Èle Biblia Si Woxlẽ Lé Ðe Mɔ̃ Dzia Zãma?

Biblia si woxlẽ lé ɖe mɔ̃ dzi. Wole Xexe Yeye Gɔmeɖeɖe Biblia si woxlẽ lé ɖe mɔ̃ dzia ɖem ɖe go vivivi le gbegbɔgblɔ geɖe me ale si wòanya wɔ. Nu siwo ɖe dzesi le eŋu dometɔ ɖekae nye be wozã ame vovovowo ƒe gbe tsɔ xlẽ Bibliameme ɖe sia ɖe ƒe wɔƒe. Woxlẽa nyawo kple seselelãme kpakple gbeteteɖedzi nyuitɔ, si wɔnɛ be gɔmesese si tututu le Biblia me gbedeasia ŋua dzena kɔtɛ.

Aleke Biblia si woxlẽ lé ɖe mɔ̃ dzia le vi ɖem na ame aɖewo? Ame geɖe siwo ɖoa toea kpɔa dzidzɔ ɖe ale si wònana Mawu ƒe Nyaa wɔa dɔ ɖe wo dziia ŋu. Wokpɔnɛ be ale si wozã ame vovovowo ƒe gbe tsɔ xlẽ Bibliameme ɖe sia ɖe ƒe wɔƒea, wɔnɛ be yewokpɔa Biblia me nudzɔdzɔwo le susu me nyuie wu eye nyawo hã me kɔna na yewo wu. (Lod 4:5) Ame geɖe hã kpɔnɛ be ne nu te ɖe yewo dzi eye yewoɖo toea, yewoƒe dzi dzea eme.—Ps 94:19.

Ne woxlẽ Mawu ƒe Nyaa míesea, ate ŋu akpɔ ŋusẽ gã aɖe ɖe míaƒe agbe dzi. (2Kr 34:19-21) Eya ta ne woxlẽ Biblia bliboa alo eƒe akpa aɖe lé ɖe mɔ̃ dzi le gbe aɖe si nèse mea, ɖe manyo ŋutɔ be nànɔ to ɖomee edziedzi oa?

MIKPƆ VIDEO SI NYE ALE SI WOXLẼ BIBLIA LÉ ÐE MƆ̃ DZI—KPUITƆ, EYOME MIAÐO BIABIA SIA ŊU:

Nu kae wɔ dɔ ɖe dziwò le ale si woxlẽ Biblia lé ɖe mɔ̃ dzi ŋu?