Nyabiaɖaka

◼ Nukata wòhiã be mía ɖɔ ŋu ɖo ne míele ɖase ɖim to lɛtaŋɔŋlɔ me?

Lɛtaŋɔŋlɔ atsɔ aɖi ɖase nye nyanyuia gbɔgblɔ mɔnu si wokpɔ be eɖea vi vaseɖe fiafia. Ke hã, nyitsɔ laa ƒe xexemenudzɔdzɔwo wɔe be amewo va le ŋu ɖɔm ɖo le lɛta siwo tsoƒe womenya o ʋuʋu ŋu. Womekana ɖe agbalẽ siwo tsoƒe womenya o alo esiwo ƒe agbalẽkotokuwo dzi eŋlɔla ƒe adrɛs medze le o dzi o, vevietɔ ne asie wotsɔ ŋlɔe eye lɛtaa lolo. Aƒemenɔlawo ate ŋu atsɔ agbalẽ mawo ƒomevi aƒu gbe maʋumaʋui. Aleke míawɔ be nusia madzɔ o?

Ne anya wɔ la, woatsɔ mɔ̃ aŋlɔ lɛta la kple adrɛs si anɔ agbalẽkotokua siaa dzi. Ele be woaŋlɔ aƒemenɔlaa ƒe ŋkɔ ŋutɔ ɖe agbalẽkotokua dzi. Mègaŋlɔ ɖe edzi be na “Aƒemenɔlaa” ko evɔ o. Tsɔ kpe ɖe eŋu la, ŋlɔ wò adrɛs si dzi nàdi be yeaxɔ ŋuɖoɖoa toe ɖe agbalẽkotokua dzi ɣesiaɣi. Ne manya wɔ be nàtsɔ wò ŋutɔ wò adrɛs ana o la, tsɔ mɔ̃ ŋlɔ wò ŋkɔ kple Fiaɖuƒe Akpataa ƒe adrɛs ɖe edzi. Mègaɖo lɛta siwo dzi mèŋlɔ wò ŋkɔ ɖo o ɖe aƒemenɔlaa o. Mègazã alɔdzedɔwɔƒea ƒe adrɛs gbeɖe o.—Kpɔ November 1996 Míaƒe Fiaɖuƒe Subɔsubɔdɔ ƒe Nyabiaɖaka.

Woate ŋu akpɔ aɖaŋuɖoɖo bubuwo kple alesi wòle be woaŋlɔ lɛta sia ƒomevii ƒe kpɔɖeŋu le agbalẽ si nye Na Teokrasi Subɔsubɔ Suku ƒe Hehenana Naɖe Vi na Wò, axa 71-3. Mɔfiame siawo akpe ɖe mía ŋu míazã lɛtawo le mɔ si aɖe vi bliboe nu bene míatsɔ nyanyuia ayi na amewo.