IBUOTIKỌ UKPEPN̄KPỌ 19
ỌYỌHỌ IKWỌ 22 Yak Obio Ubọn̄ Fo Edi!
Nso ke Idiọn̄ọ Iban̄a Se Jehovah Edibierede Inọ Mme Owo Ekpri Ini ke Iso?
“Jehovah . . . [iyomke] baba owo kiet atak.”—2 PET. 3:9.
AKPAN N̄KPỌ EMI IDINEMEDE
Se ikemede ndinam inịm ke se Jehovah edibierede inọ mme owo ke ini iso eyenen, utụk inyụn̄ idụhe.
1. Ntak emi ikemede ndidọhọ ke mme akpan n̄kpọ ke ẹtịbe ke eyo nnyịn emi?
MME akpan n̄kpọ ke ẹtịbe ke eyo nnyịn emi! Kpukpru usen ke ida enyịn nnyịn ikụt nte mme n̄kpọ emi Bible eketịn̄de ẹtịbede. Ke uwụtn̄kpọ, imokụt nte “edidem edere” ye “edidem usụk” ẹmiade mbuba ye kiet eken. Enye emi oyom ofụri ererimbot esịne imọ ke idak, enye oko ete ke akpakam esịne imọ ke idak. (Dan. 11:40) Udomo emi ẹkwọrọde eti mbụk Obio Ubọn̄ idahaemi, akanam nnyịn ikwe nte ẹkwọrọde ntre, ndien ediwak miliọn owo ke ẹdụk esop. (Isa. 60:22; Matt. 24:14) Mme n̄kpọ ikọ Abasi emi ẹnọde nnyịn “ke nnennen ini” ẹdi barasuene.—Matt. 24:45-47.
2. Nso ke ikeme ndinịm? Edi nso ke ana idiọn̄ọ?
2 Jehovah ke anam mme akpan n̄kpọ emi ẹditịbede ekpri ini ke iso ẹnen̄ede ẹn̄wan̄a nnyịn. (N̄ke 4:18; Dan. 2:28) Imekeme ndinen̄ede nnịm ke etisịm ini emi akwa ukụt ọtọn̄ọde, iyọdiọn̄ọ kpukpru se anade idiọn̄ọ man ika iso isọn̄ọ ida inam n̄kpọ Abasi inyụn̄ idiana kiet ke utọ ọkpọsọn̄ ini oro. Edi ana idiọn̄ọ ite ke enyene ndusụk n̄kpọ emi nnyịn mîdiọn̄ọke iban̄a se iditịbede ekpri ini ke iso. Ke ibuotikọ emi, imọn̄ ibem iso ineme se inamde ikpụhọde se ikesikpepde iban̄a ndusụk mme n̄kpọntịbe oro. Ekem iyeneme ndusụk n̄kpọ emi idiọn̄ọde iban̄a ini iso ye nte Ete nnyịn emi odude ke heaven edinamde n̄kpọ.
SE NNYỊN MÎDIỌN̄ỌKE
3. Ikesidọhọ ke ini ewe ke Jehovah ediberi usụn̄ ibaha mme owo, mmọ ikemeke ndidụk esop aba? Nso ikesinam idọhọ ntre?
3 Ke ini edem, ikesidọhọ ke akwa ukụt ama ọtọtọn̄ọ ntem kpam, ẹyeberi usụn̄ ẹbaha mbon emi mîkatuakke ibuot inọ Jehovah, mmọ idinyụn̄ ibọhọke Armageddon. Ikesidọhọ ntre sia ikesikere ke kpukpru n̄kpọ ke mbụk Ukwọ eyo Noah ẹkewụt se iditịbede ke ini iso. Ke uwụtn̄kpọ, ikesidọhọ ke ukem nte ekedide Ukwọ oyom nditọn̄ọ Jehovah eberi usụn̄ ubom, ke akwa ukụt ama ọtọtọn̄ọ ntem, Jehovah “[eyeberi] usụn̄ . . . abaha” mbon ererimbot Satan emi. Owo ndomokiet idikemeke ndibuọt idem ye enye aba; edinyan̄a ebe utọ owo enye oro.—Matt. 24:37-39.
