‘Ðe Mele Vevie na Mawua?’

“ÐE MÈLE Veviea? Ðe Mawu Tsɔa Ðe le Emea?” Emae nye nyati aɖe ƒe tanya si dze le Christianity Today me. Philip Yancey si nye nyatia ŋlɔla gblɔ be: “Nye nuŋɔŋlɔdɔa ƒe akpa gãtɔ ku ɖe nuxaxa ŋuti kuxia ŋu. Medzea ŋgɔ nyabiase sia enuenu abe abi xoxo si gbe kuku ŋue mele asi lilimee ene. Mesea nya tso nye agbalẽa xlẽlawo gbɔ, eye woƒe ŋutinya siwo me nuxaxa le la ɖoa kpe nye ɖikekeawo dzi.”

Ðewohĩ wò hã ède ŋugble le Mawu ƒe ɖetsɔtsɔ le wò agbe me ŋu kpɔ. O, ɖewohĩ ènya nya si le Yohanes 3:16 si gblɔ be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena.” Alo ànya xlẽ Mateo 20:28 si gblɔ be Yesu va be “yeatsɔ eƒe agbe la ana ɖe ame geɖewo ƒe xɔxɔ ta” kpɔ. Gake àbia kokoko be, ‘Ðe Mawu léa ŋku ɖe ŋunyea? Ðe wòtsɔa ɖe le nye amea mea?’ Abe alesi míava kpɔe ene la, susu nyui li si ta míaxɔe ase be etsɔa ɖe le eme.