Mme Christian Ntiense Ẹmi Ẹnyenede Itie Eyenisọn̄ Eke Heaven
“Edi obio nnyịn ododu ke heaven.”—PHILIPPI 3:20.
1. Nso utịbe utịbe uduak ke Jehovah enyene kaban̄a ndusụk mme owo?
MBON oro ẹmande nte mme owo ẹyekara nte ndidem ye mme oku ke heaven, ẹkarade idem mme angel. (1 Corinth 6:2, 3; Ediyarade 20:6) Nso ndyọ ndyọ akpanikọ ke emi edi ntem! Edi, Jehovah akaduak oro, onyụn̄ anam enye ebe ke ikpọn̄îkpọn̄ edibon Eyen esie, Jesus Christ. Ntak emi Andibot nnyịn anamde utọ n̄kpọ ntre? Ndien didie ke ifiọk ẹnyenede ẹban̄a oro okpotụk Christian mfịn? Ẹyak nnyịn ise nte Bible ọbọrọde mme mbụme ẹmi.
2. Nso obufa n̄kpọ ke John Andinịm Owo Baptism ọkọtọt ke Jesus eyenam, ndien obufa n̄kpọ emi ekenyene ebuana ye nso?
2 Ke ini John Andinịm Owo Baptism ọkọdiọn̄de usụn̄ ọnọ Jesus, enye ama ọtọt ete ke Jesus eyenam n̄kpọ emi edide obufa. Mbụk oro ọdọhọ ete: “[John] ọkwọrọ ete, Enyeemi enyenede odudu akan mi etiene mi ke edem edi, emi mmendotke ndinụhọ ntat urụk ikpaukot Esie. Ami nda mmọn̄ nnịm mbufo baptism; edi Enye eyenịm mbufo baptism ke Edisana Spirit.” (Mark 1:7, 8) Mbemiso ini oro, owo ndomokiet ikanaha baptism ke edisana spirit. Emi ekedi obufa ndutịm emi abuanade edisana spirit, ndien enye ekenyene n̄kpọ ndinam ye uduak Jehovah emi ẹkeyomde ndiyarade man ẹtịm mme owo idem ẹnọ itie ukara eke heaven.
‘Nditọn̄ọ Ntak Mmana’
3. Ewe mbufa n̄kpọ ẹban̄ade Obio Ubọn̄ eke heaven ke Jesus akanam an̄wan̄a Nicodemus?
3 Ke osobode ndedịbe ndedịbe ye ọwọrọetop owo Pharisee, Jesus ama ayarade ekese aban̄a uduak Abasi emi. Pharisee oro, Nicodemus, ekedi ebịne Jesus ke okoneyo, ndien Jesus ama ọdọhọ enye ete: “Edieke owo mîtọn̄ọke ntak imana, enye ikemeke ndikụt Obio Ubọn̄ Abasi.” (John 3:3) Nicodemus, nte owo Pharisee emi anade edi ama ekpep N̄wed Abasi Usem Hebrew, ama ọfiọk n̄kpọ aban̄a n̄wọrọnda akpanikọ Obio Ubọn̄ Abasi. N̄wed Daniel ama etịn̄ prọfesi ete ke ẹyeda Obio Ubọn̄ oro ẹnọ “owo eke ebietde eyen owo” ye “edisana ikọt Ata Edikon̄.” (Daniel 7:13, 14, 27) Obio Ubọn̄ oro ekenyene ‘ndinuak onyụn̄ ama’ kpukpru mme obio ubọn̄ eken ndien ada ke nsinsi. (Daniel 2:44) Eyedi Nicodemus ekekere ete ke mme prọfesi ẹmi ẹdinyene edisu ye idụt Jew; edi Jesus ọkọdọhọ ke man ẹkụt Obio Ubọn̄ oro, owo enyene nditọn̄ọ ntak mmana. Ikan̄wan̄ake Nicodemus, ntre Jesus ama akaiso ndidọhọ ete: “Edieke owo mîmanake oto ke mmọn̄ ye Spirit, enye ikemeke ndidụk ke Obio Ubọn̄ Abasi.”—John 3:5.
