Jehovah Ada Ediwak Nditọ Odụk Ubọn̄
“[Odot Abasi ndida] ediwak nditọ ndụk ubọn̄, ndinam asiakusụn̄ edinyan̄a mmọ asan̄a ke ndutụhọ akabade ọfọn ama.”—MME HEBREW 2:10.
1. Ntak emi nnyịn ikemede ndinịm ke akpanikọ nte ke ẹyesu uduak Jehovah kaban̄a ubonowo?
JEHOVAH okobot isọn̄ man edi nsinsi ebietidụn̄ mfọnmma ubon eke owo ndidara anana-utịt uwem. (Ecclesiastes 1:4; Isaiah 45:12, 18) Edi akpanikọ, ete ete nnyịn Adam ama anam idiọkn̄kpọ ndien ke ntem ayakde idiọkn̄kpọ ye n̄kpa ọnọ nditọ esie. Edi uduak Abasi kaban̄a ubonowo oyosu ebe ke Mfri Un̄wọn̄ọ, Jesus Christ. (Genesis 3:15; 22:18; Rome 5:12-21; Galatia 3:16) Ima enyenede ọnọ ererimbot ubonowo okonụk Jehovah ndinọ “ikpọn̄îkpọn̄ Eyen emi Enye obonde . . . man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Ndien ima okonụk Jesus “ọnọ uwem Esie ndifak ediwak owo.” (Matthew 20:28) ‘N̄kemn̄kem ufak’ emi afiak edep mme unen ye idotenyịn oro Adam ọkọduọkde onyụn̄ anam ẹkeme ndinyene nsinsi uwem.—1 Timothy 2:5, 6; John 17:3.
2. Didie ke ẹkewụt nte ẹdidade uwa ufak Jesus ẹnam n̄kpọ ke Usen Usio-Isop Israel eke isua ke isua?
2 Ẹma ẹwụt se edida uwa ufak Jesus nnam n̄kpọ akadade aban̄a ke Usen Usio-Isop eke isua ke isua. Ke usen oro, akwa oku Israel ama esibem iso awa ayara enan̄ nte uwa idiọkido onyụn̄ odori iyịp esie ke Ekebe ke Ata Edisana ataya, ndien ekem ke temple. Enye akanam emi ke ufọn idemesie, mbonufọk esie, ye esien Levi. Ukem ntre, Jesus Christ ekebem iso ọnọ Abasi ekọmurua iyịp esie ndisọhi idiọkn̄kpọ “nditọete” esie eke spirit mfep. (Mme Hebrew 2:12; 10:19-22; Leviticus 16:6, 11-14) Ke Usen Usio-Isop, akwa oku ama esiwa ebot n̄ko nte uwa idiọkido onyụn̄ odori iyịp esie ke Ata Edisana, ntem osiode isop mme idiọkn̄kpọ esien Israel 12 oro mîkedịghe eke mme oku. Kpasụk ntre, Akwa Oku oro Jesus Christ ayada iyịp uwem esie anam n̄kpọ ke ufọn mbon oro ẹnyenede mbuọtidem ke otu ubonowo, abiatde mme idiọkn̄kpọ mmọ efep.—Leviticus 16:15.
Ada Odụk Ubọn̄
3. Nte ekemde ye Mme Hebrew 2:9, 10, nso ke Abasi ananam ke isua 1,900?
3 Ke isua 1,900, Abasi ke anam n̄wọrọnda n̄kpọ ke ebuana ye “nditọete” Jesus. Kaban̄a emi, apostle Paul ekewet ete: “Nnyịn ikụt Enye, emi ẹkenamde Enye ekpri akan mme angel ke ini esisịt kan̄a man Enye akpa n̄kpa, kpa Jesus, nte ayarade ubọn̄ ye ukpono man ke mfọn Abasi Enye akpatabi n̄kpa ke ibuot kpukpru owo. Koro odotde Enye [Jehovah Abasi], emi kpukpru n̄kpọ ẹsụn̄ọde ye Enye, kpukpru n̄kpọ ẹnyụn̄ ẹtode ke Enye, ke edida ediwak nditọ ndụk ubọn̄, ndinam asiakusụn̄ edinyan̄a mmọ asan̄a ke ndutụhọ akabade ọfọn ama.” (Mme Hebrew 2:9, 10) Asiakusụn̄ edinyan̄a edi Jesus Christ, emi ekekpepde mfọnmma nsụkibuot oto mme n̄kpọ oro enye ọkọyọde ke adan̄aemi odude uwem ke isọn̄ nte owo. (Mme Hebrew 5:7-10) Jesus ekedi akpa owo ẹkebonde nte eyen Abasi eke spirit.
