Ibuot 23
Sọn̄ọ Nyene Usen Jehovah ke Ekikere
1. (a) Ke ini afo ke akpa ekekpepde nte ke edinyan̄a nsio ke mme mfụhọ mfụhọ idaha eke akani editịm n̄kpọ emi ke ekpere, didie ke afo akanam n̄kpọ? (b) Mme mbụme ewe kaban̄a emi ke nnyịn ikpekere ọkpọsọn̄ ọkpọsọn̄ iban̄a?
YE UNANA eyịghe, kiet ke otu mme akpa n̄kpọ oro afo ekekpepde oto edikpep Bible ekedi nte ke edinyan̄a nsio ke mme mfụhọ mfụhọ idaha eke uwem ke editịm n̄kpọ oro odude kemi ke ekpere. Afo ama edifiọk ete ke uduak Abasi edi ofụri isọn̄ ndidi Paradise. Ubiatibet, ekọn̄, udọn̄ọ ye n̄kpa ididụhe aba, ndien idem mbonima oro ẹma ẹkekpa ẹyefiak ẹdu uwem. Nso akama-inemesịt idotenyịn! Uyarade oro nte ke edidu Christ oro enyịn mîkwe nte Edidem emi akarade ama ọtọn̄ọ ke 1914 E.N. ye nte ke ọtọn̄ọde ke ini oro ke nnyịn idu ke ukperedem ini eke idiọk ererimbot emi ọsọn̄ọ owụt edikpere oro enye ekperede. Nte ifiọk oro osion̄o mme ukpụhọde edi ke uwem fo? Nte usụn̄uwem fo enen̄ede owụt edinịm oro afo onịmde ke akpanikọ ete ke “usen Jehovah” ekpere?
2. (a) Ini ewe ke “usen Jehovah” edidi? (b) Didie ke akpanikọ oro nte ke Jehovah ikayarake “usen oro m̀mê hour oro” ọnọ ufọn?
2 N̄wed Abasi owụt in̄wan̄în̄wan̄ ete ke “emana” oro okokụtde ntọn̄ọ edidu Christ n̄ko eyekụt “akwa usen Jehovah” emi enye edibierede ikpe ọnọ kpukpru mbon oro ẹnamde ukwan̄ido. (Matt. 24:34; Zeph. 1:14–2:3) “Emana” oro kemi aka anyan ke isua. Edi Bible isiakke akpan usen emi Jesus Christ edidide nte andisobo oro Jehovah onịmde ndisobo editịm n̄kpọ Satan eke isọn̄. Jesus ọkọdọhọ ete, “Edi baba owo kiet ifiọkke iban̄a usen oro m̀mê hour oro, kpa mme angel ke heaven, Eyen inyụn̄ ifiọkke, ibọhọke Ete ikpọn̄.” (Mark 13:32) Emi emenyene ufọn etieti. Ke nso usụn̄? Enye aman̄wam ndiwụt se idude ke esịt mme owo. Edieke owo ekededi mînen̄ekede ima Jehovah, mmọ ẹyenyene ntụhọ edisio “usen” Abasi ke ekikere mmọ nnịm nnyụn̄ n̄wọn̄ọde ntiene edibịne n̄kpọ obụkidem emi esịt mmọ otụhọde ọnọ. Mbon oro ẹnen̄erede ẹma enye ẹnyụn̄ ẹwụtde emi ke ndinam n̄kpọ esie ke ofụri ukpọn̄, inamke n̄kpọ m̀mê ini ewe ke utịt editịm n̄kpọ emi edi ikpọn̄îkpọn̄ ke Jehovah onyịme nte mme asan̄autom esie. Abasi ye Eyen esie inyịmeke mbon oro ẹtiede ndebe ndebe m̀mê ẹnyenede esịt iba.—Edi. 3:16; Ps. 37:4; 1 John 5:3.
3. Nso ke Jesus eketịn̄ nte ikọ item ọnọ nnyịn ke n̄kpọ emi?
3 Nte ikọ item oro ọnọde mme andima Jehovah, Jesus ọkọdọhọ ete: “Mbufo ẹtịn̄ enyịn ẹse, ẹkpeme . . . koro mbufo mîfiọkke edikem ini.” (Mark 13:33-37) Enye akpak nnyịn ete ikûyak udia ye edin̄wọn̄ n̄kpọ m̀mê “ekikere uwem emi” ada ekese ntịn̄enyịn nnyịn tutu nnyịn iduọk editịm nnọ ntịn̄enyịn ke nte ini emi edide akpan n̄kpọ.—Luke 21:34-36; Matt. 24:37-42.
