Woda Ahe Ganye Kesinɔtɔwo—Aleke Wòate Ŋu Adzɔe?

Ƒe alafa geɖe enye sia la, nunyala aɖe do gbe ɖa be woagana yeazu hiãtɔ o. Nukata wòbia nu ma? Elabena evɔ̃ be ahedada ana nɔnɔme aɖewo nava nɔ ye si eye yeawɔ nane siwo agblẽ ye kple Mawu dome. Nusia dze le nya siwo wògblɔ me be: “Na maɖu nye nusi nye tɔnye . . . ne nyemagaɖo ko ayi fi fi ge ahada aƒu ɖe nye Mawu ƒe ŋkɔ ŋu o.”—LODODOWO 30:8, 9.

ÐE WÒFIA be ame dahe mate ŋu asubɔ Mawu nuteƒewɔwɔtɔe oa? Kpao! Tso gbaɖegbe ke la, Yehowa Mawu subɔla gbogbo aɖewo wɔ nuteƒe nɛ togbɔ be ahedada na wokpe fu hã. Yehowa hã lɔ̃a amesiwo ɖoa ŋu ɖe eŋu eye wònaa woƒe nuhiahiãwo wo.

Blema Nuteƒewɔlawo

Hiã tu apostolo Paulo ŋutɔ hã. (Korintotɔwo II, 6:3, 4) Eya hã ƒo nu tso ɖaseɖila wɔnuteƒe siwo nɔ anyi do ŋgɔ na Kristotɔwo ŋɔli la ƒe “alilikpo gã” aɖe ŋu, amesiwo dometɔ aɖewo “[nɔa] tsatsam le alẽgbalẽwo kple gbɔ̃gbalẽwo me, le koɖoɖo [me] . . . wotra mɔ henɔ tsatsam le gbedziwo kple towo kple agadowo kple anyigba ʋewo me.”—Hebritɔwo 11:37, 38; 12:1.

Nuteƒewɔla siawo dometɔ ɖekae nye nyagblɔɖila Eliya. Esime ku ɖi ƒe etɔ̃ kple afã la, Yehowa na nuɖuɖui ɣesiaɣi. Gbã la, Mawu na akpaviãwo tsɔa abolo kple lã vana na nyagblɔɖila la. (Fiawo I, 17:2-6) Emegbe Yehowa to nukumɔ aɖe dzi na be wɔ kple ami si ahosi aɖe tsɔ ɖaa nu Eliya ɖuna la mevɔ o. (Fiawo I, 17:8-16) Nuɖuɖu tsɛ aɖe koe wònye, gake eya ŋue nyagblɔɖila la, nyɔnua, kple viaŋutsuvi wonɔ agbe ɖo.

Nenema ke Yehowa lé nyagblɔɖila Yeremya nuteƒewɔla la ɖe tee le ɣeyiɣi aɖe si me ganyawo sẽ ŋutɔ me. Yeremya tsi agbe esime Babilontɔwo ɖe to ɖe Yerusalem, eye dua me tɔwo ‘tsɔ vɔvɔ̃ ɖu abolo ɖe dàda nu.’ (Xezekiel 4:16) Mlɔeba la, dɔwuamea nu va sẽ ale gbegbe be nyɔnu aɖewo ɖu woa ŋutɔwo ƒe viwo. (Konyifahawo 2:20) Togbɔ be wode Yeremya game le gbeƒãɖeɖe vɔvɔ̃manɔmee ta hã la, Yehowa kpɔ egbɔ be wonaa ‘abolo ɖekae’ gbesiagbe “vaseɖe esime woɖu abolowo katã wòvɔ le dua me.”—Yeremya 37:21.

Eyata nuɖuɖu mebɔ ɖe Yeremya si abe alesi mebɔ ɖe Eliya hã si o ene. Ŋɔŋlɔawo mena míenya nusi Yeremya ɖuna alo zi alesinu wòɖua nu esime abolo vɔ le Yerusalem o. Gake míenya be Yehowa lée ɖe te wòto dɔŋɔli sesẽ ma me do.