4. Ye mbon oro ẹmanade ẹto edisana spirit, didie ke itie ebuana mmọ ye Jehovah edikpụhọde?
4 John Andinịm Owo Baptism ama etịn̄ aban̄a baptism ke edisana spirit. Idahaemi, Jesus ama adian do ete ke ana owo amana oto edisana spirit edieke enye edidụkde Obio Ubọn̄ Abasi. Ebede ke n̄wọrọnda emana emi, mme anana-mfọnmma iren ye iban ẹdụk ata san̄asan̄a itie ebuana ye Jehovah Abasi. Mmọ ẹkabade ẹdi nditọ esie emi enye emende obon. Nnyịn ikot ite: “Kpukpru owo eke ẹdarade [Jesus], Enye ọnọ mmọ unen ndikabade ndi nditọ Abasi, kpa mmọemi ẹbuọtde idem ke enyịn̄ Esie; emi mîmanake oto ke iyịp, m̀mê ke edinyịme obụkidem, m̀mê ke edinyịme owo, edi ẹmana oto Abasi.”—John 1:12, 13; Rome 8:15.
Nditọ Abasi
5. Ini ewe ke mme anam-akpanikọ mbet ẹkena baptism ke edisana spirit, ndien nso edinam edisana spirit emi ebietde enyeemi akada itie ke ukem ini oro?
5 Ke ini Jesus eketịn̄de ikọ ọnọ Nicodemus, edisana spirit ama ododoro Jesus ke idem, eyetde enye aran onịm ọnọ itie edidem esie ke ini iso ke Obio Ubọn̄ Abasi, ndien Abasi ama onyịme Jesus an̄wan̄wa nte Eyen Esie. (Matthew 3:16, 17) Jehovah ama obon nditọ eke spirit efen efen ke Pentecost 33 E.N. Mme anam-akpanikọ mbet ẹmi ẹkesopde idem ke ubet enyọn̄ ke Jerusalem ẹma ẹna baptism ke edisana spirit. Ke ukem ini oro, mmọ ẹma ẹtọn̄ọ ntak ẹmana oto ke edisana spirit ndidi nditọ Abasi eke spirit. (Utom 2:2-4, 38; Rome 8:15) N̄ko-n̄ko, ẹma ẹyet mmọ aran ke edisana spirit ye uduak edinyene udeme eke heaven ke ini iso, ndien ẹma ebemiso ẹfịk mmọ idiọn̄ọ ke edisana spirit nte idiọn̄ọ ndisọn̄ọ idotenyịn eke heaven oro.—2 Corinth 1:21, 22.
6. Nso idi uduak Jehovah kaban̄a Obio Ubọn̄ eke heaven, ndien ntak emi odotde ete mme owo ẹnyene udeme ke emi?
6 Mmọemi ẹkedi mme akpa anana-mfọnmma owo ẹmi Abasi ekemekde ndidụk Obio Ubọn̄. Oro edi, ke mmọ ẹma ẹkekpa ẹnyụn̄ ẹset, mmọ ẹkenyene ndikabade ndi ubak esop Obio Ubọn̄ eke heaven emi edikarade mme owo ye mme angel. Jehovah aduak ete ke ebede ke Obio Ubọn̄ emi, ẹyenam akwa enyịn̄ esie asana ẹnyụn̄ ẹwụt unen itie edikara esie ke iso ofụri edibotn̄kpọ. (Matthew 6:9, 10; John 12:28) Odot didie ntem ete mme owo ẹnyene udeme ke Obio Ubọn̄ oro! Satan akada mme owo ke ini akamiade akpa ata esie kaban̄a unen itie edikara Jehovah ko ke in̄wan̄ Eden, ndien kemi Jehovah aduak ete ke mme owo ẹyetiene ẹbuana ke ndibọrọ ata oro. (Genesis 3:1-6; John 8:44) Apostle Peter ekewet ọnọ mbon ẹmi ẹmekde ndikara ke Obio Ubọn̄ oro ete: “Itoro enyene Abasi ye Ete Ọbọn̄ nnyịn Jesus Christ, emi, nte asan̄ade ekekem ye akwa mbọm Esie, okobonde nnyịn obufa ada esịn ke oduuwem idotenyịn oto ke ediset Jesus Christ ke n̄kpa; ete nnyịn idida udeme eke mîkemeke ndibiara, eke n̄kpọ mîsabakede, eke mînyụn̄ ikemeke ndibe mfep, inyene. Abasi okonyụn̄ onịm udeme oro ke heaven ọnọ mbufo.”—1 Peter 1:3, 4, 5a.