4. Nte Peter akanamde an̄wan̄a, nso ke “usen Jehovah” edida edi?
4 Ke ukperedem, apostle Peter ama ọnọ kpukpru mbon oro ẹnyenede ata mbuọtidem item ete ‘ẹtie ẹbet ẹnyụn̄ ẹsọn̄ọ ẹnyene edidu usen Jehovah ke ekikere, kpa usen oro edisịnde ikpaenyọn̄ atara ke ikan̄, edinyụn̄ esịnde se ẹdade ẹbot ererimbot atara ke ọkpọsọn̄ ufiop.’ Edikpere oro “usen Jehovah” ekperede edi akpanikọ emi baba owo nnyịn kiet mîkpedehede ida ke ekpri n̄kpọ. Ibịghike “obufa enyọn̄ ye obufa isọn̄” emi Abasi anamde eyeda itie ukara enyọn̄ oro ẹkụtde ke enyịn ye idiọk n̄ka ubonowo, ndien ẹyeda kpukpru “se ẹdade ẹbot ererimbot” oro asan̄ade kiet ye editịm n̄kpọ ererimbot emi odude kemi—edu nda-ke-idem esie, usụn̄uwem oburobụt ido uwem ye uma-inyene esie—ẹsịm utịt mmọ ke ikan̄ ikan̄ nsobo “usen Jehovah.” (2 Pet. 3:10-13, NW) Oyom nnyịn idu ke edidemede, idiọn̄ọde ite ke mme n̄kpọntịbe ẹmi ẹdinyen̄ede ererimbot mi ẹkeme nditọn̄ọ ke ini ekededi.—Matt. 24:44.
DU KE EDIDEMEDE BAN̄A MME N̄KPỌNTỊBE ẸMI ẸSUDE IDIỌN̄Ọ
5. (a) Ke nso udomo ke ibọrọ oro Jesus ọkọnọde ke mbụme oro ẹwetde ke Matthew 24:3 ekenyene n̄kpọ ndinam ye utịt editịm n̄kpọ mme Jew? (b) Mme ikpehe ewe ke ibọrọ esie ẹkewụk ntịn̄enyịn ke mme n̄kpọntịbe ẹmi ẹketọn̄ọde ke 1914 E.N. kaiso?
5 Akpan akpan ke ikerede iban̄a ini emi nnyịn idude uwem, akpana nnyịn itịm imehe ye ọyọhọ ntọt ẹmi ẹban̄ade ntan̄ndian idiọn̄ọ oro anamde ẹdiọn̄ọ “ukperedem ini,” m̀mê “akpatre ini eyo emi.” Man ikot idiọn̄ọ oro nnennen, ana nnyịn inyene ke ekikere nte ke ini Jesus ọkọbọrọde mbụme oro mme mbet esie ẹkebụpde nte ẹwetde ke Matthew 24:3, ndusụk se enye eketịn̄de ẹkenyene n̄kpọ ndinam ye utịt editịm n̄kpọ mme Jew ke akpa isua ikie, edi akpan n̄kpọ oro enye ọwọrọde aka anyan akan oro. Se enye eketịn̄de aban̄a ke Mt 24 ufan̄ikọ 4 osịm 22 ama osu ke ekpri udomo ke ufọt 33 osịm 70 E.N. Edi prọfesi oro enyene akpan edisu esie ke eyo nnyịn onyụn̄ anam ẹdiọn̄ọ ikpehe ini oro ọtọn̄ọde ke 1914 E.N. nte edide ini “edidi [“edidu,” NW] [Christ], ye eke akpatre ini eyo emi.” (N̄ko Mark 13:5-20 ye Luke 21:8-24) Matthew 24:23-28 etịn̄ se ikanade ada itie ọtọn̄ọde ke 70 E.N. kaiso tutu osịm ini edidu Christ.—Mark 13:21-23.
6. (a) Ntak emi nnyịn owo kiet kiet ikpodude ke edidemede ke nte mme n̄kpọntịbe idahaemi ẹsude “idiọn̄ọ” oro? (b) Bọrọ mme mbụme ẹmi ẹdude ke utịt ikpehe ekikere emi ndiwụt nte “idiọn̄ọ” oro osude ọtọn̄ọde ke 1914.
