Ibuot Edịp
Sọn̄ọ Nyene Usen Jehovah ke Ekikere
1. Eketie fi didie ke idem ke ini afo ekekpepde ke akpa ini nte ke edinyan̄a owo nsio ke mme mfụhọ mfụhọ idaha akani editịm n̄kpọ emi ekpere?
KIET ke otu akpa n̄kpọ oro afo ekekpepde oto Bible ekedi nte ke uduak Jehovah edi ofụri isọn̄ ndikabade ndi paradise. Ke obufa ererimbot oro, ekọn̄, ubiatibet, ubuene, udọn̄ọ, ndutụhọ, ye n̄kpa ididụhe aba. Idem mme akpan̄kpa ẹyefiak ẹdidu uwem. Nso utịbe utịbe idotenyịn ke emi edi ntem! Uyarade nte ke edidu Christ emi enyịn mîkwe nte Edidem emi akarade ọkọtọn̄ọ ke 1914 ye nte ke ọtọn̄ọde ke ini oro nnyịn idu ke ukperedem ini eke idiọk ererimbot emi ẹsọn̄ọ nte ke kpukpru oro ẹsan̄a ẹkpere. Ke utịt ukperedem ini emi, Jehovah oyosobo editịm n̄kpọ emi odude ke emi efep onyụn̄ ada obufa ererimbot oro ẹken̄wọn̄ọde edi!
2. Nso idi “usen Jehovah”?
2 Bible okot ini nsobo emi edide “Usen Ọbọn̄.” (2 Peter 3:10) Enye edi “usen iyatesịt Jehovah” ye ofụri ererimbot Satan. (Zephaniah 2:3) Enye edisịm utịt ke “ekọn̄ akwa usen Abasi, Andikara kpukpru n̄kpọ . . . , ẹkotde ke usem Hebrew, ẹte, Har-Magedon [Armageddon],” emi ẹdisọhide “ndidem kpukpru ekondo” ẹfep. (Ediyarade 16:14, 16) Nte usụn̄ uwem fo owụt mbuọtidem fo nte ke “usen Jehovah” emi ekpere?—Zephaniah 1:14-18; Jeremiah 25:33.
3. (a) Ini ewe ke usen Jehovah edidi? (b) Nso ufọn idu ke Jehovah ndiketre ndiyarade “usen oro m̀mê hour oro”?
3 Bible isianke nnyịn nnennen ini emi Jesus Christ edidide nte Andisobo oro Jehovah emekde ndisobo editịm n̄kpọ Satan. Jesus ọkọdọhọ ete: “Edi baba owo kiet ifiọkke iban̄a usen oro m̀mê hour oro, kpa mme angel ke heaven, Eyen inyụn̄ ifiọkke, ibọhọke Ete ikpọn̄.” (Mark 13:32) Edieke mme owo mînen̄ekede ima Jehovah, oyonụk mmọ ndisịk usen esie nnịm ke ekikere mmọ nnyụn̄ n̄wọn̄ọde mbịne mme n̄kpọ ererimbot. Edi mbon oro ẹnen̄erede ẹma Jehovah ẹyenam n̄kpọ esie ke ofụri ukpọn̄, inamke n̄kpọ m̀mê ini ewe ke utịt idiọk editịm n̄kpọ emi edidi.—Psalm 37:4; 1 John 5:3.
4. Nso ke Jesus eketịn̄ nte ikọ item?
4 Ke ọnọde mme andima Jehovah item, Jesus ọdọhọ ete: “Mbufo ẹtịn̄ enyịn ẹse, ẹkpeme, ẹnyụn̄ ẹbọn̄ akam; koro mbufo mîfiọkke edikem ini.” (Mark 13:33-37) Enye ama akpak nnyịn ete ikûyak uyụhọ udia ye mmịn m̀mê “ekikere uwem emi” ẹda ekese ntịn̄enyịn nnyịn tutu nnyịn ifre iban̄a nte ini emi edide akpan n̄kpọ.—Luke 21:34-36; Matthew 24:37-42.