7. Nso n̄wọrọnda itie ebuana ye Jesus ke mbon oro ẹnade baptism ke edisana spirit ẹnyene?
7 Nte nditọ ẹmi Abasi emende obon, mme Christian ẹmi ẹmekde ẹkabade ẹdi nditọete Jesus Christ. (Rome 8:16, 17; 9:4, 26; Mme Hebrew 2:11) Sia Jesus okowụtde nte idide Mfri oro ẹken̄wọn̄ọde ẹnọ Abraham, mme Christian ẹmi ẹyetde aran ke spirit mi ẹdi nsan̄a, m̀mê udiana, ubak Mfri oro, emi edidade edidiọn̄ ọsọk ubonowo emi ẹnịmde ke akpanikọ. (Genesis 22:17, 18; Galatia 3:16, 26, 29) Nso edidiọn̄? Ifet ndidi se ẹnyan̄ade ẹsio ke idiọkn̄kpọ nnyụn̄ n̄kabade ntie ke emem ye Abasi nnyụn̄ nnam n̄kpọ esie idahaemi ye ke nsinsi. (Matthew 4:23; 20:28; John 3:16, 36; 1 John 2:1, 2) Mme Christian oro ẹyetde aran mi ke isọn̄ ẹda mbon eti esịt ẹwụt edidiọn̄ emi ebe ke nditie ntiense nnọ Jesus Christ eyenete mmọ eke spirit ye Ete oro emende mmọ obon, Jehovah Abasi.—Utom 1:8; Mme Hebrew 13:15.
8. Nso idi “ediyarade” eke nditọ Abasi ẹmi ẹbonde ke spirit?
8 Bible etịn̄ aban̄a “ediyarade” nditọ Abasi ẹmi ẹbonde ke spirit. (Rome 8:19) Ke ndidụk Obio Ubọn̄ oro nte nsan̄a ndidem ye Jesus, mmọ ẹbuana ke ndisobo editịm n̄kpọ ererimbot Satan. Ke oro ebede, ke tọsịn isua kiet, mmọ ẹn̄wam ke ndinam ubonowo ẹbọ mme ufọn uwa ufak oro ndien ke ntem ẹmenede ekpụk ubonowo ẹsịm mfọnmma oro Adam ọkọduọkde. (2 Thessalonica 1:8-10; Ediyarade 2:26, 27; 20:6; 22:1, 2) Ediyarade mmọ abuana kpukpru n̄kpọ ẹmi. Enye edi n̄kpọ emi edibotn̄kpọ edide owo emi onịmde ke akpanikọ ebetde ye ọkpọsọn̄ udọn̄.
