Nu Si Akpe Ðe Ame Siwo Ŋu Wosẽa Ŋuta Le Le Ƒomea Me Ŋu

Xexea Me Lãmesẽ Habɔbɔa gblɔ be, “ŋutasesẽ le nyɔnuwo ŋu bɔ ŋutɔ. Ðeko wòva le abe dɔléle aɖe si kaka ɖe xexea me godoo ene, eye ehiã be woawɔ nane tso eŋu kaba.” Habɔbɔ sia ka nya ta be nyɔnu 30 kloe le alafa me “ƒe srɔ̃ alo woƒe ahiãvi ƒo wo alo dɔ wo gbɔ sesẽe kpɔ.” Dukɔ Ƒoƒuawo bu akɔnta be le ƒe aɖe si va yi nyitsɔ laa me la, nyɔnu 137 kloe ye ku gbe sia gbe le wo srɔ̃, woƒe ahiãvi alo woƒe ƒometɔ aɖe si me.a

Akɔntabubuwo ate ŋu ana míakpɔ nyɔnu siwo gbegbe ŋu wo srɔ̃wo alo woƒe ahiãviwo le ŋuta sẽm le, gake mate ŋu ana míakpɔ vevesese si gbegbe me nyɔnu siawo dometɔ ɖe sia ɖe tona o.

Ðe srɔ̃wò alo wò ahiãvi sẽa ŋuta le ŋuwòa? Alo ènya ame aɖe si ŋu wowɔnɛ ɖoa? Ne nenemae la, kpɔ ale si Biblia ƒe aɖaŋuɖoɖo siawo ate ŋu akpe ɖe ŋuwò ɖa.

Menye gbɔwòe wòtso be srɔ̃wò alo wò ahiãvi sẽa ŋuta le ŋuwò o

Kpekpeɖeŋu li

Mawu li na wò

Ŋutasesẽ le ame ŋu le ƒomea me nu ayi

Aleke nàte ŋu akpe ɖe ame si ŋu wole ŋuta sẽm le ŋu

Menye gbɔwòe wòtso be srɔ̃wò alo wò ahiãvi sẽa ŋuta le ŋuwò o

Nya si Biblia gblɔ: “Mía dometɔ ɖe sia ɖe abu akɔnta le eɖokui ŋu na Mawu.”—Romatɔwo 14:12.

Ðo ŋku nya sia dzi: Ame si le ŋutasẽnua wɔm ɖe ŋuwòe woabia akɔntae.

Ne srɔ̃wò alo wò ahiãvi gblɔna be gbɔwòe wòtso be yele ŋuta sẽm le ŋuwò la, nyae be menye nyateƒee o. Mele be woasẽ tame le srɔ̃nyɔnuwo ŋu o, ɖe wòle be woalɔ̃ wo boŋ.—Kolosetɔwo 3:19.

Ɣeaɖewoɣi la, aha tsu nono, susumedɔléle alo ƒome si me ame tsi le ate ŋu ana wòasẽ ŋuta le srɔ̃a alo eƒe ahiãvi ŋu. Gake ema mefia be etɔ dzɔ be wòawɔ nu nenema o; Mawu abia akɔntae godoo. Eye ele be eya ŋutɔ nawɔ nu siwo ana wòadzudzɔ agbenɔnɔ ma.

Kpekpeɖeŋu li

Nya si Biblia gblɔ: “Afi si aɖaŋuɖola geɖewo le la, nuwo dzea edzi.”—Lododowo 15:22.

Ðo ŋku nya sia dzi: Ne èkpɔe be yemele dedie o alo mènya nu si nàwɔ o la, ame bubuwo ate ŋu akpe ɖe ŋuwò.

