Asiƒoƒo Ðe Nyɔnutabianu Si Sɔ Ŋu

ABE alesi wònɔ le Biblia ƒe ɣeyiɣiwo me ene la, enye nudidi le nuto aɖewo me be ŋutsu nana nu ɖe nyɔnu ta hafi aɖee. Yakob gblɔ na Laban si ava nye toa be: “Masubɔ wò ƒe adre le Raxel, wò nyɔnuvi ɖevitɔ la ta.” (Mose I, 29:18) Le alesi Yakob lɔ̃ Raxel ta la, edo nu gã aɖe ŋugbe be yeana—nusi ade ƒe adre ƒe fetu! Laban lɔ̃ ɖe nusi Yakob be yeana dzi gake eflui wòɖe vianyɔnu xoxotɔ, Lea, gbã. Ameflunu sɔŋ ye Laban va nɔ wɔwɔm ɖe Yakob ŋu emegbe. (Mose I, 31:41) Alesi Laban va biã ŋku ɖe ŋutilãmeviɖewo ŋu wɔe be vianyɔnuwo megava bui o. Wobia be: “Ðe mele mía bum amedzrowoe oa? Elabena etsɔ mí dzra, eye wòle ga, si wòxɔ ɖe mía ta la ɖum vaseɖe fifi.”—Mose I, 31:15.

Ewɔ nublanui be dzila geɖe ɖi Laban le egbe ƒe ŋutilãmenudidi ƒe xexeame. Eye wo dometɔ aɖewo gavloe wu gɔ̃ hã. Afrika-nyadzɔdzɔgbalẽ aɖe gblɔ be “vifofo ŋuklẽlawo” ƒoa asi ɖe srɔ̃ɖeɖe aɖewo ŋu “ɖe gaviɖekpɔkpɔ dzaa ko ta.” Ganyawo ƒe amemiamia hã nye nu bubu si na dzila aɖewo susunɛ be yewoato yewovi nyɔnua dzi akpɔ gakuxi aɖe gbɔe.a

Dzila aɖewo gbea wo vinyɔnuwo tsɔtsɔna be woaɖe elabena wole mɔ kpɔm na ame aɖe si ava na ga gã. Nusia ate ŋu ahe kuxi sesẽwo vɛ. Nyadzɔdzɔŋlɔla aɖe si le Afrika ƒe ɣedzeƒe ŋlɔ be: “Ðekakpui aɖewo kplɔa woƒe lɔlɔ̃tɔwo sinae kple susu be yewoasi le to kple lɔ̃xo nyamesesẽtɔwo ƒe tabianu gbogboawo nu.” Gbɔdɔdɔ ƒe agbegbegblẽnɔnɔe dona tsoa eme ne wodi kokoko be woaxɔ tabianu xɔasi. Gakpe ɖe eŋu la, ɖekakpui aɖewo wɔa nusianu ƒlea wo srɔ̃a gake wova zua fenyilawo. South Africatɔ hadomekpekpeɖeŋudɔwɔla aɖe xlɔ̃ nu be: “Ele be dzilawo nase nu gɔme. Mele be woanɔ ga gã biam o. Ele be srɔ̃tɔ yeyeawo nanɔ agbe . . . Eyata nukata miana ɖekakpuia nanyi fe?”

Aleke dzila Kristotɔwo aɖo nugɔmesesename ƒe kpɔɖeŋu ne wole asi ƒom be woaxe nyɔnutabianu alo be woaxee na yewo? Ŋkubiãnyae wònye, elabena Biblia de se be: “Mina amewo katã nanyae be mienye nugɔmeselawo.”—Filipitɔwo 4:5, NW.

