Mme Uyen—Nte Mbufo ke Ẹnam N̄kọri eke Spirit?

“OKPOSỤKEDI n̄kesidụkde mme mbono esop Christian, n̄kenyeneke ọkpọsọn̄ udọn̄ ndinam n̄kpọ Jehovah,” ntre ke Hideo ọdọhọ nte enye etide ini emi enye okodude ke akamba ufọkn̄wed. “Mma nsiwak ndikere nte n̄wọrọde etop ke otu nsan̄a ubet ukpepn̄kpọ mi nnyụn̄ nsan̄ade ntan̄idem ntan̄idem ke efak ye ufan mi an̄wan. N̄kenyeneke akpan utịtmbuba, n̄konyụn̄ nnyeneke udọn̄ ndomokiet ndinam n̄kọri eke spirit.” Ukem nte Hideo, etie nte ke ediwak uyen ẹnana uduak, inyeneke udọn̄ ndomokiet ndisịm nti utịtmbuba m̀mê ndinam n̄kọri ekededi.

Edieke afo edide uyen, ekeme ndidi afo emesikop nduaidem ke ini ebrede mbre mbuba m̀mê ke ini abuanade ke mme edinam ini nduọkodudu. Nte ededi, ekeme ndidi iditiehe fi ntre ke idem ke ini edide edisịm mme edinam eke spirit. Ndi ẹkeme ndikop nduaidem mban̄a mme utịtmbuba eke spirit? Kere ban̄a mme ikọ andiwet psalm emi: “Item Jehovah edi akpanikọ, asian mme ọkọi. . . . Mbet Jehovah ẹyama, ẹn̄wan̄a owo enyịn.” (Psalm 19:7, 8) Ikọ Abasi ekeme ndinam “ọkọi” anam n̄kpọ ye eti ibuot, ‘anamde enyịn esie ẹn̄wan̄a.’ Ih, mme n̄kpọ eke spirit ẹkeme ndiduai fi idem nnyụn̄ ndat fi esịt. Edi nso ke oyom man mme n̄kpọ eke spirit ẹduai fi idem? M̀mọ̀n̄ ke afo ọkpọtọn̄ọ?

Nyene Udọn̄ Ndinam N̄kpọ Abasi

Akpa, ana afo enyene udọn̄. Da ekpri Edidem Josiah ke uwụtn̄kpọ. Ke ini ẹkekụtde n̄wed Ibet Jehovah ke temple, Josiah ama ọdọhọ ẹkot enye ndien se enye okokopde ama enen̄ede otụk enye. Nte utịp, “Josiah osion̄o kpukpru mbubiam-n̄kpọ efep ke kpukpru mme idụt eke ẹnyenede nditọ Israel.” (2 Chronicles 34:14-21, 33) Ndikot Ikọ Abasi ama onụk Josiah ndinam ekese ke ndimenede edisana utuakibuot ke enyọn̄.

Afo n̄ko emekeme ndikọri udọn̄ ndinam n̄kpọ Jehovah edieke afo okotde Bible onyụn̄ etiede ekere se okotde kpukpru ini. Oro edi se ikonụkde Hideo. Enye ama ọtọn̄ọ ndidụk ndụk ye asiakusụn̄ oro ama ọkọsọn̄, kpa asan̄autom uyọhọ ini eke Mme Ntiense Jehovah. Asiakusụn̄ oro ekedi ifịk ifịk eyen ukpepn̄kpọ Bible ama onyụn̄ odomo ndida se enye ekekpepde ke Bible nsịn ke edinam. Sia uwụtn̄kpọ asiakusụn̄ oro ekenen̄erede esịn udọn̄ ọnọ enye, Hideo ama ọtọn̄ọ ndikpebe enye onyụn̄ ọkọri ọkpọsọn̄ udọn̄ ndinam n̄kpọ nnọ Abasi ye mbon en̄wen. N̄kọri eke spirit esie ama osụn̄ọ ke uwem oro enyenede uduak.

Ndikot Bible ke usen ke usen ekeme ndidemede n̄kparawa owo udọn̄. Takahiro anam an̄wan̄a ete: “Ini ekededi oro ndụkde idap ndien ekem nti ke n̄kokotke Bible kan̄a ke usen oro, mmesidaha nda nnyụn̄ n̄kot. Mma nnyene ndausụn̄ Jehovah nte utịp. Edikot Bible ke usen ke usen ama enen̄ede etịp esịn ke ami ndinam n̄kọri eke spirit. Sia n̄kebierede ndinyene ebuana oro okponde akan ke utom Jehovah, mma ndụk utom usiakusụn̄ ofụri ini esisịt ini ke mma n̄kokụre akamba ufọkn̄wed. Ndien ami mmenen̄ede mma utom usiakusụn̄.”