Koɖoɖo le xexeame ƒe akpa ɖesiaɖe egbea. Le Dukɔ Ƒoƒuawo ƒe nya nu la, Afrika ye koɖoɖo bɔ ɖo wu teƒe ɖesiaɖe. Dukɔ Ƒoƒuawo ƒe nyatakaka aɖe le ƒe 1996 me gblɔ be: “Afrikatɔwo katã ƒe afã teti nye hiãtɔwo.” Togbɔ be ganyawo le sesẽm ɖe edzi ale gbegbe hã la, Afrikatɔ siwo wɔa Biblia ƒe gɔmeɖosewo ŋudɔ le woƒe agbenɔnɔ me la ƒe xexlẽme le dzidzim ɖe edzi, eye wole Mawu subɔm nuteƒewɔwɔtɔe, kple kakaɖedzi be alé yewo ɖe te. Xlẽ kpɔɖeŋu aɖewo siwo tso míaƒe xexe sia si me xaxawo bɔ ɖo la ƒe akpa aɖe kpɔ.

Anukwareɖiɖi

Michael,a si le Nigeria la nye agbledela si si vi ade le wòkpɔa wo dzi. Egblɔ be: “Esesẽ be nàɖi anukware ne ga mele asiwò nàkpɔ wò ƒomea dzi o. Gake ne anukwaremaɖimaɖi nuwɔna aɖe dzrom la, meɖoa ŋku Efesotɔwo 4:28 me nyawo dzi, siwo gblɔ be: ‘Fiafitɔ la nagafi fi o, ke boŋ nedze agbagba, ne wòatsɔ eƒe asiwo awɔ dɔ nyui.’ Eyata ne tetekpɔa va la, mebiaa ɖokuinye be, ‘Ðe mewɔ dɔ hafi kpɔ ga sia?’ ”

Michael gblɔ kpee be: “Le kpɔɖeŋu me, esi menɔ zɔzɔm gbeɖeka la, mekpɔ be akplo aɖe ge tso dzokeke aɖe dzi. Nyemete ŋu tɔ dzokekedola la o, eyata metsɔ akploa eye mekpɔ be ga yɔe fũ! Mezã ŋkɔ si le akploa me ale be meke ɖe nutɔa ŋu eye metsɔ akploa nɛ.”

Tenɔnɔ Ðe Blanuiléle Nu

Ŋutsu aɖe si le Dziehe Afrika gblɔ be: “Ahedada ɖeko wòle [abe] ame aɖe si ge ɖe do globo aɖe me ene, eye ete ŋu le kekeli kpɔm ɖaa le etame eye amewo hã va le eme tsom le ablɔɖe me, gake mete ŋu le ɣli dom be woakpe ɖe ye ŋu o alo aŋutsrɔe aɖeke meli wòalia ado go o.” Eyata mewɔ nuku be zi geɖe la, ahedada naa woléa blanui eye dzi ɖena le ame ƒo o! Mawu subɔlawo gɔ̃ hã akpɔ be kesinɔnu le ame bubuwo ya si ale be woate tamebubu be viɖe aɖeke mele nuteƒewɔwɔ ŋu o. (Tsɔe sɔ kple Psalmo 73:2-13.) Aleke míawɔ aɖu seselelãme mawo dzi?

Peter nye Ɣetoɖoƒe Afrikatɔ si xɔ dzudzɔ le dziɖuɖudɔ me le dɔwɔwɔ ƒe 19 vɔ megbe. Dzudzɔga sue aɖe ŋu koŋ ye wònɔa agbe ɖo fifia. Peter gblɔ be: “Ne dzi ɖe le ƒonye la, meɖoa ŋku nusiwo mexlẽ le Biblia kple Gbetakpɔxɔ Habɔbɔa ƒe agbalẽwo me dzi. Esusɔ vie nuɖoanyi xoxo sia nu ava yi, eye míele nuɖoanyi si nyo wu la lalam.

