Ðe Woate Ŋu Aka Ðe Agbalẽ Sia Dzia?
“Mekpɔ nyateƒetotodzesi siwo ŋu kakaɖedzi le le Biblia ŋu wu xexeme ŋutinyagbalẽ ɖesiaɖe.”—Aƒetɔ Isaac Newton, Eŋlisi dzɔdzɔmeŋutinunyala xɔŋkɔ.1
ÐE WOATE ŋu aka ɖe agbalẽ sia—Biblia —dzia? Ðe wòƒo nu tso amesiwo nɔ anyi ŋutɔŋutɔ kpɔ, teƒe siwo nɔ anyi nyateƒe, kple nusiwo dzɔ kpɔ vavã ŋua? Ne eƒo nu tso wo ŋu nenema la, ke ele be kpeɖodziwo nanɔ anyi be nuŋlɔla ɖɔŋuɖo siwo ɖia anukware ye ŋlɔe. Woƒe kpeɖodziwo li. Wokpɔ geɖe le tome, eye bubu geɖe le agbalẽa ŋutɔ me.
Kpeɖodziawo Kuku le Tome
Asinudɔwɔwɔ siwo ŋu woke ɖo le tome le Biblia-nyigbawo dzi ɖo kpe edzi be nya siwo Biblia gblɔ le ŋutinya kple anyigbaŋutinunya me sɔ pɛpɛpɛ. Bu kpeɖodzi siwo blemanukulawo ku la dometɔ aɖewo ŋu kpɔ.
Biblia xlẽlawo nya Dawid, ɖekakpui si nye alẽkplɔla si ƒo dzi nɔ si va zu Israel-fia, nyuie. Eƒe ŋkɔ dze zi gbɔ zi 1,138 le Biblia me, eye nyagbɔgblɔ “Dawid ƒe Aƒe”—si zi geɖe fiaa eƒe fiaƒomea—dze zi gbɔ zi 25. (Samuel I, 16:13; 20:16, NW) Gake vaseɖe nyitsɔ laa la, kpeɖodzi gobi aɖeke medze le afi bubu aɖeke be Dawid nɔ anyi kpɔ tsɔ kpe ɖe esiwo le Biblia me ŋu o. Glimeme aɖe koe Dawid nyea?
Le ƒe 1993 me la, blemanukulawo ƒe ha aɖe si Nufialagã Avraham Biran nɔ ŋgɔ na la fɔ nu ɖedzesi aɖe, si ŋu nya wogblɔ ɖe Israel Exploration Journal me. Wofɔ kpe yibɔ aɖe le afisi nye kpo aɖe si nɔ anyi le blema, si woyɔna be Tel Dan, si le Israel ƒe dziehenutomekpa dzi. Woɖe nuŋɔŋlɔ si nye “Dawid ƒe Aƒe” kple “Israel Fia” ɖe kpea dzi.2 Wogblɔ be nuŋɔŋlɔ sia si wobui be ƒe alafa asiekelia D.M.Ŋ. mee woŋlɔe la nye aʋadziɖuŋkuɖodzikpe si Aramtɔwo—Israel ƒe futɔ siwo nɔ ɣedzeƒekpa dzi—tu la ƒe akpa aɖe. Nukatae blemanuŋɔŋlɔ sia le vevie alea gbegbe?
Biblical Archaeology Review (Biblia ƒe Blemanuwo Kuku Ŋuti Numetoto) nɔ te ɖe Nufialagã Biran, kple eƒe dɔwɔhati Nufialagã Joseph Naveh, ƒe nyatakaka aɖe dzi gblɔ be: “Le Biblia megbe la, esiae nye zi gbãtɔ si wokpɔ ŋkɔ Dawid le blemanuŋɔŋlɔ aɖe me kpɔ.”3a Nu bubu aɖe hã ɖe dzesi le nuŋɔŋlɔa ŋu. Woŋlɔ nyagbɔgblɔ “Dawid ƒe Aƒe” nya ɖekae. Gbegbɔgblɔŋutinunyala bibi Nufialagã Anson Rainey ɖe nu me be: “Zi geɖe la, womedea . . . nyamemãnu eme o, vevietɔ ne nya siwo woŋlɔ ɖekae la nye ŋkɔ ɖedzesi si wonya nyuie. Ðikekemanɔmee la, ‘Dawid ƒe Aƒe’ la nye ŋkɔ ɖedzesi si wonya nyuie le dunyahehe kple anyigbaŋutinunya me le ƒe alafa asiekelia D.M.Ŋ. ƒe domedome.”5 Eyata edze ƒã be blematɔwo nya Fia Dawid kple eƒe fiaƒomea nyuie.
