Ta 3
Nusi Fiaɖuƒea Fia Na Míaƒe Anyigba La
1, 2. Aleke Fiaɖuƒea ƒe vava fia be Mawu tsɔ ɖe le eme na anyigba kple eƒe amewoe?
YESU ƒe kpɔɖeŋugbedodoɖa la yi edzi kple nya siawo be: “Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!” (Mateo 6:10) Mawu tsɔ ɖe le míaƒe anyigba kple amesiwo katã le edzi kple amesiwo nɔ edzi kpɔ la me vevie. Ema tae Fiaɖuƒea gbɔna be yeava ‘tsrɔ̃ amesiwo gblẽa anyigba la,’ be yeana ame kukuwo natsi tre, yeaɖe futɔ si nye ku ɖa eye yeawɔ míaƒe anyigba la wòanye ŋutifafanɔƒe si dzidzɔ le be ameƒomea nanɔ.—Nyaɖeɖefia 11:15, 18; 21:1, 3, 4.
2 Ekema aleke gbegbe wòle be míadi vevie be míatsɔ nya mawo ado gbe ɖae nye si be, “Wò fiaɖuƒe nava!” Esiae nye Mawu ƒe Fiaɖuƒe si le Via Aƒetɔ Yesu Kristo si me. To Fiaɖuƒea dzi la, woawɔ Yehowa si nye “Fia mavɔmavɔtɔ” la ƒe lɔlɔ̃nu le anyigba sia dzi vavã. Bu nusi ema afia na dukɔwo katã me tɔwo la ŋu kpɔ:
“ŊUTIFAFAFIA” LA LE DZI ÐUM
3, 4. (a) Nyagblɔɖinya kae Dukɔ Ƒoƒuawo tsɔ ɖo wo ɖokui dzi gake do kpo nu, eye nukatae? (b) Nuka koe ate ŋu ahe ŋutifafa mavɔ vɛ, eye to mɔ ka dzi?
3 Esi Mawu ƒe nyagblɔɖila aɖe nɔ mɔ kpɔm na Kristo ƒe Fiaɖuƒedziɖuɖua ƒe vava la, egblɔ be enye “Ŋutifafafia” eye wògblɔ kpe ɖe eŋu be, “Ne eƒe dziɖuɖu nakeke ta, eye seƒeɖo manɔe na ŋutifafa . . . o.” Nyagblɔɖila ma ke ka ɖe edzi na mí be: “Woatsɔ woƒe yiwo atu kodziwoe, eye woatsɔ woƒe akplɔwo atu hɛ gobɛwoe; dukɔ magatsɔ yi ɖe dukɔ ŋu azɔ o, eye womagasrɔ̃ aʋawɔwɔ hã azɔ o.” Togbɔ be woŋlɔ nya siawo ɖe Dukɔ Ƒoƒuawo ƒe ablɔgã dzi gli ŋu hã la, menye dukɔwo dome habɔbɔ ma si me dzrewɔwɔ mã kakɛkakɛe lae ana nyagblɔɖia nava eme o. Elabena Dukɔ Ƒoƒuawo ƒe habɔbɔa do kpo nu nublanuitɔe le ŋutifafa kple dedienɔnɔ hehe va dukɔwo dome me.—Yesaya 2:4, 9:5, 6.
4 Ŋutifafa vavãtɔ si anɔ anyi ɖaa bia be woawɔ nu dzɔdzɔe ɖe amesiame ŋu, si nye dzɔdzɔenyenye tsɔtsɔ de dɔwɔwɔ me ŋutɔŋutɔ. “Ŋutifafafia” ƒe Fiaɖuƒea koe ate ŋu ahe esia vɛ; woatsɔ ‘dzɔdzɔenyenye aɖo egɔme anyi ahali kee.’ Ẽ, Fiaɖuƒe ma dzie Mawu ato ahe ‘ŋutifafa ava anyigba dzi na dzinyuitɔwo.’—Yesaya 9:6; 32:17; Luka 2:14.