“Mebua Petro I, 5:9 hã ŋu, si gblɔ be: ‘Minɔ tsitre sesĩe ɖe [Satana] ŋuti le xɔse me, esi mienyae bena, fukpekpe mawo ke [vaa] mia nɔvi, siwo le xexeame la dzi.’ Eyata menye nye ɖeka koe le fu kpem o. Ŋkuɖoɖo nya siawo dzi kpena ɖe ŋunye be meɖea nya siwo ɖea dzi le ame ƒo hena woléa blanui la ɖa le susu me.”

Peter gagblɔ be: “Gakpe ɖe eŋu la, togbɔ be Yesu wɔ nukunu geɖe esime wònɔ anyigba dzi hã la, mewɔ ame aɖeke hotsuitɔe o. Nukata wòle be masusu be ana makpɔ ho?”

Gbedodoɖa ƒe Ŋusẽ

Tete ɖe Yehowa Mawu ŋu le gbedodoɖa me nye mɔ bubu si dzi woato aɖu nukpɔsusu tatrawo dzi. Esi Mary va zu Yehowa Ðasefo le ƒe 1960 me la, eƒe ƒometɔwo gbee. Srɔ̃ mele esi o eye ele eƒe ƒe 50-awo me fifia, enye ame beli eye ŋutilãmenu ʋee aɖewo koe le esi. Ke hã, edoa vevie nu le Kristotɔwo ƒe subɔsubɔdɔa me.

Mary gblɔ be: “Ne dzi ɖe le ƒonye la, meyina Yehowa gbɔ le gbedodoɖa me. Menya be ame aɖeke meli akpe ɖe ŋunye wui o. Meva kpɔe be ne èɖo ŋu ɖe Yehowa ŋu la, akpe ɖe ŋuwò. Meɖoa ŋku Fia Dawid ƒe nya siawo siwo le Psalmo 37:25 dzi ɣesiaɣi be: ‘Menɔ ɖevime tsã, eye azɔ metsi, ke nyemekpɔ be, wogblẽ ame dzɔdzɔe ɖi, eye viawo ɖo abologbe kpɔ o.’

“Gbɔgbɔ me nɔviŋutsu kple nɔvinyɔnu siwo tsi ƒe nuteƒekpɔkpɔ siwo wota ɖe Gbetakpɔxɔ me hã dea dzi ƒo nam. Yehowa Mawu kpe ɖe wo ŋu, eyata menya be ayi edzi akpe ɖe nye hã ŋunye. Eyrana ɖe nye fufudzradɔ sue si mewɔna la dzi, eye mete ŋu kpɔa nye gbesiagbenuhiahiãwo. Ɣeaɖewoɣi ne ga vɔ le asinye eye nyemenya nusi mawɔ o la, Yehowa ɖoa ame aɖe ɖa wòva naa num gblɔna be, ‘Nɔvinyɔnu, taflatse xɔ nusia.’ Yehowa megblẽm ɖi kpɔ o.”

Asixɔxɔ si Le Biblia Sɔsrɔ̃ Ŋu

Yehowa Ðasefowo dea asixɔxɔ Mawu ƒe Nya, Biblia la, sɔsrɔ̃ ŋu, eye wo dometɔ siwo nye ame dahewo hã denɛ eŋu. John si xɔ ƒe 60 nye mɔɖela (ɣeyiɣiawo katã ƒe Fiaɖuƒe gbeƒãɖela) ganye subɔsubɔdɔwɔla le hamea me. Dziƒoxɔ gbagbɛ aɖe mee wo kple ƒome 13 bubu wole. Eƒe xɔme nye dziƒoxɔa ete tɔ ƒe agbalinu ƒe akpa aɖe si wotsɔ ati xee. Ablegɔ xoxo eve kple kplɔ̃ ɖeka si dzi wòli kɔ Biblia-srɔ̃gbalẽwo ɖoe le xɔa me. Atsatsa dzie wòmlɔna.