Nu ka tae wòahiã be ame bubuwo nakpe ɖe ŋuwò? Nɔnɔme si me nèle la mele bɔbɔe o. Ate ŋu asesẽ be nàtso nya me nyuie, elabe mànya nu si tututu nàwɔ o. Ele be nàbu nu vevi geɖe ŋu, le kpɔɖeŋu me:

Wò dedienɔnɔ
Nu si ade viwòwo dzi
Wò ganyawo
Ale si nèlɔ̃ srɔ̃wòa alo wò ahiãvia
Àdi be yeanɔ anyi ko elabe srɔ̃wòa alo wò ahiãvia ate ŋu ava trɔ

Nu siawo ŋu bubu ate ŋu ana nàtɔtɔ eye nàtsi dzodzodzoe; megblẽ be nàse le ɖokuiwò me nenema o. Ame kae ate ŋu akpe ɖe ŋuwò?

Xɔlɔ̃ alo ƒometɔ aɖe si dzi nèka ɖo ate ŋu akpe ɖe ŋuwò eye wòafa akɔ na wò. Dzeɖoɖo kple ame si tsɔ ɖe le eme na wò ate ŋu aɖe vi geɖe na wò.

Dɔwɔƒe siwo kpena ɖe ame siwo ŋu wowɔa ŋutasẽnuwo ɖo ate ŋu ava xɔ na wò enumake ne èyɔ woƒe kaƒodzesiwo. Ame siwo wɔa dɔ le dɔwɔƒe siawo ate ŋu akpe ɖe ŋuwò nàwɔ ɖoɖo aɖewo siwo akpɔ tawò. Ne srɔ̃wò alo wò ahiãvia de dzesii be nu si wɔm yele ɖe ŋuwò menyo o eye wòlɔ̃ be yeatrɔ la, dɔwɔƒe siawo ate ŋu akpe ɖe eŋu wòanya afɔ siwo wòle be wòaɖe.

Ame siwo tsona kpla ɖe afɔkuwo ŋu hã ate ŋu akpe ɖe ŋuwò ne wò agbe ɖo afɔku me. Ame siawo ƒe ɖewoe nye ɖɔktawo, dɔnɔdzikpɔlawo kple ame bubu siwo xɔ hehe be woana kpekpeɖeŋu ne afɔku dzɔ.

Mawu li na wò

Nya si Biblia gblɔ: “Yehowab tsɔ ɖe ame siwo ƒe dzi gbã gudugudu la gbɔ; exɔna na ame siwo ƒe gbɔgbɔ ŋu nu te.”—Psalmo 34:18.

Ðo ŋku nya sia dzi: Mawu do ŋugbe be yeakpe ɖe ŋuwò.

Yehowa tsɔ ɖe le eme na wò vevie ŋutɔ. (1 Petro 5:7) Ese nu si gbegbe me tom nèle kple nu siwo ŋu bum nèle la gɔme. Ate ŋu azã eƒe Nya Biblia afa akɔ na wò. Eye edi be nàdo gbe ɖa na ye. Ne èle gbe dom ɖa nɛ la, àte ŋu abiae be wòana wò nunya kple ŋusẽ nàtsɔ anɔ te ɖe nɔnɔmea nu.—Yesaya 41:10.

Ŋutasesẽ le ame ŋu le ƒomea me nu ayi

Nya si Biblia gblɔ: “Wo dometɔ ɖe sia ɖe abɔbɔ nɔ eƒe wainka kple eƒe gboti te bɔkɔɔ, eye ame aɖeke mado voɖi na wo o.”—Mika 4:4.

Ðo ŋku nya sia dzi: Biblia do ŋugbe be madidi o, ŋutifafa anɔ ame sia ame ƒe aƒe me.

