ƒe dzoxɔxɔ si nu le sesẽm ɖe edzi la na be tsikpe, siwo kpɔa kɔƒeawo ta be ƒua nagaɖe wo o la, megablana kaba o. Eye esia ate ŋu awɔe be ahom siwo tuna le kele me ate ŋu agblẽ nu le kɔƒeawo ŋu wu.

Xexea Me

Togbɔ be wozã ga gbogbo aɖewo ɖe elektrik-ŋusẽ si wokpɔna tso yaƒoƒo kple ɣe gbɔ ŋu be yamenuto me nagaƒo ɖi o hã la, Maria van der Hoeven si nye Dukɔwo Dome Elektrik-ŋusẽ ƒe dɔdzikpɔla gblɔ be: “Elektrik-ŋusẽ agbɔsɔsɔ si wozãna egbea ganaa yamenuto me ƒoa ɖi abe ale si ko wònɔ ƒe 20 siwo va yi ene.”