4. Ini ewe ndien didie ke ẹkebon Jesus nte Eyen Abasi eke spirit?
4 Jehovah akada edisana spirit, m̀mê anam utom odudu esie, ndibon Jesus nte Eyen esie eke spirit, man otodo ada enye odụk ke ubọn̄ eke heaven. Ke adan̄aemi okodude ikpọn̄ ye John Andinịm Owo Baptism, Jesus ama ayak ẹbụk enye ke mmọn̄ ofụri ofụri nte idiọn̄ọ ediyak idemesie nnọ Abasi. Mbụk Gospel Luke ọdọhọ ete: “Ke ini kpukpru owo ẹnade baptism ẹma, Jesus onyụn̄ anade baptism onyụn̄ ọbọn̄de akam, enyọn̄ eberede, ndien Edisana Spirit osụhọde ke mbiet ibiom edidoro Enye ke idem: ndien uyo oto ke enyọn̄, ete, Afo edi edima eyen Mi; mmenem esịt etieti ye Afo.” (Luke 3:21, 22) John ama okụt edisana spirit osụhọrede edidoro Jesus onyụn̄ okop Jehovah etịn̄de ikọ in̄wan̄în̄wan̄ ndiwụt unyịme emi ọnọde enye nte edima Eyen Esie. Ke ini oro ndien ebede ke edisana spirit, Jehovah ama obon Jesus nte akpa ke otu ‘ediwak nditọ oro ẹnyenede ndida ndụk ubọn̄.’
5. Mmanie ẹdi akpa ndibọ ufọn nto uwa Jesus, ndien mmọ ẹdi ifan̄ ke ibat?
5 “Nditọete” Jesus ẹdi akpa ndibọ ufọn nto ufak esie. (Mme Hebrew 2:12-18) Ke n̄kukụt, apostle John ama okụt mmọ nte ẹma ẹkedodu ke ubọn̄ ke Obot Zion eke heaven ye Eyenerọn̄, kpa Ọbọn̄ Jesus Christ emi ekesetde ke n̄kpa. John n̄ko ayarade ibat mmọ, ọdọhọde ete: “N̄kụt, ndien sese, Eyenerọn̄ ke adada ke Obot Zion, tọsịn owo ikie ye aba ye inan̄ ẹnyụn̄ ẹda ye Enye, kpa mmọ ẹmi ẹkewetde enyịn̄ Esie ye enyịn̄ Ete Esie ke ọkpọiso mmọ. . . . Ẹkefak mmọ ẹsio ke otu owo, ẹte mmọ ẹdi akpa mbun̄wụm ẹnọ Abasi ye Eyenerọn̄. Ndien owo ikwe mmọ abian̄a ke inua; mmọ inyụn̄ inyeneke ndo.” (Ediyarade 14:1-5) Ntre ‘ediwak nditọ oro ẹdade ẹdụk ubọn̄’ ke heaven ẹdi 144,001 kpọt ke ibat—Jesus ye nditọete esie eke spirit.
‘Abasi Obon’
6, 7. Mmanie ke ‘Abasi obon,’ ndien nso ke emi ọwọrọ ọnọ mmọ?
6 Edi “Abasi okobon” mbon oro ẹdide nditọ Jehovah. Ke etịn̄de n̄kpọ aban̄a utọ mbon oro, apostle John ekewet ete: “Baba owo kiet eke Abasi okobonde inamke idiọkn̄kpọ, koro se Abasi adade obon enye nte eyen odụn̄de enye ke idem; enye inyụn̄ ikemeke ndinam idiọkn̄kpọ, sia edide Abasi okobon enye.” (1 John 3:9) Se “adade obon” emi edi edisana spirit Abasi. Ke anamde utom ke ebuana ye ikọ esie, enye obon owo kiet kiet ke otu owo 144,000 ẹmi “obufa” ọnọ idotenyịn eke heaven.—1 Peter 1:3-5, 23.
