Ubọ Ukpep Ererimbot ye Mme Utịtmbuba eke Spirit Fo
1 Ndibọ eti ukpep ke ini afo edide uyen ekeme ndinam fi enyene usọ ifiọkn̄wed ẹyomde man afo okot onyụn̄ ewet n̄kpọ ọfọn onyụn̄ enyene ofụri ofụri ifiọk aban̄a ukpepn̄kpọ aban̄ade isọn̄, mbụkeset, ibat, ye ifiọk ntaifiọk. Ke ndinam emi, afo emekeme ndikpep nte ekerede n̄kpọ in̄wan̄în̄wan̄, odụn̄ọrede akpanikọ, ọkọkde mme mfịna, onyụn̄ ekerede nti ekikere. Utọ ubọ ukpep oro eyenyene ufọn ke ofụri uwem fo. Didie ke ubọ ukpep ererimbot fo ekeme ndinyene ebuana ye mme utịtmbuba eke spirit fo ke uwem onyụn̄ an̄wam fi ndinyene “ekikere ye ọniọn̄”?—N̄ke 3:21, 22.
2 Nyene Ufọn ke Utom Abasi: Ke adan̄aemi afo odude ke ufọkn̄wed, nọ n̄kpan̄utọn̄ ke otu nditọ ufọkn̄wed nyụn̄ tịm nam utomufọk oro ẹnọde fi. Edieke afo emehede ye eti ido ukotn̄wed ye ukpepn̄kpọ, ekeme ndinen̄ede ndi mmemmem nnọ fi ndidụn̄ọde Ikọ Abasi nnyụn̄ nsọn̄ idem ke n̄kan̄ eke spirit. (Utom 17:11) Ọyọhọ ọyọhọ ifiọk ayan̄wam fi ndinyene ebuana ye mme owo ẹnyenede nsio nsio idaha, udọn̄, ye edinịm ke akpanikọ ke ini osobode mmọ ke an̄wautom. Ukpep oro afo ọbọde ke ufọkn̄wed eyenyene ufọn nte afo obiomde mme mbiomo Christian fo ke esop Abasi.—Men 2 Timothy 2:21; 4:11 domo.
3 Kpep Ndin̄wam Idemfo: Edieke afo esịnde idem, afo emekeme n̄ko ndikpep usọ ẹyomde man odu uwem ke ama okokụre ukpep. (Men 1 Timothy 5:8 domo.) Mek se ekpepde ye ntịn̄enyịn. Utu ke ndiwụk ekikere ke ukpep oro mme ifet unyene utom mîwakke, kere ban̄a edikpep ubọkutom m̀mê usọ oro edin̄wamde fi okụt utom oro odotde ke ebiet ekededi. (N̄ke 22:29) Utọ ukpep oro ayanam edi mmemmem n̄kpọ ọnọ fi ndin̄wam idemfo edieke ebierede ndinam utom ke ebiet emi udọn̄ okponde akan.—Men Utom 18:1-4 domo.
4 Ndinyene eti ubọ ukpep ke adan̄aemi odude ke ufọkn̄wed ekeme ndin̄wam fi nditat utom ukwọrọikọ fo. Nam utom ọkpọsọn̄ ndinyene usọ oro ẹyomde man an̄wam idemfo ke adan̄aemi akade iso ke utom Jehovah. Ntem ukpep fo ayan̄wam fi ndisịm mme utịtmbuba eke spirit fo.