9. Didie ke Bible etịn̄ aban̄a otu Christian eke ofụri ererimbot oro ẹyetde aran?
9 Otu mme Christian ẹmi ẹyetde aran ke ofụri ererimbot edi “ufọk Abasi eke mmọemi ẹdide ikpan, emi ẹwetde enyịn̄ mmọ ke heaven.” (Mme Hebrew 12:22, 23) Mmọ ẹdi akpa mme andibọ ufọn nto uwa ufak Jesus. Mmọ n̄ko ẹdi “idem Christ,” emi owụtde ntotụn̄ọ itie ebuana mmọ ye kiet eken ndien ye Jesus. (1 Corinth 12:27) Paul ekewet ete: “Kpa nte ikpọkidem edide kiet, onyụn̄ enyenede ediwak ndido, ndien kpukpru ndido ikpọkidem, eke ẹwakde, edide ikpọkidem kiet, kpasụk ntre ke edi ye Christ. Koro ke Spirit kiet ke ẹma ẹnịm kpukpru nnyịn baptism ẹsịn ke ikpọkidem kiet, ye idide Jew inyụn̄ idide Greek, idide ifịn inyụn̄ idide nditọ: ẹma ẹnyụn̄ ẹnam kpukpru nnyịn in̄wọn̄ Spirit kiet isịn ke idem.”—1 Corinth 12:12, 13; Rome 12:5; Ephesus 1:22, 23; 3:6.
“Israel Abasi”
10, 11. Ke akpa isua ikie, ntak ẹkeyomde obufa Israel, ndien mmanie ẹkenam obufa idụt emi?
10 Ke se iwakde ikan isua 1,500 mbemiso Jesus edide nte Messiah oro ẹken̄wọn̄ọde, idụt Israel eke obụk ekedi san̄asan̄a ikọt Jehovah. Kpa ye mme n̄kpọ editi ofụri ini, idụt oro ke ofụri ofụri ikanamke akpanikọ. Ke ini Jesus ọkọbiọn̄ọrede, idụt oro ama esịn enye. (John 1:11) Ntem, Jesus ama ọdọhọ mme adaiso ido ukpono Jew ete: “Ẹyebọ mbufo Obio Ubọn̄ Abasi, ẹyak ẹnọ idụt emi edin̄wụmde mfri esie.” (Matthew 21:43) Ndifiọk “idụt emi edin̄wụmde mfri [Obio Ubọn̄ oro]” edi akpan n̄kpọ kaban̄a edinyan̄a.
11 Obufa idụt oro edi esop Christian oro ẹyetde aran, emi akamanade ke Pentecost 33 E.N. Mme akpa andibuana ke enye ekedi mme mbet Jesus ẹkedide Jew ẹmi ẹkenyịmede enye nte Edidem mmọ eke heaven. (Utom 2:5, 32-36) Nte ededi, mmọ ẹkedi mme andibuana ke obufa idụt Abasi, idịghe ke ntak emi ẹkedide mme Jew, edi ke ntak mbuọtidem ke Jesus. Ntem, obufa Israel Abasi emi ekedi n̄kpọ emi edide san̄asan̄a—idụt eke spirit. Ke ini n̄wakn̄kan ibat owo ke otu mme Jew ẹkesịnde ndinyịme Jesus, ẹma ẹnọ mbon Samaria ikot ndidi ubak obufa idụt oro ndien ekem ẹnọ mme Gentile. Ẹkekot obufa idụt emi “Israel Abasi.”—Galatia 6:16.
12, 13. Didie ke akakabade ana in̄wan̄în̄wan̄ nte ke obufa Israel ikedịghe sụk n̄ka ọwọrọde oto Ido Ukpono Mme Jew?
12 Ke Israel eset, ke ini mbon oro mîkedịghe mme Jew ẹkekabarede ẹdi mme andikpono Abasi ke ido mme Jew, mmọ ẹkenyene ndinịm Ibet Moses, ndien irenowo ẹkenyene ndiwụt emi ebe ke ndina mbobi. (Exodus 12:48, 49) Ndusụk mme Christian ẹdide Jew ẹkekere ke mbon oro mîdịghe mme Jew ke Israel Abasi ẹkpenyene ndinam kpasụk ntre. Nte ededi, Jehovah ama enyene isio isio n̄kpọ ke ekikere. Edisana spirit ama ada apostle Peter aka ufọk Cornelius owo Gentile. Ke ini Cornelius ye ubon esie ẹkenyịmede ukwọrọikọ Peter, mmọ ẹma ẹbọ edisana spirit—idem mbemiso mmọ ẹnade baptism ke mmọn̄. Emi ama owụt in̄wan̄în̄wan̄ nte ke Jehovah ama onyịme mme Gentile ẹmi nte mme andibuana ke Israel Abasi ye unana ediyom mmọ ẹnịm Ibet Moses.—Utom 10:21-48.
