Yak Ima Anam Fi Aka Iso Ọkwọrọ Ikọ!

1. Nso ke ikekpep ke mbono ofụri isua 2023?

KE MBONO ofụri isua Watch Tower Bible and Tract Society of Pennsylvania eke 2023,a ima ikop nte ẹkekpụhọrede ndusụk n̄kpọ emi ikesinịmde ye mbufa n̄kpọ emi ẹtịn̄de ẹban̄a utom ukwọrọikọ nnyịn. Mme n̄kpọ oro ẹma ẹnem nnyịn ndikop etieti. Ke uwụtn̄kpọ ima ikop ke idem ke ẹma ẹkesobo Akwa Babylon, ke ndusụk owo ẹkeme ndinyene ifet ndiwụt ke ida ye Jehovah. Ima ikop n̄ko ke ọtọn̄ọde ke November 2023, ke idịghe kpukpru n̄kpọ emi mme asuanetop ẹkesiwetde ke ibatutom ke ẹdisiwet. Ndi mbufa n̄kpọ emi ikokopde ọwọrọ ke ukwọrọikọ inen̄ekede idi akpan n̄kpọ aba, ke edi se ision̄ode ukot ke ikan̄? Tutu amama!

2. Ntak emi edide eyo esiere, enye edi se inen̄erede isịn idem ikwọrọ ikọ? (Mark 13:10)

² Edi eyo esiere, ntre ke edi se inen̄ede isịn ikan̄ ke n̄kpọ ukwọrọikọ emi. Ntak edi ke ini okụre ama. Kere se Jesus eketịn̄de aban̄a utom ukwọrọikọ emi ẹdinamde ke mme akpatre usen. (Kot Mark 13:10.) Ke ukem mbụk oro ke Matthew, Jesus ọkọdọhọ ke ẹyekwọrọ eti mbụk ke ofụri ererimbot mbemiso “utịt” edide. (Matt. 24:14) Ikọ esie oro akaban̄a utịt idiọk ererimbot Satan emi. Amaedi mme n̄kpọ emi ẹditịbede ke mîbịghike, Jehovah enenịm “usen ye hour” emi ẹditịbede. (Matt. 24:36; 25:13; Utom 1:7) Nte eyo esierede, ntre ke ini oro enen̄ede ekpere. (Rome 13:11) Utịt isịmke kan̄a-o, ntre ana ika iso ikwọrọ ikọ tutu edi.

3. Nso isinam ọdọn̄ nnyịn ndikwọrọ ikọ?

³ Nte isụk itiede ikere utom ukwọrọikọ emi inamde mi, ọfọn ibụp idem nnyịn mbụme emi ida idụn̄ọde idem: Ntak emi isikwọrọde eti mbụk? Ibio ibio ibọrọ edi ke ima esinam ikwọrọ. Ima ikwọrọ ikọ, iwụt ke imama eti mbụk, ima mme owo, ndien akakan edi ke imama Jehovah ye enyịn̄ esie. Ẹyak ineme mme n̄kpọ oro kiet kiet ise.

ISIKWỌRỌ IKỌ KE NTAK EMI IMADE ETI MBỤK

4. Ima ikop eti mbụk, esitie nnyịn didie ke idem?

⁴ Ndi emeti nte eketiede fi ke idem ini okokopde eti mbụk? Ekeme ndidi ẹkedọhọ fi ke owo mbufo aman obufa nsekeyen, mîdịghe ke ẹkot fi utom emi okoyomde-yom ke mbrenyịn. Anaedi ama enen̄ede ọdọn̄ fi ndibụk eti mbụk oro nnọ mbonubon mbufo ye mme ufan fo. Ndi eketie fi ntre n̄ko ini okokopde eti mbụk Obio Ubọn̄ Abasi emi edide akakan mbụk?