4. Ndi ke inenịm ke kpukpru n̄kpọ ke mbụk Ukwọ eyo Noah ẹban̄a se iditịbede ke ini iso? Ntak ọbọrọde ntre?
4 Ndi enen nnyịn ndidọhọ ke n̄kpọ kiet kiet emi eketịbede ke mbụk Ukwọ eyo Noah aban̄a se iditịbede ke iso? Ihih-o. Ntak idọhọde ntre edi ke inyeneke n̄kpọ ndomokiet ke Bible emi ọdọhọde ke ntre ke edi.a Jesus ama emen “mme usen Noah” odomo ye ini edidu esie. Edi se enye eketịn̄de ikọwọrọke ke se iketịbede ke ini Ukwọ oro owụt se iditịbede ke ini iso; ke owo kiet kiet ye n̄kpọ kiet kiet emi ẹketịbede ini oro ẹban̄a se iditịbede ke ini iso. Enye ikonyụn̄ idọhọke ke nte Abasi ekeberide usụn̄ ubom oro enyene se adade aban̄a ke ini iso. Edi oro iwọrọke ke inyeneke se ikemede ndikpep nto mbụk Noah ye Ukwọ oro.
5. (a) Nso ke Noah akanam mbemiso Ukwọ ọtọn̄ọde? (Mme Hebrew 11:7; 1 Peter 3:20) (b) Nso ke ukwọrọikọ Noah ada ebiet eke nnyịn mfịn?
5 Ini Noah okokopde etop emi Abasi akadade odụri mme owo utọn̄ aban̄a se iditịbede, enye ama ọkọn̄ ubom man owụt ke imenyene mbuọtidem. (Kot Mme Hebrew 11:7; 1 Peter 3:20.) Ukem ntre n̄ko, mbon emi ẹkopde eti mbụk Obio Ubọn̄ Abasi ana ẹnanam se mmọ ẹkopde man ẹwụt ke imenyene mbuọtidem. (Utom 3:17-20) Peter okokot Noah “ọkwọrọ edinen ido.” (2 Pet. 2:5) Edi nte ima ikeneneme ke ibuotikọ emi ekebede, nnyịn idiọn̄ọke m̀mê Noah ama anam ndutịm man ẹkwọrọ ikọ ẹnọ kpukpru owo ke isọn̄ mbemiso Ukwọ edide. Mfịn nnyịn ke ikwọrọ ikọ ke ofụri ererimbot, ke inyụn̄ isịn ibuot isịn itọn̄ inam utom oro. Edi ọkpọkọm itịme didie, enyene ndusụk owo ke isọn̄ emi nnyịn mîdikemeke ndikwọrọ eti mbụk nnọ mbemiso utịt edide. Ntak idọhọde ntre?
6-7. Ntak emi ikemede ndidọhọ ke enyene ndusụk owo ke isọn̄ emi nnyịn mîdikemeke ndikwọrọ eti mbụk nnọ mbemiso utịt edide?
6 Kere se Jesus eketịn̄de aban̄a utom ukwọrọikọ emi inamde mi. Enye ama ọdọdọhọ ke ẹyekwọrọ eti mbụk “ke ofụri isọn̄ nte ntiense ẹnọ kpukpru mme idụt.” (Matt. 24:14) Prọfesi oro ke osu mfịn ke udomo oro mîsụho akanam. Usem emi ẹkwọrọde eti mbụk Obio Ubọn̄ ebe 1,000, ndien ikpehe Intanet nnyịn emi ekerede jw.org ke anam etop oro esịm n̄wakn̄kan owo ke ererimbot emi.
7 Edi Jesus ama ọdọhọ mme mbet esie n̄ko ke mmọ “idisan̄ake ikanade ofụri obio” ima mbemiso imọ idide. (Matt. 10:23; 25:31-33) Ntre nnyịn idikwọrọke ikọ inọ ata ofụri ofụri owo ntem mbemiso Jesus edide edibiere ikpe ọnọ mme owo. Ediwak miliọn mme owo ẹdụn̄ ke mme ebiet emi mme owo mînyeneke ifụre ndikwọrọ ikọ. N̄kpọ en̄wen edi ke kpukpru minit, nsek nditọ ke ẹmana ke udịm ke udịm. Imesidomo ofụri ukeme nnyịn ndinam eti mbụk esịm mme owo ke “kpukpru mme idụt ye esien ye usem.” (Edi. 14:6) Edi yak isio akpanikọ itịn̄ inọ mbufo, idịghe kpukpru owo ke idikeme ndikwọrọ eti mbụk nnọ mbemiso utịt edide.