6 Ana nnyịn owo kiet kiet ikama enyịn ise mme n̄kpọntịbe idahaemi ẹmi ẹsude “idiọn̄ọ” oro. Nnyịn ndida mme n̄kpọntịbe ẹmi n̄kabuan ye prọfesi Bible eyen̄wam nnyịn ‘ndisọn̄ọ nnyene’ usen Jehovah ke ekikere. Enye n̄ko eyen̄wam nnyịn ndisịn mbukpek ke ini itọtde mbon efen iban̄a edikpere oro “usen usiene Abasi nnyịn” ekperede. (Isa. 61:1, 2) Ye mme uduak ẹmi ke ekikere, fiak dụn̄ọde mme ikpehe “idiọn̄ọ” oro, ẹmi ẹtienede mi.
Ke nso n̄wọrọnda usụn̄ ke ‘idụt ndidaha n̄n̄wana ye idụt ye obio edidem ndidaha n̄n̄wana ye obio edidem’ oro ẹkebemde iso ẹtịn̄ okosu ọtọn̄ọde ke 1914 E.N.? Nso itịbe idem ke mme ọfiọn̄ ndondo ẹmi, emi adiande n̄kpọ ke edisu oro?
Ke nso udomo ke unana udia ọnọmọ isọn̄ kpa ye ifiọk ntaifiọk eke ọyọhọ isua ikie-20?
Nte ukpụhọde enen̄ede odu ke adan̄a ediwak ini nte unyekisọn̄ adade itie ke nsio nsio ebiet ọtọn̄ọde ke 1914 E.N.?
Ke 1918 ewe idiọk udọn̄ọ akada uwem awak akan ekọn̄ ererimbot? Kpa ye ifiọk ibọkusọbọ, mme udọn̄ọ ewe ẹsụk ẹtara ke udomo oro okponde?
Nso inam afo onịm ke akpanikọ nte ke mme idaha oro ẹtịn̄de ẹban̄a ke 2 Timothy 3:1-5 idịghe ikpîkpu usụn̄ oro uwem ekesidide kpukpru ini edi nte ke mmọ ẹsọsọn̄ ubọk ẹkesịm udomo oro akpade owo idem nte nnyịn isan̄ade ibịne utịt ukperedem ini?
EDIBAHADE MME OWO
7. (a) Ewe n̄kpọntịbe efen, oro ẹbụkde ke Matthew 13:36-43, ke Jesus akabuan ye utịt editịm n̄kpọ ẹmi? (b) Nso ke n̄ke oro ọwọrọ?
7 Ikpọ n̄kpọntịbe efen ẹdu n̄ko oro Jesus ke n̄wọrọnda usụn̄ akabuande ye utịt editịm n̄kpọ ẹmi. Kiet ke otu mmọemi edi edibahade “nditọ Obio Ubọn̄” n̄kpọn̄ “nditọ andidiọk.” Jesus ama etịn̄ aban̄a emi ke n̄ke esie oro aban̄ade in̄wan̄ ibokpot emi owo usua akadade idiọk n̄kpasịp edisuan esịn. “Ibokpot” ke n̄ke esie ada aban̄a mme Christian akpanikọ oro ẹyetde aran. “Idiọk n̄kpasịp” ẹdi mme abian̄a abian̄a Christian. Ke utịt editịm n̄kpọ ẹmebahade “idiọk n̄kpasịp”—kpa mbon oro ẹdọhọde nte idide mme Christian edi ẹyarade idemmọ ẹwụt nte “nditọ andidiọk” ke ntak mmọ ẹsọn̄ọde ẹyịre ye ererimbot emi Devil edide andikara—ẹkpọn̄ “nditọ Obio Ubọn̄ [Abasi]” ẹnyụn̄ ẹnịm ẹnọ nsobo. (Matt. 13:36-43) Nte emi emenen̄ede ada itie?
8. (a) Ke Ekọn̄ Ererimbot I ama okokụre, nso akwa edibahade kpukpru mbon ẹmi ẹkedọhọde nte idide mme Christian akada itie? (b) Didie ke mme ata Christian ẹmi ẹyetde aran ẹkenọ uyarade nte ke mmimọ, ke akpanikọ, ikedi “nditọ Obio Ubọn̄”?
