Dzeɖoɖo to Lɛtaŋɔŋlɔ Dzi
LƐTAWO na ame miliɔn nanewo te ŋu ɖɔ woƒe agbe kple nuwɔna ɖo. Le gɔmedzedzea me la, lɛtawoe Kristotɔwo ƒe Hela Ŋɔŋlɔawo ƒe akpa gãtɔ nye. Egbea míate ŋu aŋlɔ lɛta be míatu haxɔsetɔ yeyewo ɖo, ado ka kple xɔlɔ̃wo, ade dzi ƒo na nɔvi siwo le dɔdasi tɔxɛwo wɔm, ado ŋusẽ amesiwo le xaxa me, aɖo nyatakaka ɖe teƒeteƒewo ne woatsɔ akpɔ hamea ƒe dɔ vovovowo gbɔe.—Tes. I, 1:1-7; 5:27; Pet. II, 3:1, 2.
Lɛtaŋɔŋlɔ ganye mɔ si dzi míetona ɖia ɖase dzidzedzetɔe hã. Le teƒe aɖewo la, ame geɖe nɔa aƒe siwo ŋu wodzɔna vevie me alo va tsia amedzrodzeƒewo ɣeyiɣi didi aɖe le kɔƒe kple teƒe bubu siwo wòsesẽ be woaɖi ɖase le. Ame bubuwo hã menɔa aƒeme o zi geɖe, eyata míedoa go wo ne míele ɖase ɖim tso aƒeme yi aƒeme o. Ame aɖewo hã sa ɖe aga.
Ɣeaɖewoɣi la, dɔléle, alesi yame mele kɔkɔm o, alo gomadomadose ana nàtsi aƒeme. Anya wɔ na wò be nàŋlɔ lɛta agaɖi ɖase na ƒometɔ alo ame aɖe si nèƒo nu na kpɔ le vomea? Ðe wò Biblia-nusrɔ̃vi aɖe ʋu yi afi bubua? Ðewohĩ lɛta si nàŋlɔ nɛ lae nye nusi tututu wòhiã be wòayi edzi agaxɔ dzo le gbɔgbɔ me. Nu bubu si nàgate ŋu awɔ hãe nye be nàŋlɔ lɛta si me Ŋɔŋlɔawo me nyatakaka si sɔ anɔ aɖo ɖe srɔ̃tɔ yeyewo, amesiwo dzi vi eteƒe medidi o, alo amesiwo ƒe lɔlɔ̃tɔ aɖe ku.
Ðaseɖiɖi to Lɛtaŋɔŋlɔ Dzi
Ne èle lɛta ŋlɔm ɖo ɖe amesi mènya o la, ɖe ɖokuiwò nu gbã. Àte ŋu aɖe eme be yenye amesiwo le lɔlɔ̃nu faa dɔ wɔm le xexeame godoo la dometɔ ɖeka. Ne esɔ nenema la, gblɔ be Yehowa Ðasefoe yenye. Na amea nanya nusita nèle lɛta ŋlɔm, ɖe eyama gbɔ vava teƒe. Ŋlɔ nua abe ɖe nèle nu ƒom nɛ ŋkume kple ŋkume ene. Ke hã le ɖekawɔwɔ me kple mɔfiame sia be “midze aɖaŋu abe dawo ene, eye midza abe ahɔ̃nɛwo ene” ta la, ɖɔ ŋu ɖo le nusiwo nàgblɔ nɛ le ɖokuiwò ŋu gome.—Mat. 10:16.
Nusi nàgblɔ na amea ne ɖe nèyi egbɔ ŋutɔŋutɔ la nenɔ nya siwo nàŋlɔ ɖe lɛtaa me la me. Àte ŋu atrɔ asi le ŋgɔdonya aɖe si tso Reasoning-gbalẽa alo agbalẽvi si nye Alesi Nàdze Biblia me Dzeɖoɖowo Gɔme Ahayi Wo Dzii me ŋu alo azã Ŋɔŋlɔawo me nyati aɖe si ŋu Míaƒe Fiaɖuƒe Subɔsubɔdɔ ƒo nu le eteƒe medidi boo o. Àte ŋu abia nya aɖe eye nàde dzi ƒo na amea be wòabu eŋu. Nusi gbeƒãɖela aɖewo wɔna koe nye be woaɖe eme be ɖoɖo aɖe le mía si femaxee hena Biblia me nyabiabiawo ŋuɖoɖo, eye ekema woyɔa míaƒe Biblia-srɔ̃gbalẽawo dometɔ ɖeka me tanya aɖewo. Lɛta si woatsɔ aɖi ɖasee ƒe kpɔɖeŋu aɖe dze le axa 73. Ana susu aɖewo wò, gake anyo be nànɔ emenyawo ɖɔ lim. Ne menye nenem o la, lɛta ɖeka ma koe nànɔ ɖoɖom ɖe ame mawo ke ɣeawokatãɣi.
Ame aɖewo melɔ̃na lɛta didi si tso amesi womedze sii o gbɔ xexlẽ o. Eyata anye nusi me nunya le be wò lɛtaa nanɔ kpuie. Ŋlɔ lɛtaa ale gbegbe be hafi exexlẽ nati exlẽlaa la, eɖo eƒe nuwuwu vɔ. Anyo ta be nàɖo amekpegbalẽvi si wota hena kpekpewo dede le Fiaɖuƒe Akpata me la ɖee. Àte ŋu aɖo trakt, agbalẽ gbadza, Gbetakpɔxɔ alo Nyɔ! ɖee ahaɖe eme be yeate ŋu awɔ ɖoɖo eƒe asi naka wo edziedzi ne elɔ̃. Àte ŋu abiae hã ne alɔ̃ be woava srã ye kpɔ le aƒeme ahayi dzeɖoɖoa dzi kplii.
