**Ale Si Nàwɔ Abi Ðe Ðaseɖiɖidɔa Me—Zã Biblia ƒe Nufiafia Gbalẽa Nàtsɔ Afia Amewo Ale Si Míewɔa Biblia-nusɔsrɔ̃e**

Nu Si Ta Wòle Vevie: Anɔ eme be ame geɖe menya nu si míewɔnɛ ne míegblɔ be míesrɔ̃a Biblia kple amewo femaxee le woƒe aƒewo me o. Woasusui be ele be yewoanɔ ha me asrɔ̃ nu alo be agbalẽwo ɖoɖo ɖe ame le aƒe me ƒe nusrɔ̃ɖoɖo aɖee wònye. Le esi teƒe be míado nusɔsrɔ̃ ɖe egbɔ ko la, ɖe manyo be míawɔe afiae boŋ oa? Le miniti ʋɛ aɖewo ko me la, àte ŋu afia ame aɖe ale si Biblia sɔsrɔ̃ le bɔbɔe eye wòvivinae la le ʋɔtru nu gɔ̃ hã.

Ale Si Nàwɔe:

Ne èɖe ɖokuiwò nu vɔ la, bia aƒemenɔlaa be etsia dzi ɖe ale si etsɔme ava nɔ ŋu hã.
Gblɔ nɛ be ame geɖe tsia dzi ɖe nu siawo ŋu, eyome nàtsɔ Biblia ƒe Nufiafia gbalẽa ƒe emenyawo afiae. Na wòanya be nusɔsrɔ̃ siwo gɔme sese le bɔbɔe siwo ku ɖe nu siwo Biblia fia tso míaƒe etsɔme ŋu kple nyati bubuwo la le agbalẽ sia me, eye nàbiae be ta ka mee wòadi be miadzro hã.
Tsɔ agbalẽa ɖeka nɛ, eye miake ta si wòtia. Gblɔ nɛ be biabia siwo le ta ma ƒe gɔmedzedze la ƒe ŋuɖoɖowo le memama siwo le taa me la me.
Ne aƒemenɔlaa adi be yeaxlẽ memamawo la, ke na wòaxlẽ memama gbãtɔa. Eyome bia memama ma ƒe nyabiasea eye miadzro ŋuɖoɖoa me ɖekae. Mixlẽ mawunyakpukpui siwo ɖo kpe ŋuɖoɖoa dzi la le Biblia ŋutɔ me. Tsɔ ale si nède dzesi ŋuɖoɖoa le wò agbalẽa me la fiae.
Midzro memama si kplɔe ɖo la me, gake fifia ya gblɔ na aƒemenɔlaa be wòadze agbagba aɖo biabiaa ŋu le eya ŋutɔ ƒe nyagbewo me.
Kafui eye nàwɔ ɖoɖo be yeatrɔ ava ne miayi nusɔsrɔ̃a dzi.
Ne asɔ la, he eƒe susu yi video si le jw.org si ƒe tanyae nye Aleke Míewɔa Biblia-nusɔsrɔ̃e? la dzi.

Te Esia Kpɔ Le Ɣletia Me:

Do gbe ɖa na Yehowa be wòayra ɖe agbagba siwo nàdze be yeadze Biblia-nusɔsrɔ̃ yeye gɔme la dzi.—Flp. 2:13.
Ne èle gbeadzi la, dze agbagba nàzã Biblia ƒe Nufiafia gbalẽa alo nàɖe video si nye Aleke Míewɔa Biblia-nusɔsrɔ̃e? nàtsɔ awɔ ale si míewɔa Biblia-nusɔsrɔ̃e la afia zi ɖeka ya teti.