5. Akpa ini emi ekekpepde akpanikọ emi odude ke Bible, eketie fi didie ke idem? (Se mme ndise n̄ko.)

⁵ Fiak kere nte eketiede fi ke idem akpa ini emi ekekpepde akpanikọ emi odude ke Bible. Ama edidiọn̄ọ ke Ete fo emi odude ke heaven ama fi, ke enye oyom fi esịne ke otu ikọt imọ, ke enye ọn̄wọn̄ọ ndinam ubiak ye ufen ẹtre, ke omonyụn̄ ekeme ndidori enyịn ndikụt mbon mbufo emi ẹma ẹkekpa ẹfiakde ẹdidu uwem ke obufa ererimbot. Mme n̄kpọ en̄wen do emi ekedidiọn̄ọde emi nnyịn mîsiakke. (Mark 10:29, 30; John 5:28, 29; Rome 8:38, 39; Edi. 21:3, 4) Mme n̄kpọ emi ekedidiọn̄ọde ẹma ẹnem fi tutu. (Luke 24:32) Ama enen̄ede ama se ekekpepde tutu ukemeke ndimụm nsịn ke idịbi ndop ntie!​—Men Jeremiah 20:9 domo.

6. Mbụk Ernest ye Rose ekpep fi nso?

⁶ Kop mbụk emi ise. Ini Brọda Ernestb edide n̄kpọ nte isua duop, ete esie ama akpa ọkpọn̄ enye. Ernest ọdọhọ ete: “Mma n̄kere m̀mê enye akpaka heaven mîdịghe m̀mê esie akam okụre ke nsinsi nsinsi. Ama esidọn̄ mi ndikpetie nte nditọwọn̄ eken emi ẹnyenede ete.” Ernest ama esiwak ndika udi ọkọtọn̄ọ edọn̄ ke ebiet emi ẹkebụkde ete esie onyụn̄ ọbọn̄ akam ete: “Abasi mbọk, nyom ndidiọn̄ọ ebiet emi ete mi odude.” Ke n̄kpọ nte isua 17 ama ekebe tọn̄ọ ete esie akakpa, owo ama edidọhọ Ernest m̀mê enye akpama ndikpep Bible; Ernest ama enyịme, idaha ibiat ini. Esịt emi ekenemde enye ikedịghe ekpri ini enye ọdiọn̄ọde ke mme akpan̄kpa idiọn̄ọke n̄kpọ ndomokiet, ke mmọ ẹtie nte owo emi edede ata ọkpọsọn̄ idap ikopke-kop se ikade iso ke n̄kan̄ emi, ke Bible onyụn̄ ọn̄wọn̄ọ ke ini ke iso mme owo ẹyeset. (Eccl. 9:5, 10; Utom 24:15) Enye ama edikụt ndien ibọrọ mme mbụme emi ẹkefịnade enye ke ata ediwak isua! Mme akpanikọ emi Ernest ekekpepde ke Bible ẹma ẹnem enye etieti. Rose n̄wan esie ama etiene enye ekpep Bible onyụn̄ etiene ama etop Obio Ubọn̄ emi enye okokopde. Ke 1978, mmọ ẹma ẹna baptism. Mmọ ẹma ẹmen se mmọ ẹkekpepde emi ekenemde mmọ do ẹketịn̄ ẹnọ mbonubon mmọ, mme ufan mmọ, ye owo ekededi emi akamade ndikpan̄ utọn̄ nnọ mmọ, ikpaha mba. Utịp edi nso? Mbon emi Ernest ye Rose ẹn̄wamde ẹna baptism ẹbe 70.

7. Ima inen̄ede ima akpanikọ emi ikpepde ke Bible, oro edinam inam nso? (Luke 6:45)

⁷ Imetịm ikụt do ke ima inen̄ede ima akpanikọ emi odude ke Bible, ke nnyịn idikemeke ndidop ntie. (Kot Luke 6:45.) Editie nnyịn nte eketiede mme mbet Jesus ke eyo mme apostle emi ẹkedọhọde ẹte: “Nnyịn ikemeke nditre nditịn̄ mban̄a mme n̄kpọ emi nnyịn ikokụtde inyụn̄ ikopde.” (Utom 4:20) Imama akpanikọ tutu ọdọn̄ nnyịn ndinam adan̄a ediwak owo nte ikekeme ndikwọrọ enye nnọ ẹkop.

