Ðe Nye Hã Mate Ŋu Aɖe Gbeƒãa?
1. Nu ka tae mele be míase le mía ɖokui me be míedze aɖe gbeƒã o?
1 Ne èsena le ɖokuiwò me be yemate ŋu aɖe gbeƒã nyuie o hã la, lé dzi ɖe ƒo! Menye suku si gbegbe míede alo ŋutete si le mía si ye nana míetea ŋu ɖea gbeƒã nyuie o. Wogblɔ le nusrɔ̃la gbãtɔwo dometɔ aɖewo ŋu be wonye “ame manyagbalẽwo kple ame tsɛwo.” Gake wote ŋu ɖe gbeƒã nya nyui la nyuie, elabena woɖoe kplikpaa be yewoadze Yesu ƒe kpɔɖeŋu yome.—Dɔw. 4:13; 1 Pet. 2:21.
2. Nu siwo ɖe dzesi le Yesu ƒe nufiafia ŋu dometɔ aɖewo ɖe?
2 Ale Si Yesu Fiaa Nui: Ne ele nu fiam la, eƒe nyawo nɔa bɔbɔe, wo me kɔna, eye wo gɔme nya sena bɔbɔe. Nya siwo wòbiana, kpɔɖeŋu siwo wòwɔna kple ŋgɔdonya bɔbɔe siwo wòzãna la nana amewo dina be yewoaɖo toe. (Mat. 6:26) Etsɔ ɖe le eme na amewo vevie. (Mat. 14:14) Tsɔ kpe ɖe eŋu la, eka ɖe nya siwo wògblɔna la dzi, eye amewo hã kana ɖe eƒe nyawo dzi, elabena enyae be Yehowa de dɔ asi na ye hena ŋusẽ ye be yeatsɔ awɔe.—Luka 4:18.
3. Aleke Yehowa kpena ɖe mía ŋu míewɔa míaƒe subɔsubɔdɔa dea goe?
3 Yehowa Kpena Ðe Mía Ŋu: Míaƒe Nufiala Gã la toa eƒe Nya la kple eƒe habɔbɔa dzi naa hehe si hiã la mí be míaɖe gbeƒã nya nyui la nyuie. (Yes. 54:13) Esi Yehowa na woŋlɔ ale si Yesu fia nui la ɖi na mí ta la, míate ŋu anya mɔnu siwo wòzã la ahasrɔ̃ wo. Yehowa naa eƒe gbɔgbɔ kɔkɔe la mí, eye wòtoa kpekpeawo dzi naa hehe mí. (Yoh. 14:26) Ena gbeƒãɖela bibiwo hã le hamea me, ale be míesrɔ̃a nu tso wo gbɔ, eye wokpena ɖe mía ŋu míezua gbeƒãɖela bibiwo.
4. Nu ka tae wòle be míase le mía ɖokui me be míedze aɖe gbeƒã nya nyuia?
4 Ele be míase le mía ɖokui me be míedze aɖe gbeƒã, elabena “míaƒe dzedze nyuie la tsoa Mawu gbɔ.” (2 Kor. 3:5) Ne míeɖoa ŋu ɖe Yehowa ŋu, eye míewɔa ɖoɖo nyui siwo katã wòwɔ na mí la ŋu dɔ ɣesiaɣi la, ekema míanɔ “dzadzraɖoɖi keŋkeŋ na dɔ nyui sia dɔ nyui wɔwɔ.”—2 Tim. 3:17.