Ẹtan̄a Etop Obio Ubọn̄
1 “Mmenyene ndikwọrọ eti mbụk Ubọn̄ Abasi . . . koro ẹkedọn̄ Mi ẹte ndinam oro.” (Luke 4:43) Jesus akada mme ikọ emi owụt ibuotikọ ukwọrọikọ esie—Obio Ubọn̄ Abasi. Etop oro nnyịn itan̄ade mfịn n̄ko ọkọn̄ọ ke Obio Ubọn̄ oro, nte ẹkebemde iso ẹtịn̄ ke Matthew 24:14 ẹte: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” Mme akpanikọ ewe ẹban̄ade Obio Ubọn̄ Abasi ke oyom mme owo ẹkop?
2 Obio Ubọn̄ Abasi ke akara idahaemi ke heaven oyonyụn̄ ọsọp ada itie kpukpru ukara owo. Ẹma ẹsosio Devil ẹfep ke heaven, ndien idiọk editịm n̄kpọ odude ke emi odu ke ukperedem ini esie. (Edi. 12:10, 12) Ẹyesobo akani idiọk editịm n̄kpọ Satan taktak, edi n̄kpọ idinyen̄eke Obio Ubọn̄ Abasi. Enye edida ke nsinsi.—Dan. 2:44; Heb. 12:28.
3 Obio Ubọn̄ oyoyụhọ nti udọn̄ kpukpru mme okopitem ubonowo. Enye eyemen ndutụhọ oro otode ekọn̄, ubiatibet, ufịk, ye ubuene efep. (Ps. 46:8, 9; 72:12-14) Kpukpru owo ẹyenyene akpakịp udia. (Ps. 72:16; Isa. 25:6) Udọn̄ọ ye edibiomo ndo ẹdidi n̄kpọ eset. (Isa. 33:24; 35:5, 6) Nte ubonowo asan̄ade ekpere mfọnmma, isọn̄ ayakabade edi paradise, ndien mme owo ẹyedụn̄ ọtọkiet ke emem.—Isa. 11:6-9.
4 Nte nnyịn idude uwem idahaemi owụt ke imoyom ndidu ke idak Obio Ubọn̄ Abasi. Etop Obio Ubọn̄ ekpenyene ndikara ofụri edinam nnyịn ke uwem, esịnede mme utịt mbuba ye mme n̄kpọ oro ẹdide ebeiso ke uwem nnyịn. Ke uwụtn̄kpọ, ke adan̄aemi edide mbiomo nnyịn nditịm n̄kpọ nnọ mbonufọk nnyịn, inaha nnyịn iyak mme ekikere n̄kpọ obụkidem ẹbaba n̄kpọ Obio Ubọn̄ ẹwot. (Matt. 13:22; 1 Tim. 5:8) Utu ke oro, ana nnyịn inam item Jesus emi: “Ẹkam ẹbem iso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ emi [mme akpan n̄kpọ udu uwem] ẹnọ mbufo.”—Matt. 6:33.
5 Oyom mme owo ẹkop ẹnyụn̄ ẹnam n̄kpọ usọp usọp ẹban̄a etop Obio Ubọn̄ ke adan̄aemi ini osụk odude. Nnyịn ikpakam in̄wam mmọ ndinam ntre ebe ke ‘ndinọ mmọ item mban̄a Obio Ubọn̄ Abasi.’—Utom 19:8.