8. Se Jehovah edibierede iban̄a mme owo ke ini iso ekeme ndinam ibụp nso? (Se mme ndise n̄ko.)
8 Mbụme emi odude idahaoro edi ntem: Nso iditịbe inọ mbon oro mîdinyeneke ifet ikop eti mbụk mbemiso akwa ukụt ọtọn̄ọde? Eke mmọ oro Jehovah ye Eyen esie emi enye emekde yak ebiere ikpe ọnọ mme owo ẹdibiere didie? (John 5:19, 22, 27; Utom 17:31) Itie Bible emi ẹdade ibuotikọ ukpepn̄kpọ emi ẹto ọdọhọ ke Jehovah “[iyomke] baba owo kiet atak,” utu ke oro ke oyom “kpukpru owo ẹkabade esịt.” (2 Pet. 3:9; 1 Tim. 2:4) Imọdiọn̄ọ ke enye oro edi ntre, edi ana idiọn̄ọ n̄ko ke Jehovah iyarakede kan̄a inọ nnyịn se enye ebierede ndinam ye mbon emi mîdinyeneke ifet ndikop eti mbụk. Ọfọn iti n̄ko ke Jehovah idịghe eyenufọk nnyịn emi anade ọdọhọ nnyịn se enye ama akananam m̀mê se enye aduakde ndinam, enye amama, imaha-ma.
Jehovah edinam n̄kpọ didie ye mbon emi mînyeneke ifet ndikop eti mbụk mbemiso akwa ukụt ọtọn̄ọde? (Se ikpehe 8)c
9. Nso ke Jehovah ayarade ọnọ nnyịn ke Bible?
9 Ke Bible, Jehovah ayarade ndusụk n̄kpọ emi enye edinamde ọnọ nnyịn. Ke uwụtn̄kpọ, Bible ọdọhọ nnyịn ke Jehovah ayanam “mme anam ukwan̄n̄kpọ” emi mînyeneke ifet ndikop eti mbụk n̄kpụhọde ẹset. (Utom 24:15; Luke 23:42, 43) Ikọ oro ada mme akpan mbụme efen edi.
10. Siak mme mbụme efen emi ikemede ndibụp.
10 Ndi kpukpru mbon emi ẹdikpade ke ini akwa ukụt ẹdikpa taktak, idotenyịn ediset ke n̄kpa ebe mmọ? Ikọ Abasi anam inen̄ede ikụt ke mme asua Abasi emi Jehovah ye udịmekọn̄ esie ẹdisobode ke Armageddon idisetke tutu amama. (2 Thess. 1:6-10) Edi amaedi mbon emi ẹdikpade ke ini akwa ukụt ke ntak udọn̄ọ, usọn̄, aksiden, mîdịghe owo owot mmọ, eke mmọ oro Abasi edinam didie? (Eccl. 9:11; Zech. 14:13) Ndi ndusụk mmọ ẹyesịne ke otu “mme anam ukwan̄n̄kpọ” emi ẹdinamde ẹset ke obufa ererimbot? Ibio ibio ikọ edi ke nnyịn idiọn̄ọke.
SE IDIỌN̄ỌDE
11. Nso ke ẹdida ẹbiere ikpe ẹnọ mme owo ke Armageddon?
11 Enyene n̄kpọ ifan̄ emi idiọn̄ọde iban̄a se iditịbede ke ini iso. Uwụtn̄kpọ edi ke imọdiọn̄ọ ke nte mme owo ẹnamde n̄kpọ ye nditọete Christ ke ẹdida ẹbiere ikpe ẹnọ mmọ ke Armageddon. (Matt. 25:40) Mbon emi ẹdibatde nte mme erọn̄ ẹdidi mbon oro ẹken̄wamde mbon emi ẹyetde aran, ẹnyụn̄ ẹwụtde ke ida ye Christ. Imọdiọn̄ọ n̄ko ke ndusụk nditọete Christ ẹyesụk ẹdu ke isọn̄ emi ke akwa ukụt ama ọkọtọn̄ọ. Edi ekpri ini mbemiso Armageddon ọtọn̄ọde, ẹyetan̄ mmọ ẹka heaven. Adan̄a nte nditọete Christ oro ẹsụk ẹdude ke isọn̄, imekere ke ndusụk mbon emi ẹnen̄erede ẹyom ndidiọn̄ọ Abasi ẹyenyene ifet ndiwụt ke ida ye mmọ ẹnyụn̄ ẹn̄wam mmọ ẹnam utom emi mmọ ẹnamde. (Matt. 25:31, 32; Edi. 12:17) Nso inam mme n̄kpọ emi isụk itịn̄de do ẹdi ata ọkpọikọ?