7 Jesus ekedi Eyen Abasi toto ke emana esie nte owo, idem kpa nte mfọnmma owo oro Adam ekedide “Eyen Abasi.” (Luke 1:35; 3:38) Nte ededi, ke Jesus ama akana baptism, ama edi akpan n̄kpọ Jehovah nditịn̄ ete: “Afo edi edima Eyen Mi; mmenem esịt etieti ye Afo.” (Mark 1:11) Ebede ke utịn̄ikọ emi ndisan̄a ye edisana spirit, ama ana in̄wan̄în̄wan̄ nte ke Abasi akanam Jesus amana adan̄aoro nte Eyen Esie eke spirit. Ke ndamban̄a usụn̄, ẹma ẹbon Jesus “obufa” ini oro ye unen ndibọ uwem ini kiet efen nte Eyen Abasi eke spirit ke heaven. Ukem nte enye, nditọete esie eke spirit 144,000 ‘ẹtọn̄ọ ntak ẹmana.’ (John 3:1-8; se Enyọn̄-Ukpeme, November 15, 1992, page 3-6.) N̄ko ukem nte Jesus, Abasi eyet mmọ aran onyụn̄ ọnọ utom ete ẹtan̄a eti mbụk.—Isaiah 61:1, 2; Luke 4:16-21; 1 John 2:20.
Uyarade Edibon
8. Nso uyarade edidi se ẹbonde ke spirit odu kaban̄a (a) Jesus (b) mme akpa mbet esie?
8 Uyarade ama odu nte ke ẹma ẹbon Jesus ke spirit. John Baptist ama okụt spirit osụhọrede edidoro Jesus onyụn̄ okop ikọ oro Abasi etịn̄de aban̄a obufa itie eyen eke spirit Messiah oro ẹkeyetde aran. Edi mme mbet Jesus ẹdisan̄a didie ẹfiọk nte ke ẹbon mmimọ ke spirit? Nte ededi, ke usen oro enye ọkọdọkde ke heaven, Jesus ọkọdọhọ: “John [akada] mmọn̄ enịm baptism, edi ẹyenịm mbufo baptism ke Edisana Spirit ke usen ifan̄ mîbehe kan̄a.” (Utom 1:5) ‘Ẹkenịm’ mme mbet Jesus “baptism ke Edisana Spirit” ke usen Pentecost 33 E.N. Edin̄wan̄a edisana spirit oro nduọk akasan̄a ye ‘uyom otode enyọn̄, ekebietde uyom ata ọkpọsọn̄ oyobio eke ofụmede’ ndien “edeme eke ẹsakde nte ikan̄” ẹdoro mbet kiet kiet ke idem. Akakan n̄wọrọnda n̄kpọ ekedi ukeme mme mbet “ndisem nsio nsio usem, nte Spirit ọnọde mmọ ukeme nditịn̄.” Ntre uyarade oro ẹkụtde-kụt ẹnyụn̄ ẹkopde-kop ẹma ẹdu nte ke usụn̄ ndidụk ubọn̄ eke heaven nte nditọ Abasi ama eberede ọnọ mme anditiene Christ.—Utom 2:1-4, 14-21; Joel 2:28, 29.