ISIKWỌRỌ IKỌ KE NTAK EMI IMADE MME OWO

8. Nso isinam ọdọn̄ nnyịn ndinam mbon en̄wen ẹkop eti mbụk? (Se ekebe emi, “Ma Mme Owo​—Nam Mmọ Ẹdi Mbet Jesus.”) (Se ndise n̄ko.)

⁸ Imama mme owo ukem nte Jehovah ye Jesus ẹmade. (N̄ke 8:31; John 3:16) Mbọm mme owo emi ‘mînyeneke idotenyịn’ inyụn̄ ‘inyeneke Abasi’ esinam nnyịn. (Eph. 2:12) Uwak afanikọn̄ ererimbot emi anam etie mmọ nte ẹtop mmọ ẹsịn ke ata ntotụn̄ọ obube, ndien eti mbụk Obio Ubọn̄ Abasi edi urụk emi iyomde ndida ndụri mmọ nsio ke obube oro. Ima emi imade utọ mbon oro ye esịt mbọm emi inyenede inọ mmọ ẹsinam inam ofụri se ikekeme ndinam mmọ ẹkop eti mbụk. Ọsọn̄urua etop oro ekeme ndinam mmọ ẹnyene idotenyịn, anam uwem mmọ enyene ibuot idahaemi, onyụn̄ anam mmọ ẹdori enyịn ndidu nsinsi uwem emi akam edide “ata uwem” ke obufa ererimbot emi Abasi edimende idi.​—1 Tim. 6:19.

9. Isidụri mme owo utọn̄ ite ke nso iditịbe ke ini iso? Ntak isinamde ntre? (Ezekiel 33:7, 8)

⁹ Ima emi imade mme owo edi n̄kpọ en̄wen emi anamde idụri mmọ utọn̄ ite ke utịt ererimbot emi esesịm ama. (Kot Ezekiel 33:7, 8.) Mbọm mme mbọhọidụn̄ nnyịn ye mbonubon nnyịn emi mîtuakke ibuot inọ Jehovah esinam nnyịn. Eyo ama esiere, ediwak owo ẹsidi ẹdụk mi, ẹnam oko. Se mmọ ẹsasan̄a oro, idiọn̄ọke se ifịtde idi, ke “akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matt. 24:21) Iyom mmọ ẹdiọn̄ọ se iditịbede ini emi Abasi edibierede ikpe inọ mme owo, ke ẹyesobo kpukpru nsunsu ido ukpono, ekem ẹsobo idiọk ererimbot Satan emi ẹfep ke Armageddon. (Edi. 16:14, 16; 17:16, 17; 19:11, 19, 20) Akam nnyịn edi yak adan̄a ediwak owo emi ikwọrọde ikọ inọ ẹkop se itịn̄de ẹnyụn̄ ẹditiene nnyịn ẹnam n̄kpọ Jehovah idahaemi. Edi nso iditịbe inọ mbon emi ẹsụk ẹmiade utọn̄ ẹsio ke se isụk itịn̄de, ẹsịnede mbonubon nnyịn emi imade etieti?

10. Ntak emi anade ika iso idụri mme owo utọn̄ iban̄a se iditịbede?

¹⁰ Ima itetịn̄ ke ibuotikọ emi ekebede ke ekeme ndidi edidi uduak Jehovah ndinyan̄a mbon emi ẹdidide ẹma ẹkụt nte ẹsobode Akwa Babylon, mmọ ẹtọn̄ọ ndibuọt idem ye enye. Ekpedi edidi ntre, edi se inen̄erede isịn idem idahaemi ika iso idụri mme owo utọn̄ iban̄a se iditịbede ke ini iso. Tịm kere se iyomde nditịn̄ emi: Se ididọhọde mme owo idahaemi ekeme ndinam ama esịm ini oro mmọ ẹti se mmọ ẹkpekenamde. (Men Ezekiel 33:33 domo.) Ekeme ndidi mmọ ẹyefiak ẹkere se mmọ ẹkekopde ke inua nnyịn, enye oro onyụn̄ anam ọdọn̄ mmọ ndidi ndituak ibuot nnọ Jehovah mbemiso ini ebede ọkpọn̄ mmọ. Ekpeme ufọk-n̄kpọkọbi ke Philippi ọkọtọn̄ọ ndibuọt idem ye Jehovah ke “akwa unyekisọn̄” ama eketịbe. Onyụn̄ ekeme ndidi ndusụk mbon emi mînọhọ nnyịn iso idahaemi ẹdidi ẹma ẹkụt nte ẹsobode Akwa Babylon yak mbọribọ omụm mme owo, mmọ ẹtọn̄ọ ndibuọt idem ye Jehovah.​—Utom 16:25-34.