12-13. Nso ke ndusụk owo ẹkeme ndinam mmọ ẹma ẹkụt nte ẹsobode “Akwa Babylon”? (Se mme ndise n̄ko.)
12 Idem ke akwa ukụt ama ọkọtọn̄ọ, imekere ke ndusụk owo emi ẹdikụtde nte ẹsobode “Akwa Babylon” ẹyeti ke Mme Ntiense Jehovah ẹma ẹtetịn̄ ẹban̄a n̄kpọntịbe oro anyan ini mbemiso etịbede. Ndi ndusụk mbon emi ẹdikụtde n̄kpọntịbe oro ẹyekabade esịt, ẹtọn̄ọ ndibuọt idem ye Jehovah?—Edi. 17:5; Ezek. 33:33.
13 Ekpetịbe ntre, edibiet se iketịbede ke Egypt ke eyo Moses. N̄kọ emeti ke “akwa mbuaha udịmowo” ẹma ẹtiene nditọ Israel ẹwọrọ ke Egypt. (Ex. 12:38) Etie nte ndusụk mmọ ẹketọn̄ọ ndibuọt idem ye Jehovah ke mmọ ẹma ẹkekụt nte nsio nsio Ufen Duop emi Moses ọkọdọhọde ke ẹyesịm nditọ Egypt ẹkesịmde mmọ. Mme owo ẹkpenam ukem n̄kpọ oro ẹma ẹsobo Akwa Babylon ẹma, ndi iyọtọhọ ye mbon emi ẹtọn̄ọde ndibuọt idem ye Jehovah do, ẹnyụn̄ ẹdiande idem ye ikọt Abasi esisịt ini mbemiso utịt edide? Nsa nnyịn-o! Nnyịn iyom nditie ukem ukem nte Ete nnyịn emi odude ke heaven, emi edide “Abasi mbọm ye mfọn, isọpke iyatesịt edi awak ima-mfọnido ye akpanikọ.”b—Ex. 34:6.
Ndusụk mbon emi ẹdikụtde nte ẹsobode “Akwa Babylon” ẹyeti ke Mme Ntiense Jehovah ẹma ẹtetịn̄ ẹban̄a n̄kpọntịbe oro anyan ini mbemiso etịbede (Se ikpehe 12-13)d
14-15. Ndi ini emi owo akpade m̀mê ebiet emi enye odụn̄de ke ẹdida ẹbiere m̀mê enye eyenyene ifet ndidu uwem ke nsinsi? Ntak ọbọrọde ntre? (Psalm 33:4, 5)
14 Ndusụk ini imesikop owo ọdọhọde, “Iman mi emi akpakpa mbemiso akwa ukụt ọtọn̄ọde, ekpenen̄ede ọfọn ye enye sia idotenyịn odu ke Abasi ekeme nditua enye mbọm nnam enye eset.” Etịn̄ikọ oro itịn̄ke ke idiọk. Edi idịghe ini emi owo akpade ke ẹdida ẹbiere m̀mê enye eyenyene ifet ndidu uwem ke nsinsi m̀mê idinyeneke. Jehovah edi Ebiereikpe emi ọfọnde ama, enye isinamke ndudue ke se enye ebierede. Se enye ebierede esinen kpukpru ini. (Kot Psalm 33:4, 5.) Imekeme ndinen̄ede nnịm ke “Ebiereikpe ofụri ererimbot” edinam nnennen n̄kpọ.—Gen. 18:25.
15 Nnyịn iduehe n̄ko ndidọhọ ke idịghe itie emi owo odụn̄de ke ẹdida ẹbiere m̀mê enye eyenyene idotenyịn ndidu uwem ke nsinsi m̀mê idinyeneke. Jehovah ikemeke ndibiere ete ke ediwak miliọn mme owo emi ẹdụn̄de ke mme idụt emi mmọ mînyeneke ifet ndikop etop Obio Ubọn̄ tọn̄ọ akananam nnyụn̄ n̄kabade esịt ẹdi mme “ebot.” Nsa Abasi nnyịn-o! (Matt. 25:46) Ebiereikpe ofụri ererimbot edi edinen, enye onyụn̄ ekere aban̄a mme owo oro akan nte ikerede. Nnyịn idiọn̄ọke nte Jehovah ediwọn̄ọrede n̄kpọ ibon ke ini akwa ukụt. Ekeme ndidi ndusụk mme owo oro ẹyenyene ifet ẹkpep n̄kpọ ẹban̄a Jehovah, ẹbuọt idem ye enye, ẹnyụn̄ ẹwụt ke ida ye enye ini emi enye edinamde kpukpru owo ke isọn̄ emi ẹdiọn̄ọ enyịn̄ esie ẹnyụn̄ ẹdiọn̄ọ utọ owo emi enye edide.—Ezek. 38:16.