Ðe Niniwe—Asiria-dugã si woyɔ le Biblia me—nɔ anyi kpɔ ŋutɔŋutɔa? Va ɖo nyitsɔ laa le ƒe alafa 19 lia me la, Biblia ŋuti nyahela aɖewo mexɔe se nenema o. Gake le ƒe 1849 me la, Aƒetɔ Austen Henry Layard ku Fia Sanxerib ƒe fiasã la ƒe xɔdowo le Kuyunjik, si le teƒe si nye blema Niniwe-du la ƒe akpa aɖe. Ðeko ɖoɖoe zi kplo le nyahelawo nu le nya ma ŋu. Gake wogake ɖe nu bubuwo ŋu le xɔdo mawo me. Wota alesi woxɔ du aɖe si ŋu wotu dutakpɔnu gbogbo aɖewo ɖo lae, eye aboyomewo le fli me va yina le fia si si wo la ŋgɔ ɖe amedzroxɔƒexɔ aɖe si ta wokpɔ nyuie la ƒe gli ŋu. Nuŋɔŋlɔ si dze le fia la tamee nye si: “Sanxerib, xexeame katã ƒe fia, Asiria-fia, si bɔbɔ nɔ nîmedu fiazikpui dzi eye wòlé ŋku ɖe aboyonu (siwo wolɔ le) Laxis (La-ki-su) la ŋu.”6
Nutata sia kple nuŋɔŋlɔ si kpe ɖe eŋu, si woate ŋu akpɔ le Britaintɔwo ƒe Blemanudzraɖoƒe, wɔ ɖeka kple Biblia ƒe nuŋlɔɖi si le Fiawo II, 18:13, 14, le Sanxerib ƒe Yudea-du si nye Laxis sisi ŋu. Layard ŋlɔ tsɔ ƒo nu tso nufɔfɔ sia ƒe vevienyenye ŋu be: “Amekae axɔe ase do ŋgɔ na nufɔfɔ siawo be ate ŋu anye nyateƒe alo ate ŋu adzɔ be le anyigba la ƒe tume alo le afisi Niniwe nɔ kpɔ ƒe dudoa te la, woake ɖe Xizkiya [Yuda-fia] kple Sanxerib dome ʋawo ƒe ŋutinya, siwo woŋlɔ le ɣeyiɣi siwo me tututu Sanxerib ŋutɔ wɔ aʋaawo le me, eye woaɖo kpe Biblia ƒe nuŋlɔɖia me nya suesuewo ke hã dzi?”7
Blemanukulawo ku asinudɔwɔwɔ bubu geɖe—zewo, xɔdowo, anyikpememewo, gakuwo, nuŋɔŋlɔwo, ŋkuɖodzikpewo, nusiwo woŋlɔ ɖe nuwo dzi—siwo ɖo kpe Biblia ƒe nyawo ƒe sɔsɔ pɛpɛpɛ dzi. Tomekulawo ku Kaldea-du si nye Ur, afisi nye asitsadu kple mawusubɔƒe si Abraham nɔ kpɔ.8 (Mose I, 11:27-31) Nabonidus ƒe Ŋutinya Kpememe, si ŋu woke ɖo le tome le ƒe alafa 19 lia me, gblɔ alesi Babilon ge ɖe Kores Gãtɔ si me le ƒe 539 D.M.Ŋ., si nye nudzɔdzɔ si wogblɔ le Daniel ta 5 lia me, la ŋu nya.9 Wofɔ nuŋɔŋlɔ aɖe (si ƒe kakɛwo wodzra ɖo ɖe Britaintɔwo ƒe Blemanudzraɖoƒe) le blemadu si nye Tesalonika ƒe agbo si tame woxa gobaa la ŋu si dzi woŋlɔ amesiwo woyɔ be “dua me dziɖulawo” ƒe ŋkɔwo ɖo, evɔ ŋkɔ sia medze le Helatɔwo ƒe blemanuŋɔŋlɔwo me o gake Biblia-ŋlɔla Luka ya zãe.10 (Dɔwɔwɔwo 17:6, NW, etenuŋɔŋlɔ) Nufɔfɔ sia ʋli Luka ƒe nyawo ƒe nyateƒenyenye ta—abe alesi woʋli eta le nya bubuwo mee ene.—Tsɔe sɔ kple Luka 1:3.