5. Nukunu kawoe Fiaɖuƒea awɔ le ŋutifafa vavãtɔ hehe vɛ me?
5 Aleke Fiaɖuƒea awɔ esiae? Awɔe wòaɖe dzesi to Mawu ƒe Fiaɖuƒea ƒe ‘vava’ to “Ŋutifafafia” la dzi wòava tsrɔ̃ xexemedukɔ siwo le aʋa wɔm la ɖa. Psalmo 46:9, 10 gblɔ na mí be: “Miva kpɔ Yehowa ƒe nuwɔwɔwo, amesi doa aƒedo anyigba, amesi tsia aʋawɔwɔwo nu vaseɖe anyigba ƒe mlɔenu ke, eflia dati, eŋea akplɔ, eye wòtɔa dzo [aʋawɔtasiaɖamwo]!” Fiaɖuƒea aɖe ʋunyaʋunyawɔnuwo katã ɖa. Gawu la, maɖe mɔ be ŋutasẽla siwo nye amewulawo kple amesiwo dɔa ame gbɔ sesẽe la nanɔ ablɔwo dzi o, elabena le Mawu ƒe Fiaɖuƒea me la, “ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.”—Psalmo 37:9-11.
KPƆÐEŊU AÐE SI NYE NYAGBLƆÐI
6. Biblia me nyagblɔɖi kae va eme le ŋutikɔkɔe me le ƒe alafa adelia D.M.Ŋ. me?
6 Biblia me nyagblɔɖi geɖe ƒo nu tso blema Israel ƒe aboyomenɔnɔ ŋu. Esime Israel-viwo subɔ Babilontɔwo ƒe 70 megbe la, woƒe ame susɔe wɔnuteƒewo trɔ yi wo denyigba dzi le ƒe 537 D.M.Ŋ. me. Le ƒe mawo katã me la, anyigba la zu aƒedo eye wònye gbegbe. Gake fifia esi Yehowa yra eƒe amewo ta la, tɔtrɔ ɖedzesiwo va. Nyagblɔɖi siwo woŋlɔ ɖi ƒe alafa geɖe do ŋgɔ la va eme le ŋutikɔkɔe me be:
“Gbegbe kple gbedadaƒo akpɔ dzidzɔ, tagba atso aseye, eye wòaƒo se abe dzogbenya ene. Woaƒo se ake, eye woatsɔ dzidzɔkpɔkpɔ kple aseyetsotso ase vivii. Woatsɔ Libanon ƒe ŋutikɔkɔe, Karmel kple Saron ƒe atsyɔ̃ nɛ. Woakpɔ Yehowa ƒe ŋutikɔkɔe kple mía Mawu ƒe atsyɔ̃.”—Yesaya 35:1, 2; kpɔ Yesaya 65:18-25; Mixa 4:4 hã.
7. Ekema nukae míate ŋu akpɔ mɔ na be ava míaƒe anyigba dzi ne Mawu ƒe Fiaɖuƒea ‘va’?
7 Ŋutinya ɖo kpe edzi be nyagblɔɖi siawo va eme nukutɔe na Mawu ƒe dukɔ si wògbugbɔ ɖo anyi la le ƒe alafa si kplɔ asiɖeɖe le wo ŋu le Babilon ɖo me. Eye ne Mawu ƒe Fiaɖuƒea ‘va’ be yeayra Mawu ƒe vi siwo katã le anyigba dzi la, ɖe wòado kpo míaƒe anyigba la dzi dzadzraɖo be wòagava nɔ paradiso ƒe nɔnɔme me akea? Ŋuɖoɖoae nye Ao! Fiaɖuƒea akpɔ egbɔ be dɔ si Mawu de asi na ame le gɔmedzedzea me be ameƒomea ‘nanye agbo ɖe anyigba dzi’ eye woawɔ edzi katã wòazu abe Eden-bɔa ene la nava eme bliboe.—Mose I, 1:28; 2:8-14; Yesaya 45:18.
ANYIGBA DZI KATÃ ƑE PARADISO
8. Nukae adzɔ ɖe nuɖuɖu kple mɔ̃memiwo dzi le Fiaɖuƒea te, eye le se ka dzi wɔwɔ ta?
8 Ne Mawu ƒe Fiaɖuƒea ‘va’ la, nuɖuɖu ƒe veve kple nuwo ƒe asi ƒe dziyiyi manɔ anyi o, elabena “bli ado kpekpekpe le anyigba dzi kple towo tame.” Mía Fofo lɔlɔ̃tɔ la agana “nuɖuɖu [natso] anyigba me. Wein doa dzidzɔ na amegbetɔ ƒe dzi, eye wònana eƒe mo zrɔ̃na lãlãlã wu ami; ke abolo doa ŋusẽ amegbetɔ ƒe dzi.” (Psalmo 72:16; 104:14, 15) Nuɖuɖu mamã be wòasu dukɔwo ƒe kuxi aɖeke manɔ anyi o, nuɖuɖu ƒe agbɔsɔsɔ aɖe ko mamã na amewo manɔ anyi o, womagaɖo fli adze mɔ̃memi o. Ŋuklẽla siwo dia viɖe le ame ŋu maganɔ anyi o. Ameƒomea katã awɔ fiasedede si gblɔ be, “Nalɔ̃ hawòvi, abe alesi nèlɔ̃a ɖokuiwò ene” la dzi eye woana nu wo nɔewo ɖe woƒe hiahiãwo nu.—Yakobo 2:8.