Ke adianade ye edikot Bible, nso n̄kpọ efen ikeme ndin̄wam fi ndisọn̄ọ ubiere fo nditoro Jehovah? Eka Tomohiro ekekpep enye akpanikọ Bible. Tomohiro ọdọhọ ete: “Ekedi ke mma n̄kenen̄ede n̄kpep n̄wed oro Life Does Have a Purpose ke ini n̄kedide isua 19 ke ima Jehovah ye uwa ufak Jesus ẹkenen̄ede ẹtụk mi. Esịtekọm oro n̄kowụtde mban̄a ima Abasi ama onụk mi ndinam ekese ke utom Jehovah.” (2 Corinth 5:14, 15) Ukem nte Tomohiro, ẹsịn udọn̄ ẹnọ ediwak mme uyen ndinam n̄kọri eke spirit ebe ke ndika iso nnyene ifịk ifịk ọkpọkpọ ukpepn̄kpọ Bible.

Kpa ye oro, nso edieke afo osụk ananade udọn̄ ofụri esịt ndinam n̄kpọ Jehovah? Ndi odu owo oro afo ekemede ndika mbịne n̄kọbọ un̄wam? Apostle Paul ekewet ete: “Koro edi Abasi . . . anam mbufo ẹnyịme ẹnyụn̄ ẹnam.” (Philippi 2:13) Edieke afo ọbọn̄de akam eben̄e un̄wam Jehovah, enye ọyọnọ fi edisana spirit esie ke ntatubọk, emi edinọde fi odudu ‘ndinyịme’ nnyụn̄ ‘nnam n̄kpọ.’ Emi ọwọrọ ke edisana spirit Abasi ayanam udọn̄ fo ndinam ofụri ukeme fo ke utom Jehovah ọkọri onyụn̄ an̄wam fi ndikọri ke n̄kan̄ eke spirit. Adan̄a nte ekekeme, buọt idem ke odudu Jehovah nnyụn̄ sọn̄ esịt!

Nịm Mme Utịtmbuba

Ndondo oro afo ebierede ndinam n̄kpọ Jehovah ata ọyọhọ ọyọhọ, oyom afo enịm mme ọkpọkpọ utịtmbuba man anam n̄kọri eke spirit. Mana, ekpri n̄kaiferi Christian ọkọdọhọ ete: “Ndinịm mme utịtmbuba ekedi akamba un̄wam ọnọ mi. Utu ke ndifiak edem, n̄kaka iso iso ye uko. Ye mme utịtmbuba mi ke ekikere, mma mbọn̄ akam ifịk ifịk nnọ Jehovah nyom ndausụn̄, ndien mma n̄keme ndinam n̄kọri, n̄kpọ ikonyụn̄ iwọn̄ọkede ntịn̄enyịn mi.”

Mme utịtmbuba fo ẹkpenyene ndidi ata idem n̄kpọ ye se ekemede ndisịm. Ndikot ibuot Bible kiet kpukpru usen ekeme ndidi eti utịtmbuba. Afo n̄ko emekeme nditọn̄ọ ndinam ndụn̄ọde. Ke ndida mme n̄wed oro ẹdude ke Ikọmbakara nnam an̄wan̄a, afo emekeme ndikpep mme edu Jehovah oro ẹsiakde ke idak ekpri ibuotikọ oro “Qualities by Name” ke idak ibuot nneme oro, “Jehovah” ke Watch Tower Publications Index. Ibuot nneme 40 ẹdu oro afo ekemede ndidụn̄ọde, ndien ndụn̄ọde oro nte eyịghe mîdụhe ayanam fi esịk ekpere Jehovah onyụn̄ onụk fi ndinam ekese nnọ enye. Mme utịtmbuba eken oro afo ekemede ndisịm ẹsịne ndinọ ibọrọ ke nsụhọde n̄kaha ini kiet ke mme mbono esop Christian kiet kiet oro oyomde ebuana otuowo, nditịm mfiọk ke nsụhọde n̄kaha andibuana kiet ke esop ke kpukpru mbono esop, ndinyụn̄ ntre ndiyak usen ebe ye unana edibọn̄ akam nnọ Jehovah nnyụn̄ ntịn̄ mban̄a enye nnọ mbon en̄wen.

Edieke afo mûsịnke enyịn̄ kan̄a ke Ufọkn̄wed Utom Ukara Abasi, oro edidi eti utịtmbuba ọnọ fi. Ndi afo emesibuana ke utom an̄wautom? Edieke mûsubuanake, oyom afo anam n̄kpọ man akabade edi asuanetop oro mînaha kan̄a baptism. Ndinen̄ede n̄kere mban̄a itie ebuana fo ye Jehovah nnyụn̄ nyak idemfo nnọ enye ẹdidi mme usio-ukot efen. Ediwak uyen ẹdomo ndidu uwem ekekem ye uyakidem mmọ ebe ke ndinyanade mbịne utom ukwọrọikọ uyọhọ ini.

Ke adan̄aemi ọfọnde ndinịm mme utịtmbuba ke uwem fo, kpeme idem mbak udukọri edu ndomoidem. Afo eyenyene akwa idatesịt ke se afo anamde edieke afo mûmenke okuo udomo ye eke mbon en̄wen.—Galatia 5:26; 6:4.