Akwa ukụt ama ọtọn̄ọ, ndi ndusụk mbon emi ẹdikụtde mme n̄kpọntịbe oro ẹyekabade esịt ẹdibuọt idem ye Abasi?
16. Nso ke idiọn̄ọ idahaemi iban̄a Jehovah? (Se ndise n̄ko.)
16 Se ikpepde ke Bible anam idiọn̄ọ ke Jehovah idaha uwem owo ibre mbre ke usụn̄ ndomokiet. Enye ọkọnọ Eyen esie edikpa man kpukpru nnyịn inyene idotenyịn ndidu uwem ke nsinsi. (John 3:16) Kpukpru nnyịn imokụt mbọm ye ima Abasi ke uwem nnyịn. (Isa. 49:15) Enye ọdiọn̄ọ nnyịn owo kiet kiet ke enyịn̄. Enye akam enen̄ede ọdiọn̄ọ nnyịn tutu ikpakpa, enye ekeme ndinam iset ifiak iketie nte iketiede, sia enye ọdiọn̄ọ kpukpru n̄kpọ aban̄a nnyịn ye se nnyịn ikọdiọn̄ọde! (Matt. 10:29-31) Imenyene eti ntak emi anamde inen̄ede inịm ke se edima Ete nnyịn emi odude ke heaven edibierede inọ owo kiet kiet ọyọfọn, enen, onyụn̄ owụt ke enye esitua owo mbọm.—Jas. 2:13.
Imenen̄ede inịm ke se Jehovah edibierede inọ owo kiet kiet ọyọfọn, enen, onyụn̄ owụt ke enye esitua owo mbọm (Se ikpehe 16)
17. Nso ke idineme ke ibuotikọ emi etienede?
17 Mme n̄kpọ emi ikpụhọrede nte ikesinịmde ẹkam ẹnanam ikụt ite ke edi se inen̄ede isịn idem ikwọrọ ikọ ikan nte ikesikwọrọde. Ntak idọhọde ntre? Nso idinam ọdọn̄ nnyịn ndika iso n̄kwọrọ ikọ, ikpaha mba? Iyenen̄ede ida ini ineme mme ibọrọ mbụme emi ke ibuotikọ emi etienede.
ỌYỌHỌ IKWỌ 76 Ndi Isinemke Fi?
a Okpoyom ndidiọn̄ọ se inamde ikpụhọde se ikesinịmde oro, se ibuotikọ emi “Afo Enyịme Ete Edi Ntem” ke Enyọn̄-Ukpeme March 15, 2015, p. 7-11.
b Ẹma ẹsobo Akwa Babylon ẹma, ẹyedomo kpukpru ikọt Jehovah ese ini Gog isọn̄ Magog edimende en̄wan ibịne ikọt Abasi. Ẹyedomo n̄ko owo ekededi emi edidade ye ikọt Abasi ke ẹma ẹkesobo Akwa Babylon.
c MME NDISE: Ndise ita oro ẹwụt ntak emi ndusụk owo mîdikopke eti mbụk emi ikwọrọde ke ofụri ererimbot: (1) Ke ntak ido ukpono emi n̄wakn̄kan mme owo ẹkade ke edem mme mma oro, ndikwọrọ ikọ ke n̄kan̄ oro edi edue-ukot-akpa-itọn̄, (2) ebe ye n̄wan oro ẹdụn̄ ke ebiet emi ukara mîyakke ikwọrọ ikọ, ndien ndidomo ndikwọrọ ikọ do edi ndisịn idem ke fehesan̄, (3) ete oro odụn̄ ke ata esịt esịt ikọt emi usụn̄ mîdụhe se ẹkemede ndisan̄a n̄kesịm mme owo do.
d NDISE: N̄kaiferi emi ama ọkọkpọn̄ esop eti se enye ekekpepde aban̄a nte ẹdisobode “Akwa Babylon.” Enye akabade esịt afiak ọnyọn̄ ebịne Jehovah ye ete ye eka esie emi ẹdide Mme Ntiense Jehovah. Ikpokụt utọ mme owo oro ini oro, ẹyak ikpebe Ete nnyịn emi odude ke heaven emi esituade mme owo mbọm, inyụn̄ idara ke anamidiọk ọnyọn̄ edi.