Abolo ye John dzrana tsã eye wòkpɔa abe dɔlar ɖeka ene gbesiagbe, gake esime woxe mɔ ɖe ƒo dɔdɔ tso duta nu la, nusi ŋu wònɔa agbe ɖo la ge le esi. Egblɔ be: “Agbenɔnɔ sesẽna nam ɣeaɖewoɣi, gake megale mɔɖeɖedɔa wɔm. Yehowae léam ɖe te. Togbɔ be nɔvi siwo le hamea me kpena ɖe ŋunye ŋutɔ hã la, mewɔa dɔ sia dɔ si mekpɔ eye nyemeɖoa ŋu ɖe amegbetɔ aɖeke ŋu be wòakpe ɖe ŋunye alo ana num maɖu o. Wokpena ɖe ŋunye le dɔdidi me eye wonaa gam ɣeaɖewoɣi.

“Media ɣeyiɣi xlẽa Biblia kple Gbetakpɔxɔ Habɔbɔa ƒe agbalẽwo. Mesrɔ̃a nu ŋdikanya esime aƒea me zi ɖoɖoe kple emegbe le zã me ne wosi akaɖi. Menya be ele be manɔ ɖokuisinusɔsrɔ̃ dzi.”

Ðeviwo Hehe be Woakpɔ Agbe

Daniel nye aho si si vi ade le. Le ƒe 1985 me la, dɔ si wònɔa wɔwɔm ƒe 25 sɔŋ la ge le esi, gake eva kpɔ fiase me nudzadzradɔ. Egblɔ be: “Ganyawo sesẽ na ƒomea. Fifia la, zi ɖeka koe míeɖua nu gbesiagbe. Edzɔ ɣeaɖeɣi be míetsi dɔ ŋkeke etɔ̃ sɔŋ. Tsi koe míenona.”

Daniel nye hamemegã. Egblɔ be: “Kristotɔwo ƒe kpekpewo meto ŋunye kpɔ o, eye meléa fɔ ɖe teokrasidɔwo ŋu. Ɣesiaɣi si woawɔ dɔ aɖe le Fiaɖuƒe Akpataa ŋu la, mekpɔa egbɔ be mele afima. Eye ne agbea va sesẽ la, meɖoa ŋku Petro ƒe nya siwo wògblɔ na Yesu dzi, si woŋlɔ ɖe Yohanes 6:68 be: ‘Aƒetɔ, ameka gbɔ gɔ̃ míaʋu ayi mahã?’ Ne medzudzɔ Yehowa subɔsubɔ la, afika gɔ̃ mayi? Paulo ƒe nya siwo le Romatɔwo 8:35-39 hã naa kakaɖedzim elabena nya mawo fia be naneke mamã mí atso Mawu kple Kristo ƒe lɔlɔ̃ gbɔ o. Nɔnɔme siae meƒãna ɖe vinyewo me. Megblɔnɛ na wo enuenu be mele be míadzo le Yehowa gbɔ gbeɖe o.” Daniel ƒe veviedodo, hekpe ɖe ƒome Biblia nusɔsrɔ̃ edziedzi ŋu kpɔ ŋusẽ nyui ɖe viawo dzi.

Nunana ƒe Gbɔgbɔ

Ðewohĩ ame aɖe asusu be asesẽ ŋutɔ be hiãtɔ kolikoliwo nakpɔ ga adzɔ nu atsɔ ado alɔ Fiaɖuƒedɔwoe. Gake mele nenema o. (Tsɔe sɔ kple Luka 21:1-4.) Ðasefo aɖewo siwo le Ghana siwo ƒe dɔwɔɖui vevitɔe nye agbledede la ka woƒe anyigba ƒe akpa aɖe be yewoazãe ɖe Mawu Fiaɖuƒea ƒe dɔwo ŋu. Ne wodzra woƒe anyigba ƒe akpa ma dzi nuwo la, dɔ mawo koe wozãa ga la na, eye eya ke mee wowɔa nudzɔdzɔ tsoe le Yehowa Ðasefowo ƒe Fiaɖuƒe Akpata si le wo gbɔ me.

