Nte Mme Andibuana ke Ubon Ẹdianade Kiet Man Ẹnyene Ọyọhọ Ebuana—Ke Ukpepn̄kpọ Bible
1 Akpanikọ anam uwem ubon enen̄ede enyene se ọwọrọde ye uduak, edi edikụt unen ke ndinam n̄kpọ Jehovah idịghe ke mbuari. Esida ini ye ukeme ndibọp ubon oro ọsọn̄de idem ke n̄kan̄ eke spirit. Akamba ufọn odu mme andibuana ke ubon ndinam n̄kpọ ketket ọtọkiet ke afan̄ emi. Akpa ke udịm udịm ibuotikọ enyenede ikpehe ita mi oyowụk ntịn̄enyịn ke nte ubon ekemede ndidiana kiet ke ndikọri nti edu ukpepn̄kpọ.
2 Ebe ke Ndikot Bible Kpukpru Usen: Mme N̄ke 24:5 ọdọhọ ke “ọfiọk-n̄kpọ owo . . . anam odudu esie ọsọn̄.” Ifiọk oro ẹnyenede ẹto edikot Ikọ Abasi kpukpru ini ọnọ owo odudu esịtidem oro ẹyomde man ẹbiọn̄ọ en̄wan oro Satan an̄wanade ye idaha eke spirit esie. (Ps. 1:1, 2) Ndi mbufo ẹmesikot Bible ọtọkiet nte ubon ke usen ke usen? Ndutịm Ufọkn̄wed Utom Ukara Abasi owụt “Udiana Ndutịm Edikot Bible” eke urua kiet kiet ke isua. Nditiene enye oyom esisịt ini nte minit 10 oto ubon ke usen kiet kiet. Mek ini eferede owo ke idem, utọ nte ke udia usenubọk, ke ẹma ẹkedia udia mbubịteyo, m̀mê mbemiso ini idap, ndikot Bible nnyụn̄ n̄kere mban̄a itien̄wed eke usen otode Ẹdụn̄ọde N̄wed Abasi. Nam emi edi ubak edinam ofụri usen eke ubon fo.
3 Ebe ke Ndikpep N̄kpọ Ọtọkiet ke Urua Kiet Kiet: Ukpepn̄kpọ Bible ubon ekpenyene ndidi akpan n̄kpọ udọn̄ ọnọ ubon ke urua. Andibuana kiet kiet ekpenyene ndinọ enye ibetedem ebe ke ndibuana ifịk ifịk ke ukpepn̄kpọ. Ibuot ufọk oyoyom ndikere mban̄a mme udọn̄ ubon ke ini emekde se ẹdikpepde ye usen, ini, ye uniọn̄ ukpepn̄kpọ oro. Nam ukpepn̄kpọ ubon edi ebeiso n̄kpọ ke ndutịm eke urua. Kûyak mme usụhọde n̄kpọ efen ẹbiọn̄ọ enye.—Phil. 1:10, 11.
4 Ete oro esiwakde ndibọ ikot mbubehe ke ufọk esie ama esifahade urụk ukopikọ efep ke ini ukpepn̄kpọ ubon. Edieke mbon mbubehe ẹdide ufọk, ẹma ẹsikot mmọ ẹdibuana ke ukpepn̄kpọ mîdịghe mmọ ẹbet tutu ẹkụre ukpepn̄kpọ. Ete oro ama ebiere ete ke n̄kpọ ndomokiet idibiọn̄ọke ukpepn̄kpọ ubon. Emi ama otụk nditọ esie ntotụn̄ọ ntotụn̄ọ, ndien amaedi mbubehe esie, uforo ama odu.
5 Enem didie ntem ke ini mme andibuana ke ubon ẹdianade kiet ke mme utom eke spirit! Nnyịn ndisịn mme ukeme kpukpru ini ke ndinyene ọyọhọ ebuana ke ukpepn̄kpọ Bible ubon ayada edidiọn̄ Jehovah edi.—Ps. 1:3.