Ediwaha Oro Ekemede Ndidi Edidiọn̄
1 Ekedi ke idatesịt ke Zacchaeus akada Jesus ọnyọn̄ ufọk esie. Ndien nso edidiọn̄ ke ediwaha oro akakabade edi ntem!—Luke 19:2-9.
2 Mfịn, nte Ibuot esop, Jesus Christ eteme mbiowo ete “ẹkpeme udịm-erọn̄ Abasi.” (1 Pet. 5:2, 3; John 21:15-17) Ke adianade ye edinọ ukpep ke mme mbono esop ye edida usụn̄ ke utom an̄wautom, mme esenyịn esop ẹsinọ mme andibuana kiet kiet ke esop ima ima, ọkpọkpọ un̄wam. Ke ntre, afo emekeme ndidori enyịn ndibọ ọkpọkpọ ntịn̄enyịn nto mbiowo ke ini ke ini, edide ke ufọk fo, ke Ufọkmbono Obio Ubọn̄, ke adan̄aemi ẹsan̄ade ọtọkiet ke utom an̄wautom, m̀mê ke mme idaha efen. Nte afo ekpenyene ndikop ndịk mban̄a mme ediwaha eke mbiowo? N̄wan̄ansa-o. Mmọ ndiwaha edem fo iwọrọke ite ke afo emenyene mmeme ke ndusụk usụn̄. Nso, ndien, idi uduak utom ubọk erọn̄?
3 Paul ọkọdọhọ ke imọ ikoyom ndiwaha mbịne nditọete man ‘ikese nte mmọ ẹketiede.’ (Utom 15:36) Ih, nte mme ima ima ekpemerọn̄, mbiowo ẹnen̄ede ẹnyene udọn̄ ẹban̄a nte afo etiede. Mmọ ẹyom ndinọ un̄wam eke spirit oro ekemede ndidi n̄kpọ un̄wam nnyụn̄ mbọp fi. Utọ ọkpọkpọ ntịn̄enyịn oro edi se ima ima Ekpemerọn̄ nnyịn Jehovah oyomde owo nnyịn kiet kiet enyene.—Ezek. 34:11.
4 Dara Edidi Mbiowo: Uduak Paul ke ndika n̄kese nditọete esie ekedi man ‘ọnọ mmọ ndusụk enọ eke spirit, man oto do anam mmọ ẹsọn̄ọ ẹda; man etiene mmọ okop ndọn̄esịt emi otode mmọ.’ (Rome 1:11, 12) Kpukpru nnyịn imoyom ndọn̄esịt eke spirit ke n̄kpọsọn̄ ukperedem usen ẹmi, ndien nnyịn imoyom un̄wam man ika iso isọn̄ọ ida ke mbuọtidem. In̄wan̄în̄wan̄ edinam fo kaban̄a utom ubọk erọn̄ nte eyịghe mîdụhe oyosụn̄ọ ke eti ndọn̄esịt edem mbiba.
5 Wụt esịtekọm ban̄a ediwak ufọn oro ẹbọde ẹto utom ubọkerọn̄ mbiowo. Edieke ndusụk n̄kpọ m̀mê mbụme ẹdude ẹmi ẹfịnade fi, ti ete ke mbiowo ẹdu do ke esop ndin̄wam. Kûmen̄e ndineme mme mfịna ekededi oro ẹkemede nditụk mfọnọn̄kpọ eke spirit fo ye mmọ. Wụt esịtekọm ban̄a ima ima ndutịm emi Jehovah anamde, nyụn̄ dat esịt ban̄a mme edidiọn̄ oro utọ edidi oro ekemede ndida ndi.