9. Nso uyarade okodu nte ke ẹma ẹbon mbon Samaria, Cornelius, ye mbon efen eke akpa isua ikie ke spirit?
9 Ndusụk ini ke oro ebede, Philip ọkwọrọ eti mbụk ama ọkwọrọ ikọ ke Samaria. Okposụkedi mbon Samaria ẹkenyịmede etop esie ẹkenyụn̄ ẹnade baptism, mmọ ẹma ẹnana uyarade nte ke Abasi ama obon mmọ nte nditọ esie. Ke ini apostle Peter ye John ẹkebọn̄de akam ẹkenyụn̄ ẹdoride mme andinịm ke akpanikọ oro ubọk mmọ, “mmọ ẹnyụn̄ ẹbọ Edisana Spirit” ke usụn̄ oro mme ndanse ẹkekụtde. (Utom 8:4-25) Emi ekedi uyarade nte ke ẹbon mbon Samaria oro ẹkenịmde ke akpanikọ ke spirit nte nditọ Abasi. Ke ukem usụn̄ oro, ke 36 E.N., Cornelius ye mme Gentile efen ẹma ẹnyịme akpanikọ Abasi. Peter ye mme Jew oro ẹkenịmde ke akpanikọ oro ẹkesan̄ade ye enye ẹma ‘ẹkop n̄kpaidem koro ẹken̄wan̄ade Edisana Spirit ẹnọ mme Gentile n̄ko. Koro mmọ ẹkopde nte mmọ oro ẹsemde nsio nsio usem, ẹnyụn̄ ẹtorode Abasi.’ (Utom 10:44-48) Ediwak Christian eke akpa isua ikie ẹma ẹbọ “enọ eke spirit,” utọ nte edisem usem. (1 Corinth 14:12, 32) Mme owo ẹmi ke ntem ẹma ẹnyene in̄wan̄în̄wan̄ uyarade nte ke ẹma ẹbon mmimọ ke spirit. Edi mme Christian eke ukperedem ini ẹdisan̄a didie ẹdiọn̄ọ m̀mê ẹbon mmimọ ke spirit m̀mê owo ibonke?
Ntiense Emi Spirit Etiede
10, 11. Ọkọn̄ọde ke Rome 8:15-17, afo ọkpọdọhọ ke didie ke spirit etiene mbon ẹmi ẹdide nsan̄a mme ada udeme ye Christ etie ntiense?
10 Kpukpru Christian 144,000 oro ẹyetde aran ẹnyene ọyọhọ uyarade nte ke mmimọ imenyene spirit Abasi. Ke afan̄ emi, Paul ekewet ete: “Mbufo ẹkebọ spirit eke enyenede mmọ ẹmi ẹdade ẹsịn ke ubon Abasi, emi anamde nnyịn ikot Abasi, ite, Abba, Ete. Spirit ke Idemesie etiene spirit nnyịn edi ntiense ete, nnyịn idi nditọ Abasi. Edi edieke nnyịn idide nditọ, imonyụn̄ inyene udeme ke se ẹnịmde ẹnọ nditọ; imenyene udeme ke se Abasi enịmde; imasan̄a ye Christ inyene udeme: koro ana nte nnyịn ima ikụt ndutụhọ ye Enye, iyonyụn̄ ida ubọn̄ ye Enye.” (Rome 8:15-17, sịghisịghi ubọkn̄wed edi eke nnyịn.) Mme Christian oro ẹyetde aran ẹnyene edu eyen ye ete ẹban̄a Ete mmọ eke heaven, kpa n̄wọrọnda ntụk eke edidi nditọ. (Galatia 4:6, 7) Mmọ ẹtịm ẹfiọk ẹte ke Abasi obon mmimọ ndidi nditọ eke spirit nte nsan̄a mme ada udeme ye Christ ke Obio Ubọn̄ eke heaven. Ke emi, edisana spirit Jehovah anam akpan utom.
11 Ke idak odudu edisana spirit Abasi, spirit, m̀mê n̄wọrọnda edu, eke mbon oro ẹyetde aran onụk mmọ ndinam n̄kpọ ke in̄wan̄în̄wan̄ usụn̄ mban̄a se Ikọ Abasi etịn̄de aban̄a idotenyịn eke heaven. Ke uwụtn̄kpọ, ke ini mmọ ẹkotde se N̄wed Abasi etịn̄de aban̄a nditọ Jehovah eke spirit, mmọ ẹnyịme ke ndammana usụn̄ nte ke mme utọ ikọ oro ẹban̄a mmimọ. (1 John 3:2) Mmọ ẹfiọk ẹte ke mmimọ ima “[ina] baptism idụk ke Christ Jesus” ye ke n̄kpa esie. (Rome 6:3) Se mmọ ẹsọn̄ọde ẹnịm ke akpanikọ edi nte ke mmimọ idi nditọ Abasi eke spirit, ẹmi idikpade inyụn̄ iset idụk ubọn̄ eke heaven, nte ekedide ye Jesus.