Lɛtaa ƒe Dzedzeme ŋu Nya Aɖewo
Fifia kpɔ kpɔɖeŋu lɛtaa ɖa. De dzesi nu vevi siawo: (1) Woŋlɔe eme ɖe, wònya kpɔ, emenyawo le ɖoɖo nu. (2) Ne lɛtakotokua bu hã la, amea akpɔ lɛtaŋlɔlaa ƒe ŋkɔ kple adrɛs le edzi. (3) Le memama gbãtɔa me la, wogblɔ lɛtaa ƒe taɖodzinu tẽ eye egɔmesese mesesẽ o. (4) Memama ɖesiaɖe kple nyati vevi si wòlé ɖe asi. (5) Le eƒe taɖodzinua ta, womeŋlɔ lɛtaa abe ame nyanyɛ ye wole eŋlɔm na ene o, eye womeŋlɔe abe amedzro hãe wole eŋlɔm na ene o.
Le lɛta si tɔgbe hamea ƒe agbalẽŋlɔla aŋlɔ aɖo ɖe dɔwɔƒe alo habɔbɔ aɖe, alo alɔdzedɔwɔƒea gome la, woaŋlɔ hamea ƒe ŋkɔ ɖe eme hekpe ɖe agbalẽŋlɔlaa ƒe ŋkɔ, eƒe adrɛs, kpakple ɣletiŋkekea ŋu. Woaŋlɔ amea alo habɔbɔ si wole lɛtaa ɖom ɖo la hã ƒe ŋkɔ kple adrɛs. Lɛtagɔmedzenya si sɔ akplɔe ɖo. Le gbegbɔgblɔ aɖewo me la, wowua lɛtaa nu kple gbedoname abe esiawo ene hafi dea asi ete: “Metɔ ɖe afisia hele gbe dom na wò” alo “Xɔ nye nyuidiname ƒe gbedoname.” Ele be lɛtaŋlɔlaa ŋutɔ nade asi ete kple nuŋlɔti.
Le lɛta ɖesiaɖe me la, lé be na nya ɖesiaɖe ŋɔŋlɔ wòade pɛpɛpɛ, gbeŋutise, kple nuŋɔŋlɔmedzesiwo, eye mègaŋlɔ lɛtaa ƒe dzadzɛnyenye be o. Esia wɔwɔ ana bubu nanɔ wò lɛta la kple emenya ŋu.
Nyuitɔe nye be nàŋlɔ wò ŋutɔ wò adrɛs ɖe lɛtakotokua megbe ɣesiaɣi—be woanya afisi wòtso. Ne èkpɔ be masɔ be yeaŋlɔ ye ŋutɔ yeƒe adrɛs ɖe ɖaseɖilɛta si nàŋlɔ na amesiwo mènya o me o la, ekema bia hamemegãwo ne woalɔ̃ be nàzã hamea ƒe adrɛs. Mele be woazã Gbetakpɔxɔ Habɔbɔa ƒe adrɛs gbeɖegbeɖe le go sia me o, elabena afia be Habɔbɔa ƒe dɔwɔƒee lɛtaa tso; esia masɔ o eye ahe tɔtɔ vɛ. Ne lɛtaŋlɔlaa ƒe adrɛs medze o evɔ wòɖo Biblia-srɔ̃gbalẽ ɖa la, esia hã ana amea nabu xaa be Habɔbɔae le eɖom ɖa.
Kpɔ egbɔ be posugagbalẽvi home si sɔ la le kotokua dzi, vevietɔ ne èɖo Biblia-srɔ̃gbalẽ ɖee. Ne homea mede o la, woate ŋu ana agbalẽa xɔla naxe eŋu fe eye esia ado kplamatse wò ɖaseɖiɖidɔa. Ðo ŋku edzi be le dukɔ geɖe me la, ne woɖo agbalẽ gbadza alo magazine ɖa la, posugagbalẽvia ŋu fe sɔa gbɔ wu lɛta ɖeɖeko tɔ.
Lɛtaa me Nyawo Nesɔ Tome na Ame
Ne èŋlɔ lɛtaa vɔ ko la, xlẽe nàlé ŋku ɖe emenyawo ŋu be wosɔ nyuie hã. Aleke emenya le? Xɔlɔ̃wɔwɔ kple ŋuɖɔɖɔɖo dze le emea? Lɔlɔ̃ kple dɔmenyo nye nɔnɔme siwo míedzea agbagba be míaɖe afia le zɔzɔ kple mía nɔewo me ƒe ɖewo. (Gal. 5:22, 23) Ne ède dzesi nane si mesɔ o alo ɖia ame nu la, gbugbɔe ŋlɔ.
Lɛta ate ŋu ade teƒeteƒe siwo wò ŋutɔ màte ŋu ade o. Nyateƒenya sia ɖeɖe dzaa na be lɛtaŋɔŋlɔ nye mɔnu vevi aɖe le subɔsubɔdɔa wɔwɔ me. Esi wònye be wò lɛtaa nye tewòƒenɔla le exlẽlaa ŋkume eye wòle tsitre ɖi na nusiwo le vevie na wò ta la, bu nusiwo nègblɔ ɖe eme, eƒe dzedzeme kple emenyawo ŋu vevie. Ate ŋu anɔ eme be ŋusẽdoame alo dzideƒo si luʋɔ xɔasi aɖe hiã be wòadze agbemɔ dzi la tututue le wò lɛtaa me.