Ta 23

Egawɔ Nukunu Bubuwo le Kapernaum

ESI Yesu yɔ eƒe nusrɔ̃lawo gbãtɔ eneawo—Petro, Andrea, Yakobo, kple Yohanes—vɔ ƒe Sabat si kplɔe ɖo dzi la, wo katã woyi wo gbɔ ƒuƒoƒexɔ si le Kapernaum la me. Yesu dze nufiafia gɔme le afima, eye ewɔ yaa na amewo elabena ele nu fiam wo abe amesi si ŋusẽ le ene ke menye abe agbalẽfialawo ene o.

Ŋutsu aɖe si me gbɔgbɔ vɔ̃ le la nɔ anyi le Sabat sia dzi. Le ɣeyiɣi aɖe megbe la, edo ɣli sesĩe be: “Nya kae le mía kple wò dome, wò Yesu Nazaretetɔ? Ðe nèva mía tsrɔ̃ ge mahã? Menya amesi nènye, Mawu ƒe kɔkɔetɔ la nènye.”

Le nyateƒe me la, gbɔgbɔ vɔ̃ si kpɔ ŋusẽ ɖe amea dzi la nye Satana ƒe dɔla. Le mokaka na gbɔgbɔ vɔ̃a me la, Yesu gblɔ be: “Mia wò nu, eye nado go le eme”!

Gbɔgbɔ vɔ̃a nyamae eye wòna wòku ƒenyi hedo ɣli sesĩe alesi wòate ŋui. Gake edo go le eme eye mewɔ nuvevii o. Ðeko amesiame ƒe mo wɔ yaa! Wobia be: “Nuka enye esia? . . . Etsɔ ŋusẽ dea se na gbɔgbɔ makɔmakɔwo, eye woɖoa toe.” Nusia ŋu nya kaka ɖe afima nutowo katã me.

Esi Yesu kple eƒe nusrɔ̃lawo dzo le ƒuƒoƒea la, woyi Simon, alo Petro, ƒe aƒe me. Petro lɔ̃xo nɔ ŋudza lém vevie le aƒea me. Woɖe kuku be: ‘Mieɖe kuku da gbe le eŋu.’ Eyata Yesu lé eƒe alɔnu hefɔe ɖe tsitre. Eƒe lãme kɔ enumake eye wòdze nuɖaɖa gɔme na wo!

Emegbe esi ɣe ɖo to la, amewo tso afima nutowo katã me nɔ Petro ƒe aƒe me vam kple woƒe dɔnɔwo. Le ɣeyiɣi kpui aɖe ko me la, du bliboa katã ƒo ƒu ɖe ʋɔtrua nu! Eye Yesu da gbe le woƒe dɔnɔwo ŋu, eɖanye dɔ ka lém wole o. Ena amesiwo me gbɔgbɔ vɔ̃wo le hã vo tso wo si me. Ne gbɔgbɔ vɔ̃ siwo wonyã la le go dom la, wodoa ɣli be: “Wòe nye Mawu ƒe Vi la.” Gake Yesu kaa mo na wo eye meɖea mɔ na wo be woaƒo nu o elabena wonya be eyae nye Kristo la. Marko 1:21-34; Luka 4:31-41; Mateo 8:14-17.

▪ Nukae dzɔ le ƒuƒoƒea le Sabat si kplɔ ɣeyiɣi si Yesu yɔ eƒe nusrɔ̃la eneawo ɖo la dzi?

▪ Esi Yesu dzo le ƒuƒoƒea la, afikae wòyi, eye nukunu kae wòwɔ le afima?

▪ Nukae dzɔ emegbe le fiẽ ma ke me?