12. Nso ke spirit Abasi anam mme Christian ẹmi ẹyetde aran ẹnyene?
12 Ndidi se ẹbonde ẹsịn ke itie eyen eke spirit idịghe udọn̄ oro owo ọkọride-kọri. Mbon oro ẹbonde ke spirit iyomke ndika heaven ke ntak mfụhọ otode nsọn̄ọn̄kpọ odude ke isọn̄. (Job 14:1) Utu ke oro, spirit Jehovah anam mbon oro ẹnen̄erede ẹyet aran ẹnyene idotenyịn ye udọn̄ oro mîdịghe ọsọ ke otu ubonowo ofụri ofụri. Utọ mbon oro ẹbonde ntre ẹfiọk ẹte ke nsinsi uwem ke mfọnmma idaha eke owo ke paradise isọn̄ emi ọyọhọde ye mme ubon ye mme ufan oro ẹkopde inemesịt edidi utịben̄kpọ. Nte ededi, utọ uwem oro idịghe akpan udọn̄ esịt mmọ. Mbon oro ẹyetde aran ẹnyene ata ọkpọsọn̄ idotenyịn eke heaven tutu mmọ ke unyịmesịt ẹwa kpukpru idotenyịn ye mme itie ebuana eke isọn̄.—2 Peter 1:13, 14.
13. Nte ekemde ye 2 Corinth 5:1-5, nso “ọkpọsọn̄ udọn̄” ke Paul ekenyene, ndien nso ke emi owụt kaban̄a mbon oro ẹbonde ke spirit?
13 Idotenyịn uwem eke heaven oro Abasi ọnọde okop odudu ke idem mbon oro tutu ntụk mmọ editie nte eke Paul, emi ekewetde ete: “Nnyịn imọfiọk ite, edieke ataya eke idan̄de ke esịt ke isọn̄ emi owụrede, imenyene ufọk eke Abasi ọnọde, eke mîdaha ubọk owo ibọp, eke ebịghide ke nsinsi ke heaven. Koro ke ini idan̄de ke ataya emi, idu ke mmụm; ke ọdọn̄ nnyịn etieti ndidụk nsịne ke ebietidụn̄ emi otode heaven, koro ima idodụk isịne ke esịt, edidi Ọbọn̄ idisịmke nnyịn iferi. Ke akpanikọ nnyịn ẹmi idan̄de ke ataya emi idu ke mmụm, koro efefịghe nnyịn ke esịt; emi iwọrọke ite, nnyịn iyom ẹfọrọde nnyịn ikpọkidem ẹduọk, edi iyom ẹsịne nnyịn n̄kpọ ke idem ẹdori, man uwem ekpemen se inyenede ndikpa emen. Edi Enye emi ekeben̄ede nnyịn enịm ọnọ n̄kpọ emi edi Abasi, emi ọkọnọde nnyịn Spirit nte akpa ubak udeme nnyịn.” (2 Corinth 5:1-5) ‘Ọkpọsọn̄ udọn̄’ Paul ekedi ndinam enye eset aka uwem eke heaven nte edibotn̄kpọ eke spirit oro mîkemeke ndikpa. Ke etịn̄de aban̄a idem eke owo, enye akada ikọ n̄ke aban̄ade ataya oro ekemede ndiwụre, itieidụn̄ ibio ini oro ekemede ndiwụre ke ẹmende ẹdomo ye ufọk. Okposụkedi ẹdụn̄de ke isọn̄ ke idem eke obụk oro ekemede ndikpa, mme Christian ẹmi ẹnyenede spirit nte idiọn̄ọ uwem eke heaven oro edidide ẹdori enyịn ke “ufọk eke Abasi ọnọde,” kpa idem eke spirit oro mîdikpaha, mîdibiarake. (1 Corinth 15:50-53) Ukem nte Paul, mmọ ẹkeme ndisọn̄ọ ndọhọ nte: “Ikokop isọn̄esịt, onyụn̄ odu nnyịn ke udọn̄ akan ndidaha n̄kpọn̄ ikpọkidem [eke owo] n̄kodu ye Ọbọn̄ [ke heaven].”—2 Corinth 5:8.