Biblia ƒe Gɔmeɖose Siwo me Nugɔmesese Le

Ne dzila Kristotɔwo alɔ̃ anɔ anyi aƒo nyɔnutabianu ƒe asi alo womaƒoe o la, woawo ŋutɔ ƒe nyae. Ne woanɔ anyi agblɔe la, ele be woawɔe ɖe Biblia ƒe gɔmeɖosewo nu. Mawu ƒe Nya gblɔ be: “Mina miaƒe susu navo tso galɔlɔ̃ me.” (Hebritɔwo 13:5) Ne gɔmeɖose sia medze ne wole srɔ̃ɖenuwo nana gblɔm o la, ke dzila Kristotɔ anɔ eɖem anɔ fiafiam be yemenye kpɔɖeŋu nyui ɖola o. Wobia tso ŋutsu siwo le agbanɔamedzinɔƒewo le Kristo-hamea me si be woanye ‘nugɔmeselawo,’ menye ‘galɔ̃lawo’ alo ‘viɖe ƒoɖi dilawo’ o. (Timoteo I, 3:3, 8) Woate ŋu aɖe Kristotɔ si tsɔa ŋukeklẽ kple dzimesesẽ tafaa ame xɔa nyɔnutabianu xɔasi le esi la le hamea me gɔ̃ hã.—Korintotɔwo I, 5:11, 13; 6:9, 10.

Le kuxi siwo do tso ŋukeklẽ me ta la, dukɔ aɖewo de se siwo ɖo seɖoƒe na nyɔnutabianu. Le kpɔɖeŋu me, se aɖe si wode le Ɣetoɖoƒe Afrika-dukɔ si nye Togo me gblɔ be “woate ŋu ana nu alo axe ga alo awɔ evea siaa” atsɔ abia nyɔnu tae. Sea gblɔ kpee be: “Mele be ga la nasɔ gbɔ wu F CFA 10,000 (US$20.00) le mɔ aɖeke nu o.” Biblia dea se na Kristotɔwo enuenu be woanye dumevi sedziwɔlawo. (Tito 3:1) Ne dziɖuɖua mede se sia ƒomevi o gɔ̃ hã la, Kristotɔ vavãtɔ ya awɔ se dzi. Ana dzitsinya nyui nanɔ esi le Mawu ŋkume eye mazu nuɖianu na ame bubuwo o.—Romatɔwo 13:1, 5; Korintotɔwo I, 10:32, 33.

Amekae Agblɔ Nusi Woana?

Le nuto aɖewo me la, alesi woƒoa asi ɖe tabianua ŋu doa go kple gɔmeɖose vevi bubu aɖe. Biblia gblɔ be vifofoae wòle be wòakpɔ eƒe aƒemenyawo gbɔ. (Korintotɔwo I, 11:3; Kolosetɔwo 3:18, 20) Eyatae wobia tso amesiwo tsɔa agbanɔamedziwo le hamea me si be woanye ŋutsu siwo “[kpɔa] wo viwo kple woa ŋutɔwo ƒe aƒewo dzi nyuie.”—Timoteo I, 3:12.

Gake ate ŋu anye nusi bɔ wowɔna le nuto aɖewo me be woagblẽ srɔ̃ɖenya veviwo gbɔgblɔ ɖe ƒome ƒe ta ƒe ƒometɔwo si me. Eye ƒometɔ siawo biana be woana tabianua ƒe akpa aɖe yewo. Nusia va nyea dodokpɔ na Kristotɔwo ƒe ƒomewo. Be woawɔ nu ɖe dekɔnu nu ta la, ƒome ƒe ta aɖewo ɖea mɔ na ƒometɔ dzimaxɔsetɔwo be woaka asi gã si woaxɔ ɖe nyɔnua ta. Ewɔe be ɣeaɖewoɣi nyɔnuvi Kristotɔ va ɖea dzimaxɔsetɔ. Nusia tsi tre ɖe nuxlɔ̃me si wona be Kristotɔwo naɖe srɔ̃ ‘le Aƒetɔ la me ko’ ŋu. (Korintotɔwo I, 7:39) Womate ŋu abu ƒome ƒe ta si ɖea mɔ eƒe ƒometɔ dzimaxɔsetɔwo wɔa nyametsotso siwo va gblẽa nu le viawo ƒe gbɔgbɔmededienɔnɔ ŋu be enye “amesi kpɔa ye ŋutɔ ƒe aƒe dzi nyuie” o.—Timoteo I, 3:4.

