BIBLIA ME BIABIAWO ƑE ŊUÐOÐOWO
Ðe ame siwo ku la agava nɔ agbe akea?
Ðikeke mele eme o be ame si gbɔ agbe dzɔ tso la ate ŋu agbɔ agbe kukuawo
Yehowa Mawu gbɔe agbe dzɔ tso. (Psalmo 36:9) Ne Mawue wɔ amegbetɔwo la, ke ɖe mesɔ be míaka ɖe edzi be Mawu ate ŋu agbɔ agbe ame siwo ku la oa? Biblia ka ɖe edzi na mí be nu ma tututue wòava wɔ le etsɔme. (Xlẽ Dɔwɔwɔwo 24:15) Gake susu ka tae wòagbɔ agbe kukuawo ɖo?
Mía Wɔla la ɖoe le gɔmedzedzea me be amegbetɔwo nanɔ agbe le anyigba dzi tegbee. (1 Mose 1:31; 2:15-17) Eƒe tameɖoɖo ma metrɔ o. Ne ekpɔ ale si agbea le na mí fifia la, etena ɖe edzi, elabena agbea le kpuie eye eme yɔ fũu kple fukpekpe geɖe.—Xlẽ Hiob 14:1, 14, 15.
Afi kae ame siwo woafɔ ɖe tsitre la anɔ agbe le?
Ðe Mawu wɔ amegbetɔwo be woanɔ agbe le dziƒoa? Ao. Mawudɔlawoe Mawu wɔ be woanɔ agbe le dziƒo. Ke ewɔ amegbetɔwo ya be woanɔ agbe le anyigba dzi. (1 Mose 1:28; Hiob 38:4, 7) Esi nya mawo le susu me na wò la, bu ame siwo Yesu fɔ ɖe tsitre la ƒe ŋutinyaa ŋu kpɔ. Anyigba dzi afi siae ame siwo wòfɔ ɖe tsitre la va nɔ. Nenema kee wòanɔ le ame siwo woafɔ ɖe tsitre le etsɔme la dometɔ akpa gãtɔ gome; woagava nɔ agbe le anyigba dzi ake.—Xlẽ Yohanes 5:28, 29; 11:44.
Gake Mawu ɖoe be yeafɔ ame ʋɛ aɖewo ɖe tsitre ahana gbɔgbɔŋutilã wo ale be woanɔ agbe le dziƒo. (Luka 12:32; 1 Korintotɔwo 15:49, 50) Ame siwo woafɔ ayi dziƒo la anye fiawo le afi ma eye woa kple Kristo woaɖu anyigba la dzi.—Xlẽ Nyaɖeɖefia 5:9, 10.