13 Ama ọsọn̄ ndusụk mme andinịm ke akpanikọ idem ndinyịme emi, ndien ikebịghike mme apostle ye mbiowo ẹkenyene ndineme ofụri n̄kpọ ẹmi ke Jerusalem. Otu oro ekenyenede odudu mi ama ọnọ n̄kpan̄utọn̄ ke ikọ ntiense emi okowụtde ke nde ke nde nte edisana spirit akanamde n̄kpọ ye mme andinịm ke akpanikọ oro mîkedịghe mme Jew. Edidụn̄ọde Bible ama owụt nte ke emi ekedi ndisu prọfesi eke odudu spirit. (Isaiah 55:5; Amos 9:11, 12) Ẹma ẹdisịm nnennen ubiere ẹte: Mme Christian oro mîdịghe mme Jew ikenyeneke ndinịm Ibet Moses. (Utom 15:1, 6-29) Ntem, Israel eke spirit ekenen̄ede edi obufa idụt inyụn̄ idịghe sụk n̄ka ọwọrọde oto Ido Ukpono Mme Jew.
14. Nso ke ọwọrọ James ndikot esop Christian “esien duopeba ẹmi ẹsuanade”?
14 Ke n̄kemuyo ye emi, ke ini ekewetde n̄wed ọnọ mme Christian eke akpa isua ikie oro ẹyetde aran, mbet oro James ekewet n̄wed esie ọnọ ẹsọk “esien duopeba ẹmi ẹsuanade.” (James 1:1; Ediyarade 7:3-8) Nte ededi, owo ikedemeke mme andito obufa Israel idọn̄ ke mme akpan esien. Edibahade ndọn̄ ke nsio nsio esien 12 ikodụhe ke Israel eke spirit nte okodude ke Israel eke obụk. Edi, ikọ James eke odudu spirit oro owụt nte ke enyịn Jehovah Israel Abasi ama ada itie esien 12 eke ata Israel ofụri ofụri. Edieke ata eyen Israel akakabarede edi ubak obufa idụt oro, ubon eke obụk emi enye otode—idem ọkpọkọm enye okoto esien Judah m̀mê Levi—ikenyeneke ufọn.—Galatia 3:28; Philippi 3:5, 6.
Obufa Ediomi
15, 16. (a) Didie ke Jehovah ese mme andibuana ke Israel Abasi ẹmi mîdịghe mme Jew? (b) Ke ewe isọn̄ emi ekemde ye ibet ke ẹketọn̄ọ obufa Israel?
15 Ke enyịn Jehovah, mme andibuana ke obufa idụt emi oro mîdịghe nditọ Israel ẹdi mme Jew eke spirit ọyọhọ ọyọhọ! Apostle Paul ama anam an̄wan̄a ete: “Idịghe owo emi edide Jew enyọn̄ enyọn̄ edi ata Jew; inyụn̄ idịghe enyọn̄ enyọn̄ mbobi, emi esịnede ke obụkidem, edi ata mbobi: edi ata Jew edi enyeemi edide Jew ke esịt esịt; ata mbobi onyụn̄ edi n̄kpọ ọwọn̄esịt, odu ke spirit, idụhe ke item eke ẹwetde: itoro esie inyụn̄ itoho owo, edi oto Abasi.” (Rome 2:28, 29) Ediwak mme Gentile ẹma ẹyere ikot ndidi ubak Israel Abasi, ndien n̄kpọntịbe emi ama osu prọfesi Bible. Ke uwụtn̄kpọ, prọfet Hosea ekewet ete: “Ami nyewụt mbọm ke idem enyeoro owo mîkowụtke mbọm, ndien nyedọhọ mbon oro mîdịghe ikọt mi nte: ‘Mbufo ẹdi ikọt mi’; ndien mmọ, ke n̄kan̄ mmọ, ẹyedọhọ ẹte: ‘Afo edi Abasi mi.’”—Hosea 2:23, NW; Rome 11:25, 26.