5. Nte Peter akanamde an̄wan̄a, nso ke usen Jehovah edida edi?
5 Peter ke ukem usụn̄ oro ọnọ nnyịn item ndisọn̄ọ nyom “edidi Usen Abasi, kpa usen oro edisịnde ikpa-enyọn̄ atara ke ikan̄, edinyụn̄ esịnde se ẹdade ẹbot ererimbot atara ke ọkpọsọn̄ ufiop.” Ẹyesobo kpukpru ukara owo—“ikpa-enyọn̄”—ẹfep, kpa nte ẹdisobode idiọk n̄kaowo ke ofụri ofụri—“ererimbot”—ye “se ẹdade ẹbot” ererimbot, kpa mme ekikere ye mme edinam eke idiọk ererimbot emi, utọ nte edu edida ke idem n̄kpọn̄ Abasi ọkọrọ ye oburobụt usụn̄ uwem uma inyene esie. “Obufa enyọn̄ [Obio Ubọn̄ Abasi eke heaven] ye obufa isọn̄ [obufa n̄kaowo ke isọn̄]” emi ‘edinen ido edidụn̄de’ ẹyeda itie mmọ emi. (2 Peter 3:10-13) Mme n̄kpọntịbe emi ẹnyekde ererimbot mi ẹditọn̄ọ ke mbuari ke usen ye hour oro owo mîdorike enyịn.—Matthew 24:44.
Du ke Edidemede Ban̄a Idiọn̄ọ
6. (a) Ke nso udomo ke ibọrọ oro Jesus ọkọnọde ke mbụme mme mbet esie ekenyene n̄kpọ ndinam ye utịt editịm n̄kpọ mme Jew? (b) Mme ikpehe ewe ke ibọrọ Jesus ẹwụk ntịn̄enyịn ke mme n̄kpọntịbe ye mme edu emi ẹketọn̄ọde toto ke 1914 ka iso?
6 Ke ikerede iban̄a ini oro nnyịn idude, akpana nnyịn itịm imehe ye mme ọyọhọ ntọt ẹban̄ade ntan̄ndian idiọn̄ọ oro anamde ẹdiọn̄ọ ukperedem ini—kpa “akpatre ini eyo emi.” Ti ete ke ini Jesus ọkọbọrọde mbụme mme mbet esie oro ẹwetde ke Matthew 24:3, ndusụk n̄kpọ oro enye eketịn̄de aban̄a ke ufan̄ikọ 4 esịm 22 ẹma ẹsu ke ekpri udomo ke editịm n̄kpọ mme Jew ke ufọt isua 33 ye 70 E.N. Edi ntịn̄nnịm ikọ oro enyene akpan edisu esie ke ikpehe ini oro ọkọtọn̄ọde ke 1914, kpa ini “edidu [Christ; NW] ye eke akpatre ini eyo emi.” Matthew 24:23-28 etịn̄ se ididade itie ọtọn̄ọde ke isua 70 E.N. tutu esịm ini edidu Christ. Mme idaha oro ẹtịn̄de ẹban̄a ke Matthew 24:29–25:46 ẹda itie ke utịt ini.
7. (a) Ntak emi nnyịn ikpodude ke edidemede iban̄a nte mme idaha ndondo emi ẹsude idiọn̄ọ oro? (b) Bọrọ mme mbụme oro ẹdude ke utịt ikpehe emi, owụtde nte idiọn̄ọ oro osude toto ke 1914.