Gake menye ɣesiaɣie blemanukulawo lɔ̃na ɖe nya ɖeka dzi na wo nɔewo o, kaka wòanye be woayi lɔlɔ̃ ge ɖe Biblia tɔ dzi o. Togbɔ be ele nenema hã la, kpeɖodzi sẽŋuwo le Biblia ŋutɔ me si fia be enye agbalẽ si dzi woate ŋu aka ɖo.
Woŋlɔe Nanekemaɣlamaɣlae
Menye aʋadziɖuɖuwo (abe nusi woŋlɔ tso Sanxerib ƒe Laxis sisi ŋu ene) koe ŋutinyaŋlɔla siwo ɖia anukware aŋlɔ o ke woaŋlɔe ne woɖu wo dzi hã, menye dzidzedze siwo wokpɔ ko o ke nusiwo me wodo kpo nu le hã, menye woƒe ŋusẽ ko o ke woƒe gbɔdzɔgbɔdzɔwo hã. Xexeme ŋutinya ʋee aɖewo me koe anukwareɖiɖi sia tɔgbe dzena le.
Daniel D. Luckenbill gblɔ tso Asiriatɔwo ƒe ŋutinyaŋlɔlawo ŋu be: “Edzena zi geɖe be le ɖokuidodoɖedzi ta fiawo biana be woagblɔ nya aɖewo gake woagblẽ bubuwo ɖi le ŋutinya me nyawo ƒe nyateƒenyenye me.”11 ‘Fiawo ƒe ɖokuidodoɖedzi’ sia ƒe kpɔɖeŋu aɖee nye alesi Asiria Fia Ashurnasirpal do eɖokui ɖe dzii le eƒe ŋutinya me nuŋlɔɖiwo me be: “Fia xɔŋkɔe menye, ame ŋkutae menye, amesi ƒe ŋkɔ de dzie menye, ŋusẽtɔe menye, bubumee menye, ŋutikɔkɔemee menye, ame ɖedzesi ƒe ame ɖedzesie menye, ame triakɔe menye, kalẽtɔe menye, dzata ƒe kalẽe mewɔna, eye ame makpedziae menye!”12 Ðe nàxɔ nusianu si nàxlẽ le ŋutinyagbalẽ siawo tɔgbe me be enye nyateƒea?
Gake Biblia-ŋlɔlawo ya ɖe nyateƒetoto wɔdɔɖeamedzi fia. Mose, Israel-viwo kplɔla, gblɔ nɔvia Aron, kple nɔvianyɔnu Miriam, tɔgãayɔvi Nadab kple Abihu, kple eƒe dukɔa ƒe gbɔdzɔgbɔdzɔwo, kpakple eya ŋutɔ ƒe vodadawo anukwaretɔe. (Mose II, 14:11, 12; 32:1-6; Mose III, 10:1, 2; Mose IV, 12:1-3; 20:9-12; 27:12-14) Womeɣla Fia Dawid ƒe agɔdzedze gãwo o ke boŋ woŋlɔ wo ɖi—eye woŋlɔ wo esime Dawid ganɔ dzi ɖum. (Samuel II, ta 11 kple 24) Mateo, Biblia-ŋlɔla si ƒe agbalẽ wotsɔ eƒe ŋkɔa na, gblɔ alesi apostoloawo (si dometɔ ɖekae eya ŋutɔ hã nye) he nya le woawo ŋutɔ ƒe gãnyenye ŋu kple alesi wogblẽ Yesu ɖi le zã si me wolée ŋu nya. (Mateo 20:20-24; 26:56) Kristotɔwo ƒe Hela Ŋɔŋlɔawo ŋlɔlawo gblɔ kuxi siwo nɔ wo ŋu nanekemaɣlamaɣlae, esiwo ƒe ɖewoe nye gbɔdɔdɔ ƒe agbegbegblẽnɔnɔ kple masɔmasɔ siwo nɔ Kristo-hame gbãtɔ aɖewo me. Eye womeƒo xlã nya la le kuxi mawo gbɔgblɔ me o.—Korintotɔwo I, 1:10-13; 5:1-13.