8 Ke akpanikọ, ke Ekọn̄ Ererimbot I ama okokụre, akwa edibahade kpukpru owo oro ẹdọhọde nte idide mme Christian nsịn ke otu iba ama ada itie: (1) Mme ọkwọrọ ederi Christendom ye mme anditiene mmọ, ẹmi ẹkenọde Ediomi M’idụt (idahaemi Edidiana M’idụt) ọkpọsọn̄ ibetedem, ke adan̄aemi ẹsụk ẹsọn̄ọde ẹmụm ufreidụt mmọ ẹkama. (2) Ibat ibat mme Christian akpanikọ oro ẹyetde aran eke eyo ukụre ekọn̄ oro, ẹmi ẹkenọde Obio Ubọn̄ Messiah Abasi ọyọhọ ibetedem mmọ. Ke ndinọ mme ukara ererimbot an̄wan̄wa ibetedem nte usụn̄ ndinyene emem ye ifụre, akpa otu oro ama anam ana in̄wan̄în̄wan̄ nte ke mmimọ ikedịghe mme Christian akpanikọ. (John 17:16) Ke edide isio ye oro, mme asan̄autom Jehovah nte enende ẹma ẹdiọn̄ọ Ediomi M’idụt nte “n̄kpọ mbubiam nsobo” eyomfịn, oro ẹtịn̄de ẹban̄a ke Matthew 24:15. Sia ẹwụtde idemmọ nte idide ata “nditọ Obio Ubọn̄ [Abasi],” mmọ ẹnyịme ndikwọrọ “gospel Ubọn̄ Abasi emi ke ofụri ekondo.” (Matt. 24:14) Ye mme utịp ewe?
9. (a) Didie ke ẹkenam n̄kaiso utom edibahade, ndien ke n̄kemuyo ye ewe prọfesi? (b) Mme prọfesi ẹmi ndisu ẹwụt nso?
9 Ekem, nte Jesus ekebemde iso etịn̄, enye ama ọtọn̄ọ ndibahade mme owo ẹtode kpukpru idụt, “nte emi ekpemerọn̄ abaharede erọn̄ ye ebot.” Utom emi, oro Christ etiede ke ebekpo esie ke heaven ọnọ ndausụn̄ mi, amakaiso tutu osịm usen mfịn, ndien enye otụk fi ọkpọkpọ. Ata ediwak ke otu ubonowo ẹse Obio Ubọn̄ Abasi ye “nditọ” esie oro ẹyetde aran ke spirit ke mbio ndien ke ntre ẹyenọ mmọ ẹka “nsinsi edisịbe mfep” (NW) ke n̄kpa. Nte ededi, Ọbọn̄ ọnọ mbon eken ikot ndida Obio Ubọn̄ esie eke n̄kan̄ isọn̄ nnyene, ye nsinsi uwem ke ekikere. Mme utọ mbon mbieterọn̄ oro ẹmedian idemmọ ye “nditọ Obio Ubọn̄” oro ẹyetde aran, idem okposụkedi mmọemi ẹdide iso en̄wan ibak ibak ukọbọ. (Matt. 25:31-46) Mmọ ke edinam akpanikọ ẹmen̄wam mmọ ke ndisuan akpan etop Obio Ubọn̄. Akwa otuowo oro ibat mmọ edide ke ediwak miliọn ke ẹbuana ke utom emi. Ẹmekop etop Obio Ubọn̄ tutu osịm ke utịt isọn̄. Nso ke mme n̄kpọntịbe ẹmi ẹwụt? Nte ke nnyịn imenen̄ede ikpere utịt “ukperedem ini” ye nte ke “usen Jehovah” emekpere.
NSO INA KE ISO?
10. Nte utom ukwọrọikọ efen efen odu ndinam mbemiso “usen Jehovah” edide edisịm?
10 Nte mme prọfesi ke ẹsụk ẹdu oro ẹbetde edisu mbemiso akwa ye ndịk ndịk usen Jehovah ọtọn̄ọde? Ih! Edibahade mme owo kaban̄a eneni Obio Ubọn̄ ikụreke kan̄a. Ke ndusụk ebiet ẹmi ẹkesobode ikan̄îkan̄ ubiọn̄ọ ke ediwak isua, idahaemi ke ẹdọk ata ediwak mbufa mbet. Ndien idem ke ebiet emi mme owo ẹsịnde eti mbụk, ẹmesọn̄ọ unenikpe ye mbọm Jehovah ke nnyịn ndinọ ikọ ntiense. Ntre, ẹkaiso ke utom! Jesus ọn̄wọn̄ọ ọnọ nnyịn ete, ke ini ẹnamde enye ẹkụre, “utịt eyedi.”—Matt. 24:14.
11. (a) Nte ẹwụtde ke 1 Thessalonica 5:2, 3, ewe n̄kpọntịbe oro odotde ẹtịm ẹfiọk ebet ndida itie? (b) Nso ke enye ediwọrọ ọnọ nnyịn?
