Ale Si Míakpe Asi Ðe Mía Nɔviwo Ƒe Nuhiahiãwo Gbɔ Kpɔkpɔ Ŋu

NƆVIŊUTSU François, si nye hamemetsitsi le dukɔ madeŋgɔ aɖe me gblɔ be: “Esi woda akɔ hetia dukplɔla yeye megbe teti la, ʋunyaʋunyawɔwɔ ɖo dukɔa me, si na wòva hiã be Yehowa Ðasefo akpe geɖe nasi le woƒe aƒewo me. Nuɖuɖu vɔ, atikewo kpɔkpɔ sesẽ, eye nu ʋɛ siwo nàkpɔ aƒle la xɔ asi ale gbegbe. Wotu gadzraɖoƒewo, ga vɔ le mɔ̃ siwo me woɖea ga le me eye ɖewo hã gbe dɔwɔwɔ.”

Enumake nɔvi siwo le alɔdzedɔwɔƒea te ga kple nuhiahiã veviwo ɖoɖo ɖe Ðasefo siwo si dzo le woƒe aƒewo me heva ƒo ƒu ɖe Fiaɖuƒe Akpatawo me le dukɔa me godoo. Dunyaheha eveawo siaa xe mɔwo, gake esi wonya be Ðasefowo medea nu dunyahehe me kura o ta la, zi geɖe la, woɖea mɔ na alɔdzedɔwɔƒea ƒe ʋuwo wova yina.

François gblɔ be: “Esi míele mɔ dzi yina Fiaɖuƒe Akpata aɖe me la, asrafo siwo de xa ɖi la te tudada míaƒe ʋua. Gake ɖeko tukpeawo toa mía dome yina. Esi míekpɔ asrafo aɖe si lé tu ɖe asi gbɔna mía gbɔ kple du la, míeku ʋua yi megbemegbe, eyome míetrɔ ʋua hekui sesĩe trɔ yi alɔdzedɔwɔƒea. Míeda akpe na Yehowa be míetsi agbe. Le ŋufɔke la, mía nɔvi 130 siwo nɔ Fiaɖuƒe Akpata ma me la dzo le nuto ma me yi afi si le dedie wu. Nɔvi aɖewo va tsi alɔdzedɔwɔƒea, eye míekpɔ woƒe ŋutilã kple gbɔgbɔ me nuhiahiãwo gbɔ va se ɖe esime ʋunyaʋunyaa nu va yi.”

François gblɔ yi edzi be: “Emegbe alɔdzedɔwɔƒea xɔ akpedalɛta gbogbo aɖewo tso nɔvi siwo le dukɔa ƒe akpa vovovowo gbɔ. Esi nɔvi mawo kpɔ kpekpeɖeŋu si gbegbe wo nɔvi siwo tso teƒe bubuwo na wo la, ena woƒe kaka ɖe Yehowa dzi me gasẽ ɖe edzi.”

Ne afɔku ɖe sia ɖe ƒomevi dzɔ la, míegblɔna na mía nɔvi siwo hiã tu la be “dzo naɖo lãme na mi, eye miɖu nu ɖi ƒo” o. (Yak. 2:15, 16) Ke boŋ míedzea agbagba ɖe sia ɖe kpɔa woƒe ŋutilãmenuhiahiãwo gbɔ na wo. Nenema kee le ƒe alafa gbãtɔ me esi nusrɔ̃lawo se be dɔ gã aɖe ato la, “nusrɔ̃lawo ɖoe kplikpaa, wo dometɔ ɖe sia ɖe ale si wòate ŋui, be yewoawɔ kpekpeɖeŋudɔ to nane ɖoɖo ɖe nɔvi siwo le Yudea la dzi.”—Dɔw. 11:28-30.

Mí Yehowa subɔla siwo li egbea hã míelɔ̃na faa naa ŋutilã me kpekpeɖeŋu ame siwo hiã tu. Gake gbɔgbɔmenuwo hã hiã amewo vevie. (Mat. 5:3) Yesu de dɔ asi na eyomedzelawo be woawɔ amewo woanye nusrɔ̃lawo, ale be woakpe ɖe wo ŋu woanyae be gbɔgbɔmenuwo hiã yewo eye woaɖe afɔ siwo hiã atsɔ akpɔ wo gbɔ. (Mat. 28:19, 20) Mía dometɔ ɖe sia ɖe zãa eƒe ɣeyiɣi, ŋusẽ kple nunɔamesi geɖe le dɔ sia wɔwɔ me. Eye abe habɔbɔ ene la, míezãa gadzɔdzɔwo tsɔ kpɔa mía nɔviwo ƒe nuhiahiãwo gbɔ; ke hã Fiaɖuƒea ƒe nuwo dodo ɖe ŋgɔ kple nya nyui gbɔgblɔ dɔa koŋ ŋue míezãa gaa ɖo. Míetoa esiawo dzi ɖenɛ fiana be míelɔ̃ Mawu kple mía haviwo.—Mat. 22:37-39.

Ame siwo katã doa alɔ Yehowa Ðasefowo ƒe xexea me katã ƒe dɔa ate ŋu aka ɖe edzi be wozãa yewoƒe gadzɔdzɔwo nyuie le mɔ si sɔ nu. Ðe nàte ŋu akpe asi ɖe nɔviwòwo ƒe nuhiahiãwo gbɔ kpɔkpɔ ŋua? Ðe nèdi be yeado alɔ nusrɔ̃lawɔwɔdɔa? Ekema “mègate nu nyui hiãtɔ, nenye be ŋutete le ŋuwò na ewɔwɔ o.”—Lod. 3:27.