Nyawo ŋɔŋlɔ ɖi anukwaretɔe nanekemaɣlamaɣlae alea fia be wotsɔ ɖe le nuwo ƒe nyateƒenyenye me. Esi Biblia-ŋlɔlawo lɔ̃ faa be yewoagblɔ nya siwo maƒo nu nyui tso yewoƒe lɔlɔ̃tɔwo, yewoƒe dukɔ, kple yewo ŋutɔ gɔ̃ hã ŋu o la, ɖe mesɔ be míaka ɖe woƒe nuŋɔŋlɔwo dzi oa?
Emenya Suesuewo De Pɛpɛpɛ
Le ʋɔnudrɔ̃ƒewo ƒe nyadɔdrɔ̃ me la, zi geɖe wote ŋu nɔa te ɖe numeɖeɖe suesue siwo ɖasefowo gblɔ dzi nyana ne nyateƒe tom wole. Ne nya si wogblɔ le numeɖeɖe suesue mawo me sɔ kple wo nɔewo la, ate ŋu anye kpeɖodzi be ɖaseɖiɖia de pɛpɛpɛ eye wònye nyateƒe, gake ne vovototo gãwo le wo me la, ate ŋu aɖee afia be nyakpakpae. Gake ne wogatrɔ asi le nyaawo ŋu gblɔ wògbɔ eme—ale be numeɖeɖe suesue ɖesiaɖe sɔ ɖe nɔvia nu pɛpɛpɛ—hã la, eya hã ate ŋu afia be aʋatso kam wole.
Aleke Biblia-ŋlɔlawo ƒe “ɖaseɖiɖi” le le esia me? Ðekawɔwɔ ɖedzesi dze le Biblia-ŋlɔlawo ƒe nyawo me. Wowɔ ɖeka kple wo nɔewo ale gbegbe le nya suesuewo gɔ̃ hã me. Gake menye ɖe wobua gblɔ nyawo aɖaŋutɔe o, esi hã ate ŋu ana woabu nazã ɖe eŋu alo woatsɔe be nue wònye wobla. Edze ƒã le eme be menye nuɖowɔ ye nyadogoɖenyanu siwo le eme nye o, zi geɖe la, ɖeko eŋlɔlawo ƒe nyawo wɔa ɖeka kple wo nɔewo tɔ si menye ɖe woɖoe ŋlɔ nenema o. Kpɔ eƒe kpɔɖeŋu aɖewo ɖa.
Biblia-ŋlɔla Mateo ŋlɔ be: “Esi Yesu va Petro ƒe me la, ekpɔ lɔ̃xoa le anyimlɔƒe, le ŋudza lém.” (Mateo 8:14, míawoe te gbe ɖe edzi.) Le afisia Mateo gblɔ numeɖeɖe sue nyui aɖe si mehiã hafi o: be srɔ̃tɔe Petro nye. Paulo lɔ̃ ɖe nya sue sia dzi, esi wòŋlɔ be: “Alo ɖe míekpɔ ŋusẽ bena, míakplɔ nɔvinyɔnu, si anye mía srɔ̃ la, anɔ nugbe yim, abe alesi apostolo bubuawo . . . kpakple Kefa hã wɔna ene oa?”b (Korintotɔwo I, 9:5) Nya si ŋu wonɔ nu ƒom tsoe le nya sia me fia be ɖe Paulo nɔ eɖokui ta ʋlim le nya siwo wonɔ hehem ɖe eŋu madzemadzee me. (Korintotɔwo I, 9:1-4) Edze ƒã be menye ɖe Paulo gblɔ numeɖeɖe sue sia—Petro ƒe srɔ̃ɖeɖea—be yeatsɔ aɖo kpe Mateo ƒe nuŋlɔɖia ƒe dede pɛpɛpɛ dzi o ke ɖeko nya eveawo do go ɖe wo nɔewo nu.