Ẹda Ẹsịn ke San̄asan̄a Ediomi
14. Ke ini ọkọtọn̄ọde edinam Editi, ewe ediomi ke Jesus ekebem iso asiak, ndien nso udeme ke enye enyene ke ebuana ye nditọ Israel eke spirit?
14 Mme Christian oro ẹbonde ke spirit ẹsọn̄ọ ẹnịm ẹte ke ẹda mmimọ ẹsịn ke san̄asan̄a ediomi iba. Jesus ama asiak kiet ke otu ẹmi ke ini enye akadade uyo eke leaven mîdụhe ye wine ọtọn̄ọ Editi n̄kpa esie oro akasan̄ade ekpere okonyụn̄ etịn̄de aban̄a cup wine oro ete: “Cup emi edi Obufa Ediomi ke iyịp Mi, emi ẹduọkde kaban̄a mbufo.” (Luke 22:20; 1 Corinth 11:25) Mmanie ẹbuana ke obufa ediomi emi? Jehovah Abasi ye mme andibuana ke Israel eke spirit—mbon oro Jehovah aduakde ndida ndụk ubọn̄ eke heaven. (Jeremiah 31:31-34; Galatia 6:15, 16; Mme Hebrew 12:22-24) Ke odude ke edinam ebe ke iyịp Jesus oro ẹkeduọkde, obufa ediomi osion̄o mme owo ke mme idụt ọnọ enyịn̄ Jehovah onyụn̄ anam mme Christian oro ẹbonde ke spirit mi ẹdi ubak “mfri” Abraham. (Galatia 3:26-29, NW; Utom 15:14) Obufa ediomi anam ẹda kpukpru nditọ Israel eke spirit ẹdi ke ubọn̄ ebe ke ndinam mmọ ẹset ẹdụk uwem eke mîdikpaha. Sia edide “nsinsi ediomi,” mme ufọn esie ẹdibịghi ke nsinsi. Se isụhọde edi ndifiọk m̀mê ediomi emi ayanam n̄kpọ n̄ko ke mme usụn̄ efen ke Tọsịn Isua ye ke oro ebede.—Mme Hebrew 13:20.
15. Ke n̄kemuyo ye Luke 22:28-30, ewe ediomi efen ke ẹketọn̄ọ ndida mme anditiene Jesus oro ẹyetde aran nsịn, ndien ini ewe?
15 Ẹda “ediwak nditọ” ẹmi Jehovah aduakde ‘ndida ndụk ubọn̄’ kiet kiet ẹsịn ke ediomi Obio Ubọn̄ eke heaven. Kaban̄a ediomi emi ye mme anditiene nde-ikpat esie, Jesus ọkọdọhọ ete: “Mbufo ẹdi mmọ ẹmi ẹkesọn̄ọde ẹda ye Ami ke idomo Mi; kpa nte Ete Mi ekenịmde Obio Ubọn̄ ọnọ Mi, kpasụk ntre ke Ami nnyụn̄ nnịm nnọ mbufo nte ẹdia n̄kpọ ẹnyụn̄ ẹn̄wọn̄ n̄kpọ ke okpokoro Mi ke Obio Ubọn̄ Mi; mbufo ẹyenyụn̄ ẹtie ke ebekpo ẹkpe ikpe ẹnọ mme esien Israel duopeba.” (Luke 22:28-30) Ẹketọn̄ọ ediomi Obio Ubọn̄ ke ini ẹkeyetde mme mbet Jesus aran ke edisana spirit ke Pentecost 33 E.N. Ediomi oro odu ke edinam ke ufọt Christ ye mme nsan̄a ndidem esie ke nsinsi. (Ediyarade 22:5) Ntre, ndien, mme Christian oro ẹbonde ke spirit ẹnyene nsọn̄ọ nte ke mmimọ idu ke obufa ediomi ye ke ediomi Obio Ubọn̄. Ke ntre, ke edinam Udia Mbubịteyo Ọbọn̄, sụk esisịt ibat mbon oro ẹyetde aran oro ẹsụhọde ẹmi ẹsụk ẹdude ke isọn̄ ẹsita uyo, emi adade aban̄a ikpọkidem Jesus eke owo oro mînyeneke idiọkn̄kpọ, ẹnyụn̄ ẹn̄wọn̄ wine, emi adade aban̄a mfọnmma iyịp esie oro ẹkeduọkde ke n̄kpa emi onyụn̄ ọsọn̄ọde obufa ediomi oro.—1 Corinth 11:23-26; se Enyọn̄-Ukpeme, February 1, 1989, page 17-20.