11 Akwa n̄wọrọnda prọfesi Bible efen ebemiso etịn̄ ete: “Ini mme owo ẹdọhọde ẹte, idu ke emem ye ifụre, kpa adan̄aoro ke nsobo abuat mmọ, nte emi uman abuatde n̄wan idịbi; ndien mmọ idikwe usụn̄ ubọhọ.” (1 Thess. 5:2, 3) Ke ibet ndikụt uduot oro mfiori “emem ye ifụre” emi edidade. Edi emi ke akpanikọ idiwọrọke ite ke mme adaiso ererimbot ẹmenen̄ede ẹkọk mme mfịna ubonowo. Owo ididaha mbon oro ‘ẹsọn̄ọde ẹnyene’ usen Jehovah ke ekikere itụn usụn̄ ke mfiori oro. Mmọ ẹfiọk ẹte ke ndondo oro okụrede, ‘mbabuat nsobo’ eyedi.
12. Mme n̄kpọntịbe ewe inikiet inikiet ẹditiene editan̄a “emem ye ifụre,” ndien ke nso ndutịm?
12 Akpa, nte N̄wed Abasi owụtde, ke udomo eke ofụri ererimbot, mme akara ukaraidem ẹyewọn̄ọde iso ẹse Akwa Babylon, kpa ukara ererimbot eke nsunsu ido ukpono, ẹnyụn̄ ẹsobo enye. (Edi. 17:15, 16) Ke akpanikọ odot ẹtịm ẹfiọk nte ke edu usua oro, akpan akpan ye mme ido ukpono Christendom ke ẹwụt idemmọ idem idahaemi. Mme ukara oro ẹnyenede n̄kpọsọn̄ edumbet oro ẹbiọn̄ọde-biọn̄ọ ido ukpono ẹmenyenyene ọkpọsọn̄ odudu ke Edidiana M’idụt, ndien mbio obio ke idemmọ ke mme idụt eke ido ukpono eset ke ẹkpọn̄ ido ukpono mme ete mmọ ke ediwak ibat. Nso ke kpukpru ẹmi ẹwọrọ? Nte ke nsobo kpukpru nsunsu ido ukpono ke ekpere. Ke oro ebede, ke ini mme idụt ke nsọn̄ibuot ẹwọn̄ọrede, ke ofụri odudu, ndin̄wana ye mbon oro ẹmụmde itie edikara Jehovah ẹkama, ẹyen̄wan̄a ifụtesịt Abasi ẹduọk mme ukara ukaraidem ye mme andinọ mmọ ibetedem, osụn̄ọde ke edisobo kpukpru mmọ ofụri ofụri. Ke akpatre, ẹyetop Satan ke idemesie ye mme demon esie ẹdọn̄ ke editụn̄ọ ukpe, ẹbọde enye odudu ofụri ofụri man edinyene odudu ke idem ubonowo. Emi ke akpanikọ edidi “usen Jehovah,” kpa usen emi ẹdimenerede enyịn̄ esie ke enyọn̄.—Ezek. 38:18, 22, 23; Edi. 19:11–20:3.
13. Ntak emi mîdiwụtke eti ibuot ndikere nte ke usen Jehovah ke osụk ododu anyan usụn̄-o?
13 Enye edidi ke n̄kemn̄kem ini, nte ekemde ye ndutịm Abasi. Enye idinamke ubịghi. (Hab. 2:3) Ti, nsobo Jerusalem ke 70 E.N. ekedi usọp usọp, ke ini mme Jew mîkodorike enyịn, kpa ini mmọ ẹkekerede ke n̄kpọndịk ama ebe efep. Ndien nso kaban̄a Babylon eset? Enye ama okop odudu, enyene uko, ẹbọp ikpọ ibibene ẹkanade enye ẹkụk. Edi enye ama ọduọ ke okoneyo kiet. Ntre, n̄ko, ‘mbabuat nsobo’ eyesịm idiọk editịm n̄kpọ emi odude kemi. Ke emi otịbede, akpakam ẹkụt nnyịn nte idianade kiet ke utuakibuot akpanikọ, nte ‘isọn̄ọde inyene’ usen Jehovah ke ekikere.
Nneme Ndụn̄ọde
● Ntak emi edide akpan n̄kpọ ‘ndisọn̄ọ nnyene’ usen Jehovah ke ekikere? Didie ke nnyịn ikeme ndinam oro?
● Didie ke edibahade mme owo oro osụk adade itie mi otụk nnyịn owo kiet kiet?
● Nso isụk ina ke iso mbemiso usen Jehovah ọtọn̄ọde? Ntre nso ke nnyịn owo kiet kiet ikpanam?