Nso Mme Utịtmbuba ke Mbufo Ẹnịm Ẹnọ Nditọ Mbufo?
1 Edikụt unen ke uwem ọkọn̄ọ ke ndinịm nnyụn̄ nsịm mme utịtmbuba oro ẹdotde. Mbon oro ẹbịnede n̄kpri m̀mê mme utịtmbuba oro owo mîkemeke ndisịm ẹsikụt edikpu ye unana uyụhọ. Oyom eti ibuot man ẹfiọk utịtmbuba emi ẹkpebịnede man “ẹkpemụm uwem eke edide ata uwem ẹkama.” (1 Tim. 6:19) Nnyịn ikop idatesịt didie ntem nte ke Jehovah, ebede ke Ikọ ye esop esie, owụt nnyịn nnennen usụn̄ emi ikpasan̄ade!—Isa. 30:21.
2 Ke ndinọ utọ ima ima ndausụn̄ oro, Jehovah omonịm eti uwụtn̄kpọ ọnọ mme ete ye eka. Utu ke ndiyak nditọ mmọ ẹmi mînyeneke ifiọk ẹmek m̀mê ewe usụn̄ ọfọn akan, mme ete ye eka oro ẹnyenede ọniọn̄ ẹnọ mmọ ukpep ẹban̄a usụn̄ oro mmọ ẹkpesan̄ade, ndien ke ini mmọ ẹkabarede n̄kani owo, mmọ “idikpọn̄ke enye.” (N̄ke 22:6) Mme ete ye eka ẹdide mme Christian ẹdiọn̄ọ ẹto ifiọk eyouwem nte ke mmimọ ikemeke ndiberi edem ke ọniọn̄ mmimọ; ana mmọ ẹberi edem ke Jehovah. (N̄ke 3:5, 6) Udọn̄ emi akam enen̄ede okpon akan ke n̄kan̄ nditọ, ẹmi ẹnyenede esisịt ifiọk ye ifiọk n̄kpọntịbe.
3 Mme ete ye eka ẹkeme ndinịm mme utịtmbuba oro ẹdotde nnọ nditọ mmọ oro ẹdin̄wamde mmọ ndiwụk ntịn̄enyịn ke “ndidomo mfiọk se ifọnde ikan.” (Phil. 1:10) Mmọ ẹkeme nditọn̄ọ ye ukpepn̄kpọ ubon, ẹsịnde udọn̄ ẹnọ nditọ ndida enye nte akpan n̄kpọ nnyụn̄ n̄kpep n̄kpọ nto enye. Ọfọn nditọ ẹnyene edu edibem iso n̄kpep n̄kpọ oro ẹdikpepde ke mme mbonoesop nnyụn̄ ntịm idem ndinọ ibọrọ ke ikọ idemmọ. Edibuana kpukpru ini ke utom ukwọrọikọ edi akpan n̄kpọ. N̄kpri nditọwọn̄ ẹkeme nditịp n̄kpọ nsịn ebe ke ndinọ mme tract, ndikot itien̄wed, m̀mê ndinọ mme magazine. Ke mmọ ẹkemede ndikot n̄wed, ndisịn enyịn̄ ke Ufọkn̄wed Utom Ukara Abasi ekeme ndinam n̄kọri eke spirit mmọ awara. Ndidot nte asuanetop oro mînaha baptism m̀mê ndidi se ẹnyịmede ana baptism edi akpan usio-ukot ke ndinam n̄kọri.
4 Nte nditọ mmọ ẹkọride ẹdụk isua n̄kparawa, m̀mê ke abakde akan oro, mme ete ye eka ẹkpenyene nditịn̄ ikọ in̄wan̄în̄wan̄ ye mmọ mban̄a mme utịtmbuba ubọkọkọ. Mme ọnọ-item ke ufọkn̄wed ye mme nsan̄a ufọkn̄wed ẹkeme ndinam mmọ ẹnyene ekikere ubịne inyene eke ererimbot. Mme ete ye eka ẹkpenyene ndin̄wam nditọ mmọ ẹmek mme ukpepn̄kpọ ufọkn̄wed oro ẹnọde mmọ nti ukpep, ẹtịmde mmọ idem ndise mban̄a udọn̄ n̄kpọ obụkidem mmọ ye unana ediyak mme udọn̄ n̄kpọ Obio Ubọn̄ ẹtak. (1 Tim. 6:6-10) Ẹkeme ndisịn udọn̄ nnọ mmọ ẹbịne ‘enọ’ itie unana ndọ, ndien ekem nte ini akade, edieke mmọ ẹbierede ndidọ ndọ, mmọ ẹyedu ke idaha ndibiom ndodobi mbiomo ndọ. (Matt. 19:10, 11; 1 Cor. 7:36-38) Ebede ke nditịn̄ ikọ ke usụn̄ oro ọbọpde-bọp mban̄a usiakusụn̄, ndinam utom ke ebiet udọn̄ okponde, utom Bethel, m̀mê Ufọkn̄wed Unọ Mme Asan̄autom Ukpep, mme ete ye eka ẹkeme ndinam nditọ ẹnyene udọn̄ toto ke ata ntọn̄ọ ntọn̄ọ isua emana ndida uwem mmọ nnam n̄kpọ ke usụn̄ oro enemde Jehovah esịt, ẹda ufọn ẹsọk mbon efen, ẹnyụn̄ ẹda inemesịt ẹsọk idemmọ.
5 Idịghe ke mbuari ke nnyịn inyene ata ediwak uyen oro ẹmụmde n̄kokon̄ idaha Christian ẹkama ẹnyụn̄ ẹbịnede mme utịtmbuba eke spirit ke esop mfịn. Ẹkeme ndida nte ke ekese unen oro mmọ ẹkụtde oto mme ima ima ete ye eka. Edieke afo edide ete m̀mê eka, etie nte nso ke nditọ fo ẹbịne? Nte mmọ ke ẹkaiso ẹnam n̄kọri sụn̄sụn̄ ẹbịne uwem oro ẹwụkde ntịn̄enyịn ke mme udọn̄ n̄kpọ Obio Ubọn̄? Ti ete, kiet ke otu mme akpan n̄kpọ oro afo ekemede ndinam edi ndinam akpanikọ odu nditọ fo ke esịt, nnyụn̄ nneme mban̄a enye kpukpru usen. Ẹkeme ndida mbonufọk oro ẹnamde akpanikọ ke ndinam n̄kpọ Jehovah ndiọn̄ fi.—Deut. 6:6, 7; Josh. 24:15.