Obufa Ndutịm Mbono Circuit

Nnyịn ikeme didie ndisọn̄ọ nda n̄kan mbon oro ẹnen̄erede ẹbiọn̄ọ utuakibuot akpanikọ? Didie ke ikeme ndikan mme odudu oro ẹn̄wanade kpukpru ini ndidụri nnyịn nsịn ke idiọk ererimbot emi? Mbono circuit eke 2009 ọyọbọrọ mme akpan mbụme emi. Ibuotikọ esie edi “Ẹka Iso Ẹda Nti N̄kpọ Ẹkan Idiọk Ubọk.” (Rome 12:21) Kere ise ban̄a se ẹdinemede ke mbono oro.

Mme utịn̄ikọ emi esenyịn district edinọde ẹdi “Ẹsọn̄ọ Nnyịn Idem Ndida Nti N̄kpọ N̄kan Idiọk Ubọk,” “Kpeme Mbak Udubuọt Idem Ukaha ke Idem Fo!,” “Ibịghike Kpukpru Idiọkn̄kpọ Ẹyetre!,” ye “Ndisọn̄ọ Mbuọtidem Nnyịn Man Ikan Ererimbot.” Esenyịn circuit eyeneme mme ibuotikọ emi ye nnyịn, “Ini Edi Emi Ndidu ke Edidemede!,” ẹdade ẹto Rome 13:11-13, ye “Kûyak Esịt Ọduọ Fi ke Ini Ukụt,” ndien ẹda enye emi ẹto Mme N̄ke 24:10. Iyokop n̄ko utịn̄ikọ esenyịn circuit oro, “Ndinọ Ntịn̄enyịn ke Mme Udọn̄ Circuit.” Ibuotikọ efen emi edidemerede owo udọn̄ edidi, “Ndi Afo Emekeme ‘Ndinam Utom emi’ nte Asiakusụn̄?” Utịn̄ikọ ikpehe inan̄ ẹyedu, ndien akpa ke otu oro enyene ibuotikọ emi, “Ẹsọn̄ọ Ẹda Ẹn̄wana ye N̄kari Devil.” Enye ayan̄wam nnyịn ifiọk inyụn̄ isịn abian̄a abian̄a ekikere oro Devil ọnọde aban̄a ifiọk ntaifiọk, unọ idem inemesịt, ye ubọ ukpep. Ọyọhọ iba enyene ibuotikọ emi, “Ẹkop Odudu Man Ẹn̄wana Ẹbiọn̄ọ ke Usen Idiọk” ndien enye oyowụt nnyịn nte ikpenen̄erede ida item Abasi oro odude ke Ephesus 6:10-18 isịn ke edinam.

Ndinen̄ede n̄kan idiọk ubọk enyene ebuana ye edikwọrọ etop obio Ubọn̄. (Edi. 12:17) Ntak edi oro Satan mîkpaha mba ndin̄wana ye Mme Ntiense Jehovah! (Isa. 43:10, 12) Enye Devil ayatịgha itiat sia nnyịn imebiere ‘ndika iso nda nti n̄kpọ n̄kan idiọk ubọk.’ Nam ndutịm man ọkpọbọ ọyọhọ ufọn oto ikpehe edinam mbinan̄ ke mbono circuit emi.