7 Ana nnyịn itịn̄ enyịn ise mme n̄kpọntịbe ye mme edu oro ẹsude idiọn̄ọ oro. Ndibuan mme n̄kpọ emi ke ntịn̄nnịm ikọ Bible ayan̄wam nnyịn ndisọn̄ọ nnyene usen Jehovah ke ekikere. Enye n̄ko ayan̄wam nnyịn ndisịn mbukpek ke ini itọtde mbon efen iban̄a nte usen oro ekperede. (Isaiah 61:1, 2) Ye mme uduak emi ke ekikere, ẹyak nnyịn idụn̄ọde mme mbụme emi ẹtienede mi, oro ẹsiode ubak idiọn̄ọ oro ẹwụt, nte ẹwetde ke Matthew 24:7 ye Luke 21:10, 11.
Ke nso n̄wọrọnda usụn̄ ke se ẹkebemde iso ẹtịn̄ ẹban̄a ‘idụt ndidaha n̄n̄wana ye idụt ye obio edidem kiet ndinyụn̄ ndaha n̄n̄wana ye obio edidem efen’ okosu ọtọn̄ọde ke 1914? Kaban̄a mme ekọn̄, nso itịbe toto ke ini oro?
Ke 1918, ewe idiọk udọn̄ọ okowot mme owo awak akan se Ekọn̄ Ererimbot I okowotde? Kpa ye ifiọk ibọkusọbọ owo, mme udọn̄ọ ewe ẹsụk ẹwot ediwak miliọn owo?
Ke nso udomo ke akan̄ ọnọmọ isọn̄ kpa ye mme n̄kọri ke ifiọk ntaifiọk eke isua ikie oro ekebede?
Nso inam fi enịm ke akpanikọ nte ke 2 Timothy 3:1-5, 13 itịn̄ke iban̄a usụn̄ nte uwem etiede, edi etịn̄ aban̄a usụn̄ emi mme idiọk idaha ẹsọn̄de ubọk nte nnyịn isan̄ade ikpere utịt ukperedem ini?
Edibahade Mme Owo
8. (a) Nso efen, oro ẹtịn̄de ẹban̄a ke Matthew 13:24-30, 36-43, ke Jesus akabuan ye akpatre ini eyo emi? (b) Nso ke n̄ke Jesus ọwọrọ?
8 Mme akpan idaha eken ẹdu oro Jesus akabuande ye akpatre ini eyo emi. Kiet ke otu mmọ emi edi edibahade “nditọ Obio Ubọn̄ Heaven” n̄kpọn̄ “nditọ andidiọk.” Jesus eketịn̄ emi ke n̄ke esie aban̄ade in̄wan̄ ibokpot oro asua akasuande idiọk n̄kpasịp. Ke n̄ke esie, “ibokpot” ada aban̄a ata mme Christian emi ẹyetde aran. “Idiọk n̄kpasịp” edi mbon oro ẹdọhọde ke idi mme Christian edi ẹwụtde idemmọ nte idide “nditọ andidiọk” koro mmọ ẹsọn̄ọde ẹyịre ye ererimbot emi Devil edide andikara. Ẹbahade mmọ emi ẹkpọn̄ “nditọ Obio Ubọn̄ [Abasi]” ndien ẹnịm mmọ idiọn̄ọ ẹnọ nsobo. (Matthew 13:24-30, 36-43) Nte emi enen̄ede ada itie?
9. (a) Ke Ekọn̄ Ererimbot I ama okokụre, nso akwa edibahade eke kpukpru mbon oro ẹdọhọde ke idi mme Christian akada itie? (b) Didie ke mme Christian oro ẹyetde aran ẹkewụt nte ke mmimọ ikedi mme ata asan̄autom Obio Ubọn̄?