Ẹkot, Ẹmek, Ẹnyụn̄ Ẹnam Akpanikọ
16, 17. (a) Man ẹda ẹdụk ubọn̄, nso inyene ndidi akpanikọ kaban̄a owo 144,000? (b) Mmanie ẹdi “ndidem duop” oro, ndien didie ke mmọ ẹnam n̄kpọ ye nsụhọ “nditọete” Christ ẹmi ẹdude ke isọn̄?
16 Akpa edida uwa ufak Jesus nnam n̄kpọ anam ẹkot owo 144,000 ẹnọ uwem eke heaven ẹnyụn̄ ẹmek ebe ke ndidi se Abasi obonde ke spirit. Edi akpanikọ, man ẹda ẹdụk ubọn̄, ana mmọ ‘ẹdọdiọn̄ ẹsịn ifịk ẹnam ikot eke ẹkekotde mmọ ye edimek eke ẹmekde mmọ ọsọn̄ọ ada,’ ndien ana mmọ ẹnam akpanikọ tutu esịm n̄kpa. (2 Peter 1:10; Ephesus 1:3-7; Ediyarade 2:10) Ekpri nsụhọ oro ẹyetde aran ẹmi ẹsụk ẹdude ke isọn̄ ke ẹmụm nsọn̄ọnda mmọ ẹkama kpa ye oro “ndidem duop” oro ẹdade ẹban̄a kpukpru odudu ukaraidem oro ẹbiọn̄ọde mmọ. “Mmọ ẹyen̄wana ekọn̄ ye Eyenerọn̄,” ntre ke angel eketịn̄, “ndien Eyenerọn̄ ayakan mmọ, koro Enye edide Ọbọn̄ mbọn̄ ye Edidem ndidem; mmọ ẹmi ẹdude ye Enye ẹyenyụn̄ ẹkan, kpa mmọ ẹmi Abasi okokotde, onyụn̄ emekde, ẹmi ẹnyụn̄ ẹdide mme anam-akpanikọ.”—Ediyarade 17:12-14.
17 Mme andikara ẹdide owo ikemeke ndinam Jesus, kpa “Edidem ndidem,” n̄kpọ ndomokiet koro enye odude ke heaven. Edi mmọ ẹwụt usua ẹnọ nsụhọ “nditọete” esie ẹmi ẹsụk ẹdude ke isọn̄. (Ediyarade 12:17) Oro eyetre ke ekọn̄ Abasi eke Armageddon, emi edikan edinyenede “Edidem ndidem” ye “nditọete” esie—“mmọ ẹmi Abasi okokotde, onyụn̄ emekde, ẹmi ẹnyụn̄ ẹdide mme anam-akpanikọ.” (Ediyarade 16:14, 16) Kan̄a ke emi, mme Christian oro ẹbonde ke spirit ke ẹyọhọ ye utom. Nso ke mmọ ẹnam idahaemi, mbemiso Jehovah adade mmọ odụk ubọn̄?
Nso Idi Ibọrọ Fo?
◻ Mmanie ke Abasi ‘ada odụk ubọn̄ eke heaven’?
◻ Nso ke ‘ndidi se Abasi obonde’ ọwọrọ?
◻ Didie ke ‘spirit etie ntiense’ ye ndusụk Christian?
◻ Ẹda mbon oro ẹbonde ke spirit ẹsịn ke mme ediomi ewe?
[Ndise ke page 15]
Ke Pentecost 33 E.N., ẹma ẹnọ uyarade nte ke ẹberede usụn̄ ẹnọ edidụk ubọn̄ eke heaven