9. Kakaɖedzi kae le mía si be naneke mawɔ nuvevi ameƒomea ɣemaɣi o?
9 Tsɔ kpe eɖe ŋu la, míate ŋu akpɔ mɔ be Fiaɖuƒea akpɔ dzɔdzɔmefɔkuwo abe anyigbaʋuʋu kple ahom sesẽwo ƒe tutu ene gbɔ. Yesu ɖe alesi woate ŋu awɔ esiae fia esime wòna “ahom sesẽ aɖe” dzudzɔ tutu. Esia na eƒe nusrɔ̃lawo kpɔe be “ya kple ƒu gɔ̃ hã ɖoa toe.” (Marko 4:37-41) Naneke mahe nuveviewɔame, afɔku, alo gbegblẽ vɛ le anyigba la katã si dzi Mawu ƒe Fiaɖuƒea aɖu la dzi o.—Tsɔe sɔ kple Yesaya 11:6-9.
10. Nukae nukunu geɖe siwo Yesu wɔ la fia le Fiaɖuƒea ŋu?
10 Dɔnɔkɔdzi gã siwo lãmegbegblẽtɔwo kple susumedɔlélawo anɔ magahiã o. Woaɖe dzidɔ, dɔdzẽ, kple lãmetutudɔ bubuwo ɖa keŋkeŋ, elabena Atikewɔla Gã, Yesu Kristo, awɔ eƒe tafevɔsa ƒe asixɔxɔ ŋudɔ atsɔ ‘ayɔ dɔ dukɔwo.’ Nukunu geɖe siwo Yesu wɔ esime wònɔ anyigba dzi le dɔdada kple ame kukuwo fɔfɔ ɖe tsitre me la nye nusiwo wòava wɔ to eƒe Fiaɖuƒedziɖuɖu sẽŋua dzi ƒe sue aɖe ko. Woaɖe ku si ƒe dome ameƒomea nyi la gɔ̃ hã ɖa, elabena wona kakaɖedzi mí be “ku maganɔ anyi akpɔ o.”—Nyaɖeɖefia 21:4; 22:1, 2; Mateo 11:2-5; Marko 10:45; Romatɔwo 5:18, 19.
11. Le Yesu ƒe Fiaɖuƒedziɖuɖua me la, dzidzɔ kae aƒo ɖesiaɖe ta?
11 Eye dzidzɔ gã kae nye si wòanye!—yɔdowo maganɔ anyigba la dzi o, elabena woafɔ amesiwo le wo me la gɔ̃ hã ɖe tsitre. Ame “gbãtɔ” siwo woafɔ ɖe tsitre siwo nye Yesu ƒe nusrɔ̃la nuteƒewɔla 144,000 la awɔ ɖeka kplii le dziƒo eye woanye eƒe hatidziɖulawo le eƒe Fiaɖuƒea me. Yesu ƒe ŋugbedodo wɔnuku la hã ava eme be ame kuku mamle siwo “le yɔdowo me la, woase eƒe gbe; eye . . . woado go hena agbe ƒe tsitretsitsi.” Mɔnukpɔkpɔ dodzidzɔname asu amesiawo si be woakplɔ wo aɖo amegbetɔ ƒe blibodede gbɔ be woanye Fiaɖuƒea teviwo le anyigba dzi afisia.—Yohanes 5:28, 29; Nyaɖeɖefia 14:1-5; 20:4-6, 11, 12.
12. (a) Nukata nàdi be yeanɔ agbe mavɔ le paradiso me? (b) Nukae Yohanes 17:3 gblɔ be míawɔ be míate ŋu anɔ afima?