9 Ke Ekọn̄ Ererimbot I ama okokụre, ẹma ẹbahade kpukpru mbon oro ẹdọhọde ke idi mme Christian ẹdọn̄ ke otu iba: (1) Mme ọkwọrọ ederi Christendom ye mme anditiene mmọ, emi ẹkenọde Esop Ediomi Mme Idụt (idahaemi Edidiana Mme Idụt) ọyọhọ ibetedem ke adan̄aemi ẹsụk ẹsọn̄ọde ẹda ẹnam akpanikọ ẹnọ mme idụt oro mmọ ẹtode, ye (2) mme ata Christian ke eyo ukụre ekọn̄ oro, emi ẹkenọde Obio Ubọn̄ Messiah Abasi ọyọhọ ibetedem, utu ke ndinọ mme idụt ererimbot emi. (John 17:16) Mmọ emi ẹma ẹwụt idemmọ nte mme ata asan̄autom Obio Ubọn̄ Abasi ebe ke ndinam utom edikwọrọ “gospel Ubọn̄ Abasi emi” ke ofụri ekondo. (Matthew 24:14) Ye mme utịp ewe?
10. Nso ikedi akpa utịp ke utom edikwọrọ Obio Ubọn̄?
10 Akpa, ẹma ẹtan̄ nsụhọ mbon oro ẹyetde aran ke edisana spirit, emi ẹnyenede idotenyịn ndidu ye Christ nte ubak Obio Ubọn̄ eke heaven oro ẹbok. Okposụkedi utọ mbon oro ẹkesuanade ẹyọhọ otu mme idụt, ẹma ẹda mmọ ẹsịn ke esop oro adianade kiet. Utịt edinịm mbon oro ẹyetde aran mi idiọn̄ọ asan̄a ekpere.—Ediyarade 7:3, 4.
11. (a) Nso utom editan̄ mbok aka iso, ndien ke n̄kemuyo ye ewe ntịn̄nnịm ikọ? (b) Ntịn̄nnịm ikọ emi ndisu owụt nso?
11 Ekem, ke idak ndausụn̄ Christ, ẹma ẹtọn̄ọ nditan̄ “akwa otu owo . . . ẹtode ke kpukpru obio ye esien ye idụt ye usem” mbok. Mmọ emi ẹnam “mme erọn̄ en̄wen” emi ẹdibọhọde “akwa ukụt” ẹdụk obufa ererimbot Abasi. (Ediyarade 7:9, 14; John 10:16) Utom edikwọrọ Obio Ubọn̄ Abasi emi mbemiso utịt edide aka iso tutu esịm mfịn emi. Ke edinam akpanikọ, akwa otuowo eke mme erọn̄ en̄wen, ẹwakde idahaemi ẹsịm ediwak miliọn, ẹn̄wam nsụhọ emi ẹyetde aran nditan̄a akpan etop Obio Ubọn̄ oro an̄wan̄wa. Ẹkop etop emi ke kpukpru idụt.
Nso Ina ke Iso?
12. Ẹnyene ndinam utom ukwọrọikọ adan̄a didie mbemiso usen Jehovah edide?
12 Kpukpru emi ẹwụt nte ke nnyịn imekpere utịt ukperedem ini ye nte ke usen Jehovah enen̄ede ekpere. Edi nte mme ntịn̄nnịm ikọ ẹdu emi anade ẹsu kan̄a mbemiso enyene-ndịk usen oro ọtọn̄ọde? Ih. Ke akpa itie, edibahade mme owo ke se iban̄ade n̄kpọ Obio Ubọn̄ ikụreke kan̄a. Ke ndusụk ebiet emi ẹkesobode ikan̄-ikan̄ ubiọn̄ọ ke ediwak isua, n̄kọri odu idahaemi ke ibat mbufa mbet. Idem ke ebiet emi mme owo ẹsịnde eti mbụk, nnyịn ndinọ ikọ ntiense owụt mbọm Jehovah. Ntre, ẹka iso ke utom! Jesus ọn̄wọn̄ọ ọnọ nnyịn ete ke ini utom emi okụrede, utịt eyedi.
13. Nte ẹwetde ke 1 Thessalonica 5:2, 3, nso n̄wọrọnda n̄kpọntịbe edida itie ke mîbịghike, ndien nso ke enye ediwọrọ ọnọ nnyịn?