16 Edieke nditọ Israel eke spirit mîkodụhe ke idak Ibet ediomi Moses, ke ewe isọn̄ ke mmọ ẹkekabade ẹdi ubak obufa idụt? Jehovah akanam obufa ediomi ye idụt eke spirit emi ebe ke Jesus. (Mme Hebrew 9:15) Ke ini Jesus ọkọtọn̄ọde Editi n̄kpa esie, ke Nisan 14, 33 E.N., enye ama ọnọ mme anam-akpanikọ apostle esie 11 uyo ye wine onyụn̄ ọdọhọ ete ke wine oro akada aban̄a ‘iyịp ediomi.’ (Matthew 26:28; Jeremiah 31:31-34) Nte ẹtịn̄de ke mbụk Luke, Jesus ọkọdọhọ ete ke cup wine oro akada aban̄a “Obufa Ediomi.” (Luke 22:20) Ke ndisu mme ikọ Jesus, ke ini ẹken̄wan̄ade edisana spirit ẹduọk ke Pentecost ndien Israel Abasi akamanade, ẹma ẹbọ Israel eke obụk Obio Ubọn̄ oro ẹnyụn̄ ẹda ẹnọ obufa, idụt eke spirit. Utu ke Israel eke obụk, obufa idụt emi ekedi asan̄autom Abasi idahaemi, esịnede mme ntiense esie.—Isaiah 43:10, 11.
“Obufa Jerusalem”
17, 18. Nso ke ẹtịn̄ ke n̄wed Ediyarade ẹban̄a ubọn̄ emi anade ebet mme Christian oro ẹyetde aran?
17 Nso ubọn̄ ina ntem ibet mbon oro ẹnyenede ifet ndibuana ke ikot eke heaven oro! Ndien nso inem n̄kpọ ke edi ntem ndifiọk mme utịben̄kpọ oro ẹnade ẹbet mmọ! N̄wed Ediyarade ọnọ nnyịn aduai-owo idem ndise aban̄ade nte mmọ ẹdade heaven ẹnyene. Ke uwụtn̄kpọ, ke Ediyarade 4:4, nnyịn ikot ite: “Ebekpo edịp ye inan̄ ẹnyụn̄ ẹkan ebekpo [Jehovah] oro ẹkụk; ndien ke mme ebekpo oro mbiowo edịp ye inan̄ ẹtie, ẹsịne mfia ọfọn̄idem, ẹnyụn̄ ẹyara anyanya o-gold ke ibuot mmọ.” Mbiowo 24 ẹmi ẹdi mme Christian oro ẹyetde aran, ẹnamde ẹset ndien idahaemi ẹdade itie eke heaven emi Jehovah ọkọn̄wọn̄ọde ọnọ mmọ. Mme anyanya ye mme ebekpo mmọ ẹti nnyịn ẹban̄a itie ubọn̄ mmọ. Kere, n̄ko, ban̄a utịbe utịbe akwa ifet oro mmọ ẹnyenede ndinam utom n̄kanade ebekpo Jehovah!
