Medi be Madze Biblia Nusɔsrɔ̃ Wɔwɔ Gɔme!
1 Mía dometɔ geɖe ɖe Biblia-nusɔsrɔ̃ wɔwɔ ƒe didi fia, eye susu nyui aɖee wònye. Míeɖoa míaƒe taɖodzinu be míawɔ nusrɔ̃la yeyewo la gbɔ to Biblia-nusɔsrɔ̃ wɔwɔ dɔa me. (Mat. 28:19, 20) Gake mía dometɔ geɖe míede gbeadzi ɣleti geɖe, ɖewohĩ míedee ƒe geɖe, gake dzidzɔ tɔxɛ si dona tsoa nyateƒea fiafia ame aɖe me la mesu mía si kpɔ o. Nukae míate ŋu awɔ tso esia ŋu le November me? Esi wònye Sidzedze-gbalẽa zã gee míele le ɣleti sia me ta la, míate ŋu adze agbagba etɔxɛe be míatsɔe adze Biblia-nusɔsrɔ̃ yeyewo gɔme.
2 Ðo Kwasiɖanuwuwu Ðeka alo Geɖe Ði: Míele dzi dem ƒo na amesiame be wòaɖo ɣeyiɣi aɖe ɖi le ɣleti sia me aɖoe kplikpaa be yeadze Biblia-nusɔsrɔ̃ yeye aɖe wɔwɔ gɔme. Ele be Hamea ƒe Agbalẽ Me Nusɔsrɔ̃ dzikpɔlawo natia kwasiɖanuwuwu si(wo) woazã koŋ na taɖodzinu sia eye woawɔ ɖoɖo na woƒe ƒuƒoƒoa me tɔwo katã be woadze agbagba awɔ tɔtrɔyiwo.
3 Tsɔ wò tɔtrɔyiwɔwɔ ŋuti nuŋlɔɖiwo ɖe asi va gbeadziyikpekpe siawo me. Azɔ yi amesiwo katã ɖe ɖetsɔleme fia, amesiwo xɔ agbalẽ, alo va kpekpewo la gbɔ. Wò taɖodzinu koŋ le sasrãkpɔ ɖesiaɖe si nàwɔ me nanye be yeadze nusɔsrɔ̃ aɖe gɔme.
4 Miwɔ Biblia Nusɔsrɔ̃ ƒe Wɔwɔfia: Le kpekpewo hena gbeadziyiyi aɖewo me la, miwɔ wɔwɔfia si wodzra ɖo nyuie tsɔ fia alesi woadze nusɔsrɔ̃ gɔmee ne wole tɔtrɔyiwo wɔm. Àte ŋu agblɔ be: “Biblia le ame geɖe si, gake womede dzesii be nyabiabia vevi siwo dze ŋgɔ mí katã le agbe me ƒe ŋuɖoɖowo le eme o. [Ʋu Sidzedze-gbalẽa ƒe emenyawo ɖoƒe tsɔ fiae, eye nàxlẽ ta 3, 5, 6, 8, kple 9 ƒe tanyawo.] Ne míezã Biblia-srɔ̃gbalẽ sia gaƒoƒo ɖeka alo esi wu ema le kwasiɖa ɖeka me la, àte ŋu ase Biblia me nya veviwo gɔme le ɣleti ʋee aɖewo ko me. Ne àdi be yeatia tanya siawo dometɔ ɖeka la, anye dzidzɔ nam be mafia alesi míewɔnɛ la wò.” Ne le vovomanɔanyi ta amea medi be yeasrɔ̃ nua o la, ɖe nu me nɛ be ɖoɖo bubu le mía si si mexɔa ɣeyiɣi kura o. Tsɔ Nusi Mawu Di ƒe agbalẽ gbadza la fiae eye nàdoe ɖe egbɔ be yeawoasrɔ̃ ta ɖeka kpuie kwasiɖa ɖesiaɖe hena aɖabaƒoƒo 15 va ɖo 30.
5 Ne mí katã míedze agbagba be míadze nusɔsrɔ̃wo wɔwɔ gɔme eye míedo gbe ɖa bia Yehowa ƒe yayra ɖe míaƒe agbagbadzedzewo dzi la, míakpɔ nusrɔ̃vi yeyewo godoo! (Yoh. I, 5:14, 15) Ne èle Biblia-nusɔsrɔ̃ dim nàwɔ la, ɖewohĩ esiae nye mɔnukpɔkpɔ na wò be nàdze ɖe wɔwɔ gɔme.