13 Akwa n̄wọrọnda ntịn̄nnịm ikọ Bible efen ebem iso etịn̄ ete: “Ini mme owo ẹdọhọde ẹte, idu ke emem ye ifụre, kpa adan̄aoro ke nsobo abuat mmọ, nte emi uman abuatde n̄wan idịbi; ndien mmọ idikwe usụn̄ ubọhọ.” (1 Thessalonica 5:2, 3) Ke ibet ndikụt nte mfiori “emem ye ifụre” emi edidade itie. Edi enye ke akpanikọ idiwọrọke ite ke mme adaiso ererimbot ẹnen̄ede ẹkọk mme mfịna ubonowo. Owo ididaha mfiori oro ibian̄a mbon oro ẹsọn̄ọde ẹnyene usen Jehovah ke ekikere. Mmọ ẹfiọk ẹte ke ndondo oro emi ebede, mbabuat nsobo eyedi.
14. Mme n̄kpọntịbe ewe ẹdida itie ke ini akwa ukụt, ndien tịn̄ nte mmọ emi ẹdidade itie ke adiana ke adiana?
14 Ke ntọn̄ọ akwa ukụt oro, mme andikara ẹyewọn̄ọde ẹn̄wana ye Akwa Babylon, kpa ukara ererimbot eke nsunsu ido ukpono, ndien ẹyesọhi enye ẹfep. (Matthew 24:21; Ediyarade 17:15, 16) Ke oro ebede, mme idụt ẹyewọn̄ọde ndin̄wana ye mbon oro ẹdade ẹnọ itie edikara Jehovah, anamde Jehovah ayat esịt ye ukara ukaraidem ye mme andinọ mmọ ibetedem, osụn̄ọde ke edisobo mmọ ofụri ofụri. Oro edidi nte Armageddon edidade akwa ukụt ekesịm utịt. Ekem, ẹyetop Satan ye mme demon esie ẹdọn̄ ke editụn̄ọ ukpe, ndien mmọ idikemeke aba ndinyene odudu ke idem ubonowo. Emi ayada usen Jehovah ekesịm utịt ke ini ẹdimenerede enyịn̄ esie ẹnịm ke enyọn̄.—Ezekiel 38:18, 22, 23; Ediyarade 19:11–20:3.
15. Ntak emi mîwụtke eti ibuot ndikere ke usen Jehovah ke osụk ebebịghi-e?
15 Utịt editịm n̄kpọ emi eyedi ke edikem ini, nte ekemde ye ndutịm Abasi. Enye idibehe ini. (Habakkuk 2:3) Ti ete ke nsobo Jerusalem ke isua 70 E.N. ekedi usọp usọp, ke ini mme Jew mîkodorike enyịn, ke ini mmọ ẹkekerede ke n̄kpọndịk ama ebe efep. Ndien nso kaban̄a Babylon eset? Enye ama okop odudu, enyene uko, onyụn̄ enyene ikpọ ibibene oro ẹkebọpde ẹkanade enye ẹkụk. Edi enye ọkọduọ ke okoneyo kiet. Ntre, n̄ko, mbabuat nsobo eyesịm idiọk editịm n̄kpọ emi. Ke ini emi editịbede, ẹkpekam ẹkụt nnyịn nte idianade kiet ke utuakibuot akpanikọ, isọn̄ọde inyene usen Jehovah ke ekikere.
Nneme Ndụn̄ọde
• Ntak edide akpan n̄kpọ ndisọn̄ọ nnyene usen Jehovah ke ekikere? Didie ke nnyịn ikeme ndinam oro?
• Didie ke edibahade mme owo oro akade iso otụk nnyịn?
• Nso isụk ina ke iso mbemiso usen Jehovah ọtọn̄ọde? Ntre nso ke nnyịn ikpanam?
[Mme ndise ke page 180, 181]
Ke mîbịghike, ukperedem ini eyesịm utịt ke nsobo editịm n̄kpọ Satan