Abe alesi wònɔ le blemafofo mawuvɔ̃la Abraham gome ene la, nukae woawɔ ne wòadzɔ be vifofo Kristotɔ manɔ eteƒe woagblɔ nusiwo woana le viawo dometɔ ɖeka ƒe srɔ̃ɖeɖe me o? (Mose I, 24:2-4) Ne woatia ame aɖe wòawɔe la, ke ele be vifofo Kristotɔa nakpɔ egbɔ be amea nawɔ ɖe mɔfiame siwo sɔ kple Biblia ƒe gɔmeɖose siwo me nugɔmesesename dze le la dzi. Azɔ la, hafi woanɔ anyi be woagblɔ tabianua la, ele be dzila Kristotɔwo nabu nuwo ŋu nyuie eye woagaɖe mɔ be kɔnuwo alo nudidi siwo me nugɔmesesename medze le o la naflu wo o.—Lododowo 22:3.

Nɔnɔme Siwo Medze Kristotɔwo O Tsitsri

Biblia tsri dada kple ‘agbemenunɔamesiwo tsɔtsɔ ƒo adegbee.’ (Yohanes I, 2:16; Lododowo 21:4) Ke hã ame ɖekaɖeka aɖewo siwo le Kristo-hamea me ɖe nɔnɔme siawo fia le srɔ̃ɖenyawo gbɔgblɔ me. Ame aɖewo wɔ nu wòɖi xexeametɔwo tɔ ale be wotsɔ tabianu gã si xem wole alo esi xɔm wole ƒo adegbee. Gake Gbetakpɔxɔ Habɔbɔa ƒe alɔdzedɔwɔƒe aɖe si le Afrika ka nya ta be: “Srɔ̃ŋutsu aɖewo meɖe amebubu fia o elabena wova nɔ wo srɔ̃ nyɔnuwo bum be ‘gbɔ̃’ ƒe asi dzie yewoƒle wo ɖo, le esi nyɔnuawo ƒe ƒomewo se nu gɔme eye womebia nu fũ o ta.”

Tabianu gã biãa ŋu na Kristotɔ aɖewo eye nusi do tso eme wɔ nublanui. Le kpɔɖeŋu me, de ŋugble le nyatakaka sia si tso Gbetakpɔxɔ Habɔbɔa ƒe alɔdzedɔwɔƒe bubu gbɔ ŋu kpɔ: “Enye nu sesẽ na nɔviŋutsu tre akpa gãtɔ be woaɖe srɔ̃ eye esesẽ na nɔvinyɔnuawo be woakpɔ kpeɖeŋutɔwo. Ewɔe be amesiwo ɖem wole le hameawo me va le agbɔ sɔm ɖe edzi le gbɔdɔdɔ ƒe agbegbegblẽnɔnɔ ta. Nɔviŋutsu aɖewo yia tomenukuƒewo ɖadia sika alo lotamekpe bene yewoadzra akpɔ ga aɖe srɔ̃. Woate ŋu axɔ ƒe ɖeka alo eve alo esi wu nenema le afima, eye zi geɖe la, wogbɔdzɔna le gbɔgbɔ me esi womegadea ha kple nɔviwo kpakple hamea o ta.”

Bene woaƒo asa na emetsonu wɔnublanui siawo la, ele be dzila Kristotɔwo nasrɔ̃ amesiwo bi le hamea me ƒe kpɔɖeŋu. Togbɔ be menye dzilae apostolo Paulo nye o hã la, ese nu gɔme na haxɔsetɔwo. Ekpɔa egbɔ be yemezu agba kpekpe na ame aɖeke o. (Dɔwɔwɔwo 20:33) Nyateƒee, ne dzila Kristotɔwo alɔ̃ anɔ anyi woagblɔ nusi woana ɖe nyɔnu ta la, ele be woade ŋugble le apostoloa ƒe ɖokuitɔmadimadi ƒe kpɔɖeŋua ŋu. Le nyateƒe me la, gbɔgbɔ ʋã Paulo wòŋlɔ be: “Mizu hanyesrɔ̃lawo, nɔviwo, eye milé ŋku ɖe amesiwo zɔna nenema ke la ŋuti, abe alesi míenye kpɔɖeŋu na mi ene.”—Filipitɔwo 3:17.