12 Ðe nèdi be yeanɔ amesiwo anɔ agbe akpɔ anyigba sia si ŋu wokɔ tso vɔ̃ɖinyenye ɖesiaɖe me eye wotrɔe wòzu paradiso si me dzidzɔ le la domea? Ðe nèdi be yeanɔ afisia ado dzaa na ame kuku siwo woafɔ ɖe tsitre laa? Ðe nàdi be yeanɔ agbe tegbee le anyigba si ŋu wokɔ—afisi ame aɖeke matsi agbɔdzɔ alo dzidzɔ si agbenɔŋkeke ɖesiaɖe ahe vɛ mati ame le o la dzia? Àte ŋui ne èwɔ ɖe Mawu ƒe nudidi siwo ana nàkpɔ agbe la dzi. Yesu na eme kɔ ƒã esime wògblɔ le gbedodoɖa na Fofoa me be: “Esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.” (Yohanes 17:3) Mɔnukpɔkpɔ ka gbegbee nye si wòanye be nànɔ agbe mavɔ le paradiso me, esime “sidzedze Yehowa ƒe ŋutikɔkɔe ayɔ anyigba dzi taŋ, abe alesi tsi yɔ atsiaƒui ene”!—Xabakuk 2:14.
“MÍAƑE NUÐUÐU, SI ASU MÍA NU EGBE”
13. Nukata míatsɔ kakaɖedzi ado gbe ɖa abia “míaƒe nuɖuɖu, si asu mía nu egbe”?
13 Gake mí amesiwo li egbea míetsia dzi ɖe míaƒe fifi nuhiahiãwo ŋu vevie. Mía ɖokui kple míaƒe ƒomewo dzi kpɔkpɔ va sesẽ na mía dometɔ geɖe ŋutɔ. Eyata menye ɖeko míado gbe ɖa abia be Fofo la nato eƒe Fiaɖuƒea ƒe vava me akɔ eƒe ŋkɔ gã la ŋuti eye wòana woawɔ eƒe lɔlɔ̃nu le anyigba dzi ko o; ke ele hã be míado gbe ɖa na Mawu abia míaƒe gbesiagbenuhiahiãwo, abia “míaƒe nuɖuɖu, si asu mía nu egbe.” Míate ŋu awɔ esia kple kakaɖedzi blibo be ne míedze agbagba nɔ agbe ɖe Mawu ƒe gɔmeɖose dzɔdzɔeawo nu eye míetsɔ Fiaɖuƒea ƒe nuwo ɖo nɔƒe gbãtɔ le míaƒe agbe me la, Mawu si nye Nunala Gã la awɔ eƒe akpa dzi. Ðeko wòle abe alesi Yesu yi edzi gblɔ na mí ene be: “Migaɖe fu na mia ɖokui agblɔ bena: Nuka míaɖu, nuka míano, alo nuka míatsɔ ata mahã o. Elabena nenem nusiawo katã tɔgbe trɔ̃subɔlawo dina; ke mia Fofo, si le dziƒo la, nyae bena, nenem nusiawo katã hiãa mi. Midi mawufiaɖuƒe la kple eƒe dzɔdzɔenyenye gbãgbiagbã, eye woatsɔ nusiawo katã akpe ɖe eŋuti na mi.”—Mateo 6:11, 31-33.
‘TSƆ MÍAƑE VODADAWO KE MÍ’
14, 15. (a) Ne míetsɔ nya siwo le Mateo 6:12 do gbe ɖae la, nukae míanɔ klalo be míawɔ? (b) Kpɔɖeŋu nyui kawoe wòle be míasrɔ̃ le esia gome?
14 Le mía kple mía Fofoa dome ƒomedodo kplikplikpli tutuɖo me la, ele be míatsɔ ɖokuibɔbɔ alɔ̃ ɖe alesi gbegbe míenyi fe le eŋui dzi eye míalɔ̃ ɖe vo si míedana ɖe Mawu kple mía havi amegbetɔwo ŋu hã dzi. Eyata esɔ be míado gbe ɖa na Mawu be: “Natsɔ míaƒe vodadawo ake mí, sigbe alesi míawo hã míetsɔna kea amesiwo daa vo ɖe mía ŋuti la ene!”—Mateo 6:12.
15 Dɔmenyo gã si míedze na koŋ o si Mawu wɔ na mí amegbetɔwoe nye be, edɔ Via Yesu ɖe xexeame be wòatsɔ “eƒe agbe la ana ɖe ame geɖewo ƒe xɔxɔ ta.” Esia dzie woanɔ te ɖo atsɔ míaƒe nuvɔ̃wo ake mí. (Mateo 20:28) Aleke gbegbe Mawu ƒe dɔmenyo na ameƒome si me tɔwo nye nuvɔ̃mewo la loloe nye si! Nusi le be wòaʋã mí be míaŋe aɖaba aƒu mía havi amegbetɔwo ƒe gbɔdzɔgbɔdzɔwo dzi kae nye si! Ele be míalɔ̃ be míawɔ nu wòayi ŋgɔ wu ema gɔ̃ hã: míatsɔ nuvɔ̃ gã siwo woawɔ ɖe mía ŋu gɔ̃ hã ake. Le mɔ sia nu la, míate ŋu aɖe lɔlɔ̃ deto ma si Yesu gblɔ be ade dzesi Kristotɔ vavãtɔwo la afia ame bubuwo.—Yohanes 13:35; Kolosetɔwo 3:13; Petro I, 1:22.
