Ame Ka Tututue Le Xexea Dzi Ðum?

NYA SI BIBLIA GBLƆ

“Xexe blibo la katã le vɔ̃ɖitɔ la ƒe ŋusẽ te.”—1 Yohanes 5:19.

“Woɖe Mawu ƒe Vi la ɖe go . . . be, wòagblẽ Abosam ƒe dɔwɔwɔwo me.”—1 Yohanes 3:8, Xexe Yeye Gɔmeɖeɖe.

VI KAE ESIA AÐE NA WÒ?

Ana nàse nu si tae kuxiwo bɔ ɖe xexea me ɖo la gɔme nyuie.—Nyaɖeɖefia 12:12.

Kakaɖedzi anɔ asiwò be Mawu ava ɖɔ nuwo ɖo.—1 Yohanes 2:17.

ÐE MÍATE ŊU AKA ÐE NYA SI BIBLIA GBLƆ DZIA?

Ɛ̃, míate ŋu aka ɖe edzi, le susu etɔ̃ ya teti ta:

• Satana ƒe dziɖuɖu nu ayi. Yehowa ɖoe kplikpaa be yeaɖe Satana ɖa bene wòagakpɔ ŋusẽ ɖe ameƒomea dzi azɔ o. Edo ŋugbe be ‘yeaxɔ ŋusẽ le Satana Abosam si’ eye yeaɖɔ nu siwo katã wògblẽ la ɖo.—Hebritɔwo 2:14, Xexe Yeye Gɔmeɖeɖe.

• Mawu tia Yesu Kristo be wòaɖu xexea dzi. Yesu menye ŋutasẽla alo ɖokuitɔdila abe ame si le xexea dzi ɖum fifia ene o. Mawu do ŋugbe be ne Yesu le dzi ɖum la, “ase veve ɖe ame tsɛwo kple ame dahewo nu . . . Aɖe wo tso teteɖeanyi kple ŋutasesẽ me.”—Psalmo 72:13, 14.

• Mawu mekaa aʋatso o. Biblia gblɔe eme kɔ ƒãa be: ‘Mawu mate ŋu aka aʋatso o.’ (Hebritɔwo 6:18) Ne Yehowa nya do ŋugbe aɖe ko la, kakaɖedzi li be awɔ ɖe edzi godoo! (Yesaya 55:10, 11) ‘Aɖe xexe sia dzi ɖula ɖa.’—Yohanes 12:31.