Nyanyuia ŋlɔla eneawo katã—Mateo, Marko, Luka, kple Yohanes—ŋlɔe be le zã si me wolé Yesu la, eƒe nusrɔ̃lawo dometɔ ɖeka ɖe yi ɖe nunɔlagã la ƒe dɔla dzi kpa eƒe to. Yohanes ƒe Nyanyuia koe gblɔ numeɖeɖe aɖe si dze abe ɖe mehiã hafi o ene be: “Dɔla ma ƒe ŋkɔe nye Malxo.” (Yohanes 18:10, 26) Nukata wònye Yohanes koe yɔ amea ƒe ŋkɔ? Wogblɔ numeɖeɖe kpui aɖe si megadze le teƒe bubu aɖeke o le kpukpui siwo le ŋgɔgbe vie me be: Yohanes “enye nunɔlagã la ƒe ame nyanyɛ.” Nunɔlagã la ƒemetɔwo hã nyae; eƒe dɔlawo nyae, eye eya hã nya wo. (Yohanes 18:15, 16) Eyata esɔ be Yohanes nayɔ amesi ŋu wode abiae la ŋkɔ, gake Nyanyuia ŋlɔla bubu siwo wònye amedzro na la ya meŋlɔe o.
Ɣeaɖewoɣi numeɖeɖe tsitotsito siwo wogblẽ ɖi le nudzɔdzɔ aɖe me la gena ɖe nya siwo wogblɔ le afi bubu me. Le kpɔɖeŋu me, Mateo ƒe nuŋlɔɖi le ʋɔnudɔdrɔ̃ Yesu le Yudatɔwo ƒe Sanhedrin la ŋkume ŋu gblɔ be amesiwo nɔ afima ‘ƒo tome nɛ le gbɔgblɔm bena: Kristo, amekae ƒo wò? Gblɔe fia mí.’ (Mateo 26:67, 68) Nukata woabia Yesu be ‘wòagblɔ’ amesi ƒo tome nɛ ‘afia’ yewo, esi tomeƒola la tsi tre ɖe eŋkume tututu? Mateo meɖe eme o. Gake Nyanyuiawo ŋlɔla bubu eve gblɔ numeɖeɖe si menɔ eme o la: Yesu yometilawo tsyɔ nu mo nɛ hafi ƒo tome nɛ. (Marko 14:65; Luka 22:64) Mateo ŋlɔ eƒe nuŋlɔɖia eye metsi dzi ɖe numeɖeɖe suesue ɖesiaɖe gbɔgblɔ ŋu o.
Yohanes ƒe Nyanyuia gblɔ be ɣeaɖeɣi ameha gã aɖe ƒo ƒu be yewoase Yesu ƒe nufiafia. Nuŋlɔɖia gblɔ be esi Yesu kpɔ amehawo la, “egblɔ na Filipo bena: Afika míaƒle abolo le, bena amesiawo naɖu mahã?” (Yohanes 6:5, míawoe te gbe ɖe edzi.) Nukata wònye le Yesu ƒe nusrɔ̃lawo dome Filipo koe wòbia afisi woakpɔ abolo le aƒle? Nuŋlɔla la megblɔe na mí o. Gake le nuŋlɔɖi si ɖi ema me la, Luka gblɔ be nya la dzɔ le teƒe si tsɔ ɖe Betsaida, si nye du si nɔ Galilea ƒe dzieheƒuta gbɔ, la me, eye Yohanes ƒe Nyanyuia gblɔ do ŋgɔ be “Filipo tso Betsaida.” (Yohanes 1:44; Luka 9:10) Eyata susu le eme be Yesu bia amesi wo de gogo afima. Ðekawɔwɔ si le numeɖeɖeawo me ɖe dzesi, gake edze kɔte be menye ɖe woɖo ŋlɔ nua be wòadze nenema o.