Yehowa Mawu koe ate ŋu akpɔ míaƒe kuxiwo katã gbɔ keŋkeŋ. Biblia gblɔ be: “Atutu aɖatsi sia aɖatsi ɖa le woƒe ŋkume, eye ku maganɔ anyi akpɔ o, konyifafa kple ɣlidodo kpakple vevesese hã maganɔ anyi o.” (Nyaɖeɖefia 21:4) Ɣemaɣi la, nu nyui siwo míase vivi na ana míaŋlɔ vevesese siwo me míeto va yi la be kura. (Yesaya 65:17) Aleae Mawu do ŋugbe be nuwo ava nɔ le etsɔme si awɔe be ŋutifafa nanɔ anyi.

a Togbɔ be nyɔnu siwo ŋu wosẽa ŋuta le ŋue nyati sia ku ɖo hã, nu siwo ŋu woƒo nu tsoe la dometɔ geɖe yi na ŋutsu siwo ŋu wosẽa ŋuta le hã.

b Biblia na míenya be Mawu ƒe ŋkɔe nye Yehowa.

Aleke nàte ŋu akpe ɖe ame si ŋu wole ŋuta sẽm le ŋu

Ènya ame aɖe si srɔ̃a alo eƒe ahiãvi le fu fiam veviea? Àte ŋu awɔ nane atsɔ akpe ɖe eŋu, ne mèxɔ hehe ɖe kpekpeɖeŋunana ame siawo ŋu o hã.c

Se veve ɖe enu eye nàɖo toe nyuie. (Yakobo 1:19) Na wòanya be yele klalo be yeaɖo toe, gake mègazi edzi be wòaƒo nu o. Ka ɖe edzi nɛ be yexɔ nya siwo gblɔm wòle la dzi se.—Lododowo 20:5.

Dɔwɔƒe aɖe si kpena ɖe ame siwo ŋu wosẽa ŋuta le ŋu gblɔ be: “Menɔa bɔbɔe na wo be woaƒo nu tso woƒe nɔnɔmea ŋu o. Zi geɖe la, woɣlaa nu si me tom wole alo womegblɔna wo katã o, wu be woakpa nyaa agblɔ alo aɖe ami ɖee. Ate ŋu asesẽ na wò be nàxɔe ase be ame aɖe si nènya la sẽa ŋuta le srɔ̃a alo eƒe ahiãvi ŋu. Gake nyae be ale si wòwɔa nu ɖe ŋuwò la ate ŋu ato vovo na ale si wòwɔa nu ɖe srɔ̃a alo eƒe ahiãvia ŋu.”

Gblɔ nya siwo ade dzi ƒo nɛ. (1 Tesalonikatɔwo 5:11) Nya siwo nàgblɔ la nena wòakpɔe be asixɔxɔ le ye ŋu. Ka ɖe edzi nɛ be yetsɔ ɖe le eme nɛ vevie eye yeli nɛ. Ðo ŋku nɔnɔme nyui siwo le esi la dzi nɛ. Eye de dzi ƒo nɛ be wòadi kpekpeɖeŋu.

Kpe ɖe eŋu. (Lododowo 17:17) Le kpɔɖeŋu me, ne vovo mele eŋu o la, àte ŋu akpɔ viawo gbɔ nɛ alo aɖa nu nɛ. Biae nenye be enya nu si wòawɔ alo teƒe aɖe li wòayi be wòanɔ dedie, ne edzɔ be nɔnɔmea va do gã ɖe edzi.

Na wòakpɔe be ate ŋu atso nya me le nu si wòawɔ ŋu. (Galatiatɔwo 6:5) Àte ŋu agblɔ nu vovovo siwo wòahiã be wòawɔ tso nɔnɔmea ŋu la nɛ, gake na eya ŋutɔ natso nya me, mègawɔe nɛ o.

c Ne ènye ŋutsu eye nèdi be yeakpe ɖe nyɔnu aɖe si ŋu wowɔa ŋutasẽnu ɖo ŋu la, nyae be menye nu sia nue nàte ŋu awɔ nɛ o. Eya ta anyo be nàde dzi ƒo nɛ be wòaƒo nu kple exɔlɔ̃ nyɔnu aɖe si dzi wòka ɖo, si ate ŋu akpe ɖe eŋu geɖe wu.