Joan si le Titina Afrika la nye mɔɖela. Aboloe wòdzrana tsɔ kpɔa srɔ̃aŋutsu si ƒe lãme tu kple ame ene bubu siwo le wo gbɔ dzi. Esime amagoewo hiã le hame si ƒe kpekpewo wòdena ƒe Fiaɖuƒe Akpata me la, Joan ƒe ƒomea lɔ̃ dzɔ ga siwo katã nɔ wo si le aƒea me. Naneke megasusɔ na wo o. Gake ŋkeke eveagbe la, ame aɖe si womenɔ mɔ kpɔm na o la va xe fe xoxo aɖe si nɔ eŋu na wo, ale be ga si womeganɔ mɔ kpɔm na xɔxɔ o la va ka wo si!

Dzi dzɔa Joan ɣesiaɣi eye metsia dzi ɖe ga ŋu o. “Megblɔa nye nɔnɔmea na Yehowa le gbedodoɖa me, eye meyina gbeadzi. Míenya be mɔkpɔkpɔ gobi aɖeke meli be nuwo ava ka ɖe eme le nuɖoanyi sia me o. Gake míenya be Yehowa ana míaƒe nuhiahiãwo mí.”

Kutrikuku le Dɔwɔwɔ Me

Wonya Yehowa Ðasefowo be wolɔ̃a wo nɔewo. (Yohanes 13:35) Amesiwo si ga le kpena ɖe wo hati Kristotɔ siwo wòhiã la ŋu. Zi geɖe la enyea nunana eye ɣeaɖewoɣi wokpena ɖe wo ŋu wokpɔa dɔ wɔna.

Anyidɔ le Mark, si le Congo, ŋu. Ena eƒe afɔkuiwo kple asibidɛwo gblẽ. Eyata bunɔwo ƒe atizɔtie wòtsɔ zɔna. Esi Mark tso nya me be yeasubɔ Yehowa la, ewɔ tɔtrɔ vevi aɖewo le eƒe agbenɔnɔ me. Le esi teƒe be wòanɔ nu biam abe alesi wòwɔna tsã ene la, eya ŋutɔ de nuɖuɖugble. Emea anyikpewo hã dzrana.

Togbɔ be Mark nye nuwɔametɔ hã la, ekua kutri le dɔwɔwɔ me. Eva ƒle anyigba tu xɔ kpokploe aɖe ɖe edzi. Egbea la, Mark nye hamemegã eye wodea bubu eŋu le du si me wòle la me. Ekpena ɖe hiãtɔ bubuwo ŋu fifia.

Enye nyateƒe be dɔ meli woawɔ le teƒe geɖe o. Kristotɔ hamemegã aɖe si le dɔ wɔm le Gbetakpɔxɔ Habɔbɔa ƒe alɔdzedɔwɔƒewo dometɔ ɖeka le Titina Afrika ŋlɔ bena: “Dɔ mele afisia nɔvi geɖe nawɔ o. Wo dometɔ aɖewo wɔa dɔ le wo ɖokui si, gake mele bɔbɔe o. Ame geɖe bui be ne yewowɔ dɔ aleke ke hã la, fu koe yewoakpe, eyata yewoatsɔ ŋutilãmenuwo asa vɔe anye subɔla mɔɖelawo. Esi ame geɖe wɔe nenema la, wokpɔe be woyra yewo geɖe wu alesi wòanɔ ne ɖe yewowɔa dɔ axɔ fetu sue aɖe alo esi ŋu fetu aɖeke mele o.”

Yehowa Léa Eƒe Amewo Ðe Te

Yesu Kristo gblɔ le eɖokui ŋuti be: “Abeiwo kpɔ dowo, eye dziƒoxeviwo hã kpɔ atɔwo; ke Amegbetɔvi la mekpɔ afisi wòatsɔ ta aziɔ ɖo o.” (Luka 9:58) Nenema ke apostolo Paulo hã ŋlɔ be: “Vaseɖe gaƒoƒo sia dzi la dɔ kple tsikɔ wua mí, eye míezɔa amama, eye woƒoa mí kple kɔ, eye nɔƒe gobi aɖeke meli na mí o.”—Korintotɔwo I, 4:11.

