Nu kae nye Mawu Fiaɖuƒe la?

NYA SI BIBLIA GBLƆ

“Dziƒo ƒe Mawu la aɖo fiaɖuƒe aɖe anyi, si matsrɔ̃ gbeɖegbeɖe o.”—Daniel 2:44, Xexe Yeye Gɔmeɖeɖe.

‘Wona ŋutsuvi mí; dziɖuɖu anɔ abɔta nɛ.’—Yesaya 9:6.

VI KAE ESIA AÐE NA WÒ?

• Dziɖuɖu dzɔdzɔe sia ahe nu nyui geɖe vɛ na wò.—Yesaya 48:17, 18.

• Ahe xexe yeye si me lãmesẽ deblibo kple dzidzɔ geɖe le vɛ na wò.—Nyaɖeɖefia 21:3, 4.

ÐE MÍATE ŊU AKA ÐE NYA SI BIBLIA GBLƆ DZIA?

Ɛ̃, míate ŋu aka ɖe edzi, le susu eve ya teti ta:

• Yesu na míenya nu si Mawu Fiaɖuƒea awɔ na mí. Yesu fia eyomedzelawo be woado gbe ɖa be Mawu ƒe Fiaɖuƒe la nava eye woawɔ Mawu ƒe lɔlɔ̃nu le anyigba dzi. (Mateo 6:9, 10) Nu siwo Yesu wɔ la na míekpɔ ale si gbedodoɖa ma ava emee.

  Esime Yesu nɔ anyigba dzi la, ena nuɖuɖu dɔwuitɔwo, eda dɔ na dɔnɔwo, eye wòfɔ ame kukuwo ɖe tsitre! (Mateo 15:29-38; Yohanes 11:38-44) Yesu si woɖo Mawu Fiaɖuƒea ƒe Fia la to esia dzi na míekpɔ nu nyui siwo Fiaɖuƒea ava wɔ na eteviwo le etsɔme.—Nyaɖeɖefia 11:15.

• Nu siwo le dzɔdzɔm le xexea me ɖo kpe edzi be Mawu Fiaɖuƒea gogo. Yesu gblɔe ɖi be do ŋgɔ teti hafi Fiaɖuƒea nahe ŋutifafa ava xexea me la, aʋawɔwɔ, dɔwuame kple anyigbaʋuʋu abɔ ɖe anyigba dzi.—Mateo 24:3, 7.

  Míekpɔe be dzesiawo katã le eme vam egbea. Eya ta míate ŋu aka ɖe edzi be Mawu Fiaɖuƒea ava ɖe fukpekpewo katã ɖa kpuie.