Nugɔmesesename ƒe Kpɔɖeŋuwo

Dzila Kristotɔ geɖe ɖo nugɔmesesename ƒe kpɔɖeŋu nyuiwo le srɔ̃ɖenuwo biabia me. De ŋugble le Joseph kple srɔ̃a Mae, amesiwo nye ɣeyiɣiawo katã ƒe nyanyuigblɔlawo ŋu kpɔ.b Solomon Ƒukpowo dometɔ ɖeka si dzi nyɔnutabiabia nyea taɖui ɣeaɖewoɣi le lae wole. Joseph kple Mae wowɔ ɖoɖo be wo vinyɔnu Helen naɖe srɔ̃ le ƒukpo si te ɖe wo ŋu dzi kple susu be woaƒo asa na kuxi mawo. Nenemae wowɔe le wo vinyɔnu bubu, Esther, gome. Joseph lɔ̃ hã be toayɔvi Peter naxe tabianu si bɔbɔ wu esi sɔ woxɔna gɔ̃ hã. Esi wobia Joseph be nukatae wòwɔ nenema hã la, egblɔ be: “Nyemedi be mado agba na toyɔvinye mɔɖela la o.”

Yehowa Ðasefo geɖe siwo le Afrika hã ɖo nugɔmesesename ƒe kpɔɖeŋu nyui. Le teƒe aɖewo la, ƒometɔ geɖe kpɔa mɔ be woade ga gã aɖe kotoku me na yewo hafi woava gblɔ nusi tututu nye tabianu si woaxe. Eye bene nyɔnua nate ŋu aka ŋutsua si la, ele be ŋutsua nado ŋugbe be yeaxe yeƒe ŋugbetɔa yometɔ ƒe nyɔnutabianu ne wòava ɖe srɔ̃.

Gake de ŋugble le Kossi kple srɔ̃anyɔnu Mara ŋu kpɔ. Wo vinyɔnu Beboko ɖe Yehowa Ðasefowo ƒe dzikpɔla mɔzɔla aɖe nyitsɔ laa. Hafi woaɖe srɔ̃ la, ƒometɔwo va ɖe fu na dzilaawo vevie be woaxɔ tabianu gã aɖe bene yewo hã yewoaxɔ akpa aɖe. Gake dzilaawo te afɔ ɖe to eye womewɔ ɖe nudidi mawo dzi o. Ke boŋ woƒo asi kple woƒe toyɔvia tẽ, eye nu sue aɖe koe woxɔ ɖe wo vinyɔnua ta eye wogatrɔ eƒe afã na srɔ̃tɔawo be woatsɔ adzra ɖo ɖe woƒe srɔ̃kpekpe ŋu.

Ame bubu si gaɖo kpɔɖeŋu le dukɔ ma ke mee nye Ðasefo ɖetugbi aɖe si ŋkɔe nye Itongo. Gbã la, edzilawo bia be woana tabianu sue aɖe ko. Gake ƒometɔwo bia be woagada gaa ɖe ɖe edzi. Nyaa va sesẽ, eye wòwɔ abe ga si ƒometɔawo bia koe woava xe ene. Togbɔ be Itongo nye amesi ŋu kpena hã la, etsi tre eye wògblɔ bubutɔe be yedi kokoko be yeaɖe Sanze, amesi nye Kristotɔ dovevienu aɖe, le alesi yewo ɖoe nu. Emegbe egblɔ kple dzinɔameƒo be, “Mbi ke” (egɔmee nye, “Megblɔe vɔ”) eye wònɔ anyi. Sambeko, si nye dadaa Kristotɔ de edzi. Womegadzro nya aɖeke me o, eye wo kple ŋutsua woɖe wo nɔewo abe alesi woɖoe ene.

