Kpe Ðe Viwòwo Ŋu be Woayi Ŋgɔ le Subɔsubɔdɔa Me
1 Agba gã aɖe le dzila Kristotɔwo dzi be woana hehe wo viwo be woakpɔ gome le subɔsubɔdɔa me tso keke ɖevime ke. Woate ŋu awɔ esia to mɔ vovovowo dzi. Ðevi aɖewo te ŋu léa mawunyakpukpui aɖewo ɖe susu me gblɔna pɛpɛpɛ hafi va dzea nuxexlẽ gɔme gɔ̃ hã. Esia ate ŋu awɔ dɔ ɖe nyaselawo dzi ŋutɔ. Ne ɖeviwo le tsitsim la, woate ŋu awɔ geɖe wu le subɔsubɔdɔa me. Aleke mi dzilawo miate ŋu akpe ɖe mia viwo ŋu woaɖi ɖasee? Ðewohĩ aɖaŋuɖoɖo siwo gbɔna ate ŋu akpe ɖe mia ŋu geɖe wu.
2 Ne èdo gbe na amea vɔ la, àte ŋu agblɔ be:
◼ “Vinye [yɔ eƒe ŋkɔ] di be yeagblɔ mawunyakpukpui wɔdɔɖeamedzi aɖe me nyawo na wò.” Viwòa ate ŋu agblɔ be: “Mesrɔ̃ Mawu ƒe ŋkɔ le mawunyakpukpui sia me. [Ðevia nagblɔ Psalmo 83:19 me nyawo alo wòaxlẽ wo.] Magazine siawo ƒo nu tso nusi Yehowa Mawu ava wɔ na mí ŋu. Madi be matsɔ wo na wò.” Àte ŋu aɖe alesi wodoa alɔ xexeame katã ƒe dɔa me atsɔ awu dzeɖoɖoa nui.
3 Alo àte ŋu ate mɔnu sia hã kpɔ:
◼ “Ŋdi na wò. Mele hehe nam vinye [yɔ eƒe ŋkɔ] be wòatsɔ ɖe le eme na amewo le míaƒe nutoa me. Edi be yeaƒo nu tso Biblia me nya aɖe ŋu na wò kpuie.” Ðevia ate ŋu agblɔ be: “Mɔ aɖe si dzi medina be mato akpe ɖe amewo ŋue nye be magblɔ etsɔme mɔkpɔkpɔ siwo le Biblia me ŋu nya na wo. [Ðevia nagblɔ Nyaɖeɖefia 21:4 me nyawo alo wòaxlẽ wo.] Magazine siawo ƒo nu tso nusiwo Mawu ƒe Fiaɖuƒea ava wɔ na mí ŋu. Meka ɖe edzi be wo xexlẽ ado dzidzɔ na wò.”
4 Dzeɖonya si le bɔbɔe zazã edziedzi wɔnɛ be dzi nɔa ɖeviwo ƒo be woate ŋu akpɔ gome le Fiaɖuƒegbedasia gbɔgblɔ me. Fia alesi woaƒo nu eme nakɔ kple gbeɖiɖi si sɔ nyuie la wo eye nàto eme kpli wo zi gbɔ zi geɖe bene woanɔ dzadzraɖo ɖi na nuƒoƒo le nɔnɔme vovowo me. Dzadzraɖo nyuie do ŋgɔ kple kafukafu si tso dzi me akpe ɖe ɖevi suewo ŋu be woaƒo nu tso woƒe xɔse ŋu.
5 To dzi dede ƒo na ɖevi suewo alea me la, wo dometɔ geɖe va zu gbeƒãɖela maxɔnyɔnyrɔwo. Dzidzɔ ka gbegbe nye esi wònye be míakpɔ mía viwo woanɔ ŋgɔyiyi wɔm le Kristotɔwo ƒe subɔsubɔdɔa me!—Ps. 148:12, 13.