Ale Si Nàwɔ Abi Ðe Ðaseɖiɖidɔa Me—Ðetsɔtsɔ Le Eme Na Amewo

Nu Si Ta Wòle Vevie: Yesu lɔ̃ amewo, eye wòtsɔ ɖe le eme na wo abe ame ɖekaɖekawo ene. Le kpɔɖeŋu me, gbe ɖeka esi Yesu di be yeada gbe le tokunɔ aɖe ŋu la, anya de dzesii be esia wɔwɔ le amewo dome akpe ŋu nɛ, eya ta ekplɔe do le ameha la dome hafi da dɔ nɛ. (Marko 7:31-35) Ebu eƒe nusrɔ̃lawo ŋu esi wòde dzesi afi si woƒe ŋutete se ɖo eye megblɔ nya geɖe na wo wu esi woate ŋu atsɔ o. (Yoh. 16:12) Esi Yesu trɔ yi dziƒo gɔ̃ hã la, egatsɔa ɖe le eme na amewo. (2 Tim. 4:17) Esi míenye Kristo yomedzelawo ta la, míedi be míasrɔ̃ eyama. (1 Pet. 2:21; 1 Yoh. 3:16, 18) Tsɔ kpe ɖe eŋu la, ne míebua aƒemenɔlaa ŋu hedea dzesi nɔnɔme si me wòle, nu siwo me wòtsɔ ɖe le kple eƒe kuxiwo la, míaƒe subɔsubɔdɔa atse ku wu. Ne ekpɔe be menye gbedeasia alo agbalẽ tsɔtsɔ na ye ta koe míevaa ye gbɔ o, ke boŋ míetsɔ ɖe le eme na ye vavã la, alɔ̃ faa aɖo to wu.

Ale Si Nàwɔe:

Dzra ɖo nyuie do ŋgɔ. Ðe dzi ɖi, ko alɔgbɔnu eye nàdo vivi ɖe ame ŋu.
Lé ŋku ɖe nu ŋu. Ðe nède dzesi nane si fia be ɖeviwo le esia? ekpɔa dzidzɔ ɖe aƒemelã siwo womlã alo abɔdɔwɔwɔ ŋua? subɔsubɔdzixɔse aɖewo koŋ le esia? Ðewohĩ àte ŋu atrɔ asi le wò dzeɖonyaa ŋu be wòasɔ ɖe eƒe nɔnɔmea nu.
Bia eƒe susu le nya aɖe ŋu, eye nàɖo toe nyuie, mègaxɔ nya le enu madzemadzee o. Nɔ eƒe ŋkume kpɔm nàtsɔ aɖee afia be yele to ɖomee. Da akpe nɛ ɖe eƒe nyawo ta, eye nàkafui le afi si wòsɔ le. Ƒo asa na nyahehe kplii.
Trɔ ɖe nɔnɔmea ŋu. Ne ehiã la, trɔ asi le wò dzeɖonyaa ŋu wòasɔ ɖe nu si me wòtsɔ ɖe le nu. Ðewohĩ esia masesẽ abe ale si nèsusui ene o, elabena míaƒe traktwo, agbalẽ gbadzawo kple magazinewo dzroa nyati ƒomevi vovovowo me. Ne ɣeyiɣi si nèyi egbɔ la mesɔ nɛ o, ɖewohĩ le esi vovo mele eŋu o ta la, ɖee fia be yekpɔe nenema eye nàtso wò dzeɖonyaa dzi.

Te Esia Kpɔ Le Ɣletia Me:

Ne miele ƒometadedeagu wɔm, alo miele gbeadzi la, miwɔ wɔwɔfia siwo me wòahiã le be gbeƒãɖelaa natrɔ asi le eƒe dzeɖonyaa ŋu wòasɔ ɖe nya si aƒemenɔlaa gblɔ nu.
Ɣeaɖewoɣi la, nɔviŋutsu si akpɔ kpekpe na gbeadziyiyi dzi la nadzro ale si míaɖee afia be míetsɔ ɖe ele eme na amewo la me alo awɔ eƒe wɔwɔfia.