Ðe Ŋɔŋlɔawo Me Dzodzro Gbe Sia Gbe Le Vi Ðem Na Wòa?

Ðe nèxlẽa Biblia kpukpui si le Ŋɔŋlɔawo Me Dzodzro Gbe Sia Gbe gbalẽvia me kple eƒe numeɖeɖea ŋkeke sia ŋkeke be wòate wò ɖe Yehowa ŋua? Ne mèwɔnɛ o la, ɖe nàte ŋu adze egɔme anɔ ewɔm gbe sia gbea? Ame geɖe dzroa ŋɔŋlɔawo me le ŋdi me ale be yewoate ŋu anɔ ŋugble dem le emenyawo ŋu le ŋkekea me. (Yos 1:8; Ps 119:97) Nu kae nàwɔ be Biblia kpukpuia naɖe vi na wò geɖe wu? Xlẽ Biblia kpukpui siwo do ŋgɔ kple esiwo kplɔe ɖo be nànya nu si ŋu kpukpuia ku ɖo. Dze agbagba nàde ŋugble le Biblia me nudzɔdzɔ aɖe ŋu, si ana nàse gɔmeɖose si le ŋɔŋlɔa me gɔme. Azɔ wɔ gɔmeɖose ma ŋu dɔ le wò agbe me. Ne Mawu ƒe Nyaa kpɔa ŋusẽ ɖe wò nyametsotsowo dzi la, afia mɔ wò, eye wòaɖe vi na wò.—Ps 119:105.

Betel ƒomea me tɔ siwo le xexea me godoo la, dzoa Ŋɔŋlɔawo me gbe sia gbe le woƒe ŋdinuɖuɣiwo. Fifia wodaa numedzodzro siawo dometɔ geɖe ɖe JW Nyakakadɔwɔƒea le akpa si nye WƆNA VEVIWO KPLE WƆNA TƆXƐWO te. Ɣekaɣie nye zi mamlɛtɔ si nèkpɔ wo dometɔ aɖewo? Ðewohĩ nu si ŋu woƒo nu tsoe la tututue nèhiã. Le kpɔɖeŋu me, aleke Lot ƒe ŋutinyaa ate ŋu akpɔ ŋusẽ ɖe wò nyametsotsowo dzi?

MIKPƆ VIDEO SI NYE MIGALƆ̃ XEXEA O (1YH 2:15), EYOME MIAÐO BIABIA SIAWO ŊU:

• Biblia me gɔmeɖose ka dzie wotu Ŋditadedeagu Wɔnaa ƒe numedzodzro sia ɖo?

• Aleke nuŋlɔɖi si ku ɖe Lot ŋu ɖee fia be afɔku le eme be míalɔ̃ xexea alo nu siwo le eme?—1Mo 13:12; 14:12; 19:3, 12, 13, 24-26

• Aleke míaɖee afia be míelɔ̃ Yehowa ke menye xexea alo nu siwo le eme o?