Nanewo li siwo ŋu dzila Kristotɔ lɔ̃amewo atsi dzi ɖo wu viɖe si woakpɔ tso nyɔnutabianu me. Srɔ̃ŋutsu aɖe si le Cameroon gblɔ be: “Lɔ̃xonye zãa mɔnukpɔkpɔ ɖesiaɖe tsɔ gblɔna nam be nusianu si le asinye matsɔ ana ye be tabianu la, matsɔe akpɔ yevinyɔnua ƒe nuhiahiãwo gbɔ boŋ.” Dzila lɔ̃amewo tsia dzi ɖe wo viwo ƒe gbɔgbɔmededienɔnɔ hã ŋu. Le kpɔɖeŋu me, de ŋugble le Farai kple Rudo, amesiwo le Zimbabwe eye wowɔa dɔ si nye gbeƒãɖeɖe Mawu Fiaɖuƒea ŋuti nyanyuia ɣeyiɣiawo katã ŋu kpɔ. Togbɔ be womexɔa fetu o hã la, wotsɔ wo vinyɔnu eve na woɖe hexɔ ga si woxɔna la ƒe sue aɖe ko. Nukatae wowɔ nenema? Wodi be ŋutsu siwo lɔ̃a Yehowa vavã la ƒe atsuƒenɔnɔ naɖe vi na yewo vinyɔnuawo. Wogblɔ be: “Nusi míekpɔ be enye vevitɔe nye mía vinyɔnuawo kple mía to kple lɔ̃xo yɔviwo ƒe gbɔgbɔmemenyenye.” Nya sia fa dzi na ame ale gbegbe! Ele be woakafu lɔ̃xo kple to siwo lɔlɔ̃ ʋã wotsi dzi ɖe wo viwo ƒe dedienɔnɔ le gbɔgbɔ me kple ŋutilãme ŋu ale gbegbe.

Nugɔmesesename ƒe Viɖewo

Woyra Joseph kple Mae siwo le Solomon Ƒukpowo dzi le alesi wotsɔ dɔmenyonyo kple beléle kpɔ wo vinyɔnuwo ƒe srɔ̃ɖenyawo gbɔe ta. Ewɔe be wo lɔ̃xo kple to yɔviwo mezu fenyilawo o. Ke boŋ srɔ̃tɔawo kpakple wo vinyɔnu kple srɔ̃a zã ƒe geɖe le Fiaɖuƒegbedasia gbɔgblɔ ɣeyiɣiawo katã me. Esi Joseph bu nusi dzɔ va yi ŋu la, egblɔ be: “Nyametsotso si mía kple nye ƒomea míewɔ la ɖe vi geɖe. Enye nyateƒe be ɣeaɖewoɣi amesiwo mese nu gɔme o la yɔ ʋu ɖe mía nu, gake dzitsinya nyui le asinye eye nye dzi dze eme esi mekpɔe vinyewo like hebiã ŋku ɖe Yehowa subɔsubɔ ŋu. Dzi le woawo hã dzɔm, eye dzi le mía kple srɔ̃nye dzɔm wu gbɔgblɔ.”

Ƒomedodo nyui si le to, lɔ̃xo, toyɔvi, kple lɔ̃xoyɔviwo dome hã nye viɖe bubu. Le kpɔɖeŋu me, Zondai kple Sibusiso wonye lɔlɔ̃nu faa dɔwɔlawo le Gbetakpɔxɔ Habɔbɔa ƒe alɔdzedɔwɔƒe le Zimbabwe, eye wo srɔ̃nyɔnu siwo nye ŋutilãmenɔvinyɔnuwo hã kpe ɖe wo ŋu. Dakarai, si nye wo to hã nye ɣeyiɣiawo katã ƒe nyanyuigblɔla si mexɔa fetu o. Egblɔ le tabianuawo gblɔɣi be yeaxɔ nusianu si woate ŋu ana ko. Zondai kple Sibusiso gblɔ be: “Míelɔ̃ mía toa vevie, eye míawɔ nusianu si míate ŋui akpe ɖe eŋu ne hiã tui.”

