Ðe Fukpekpewo Nu Ava Yia?

NYA SI BIBLIA GBLƆ

‘Mawu atutu aɖatsi sia aɖatsi ɖa le woƒe ŋkume, eye ku maganɔ anyi akpɔ o, eye konyifafa kple ɣlidodo kpakple vevesese hã maganɔ anyi o.’—Nyaɖeɖefia 21:3, 4, Xexe Yeye Gɔmeɖeɖe.

VI KAE ESIA AÐE NA WÒ?

Ana nàka ɖe edzi be menye Mawu gbɔe míaƒe kuxiwo tso o.—Yakobo 1:13.

Wò dzi adze eme le esi nènya be Mawu sea veve ɖe ame siwo le fu kpem nu ta.—Zaxarya 2:8.

Mɔkpɔkpɔ anɔ asiwò be fukpekpewo katã nu ava yi.—Psalmo 37:9-11.

ÐE MÍATE ŊU AKA ÐE NYA SI BIBLIA GBLƆ DZIA?

Ɛ̃, míate ŋu aka ɖe edzi, le susu eve ya teti ta:

• Mawu mekpɔa dzidzɔ ɖe fukpekpe kple nu madzɔmadzɔ wɔwɔ ŋu o. Bu ale si Yehowa Mawu se le eɖokui me esi amewo sẽ ŋuta le eƒe dukɔa ŋu le blema la ŋu kpɔ. Biblia gblɔ be ‘esi wosẽ ŋuta le eƒe amewo ŋu la,’ woƒe nu wɔ nublanui nɛ.—Ʋɔnudrɔ̃lawo 2:18, Xexe Yeye Gɔmeɖeɖe.

  Ame siwo sẽa ŋuta le ame bubuwo ŋu ƒe nu medzɔa dzi na Mawu o. Le kpɔɖeŋu me, Biblia gblɔ be Mawu lé fu ame “siwo kɔa ʋu maɖifɔ ɖi.”—Lododowo 6:16, 17.

• Mawu tsɔ ɖe le eme na ame sia ame. Menye ame ŋutɔ ɖeɖe koe “nya vevesese si le dzi me nɛ” o, ke ele nyanya na Yehowa hã!—2 Kronika 6:29, 30.

  Eteƒe madidi o, Yehowa ato eƒe Fiaɖuƒea dzi aɖe míaƒe fukpekpewo katã ɖa. (Mateo 6:9, 10) Hafi ɣemaɣi naɖo la, ele akɔ fam na ame siwo katã dia kpekpeɖeŋu tso egbɔ.—Dɔwɔwɔwo 17:27; 2 Korintotɔwo 1:3, 4.