Ekeme ndidi afo ekere ke imọ inyeneke ifiọk esinyụn̄ ọsọn̄ fi ndinịm nti utịtmbuba. Do, nam item Bible emi: “Kpan̄ utọn̄ fo, nyụn̄ kop uyo mme ọfiọkn̄kpọ owo.” (Mme N̄ke 22:17) Yom un̄wam to ete ye eka fo m̀mê mme Christian eken oro ẹkọride ẹsịm ọyọhọ idaha. Nte ededi, oyom mme ete ye eka ye mbon en̄wen ẹwụt edikere mban̄a ẹnyụn̄ ẹnọ nsịnudọn̄ ke afan̄ emi. Mfịghe otode edidomo ndisịm mme utịtmbuba oro mbon en̄wen ẹnịmde ẹnọ mmọ ekeme ndinam mme uyen ẹkûkop idatesịt ndien ekeme ndikam mbiat uduak oro ẹkenịmde mme utịtmbuba oro. Oro ama etịbe ọnọ n̄kaiferi kiet, emi ọkọdọhọde ete: “Ete ye eka mi ẹma ẹnịm ediwak utịtmbuba ẹnọ mi, utọ nte edisịn enyịn̄ ke Ufọkn̄wed Utom Ukara Abasi, edibuana ke utom an̄wautom, edina baptism, ye edikabade ndi asiakusụn̄. Mma nsịn ọkpọsọn̄ ukeme ndisịm kpukpru mmọ. Ke ini n̄kesịmde utịtmbuba kiet, ete ye eka mi ikotoroke mi edi, utu ke oro, ẹkenịm utịtmbuba efen ẹnọ mi ndibịne. Nte utịp, eketie nte ke ẹnyenyịk mi ndisịm mme utịtmbuba oro. Mma n̄kpa mba ikonyụn̄ itiehe mi ke idem nte mmanam n̄kpọ ndomokiet.” Nso ikakwan̄a? Kpukpru utịtmbuba oro ẹma ẹfọn, edi idịghe enye ekenịm mmọ. Man okụt unen, ana afo enyene udọn̄ ndinam usio-ukot edinịm utịtmbuba nnọ idemfo!

Kere ban̄a Jesus Christ. Ke ini enye ekedide isọn̄, enye ama ọfiọk se Ete esie, Jehovah, okoyomde oto imọ. Ndinam uduak Jehovah ikedịghe sụk utịtmbuba inọ Jesus, edi ekedi utom oro anade enye anam. Didie ke Jesus ekese utom esie? Enye ọkọdọhọ ete: “Udia Mi edi ndinam uduak Andidọn̄ Mi, nnyụn̄ mma utom Esie.” (John 4:34) Jesus ama adat esịt ndinam uduak Jehovah onyụn̄ odu uwem ekekem ye se ete esie okoyomde oto enye. Emi eketie nte udia ọnọ Jesus—enye ama okop inemesịt ye uyụhọ ndikụre utom oro ẹkedọn̄de enye. (Mme Hebrew 10:5-10) Afo n̄ko emekeme ndikop idatesịt ke ini enen̄erede ọdọn̄ fi ndinam se ete ye eka fo ẹsịnde udọn̄ ẹnọ fi ndinam.

Kûkpa Mba ke Edinam Eti N̄kpọ

Ndondo oro afo enyenede utịtmbuba ke ekikere, sịn ọkpọsọn̄ ukeme ndisịm enye. Galatia 6:9 ọdọhọ ete: “Ẹyak ikûkpa mba ke edinam eti n̄kpọ; koro ke edikem ini nnyịn iyọdọk mbun̄wụm, edieke nnyịn mîyakke idem emem nnyịn.” Kûberi edem ke odudu m̀mê ukeme fo kpọt. Afo emekeme ndisobo mme n̄kpọ ubiọn̄ọ ndien ke ndusụk idaha emekeme ndisobo edikpu ibio ini. Edi Bible ọsọn̄ọ ọnọ nnyịn ete: “Diọn̄ọ [Abasi] ke kpukpru usụn̄ fo, ndien enye eyenen̄ede usụn̄ fo enịm.” (Mme N̄ke 3:6) Jehovah ọyọsọn̄ọ fi idem nte afo esịnde ọkpọsọn̄ ukeme ndisịm mme utịtmbuba fo eke spirit.

Ih, ebede ke ndikọri udọn̄ ndinam n̄kpọ Jehovah nnyụn̄ nnyanade mbịne mme utịtmbuba eke spirit, afo eyekeme ndinam “kpukpru owo ẹkụt n̄kọri fo.” (1 Timothy 4:15) Do afo oyodu uwem oro enyenede uduak ke ndinam utom Abasi.

[Ndise ke page 9]

Ndikot Bible nnyụn̄ ntie n̄kere se afo okotde oyonụk fi ndinam n̄kpọ Jehovah

[Ndise ke page 10]

Jesus ama odu uwem ekekem ye se Ete esie okoyomde