ISIKWỌRỌ IKỌ KE NTAK EMI IMADE JEHOVAH YE ENYỊN̄ ESIE

11. Didie ke isinọ Jehovah ubọn̄ ye ukpono ye odudu? (Ediyarade 4:11) (Se mme ndise n̄ko.)

¹¹ Akakan ntak emi esinamde ikwọrọ eti mbụk edi ke imama Jehovah Abasi ye edisana enyịn̄ esie. Ida ukwọrọikọ nnyịn nte usụn̄ kiet emi isitorode Abasi emi imade. (Kot Ediyarade 4:11.) Imenyịme ke ofụri esịt ke Jehovah Abasi odot ndibọ ubọn̄ ye ukpono ye odudu nto mbon emi ẹsọn̄ọde ẹda ẹtuak ibuot ẹnọ enye. Ima iwụt mbon en̄wen se inamde inen̄ede inịm ke enye “[okobot] kpukpru n̄kpọ,” ke mîkpedịghe enye nnyịn ikpodụhe uwem, inọ enye ubọn̄ ye ukpono. Ima ida ini nnyịn, ukeme nnyịn, ye se inyenede ikwọrọ ikọ adan̄a nte ikekeme, inọ enye odudu nnyịn. (Matt. 6:33; Luke 13:24; Col. 3:23) Ke nditịn̄ ibio ibio, esinenem nnyịn nditịn̄ ikọ mban̄a Abasi emi imade. Esidọn̄ nnyịn n̄ko ndinam mme owo ẹdiọn̄ọ enyịn̄ esie ye utọ Abasi emi enye edide. Ntak edide ntre?

12. Didie ke isinam enyịn̄ Jehovah asana ima ikwọrọ ikọ?

¹² Ima emi imade Jehovah esinam ọdọn̄ nnyịn ndinam enyịn̄ esie asana. (Matt. 6:9) Iyom nditiene ntat mbon en̄wen enyịn yak mmọ ẹtiene ẹkụt kpukpru nsu emi Satan osude odori Abasi. (Gen. 3:1-5; Job 2:4; John 8:44) Ima ikwọrọ ikọ, esinen̄ede ọdọn̄ nnyịn ndidọhọ owo ekededi emi edimade ndikpan̄ utọn̄ nnọ nnyịn utọ owo emi Jehovah edide. Iyom kpukpru owo ẹdiọn̄ọ ke akakan edu esie edi ima, ke nte enye akarade enen, enye inyụn̄ itụkke owo ndomokiet, ke ibịghike ukara esie ayanam kpukpru ufen ẹtre, oyonyụn̄ anam mme owo ẹnyene emem ẹnyụn̄ ẹkop inemesịt. (Ps. 37:10, 11, 29; 1 John 4:8) Ima itịn̄ nti n̄kpọ iban̄a Jehovah ini ikwọrọde ikọ, imesinam enyịn̄ esie asana. N̄kpọ en̄wen edi ke esinen̄ede enem nnyịn ke idem sia imọdiọn̄ọ ke imanam se akpanade Mme Ntiense esie ẹnam. Ntak idọhọde ntre?