Le go aɖewo me la, ɖeko numeɖeɖe suesue aɖewo gbegblẽ ɖi na be wòle bɔbɔe be woaka ɖe Biblia dzi. Le kpɔɖeŋu me, Fiawo ƒe Agbalẽ Gbãtɔ ŋlɔla gblɔ na mí be ku sesẽ aɖe ɖi le Israel kpɔ. Enu sẽ ale gbegbe be fia mete ŋu kpɔ tsi kple gbe na eƒe sɔwo kple tedzisɔwo ne wòaxɔ wo ɖe agbe o. (Fiawo I, 17:7; 18:5) Gake le ŋutinya ma ke me la, wogblɔ na mí be nyagblɔɖila Eliya dɔ wodu tsi gbogbo aɖe vɛ nɛ le Karmel To dzi (be woazã le vɔsasa me) eye tsia yɔ ʋe si woɖe wòxɔ teƒe si ƒe lolome ɖewohĩ woate ŋu akpɔ meta siwo le dzogoe ene me ɖekaɖeka 1,000 le wòyɔ gbagba. (Fiawo I, 18:33-35) Afikae wokpɔ tsi gbogbo sia tsoe le kuɖiɖia me? Fiawo ƒe Agbalẽ Gbãtɔa ŋlɔla metsɔ nya ma me ɖeɖe ɖe fu na eɖokui o. Gake amesiame si nɔ Israel la nya be Mediterranea Ƒua nue Karmel nɔ, abe alesi nya aɖe si wogblɔ emegbe wòdo go ɖe enu ɖee fiae ene. (Fiawo I, 18:43) Eyata woate ŋu akpɔ atsiaƒutsi bɔbɔe. Ne nyakpakpae agbalẽ sia si ɖe nuwo me tsitotsito nye eye wòdi be yeagblɔ nuwo wòadze abe nyateƒe ene la, ke nukatae eŋlɔla si anye nyakpala dzeaye agblẽ nusia si dze ƒã be egɔme manya se o ya ɖi le eƒe nuŋɔŋlɔa me?
Eyata ɖe míate ŋu aka ɖe Biblia dzia? Asinudɔwɔwɔ siwo blemanukulawo ku sɔ gbɔ be woaɖo kpe edzi be amesiwo nɔ anyi ŋutɔŋutɔ, teƒe siwo nɔ anyi kpɔ nyateƒe, kple nusiwo dzɔ vavã ŋue Biblia ƒo nu tsoe. Gake esi gawɔ dɔ ɖe ame dzi wue nye kpeɖodzi siwo le Biblia ŋutɔ me. Nuŋlɔɖila ɖianukwarewo meɖe ame aɖeke—woawo ŋutɔ meɖe wo ɖokui gɔ̃ hã le eme o—le nusiwo tututu dzɔ ŋɔŋlɔ me o. Ðekawɔwɔ si le nuŋɔŋlɔawo me, siwo me nyadogoɖenyanu siwo menye ɖe wobua ŋlɔ wo nenema o hã le, nye “ɖaseɖiɖi” si me kɔ ƒã be nyateƒe matrɔmatrɔe emenyawo nye. Esi “nyateƒetotodzesi siwo ŋu kakaɖedzi le” alea le Biblia ŋu ta la, enye agbalẽ si dzi nàte ŋu aka ɖo vavã.
[Etenuŋɔŋlɔwo]
a Esi wofɔ nu ma vɔ megbe la, Nufialagã André Lemaire gblɔ be Mesha nuŋlɔɖikpe (si wogayɔna hã be Moabitɔwo ƒe Kpe) si wofɔ le ƒe 1868 me dzi nuŋɔŋlɔ ƒe akpa gbegblẽ aɖe si woɖɔ ɖo ɖee fia be woƒo nu tso “Dawid ƒe Aƒe” ŋu le eya hã dzi.4
b “Kefa” ye nye alesi woyɔna na “Petro” le Hebrigbe me.—Yohanes 1:42.
[Nɔnɔmetata si le axa 15]
Tel Dan ƒe nuŋlɔkpe kakɛ la
[Nɔnɔmetata si le axa 16, 17]
Asiriatɔwo ƒe gliŋutinutata si fia alesi wosi Laxis, si ŋu nya wogblɔ le Fiawo II, 18:13, 14