Yesu kple Paulo siaa lɔ̃ be yewoanɔ agbe si me ga manɔ yewo si boo o ale be yewoate ŋu awɔ yewoƒe subɔsubɔdɔa bliboe wu. Kristotɔ geɖe siwo li egbea nye hiãtɔwo elabena naneke meli woawɔ le eŋu o. Ke hã wotsɔa Biblia ƒe gɔmeɖosewo wɔa dɔe le woƒe agbenɔnɔ me eye wodoa vevie Mawu subɔsubɔ. Wonya be Yehowa lɔ̃ yewo ale gbegbe eye wokpɔa kakaɖedzinya si Yesu gblɔ ƒe nyateƒenyenye, be: “Midi mawufiaɖuƒe la kple eƒe dzɔdzɔenyenye gbãgbiagbã, eye woatsɔ [ŋutilãmenu siawo] katã akpe ɖe eŋuti na mi.” (Mateo 6:25-33) Gawu la, Mawu subɔla dahe siawo kpɔ kpeɖodzi siwo fia be “Yehowa ƒe yayra—eyae wɔa ame kesinɔtɔe.”—Lododowo 10:22, NW.

[Etenuŋɔŋlɔ]

[Aɖaka si le axa 6]

Amekawoe Nye “Nyadziwɔlawo”?

ƑE 1994 Gallup numekuku aɖe si wowɔ fia be Amerikatɔ 96 le alafa me “xɔ Mawu alo gbɔgbɔ aɖe si le xexeame katã dzi se.” U.S.News & World Report gblɔ be “ne womã dukɔmeviwo ɖe sɔlemehawo nu la, sɔlemehawo bɔ ɖe United States wu dukɔ bubu ɖesiaɖe le Anyigba la dzi” hã. Togbɔ be wodzena mawuvɔ̃lawoe alea hã la, numekula George Gallup Jr. si tsi ɖe numekuku me gblɔ be: “Nyateƒe matrɔmatrɔ wɔnublanui lae nye be Amerikatɔ akpa gãtɔ menya nusi dzi woxɔ se alo nusitae woxɔ edzi se o.”

Akɔntabubuwo fia hã be vovototo gã aɖe le ame geɖe ƒe subɔsubɔ dzixɔsewo kple woƒe nuwɔnawo dome. Le kpɔɖeŋu me, agbalẽŋlɔla Jeffery Sheler gblɔ be, “hadomegbenɔnɔ ŋuti nunyalawo de dzesii be teƒe siwo nuvlowɔwɔ bɔ ɖo wu le dukɔa me dometɔ aɖewo kee ganye afisiwo subɔsubɔ dzixɔsewo kple nuwɔnawo kpɔ ŋusẽ ɖo wu.”

Nya sia mewɔ nuku o. Nukatae? Elabena ƒe alafa gbãtɔ me ke apostolo Paulo xlɔ̃ nu nɔvia Kristotɔwo be woakpɔ nyuie le amesiwo “[ʋua] eme bena, yewonya Mawu, ke wotsɔ woƒe nuwɔnawo gbe nu le egbɔ” la ŋu. (Tito 1:16) Hekpe ɖe eŋu la, Paulo gblɔ na ɖekakpui Timoteo be amesiwo “si mawusosroɖa ƒe nɔnɔme le, gake wogbe eƒe ŋusẽ la” abɔ le “ŋkeke mamlɛawo” me.—Timoteo II, 3:1, 5.

Gake Kristotɔ vavãwo ya wɔa woƒe ŋutete ɖesiaɖe be yewoawɔ ɖe se si Yesu Kristo de be ‘miheyi ɖawɔ dukɔwo katã me nɔlawo nusrɔ̃lawoe’ la dzi. (Mateo 28:19) Le esia wɔwɔ me la, ‘wozua nyadziwɔlawo, eye menye nyaselawo ɖeɖeko o.’—Yakobo 1:22.

[Nɔnɔmetata si le axa 7]

Amewo dea asixɔxɔ Biblia sɔsrɔ̃ ŋu le xexeame godoo