“ÐE MÍ TSO VƆ̃ÐITƆ LA SI ME”
16, 17. (a) Aleke míase nya siwo nye, “Megakplɔ mí yi tetekpɔ me o” gɔmee? (b) Aleke míawɔ nu wòasɔ kple gbedodoɖa be ‘woaɖe mí tso vɔ̃ɖitɔ la si me’?
16 Mlɔeba la, Yesu fia mí be míado gbe ɖa na Mawu be: “Megakplɔ mí yi ɖe tetekpɔ me o; ke ɖe mí tso vɔ̃ɖitɔ la si me!” (Mateo 6:13) Migana míasusu be Mawu tea mí kpɔna be míadze anyi o. Ke boŋ Satana, vɔ̃ɖitɔ si dze aglã ɖe Mawu ŋu lae di be yeahe mí ɖa le Mawu ŋu.
17 Gake Fofo la dzraa mí ɖo be ‘míate ŋu anɔ te ɖe Abosam ƒe aɖaŋu vɔ̃wo nu,’ ẽ, be míawɔ aʋa dzidzedzetɔe kple eya kpakple gbɔgbɔ vɔ̃ siwo dzi ɖum wòle. Mawu na gbɔgbɔmeʋawɔnu blibo si míado la mí be womagahe mí ‘ayi tetekpɔ me’ o. Apostolo Paulo ƒo nu tso eŋu le Efesotɔwo 6:10-18. Ne míenɔ te sesĩe le aʋawɔnu si Mawu na mí la zazã me hedo gbe ɖa ɣeawokatãɣi la, Fofo la akpɔ egbɔ be ‘womakplɔ mí ayi tetekpɔ me o,’ ke boŋ ‘woaɖe mí tso vɔ̃ɖitɔ la si me.’—Petro I, 5:6-9.
18. Le ye katã me la, nya kawoe le Kpɔɖeŋugbedodoɖa la me?
18 Neva eme kpuie be Yehowa ƒe ŋkɔ nyui la ŋuti nakɔ to ‘eƒe Fiaɖuƒea ƒe vava’ me. Eƒe lɔlɔ̃nu neva eme le anyigba dzi to vɔ̃ɖinyenye ɖesiaɖe ɖeɖeɖa kple anyigba sia katã wɔwɔ wòazu paradiso si ahe kafukafu vɛ nɛ me. Zi alesi fifi nuɖoanyi vɔ̃ɖi la gakpɔtɔ li la, míaƒe Dziƒofofo lɔlɔ̃tɔ la nena míaƒe agbemenuhiahiãwo mí eye nekpe ɖe mía ŋu be ƒomedodo nyui nanɔ mía kple ame bubuwo dome eye wòaɖe mí tso Satana si me. Esiawoe nye nusiwo Yesu fia mí be míado gbe ɖa abia. Wo katã le eƒe kpɔɖeŋugbedodoɖa la me.
[Aɖaka si le axa 25]
NUSI MAWU ƑE FIAÐUƑEA AWƆ
● Aʋli Yehowa ƒe fianyenye ta, ahe Satana ƒe dziɖuɖu ava nuwuwui.
● Aɖe alakpasubɔsubɔ kple dziɖula ŋutasẽlawo ɖa le anyigba dzi.
● Ahe Kristo “Ŋutifafafia” la ƒe dziɖuɖu vɛ.
● Ana anyigba katã nazu paradiso dzeani aɖe.
● Aɖe aƒe si me woanɔ, nuɖuɖu, kple mɔ̃memi ƒe veve ɖa.
● Atu hadomegbenɔnɔ ɖe lɔlɔ̃ na amehavi dzi.
● Aɖu anyigba ƒe dzɔdzɔmeŋusẽwo dzi, axe mɔ ɖe afɔkuwo nu.
● Aɖe nuteɖeamedzi, dzimaɖitsitsi, vevesese, kple amegãkuku ɖa.
● Aɖe futɔ siwo nye ku, dɔléle, kple blanuiléle katã ɖa.
● Afɔ ame kuku biliɔn geɖe ɖe tsitre be woanɔ agbe tegbee le anyigba dzi.