Ekebe Mbụme
◼ Nte odot otuowo ndikwak ubọk ke ẹkụrede edinam kiet kiet ke Ufọkn̄wed Utom Ukara Abasi m̀mê Esoputom?
1 Otuowo ẹmi ikọt Jehovah ẹnamde ẹsinen̄ede ẹwụt esịtekọm. Edi eti n̄kpọ mmọ ndiyom ndiwụt esịtekọm mban̄a ukeme oro nditọete mmọ ẹsịnde ye se mmọ ẹtịn̄de ke mbot utịn̄ikọ. Ke ndusụk ikpehe ke ererimbot ke eyo nnyịn ẹkeme ndiwụt utọ esịtekọm oro ke ndikwak ubọk. Edi n̄kwakubọk ekpenyene ndidi ke unyịmesịt, se itode esịt. N̄ko, enye esiwak ndidi ediwụt esịtekọm mban̄a n̄kpọ oro edide n̄wọrọnda. Ndien ke ntre, ke ikpọ mbono, ọkọrọ ye mme mbono circuit, ke ini ẹtịmde mme n̄wọrọnda edinam ndien nditọete nnyịn ẹsịnde ini ye ukeme efen efen ke se ẹnọde mmọ ẹnam, nnyịn imesikụt otuowo ẹkwakde ubọk idịghe ke utịt utịn̄ikọ ikpọn̄ edi ndusụk ini ke adan̄aemi enye akade iso.
2 Edi nte emi ekpenyene ndidi ntre ke mme Ufọkmbono Obio Ubọn̄ nnyịn? Ke akpanikọ owo ikpenyeneke ndibiọn̄ọ emi edieke ẹnamde emi ke unyịmesịt onyụn̄ otode ntotụn̄ọ esịtekọm. Edi nte ido edide nnyịn isikwakke ubọk ke mme edinam ẹmi koro, nte kiet ke otu mme ntak, enye ekeme ndikabade ndi n̄kpọ oro ẹnamde man ẹdọhọ ndien ke ntre inyeneke ata ufọn.
3 Nte ededi, odu n̄kpọ oro kpukpru nnyịn ke Ufọkmbono Obio Ubọn̄ nnyịn ikemede ndinam man iwụt esịtekọm ke ukeme owo emi etịn̄de ikọ ndien oro edi ndidu ke edidemede ke ini utịn̄ikọ emi, iwụkde enyịn ise enye inyụn̄ iwụtde ebe ke nte nnyịn inịmde iso nte ke nnyịn ke itiene se enye enemede inyụn̄ ibọ ufọn. N̄ko, ediwak ini nnyịn imekeme ndineme nneme ye etịn̄ikọ oro ke idem nnyịn ke mbonoesop asuanade, man inam enye ọfiọk ete ke utịn̄ikọ esie ama enem nnyịn.