13. Ntak emi esinemde-nem nnyịn ndikere Mme Ntiense Jehovah? (Isaiah 43:10-12)

¹³ Jehovah emek nnyịn “mme ntiense” esie. (Kot Isaiah 43:10-12.) Isua ifan̄ ko ke edem, leta Otu Emi Ẹsede Ẹban̄a Utom Nnyịn ọkọdọhọ ke ‘Jehovah ndikot nnyịn Mme Ntiense esie edi ata n̄kpọ ukpono, ke idụhe ukpono en̄wen emi akande oro.’c Ntak edide ntre? Kop uwụtn̄kpọ emi ise. Ekpedi ẹma ẹbiat fi enyịn̄ ndien ẹmen fi ẹka esop, afo oyom owo emi editịn̄de n̄kpọ iban̄a fi, edimek owo emi enen̄erede ọdiọn̄ọ, emi mîdinyụn̄ itọhọ fi edem ke isọn̄; owo emi ọdiọn̄ọde ke uwem esie ayanam ẹnịm se enye etịn̄de aban̄a fi. Jehovah ndimek nnyịn Mme Ntiense esie owụt ke enye enen̄ede ọdiọn̄ọ nnyịn onyụn̄ enịm ke iyọdọhọ mbon en̄wen ke enye ikpọn̄ edi ata Abasi. Enen̄ede enem nnyịn nte idide Mme Ntiense esie tutu edi ifet ekededi emi inyenede ndinam mme owo ẹdiọn̄ọ enyịn̄ esie nnyụn̄ nyarade ediwak nsu emi ẹsude ẹban̄a enye, nnyịn iyakke ebe nnyịn. Ima inam ntre, iwụt ke idi Mme Ntiense esie. Enyịn̄ oro ikere enye asian asian, ikama afara ntem ke enyọn̄!​—Ps. 83:18; Rome 10:13-15.

IYỌKWỌRỌ IKỌ TUTU UTỊT EDI

14. Nso ye nso iditịbe ke ini iso emi ọdọn̄de-dọn̄ nnyịn ndikụt?

¹⁴ Enyene mme n̄kpọ emi ẹditịbede ke ini iso emi ọdọn̄de-dọn̄ nnyịn ndikụt! Ke mfọn Abasi, imodori enyịn ndikụt nte ata ediwak owo ẹdidụkde esop mbemiso akwa ukụt ọtọn̄ọde. N̄kpọ en̄wen edi ke enen̄ede enem nnyịn ndidiọn̄ọ ke idem ke ini akwa ukụt emi edidide ata enyene ndịk ini ke mbụk ubonowo, ke imekeme ndidori enyịn ndikụt nte ediwak owo ẹkpọn̄de ererimbot Satan emi mînyeneke ufọn mi aba ẹditiene nnyịn ẹtoro Jehovah!​—Utom 13:48.

15-16. Nso ke idika iso inam? Iditre ini ewe?

¹⁵ Utịt isịmke kan̄a-o, edi utom do ke isọn̄ se inamde. Imenyene ifet ndikwọrọ ata akpan n̄kpọ kiet ntem ke ofụri ererimbot emi edide ẹma ẹkwọrọ ẹma idahaemi, owo idikwọrọke aba. N̄kpọ oro edi eti mbụk Obio Ubọn̄ Abasi. Kpa ke ukem ini oro, ana ika iso idụri mme owo utọn̄ iban̄a se iditịbede ekpri ini ke iso. Edi se mme owo ẹdiọn̄ọde ke utịt ererimbot emi ke edi, ke onyụn̄ esesịm nnyịn idem ama. Ini ubiereikpe oro ama edisịm, mmọ ẹyediọn̄ọ ke Jehovah Abasi ọkọdọn̄ nnyịn isikwọrọ se ikesikwọrọde oro inọ mmọ.​—Ezek. 38:23.

¹⁶ Ke ima ikokop kpukpru oro, nso ke ibiere ndinam? Ima emi imade eti mbụk ye mbon en̄wen, ndien akakan edi ima emi imade Jehovah ye enyịn̄ esie, ẹyenam ika iso isịn ibuot isịn itọn̄ ikwọrọ ikọ nte ẹdọhọ ke utịt edidi n̄kpọn̄ emi edisierede mi, tutu Jehovah ọdọhọ ete, “Ẹkwọrọ adan̄aoro!”