Dzra Ðo Ðe Magazinedɔ Wɔwɔ Ŋu Le April Me

Abe alesi wòdze le míaƒe ƒe 1996 ƒe Ɣletigbalẽa dzi ene la, míaɖu Aƒetɔ ƒe Fiẽnuɖuɖu la le ƒe sia ƒe April 2 lia dzi. Mina azãɖuɖu vevi sia nade dzo mía dometɔ ɖesiaɖe me be wòatsɔ dzonɔameme amã magazine le April bliboa me. Magazine siwo ŋudɔ míawɔ la sɔ ɖe ɣeyiɣia dzi ale gbegbe! April 1 ƒe Gbetakpɔxɔ ahe susu ayi ƒe si va yi ƒe nutome gã takpekpe ƒe dutoƒonuƒo si ƒe tanyae nye “Kafu Fia Mavɔmavɔtɔ La!” dzi. April 15 ƒe Gbetakpɔxɔ aƒo nu tso ƒe si va yi ƒe April me dutoƒonuƒo tɔxɛ ƒe tanya, “Alakpasubɔsubɔhawo ƒe Nuwuwu Ðo Vɔ” ŋu. Ele be ƒe sia me ƒe dutoƒonuƒo tɔxɛ si ƒe tanyae nye “Anyinɔnɔ Mokakamanɔŋui le Dzidzime Gɔglɔ̃ Titina” si woaƒo le April 21 lia dzi la nagade dzo geɖe wu mía me. Míana April 22 lia ƒe Nyɔ! si ƒe tanyae nye “Esime Aʋawɔwɔ Maganɔ Anyi O”.

Ele be April sia nanye ɣleti tɔxɛ hena magazine mamã kple nudɔdɔ wɔwɔ esi míele esia wɔm tsɔ le Fiaɖuƒe Ŋuti Nya si míemã le ƒe si va yi me la kplɔm ɖoe. Fifiae nye eŋuti ɖoɖo wɔɣi. Ame geɖe adi be yewoawɔ kpekpeɖeŋu mɔɖeɖedɔa. Miadɔ April ƒe magazine agbɔsɔsɔ bubu siwo hiã mi la kpee. Miate ŋu awɔ ɖoɖo ɖe Magazine Ŋkekewo ŋu, si me amesiame si ate ŋui la ate ŋu akpɔ gome le—le ŋdi, ŋdɔ, kple/alo fiẽ me hã. Mina mí katã ‘míazu nyadziwɔlawo.’ Mina míawo hã míate ŋu agblɔ abe alesi wogblɔe ɖi le Mesia la ŋu le Psalmo 69:10 ene be: “Ŋuʋaʋã ɖe wò aƒe ŋu mim.”—Yak. 1:22; Yoh. 2:17.