Ẽ, nugɔmesese na ame ne wole asi ƒom ɖe nyɔnutabianu ŋu hea ƒome ƒe dzidzɔkpɔkpɔ vɛ. Le kpɔɖeŋu me, srɔ̃tɔ yeyeawo mazu fenyilawo o, eye wote ŋu dzea srɔ̃ɖegbenɔnɔ gɔme bɔbɔe. Ewɔe be ɖekakpui srɔ̃tɔ geɖe le gbɔgbɔmeyayrawo yome, eye eƒe ɖee nye gbeƒãɖeɖe kple nusrɔ̃lawɔwɔ dɔ si hiã kpata la wɔwɔ ɣeyiɣiawo katã. Eva nyea Yehowa Mawu, srɔ̃ɖeɖe Gɔmeɖoanyila lɔlɔ̃tɔ la ŋutikɔkɔ.—Mateo 24:14; 28:19, 20.

[Etenuŋɔŋlɔwo]

[Aɖaka si le axa 27]

WOTRƆ NYƆNUTABIANUA NA WO

Le nuto aɖewo me la, womedea bubu ŋugbetɔa kple edzilawo ŋu ne tabianua mekɔ mo dzi o. Eyata dada kple didi be ƒomea naxɔ ŋkɔ ye nyea susu si ta woƒoa asi be woana tabianu gã. Ƒome aɖe si le Lagos, Nigeria, wɔ nusi to vovo wòʋã ame. Dele, si nye wo lɔ̃xo kple to yɔvi gblɔ be:

“Srɔ̃nye ƒe ƒomea melɔ̃ mena nu xɔasiwo abe nudodo xɔasi vovovowo ƒeƒle ene, siwo wonana le nyɔnutabiabia kɔnua me o. Esime ƒonyemetɔwo tsɔ srɔ̃ɖega na gɔ̃ hã la, woƒe nyanuɖela bia be: ‘Ðe miele nyɔnuvi sia xɔm wòanye mia srɔ̃ alo mia vinyɔnua?’ Ƒonyemetɔwo ƒe nu sɔ wogblɔ be: ‘Míedi be míaxɔe wòanye mía vinyɔnu.’ Ema megbe srɔ̃ɖega la kpɔtɔ nɔ agbalẽkotoku si me míedee me wogbugbɔe na mí.

“Megakpɔa ŋudzedze ɖe alesi srɔ̃nye ƒometɔwo kpɔ míaƒe srɔ̃ɖeɖea gbɔe ŋu vaseɖe egbe sia. Ena medea bubu gã wo ŋu. Gbɔgbɔmenukpɔsusu nyui si le wo si na mebua wo be wonye ƒonyemetɔ kpamkpamwo. Ekpɔ ŋusẽ geɖe ɖe alesi mebua srɔ̃nyee dzi. Meva kpɔ ŋudzedze deto ɖe eŋu le alesi eƒe ƒometɔwo wɔm la ta. Ne masɔmasɔ ɖo mía dome la, nyemena wòzua nya gã o. Ne meɖo ŋku ƒome si me wòtso dzi ko la, masɔmasɔa megaɖia naneke o.

“Xɔlɔ̃wɔwɔ bla ƒonyemetɔwo kple eƒe ƒometɔwo. Vaseɖe fifia, si nye ƒe eve le míaƒe srɔ̃kpekpe megbe gɔ̃ hã la, fofonye gaɖoa nunanawo kple nuɖuɖuwo ɖe srɔ̃nye ƒe ƒometɔwo kokoko.”