18 Ke Ediyarade 14:1, nnyịn ifiak ikụt mmọ: “N̄kụt, ndien sese, Eyenerọn̄ ke adada ke Obot Zion, tọsịn owo ikie ye aba ye inan̄ ẹnyụn̄ ẹda ye Enye, kpa mmọ ẹmi ẹkewetde enyịn̄ Esie ye enyịn̄ Ete Esie ke ọkpọiso mmọ.” Mi ke nnyịn ikụt ibat mbon oro ẹyetde aran ẹmi ẹnyenede-nyene adan̄a—144,000. Ẹfiọk itie ubọn̄ mmọ koro mmọ ẹdade ye Edidem emi Jehovah odoride ke ebekpo, “Eyenerọn̄,” Jesus. Ndien mmọ ẹdu ke Obot Zion eke heaven. Obot Zion eke isọn̄ okodu ke Jerusalem, obio ubọn̄ Israel. Obot Zion eke heaven ada aban̄a akamba itie Jesus ye mme nsan̄a adiakpa esie, ẹmi ẹnamde Jerusalem eke heaven.—2 Chronicles 5:2; Psalm 2:6.
19, 20. (a) Ewe esop eke heaven ke mme Christian oro ẹyetde aran ẹdidi ubak? (b) Ke ufan̄ ikpehe ini ewe ke Jehovah ẹkemek mbon oro itie eyenisọn̄ mmọ edidide ke heaven?
19 Ke n̄kemuyo ye emi, ẹtịn̄ n̄ko ẹban̄a mbon oro ẹyetde aran ke ubọn̄ mmọ eke heaven nte “Obufa Jerusalem.” (Ediyarade 21:2) Jerusalem eke isọn̄ ekedi “obio akwa Edidem” ye n̄ko ebiet emi temple odude. (Matthew 5:35) Obufa Jerusalem eke heaven edi ubọn̄ ubọn̄ esop Obio Ubọn̄ emi ebede ke enye akwa Andikara, Jehovah, ye Edidem oro enye emekde, Jesus, ẹkara kemi emi ẹnyụn̄ ẹnamde utom oku nte nti edidiọn̄ ẹfiọrọde ẹto ebekpo Jehovah ndida n̄kọk ubonowo udọn̄ọ. (Ediyarade 21:10, 11; 22:1-5) Ke n̄kukụt en̄wen John okop nte ẹtịn̄de ẹban̄a mme anam-akpanikọ Christian oro ẹyetde aran, ẹmi ẹnamde ẹset nte ‘n̄wanndọ Eyenerọn̄.’ Nso edemede-owo udọn̄ uwụtn̄kpọ ke emi ọnọ ntem aban̄a n̄kpet n̄kpet itie ebuana emi mmọ ẹdidarade ye Jesus ye unyịme unyịme nsụkibuot mmọ nnọ enye! Kere ban̄a idara oro edidude ke heaven ke ini akpatre ke otu mmọ ọbọde utịp eke heaven esie ke akpatre. Idahaemi, ke akpatre, “ndọ Eyenerọn̄” ekeme ndida itie! Ubọn̄ ubọn̄ esop eke heaven oro eyekem ibat adan̄aoro.—Ediyarade 19:6-8.
20 Ih, mme utịbe utịbe edidiọn̄ ke ẹna ẹbet mbon oro apostle Paul ọkọdọhọde ete: “Obio nnyịn ododu ke heaven.” (Philippi 3:20) Ke se ikperede ndisịm tọsịn isua iba, Jehovah ke emek nditọ esie eke spirit onyụn̄ otịm mmọ idem eben̄e edida heaven nnyene. Nte ekemde ye ofụri uyarade ẹmi ẹdude, utom edimek ye editịm idem emi ekpere ndikụre. Edi n̄kpọ en̄wen ekenyene nditiene, nte ẹkeyararede ẹnọ John ke n̄kukụt esie oro ẹwetde ke Ediyarade ibuot 7. Ntre kemi, oyom nnyịn inọ ntịn̄enyịn ke otu mme Christian en̄wen, ndien nnyịn iyeneme iban̄a otu emi ke udiana ibuotikọ.
Nte Afo Emeti?
◻ Nso idi nsio nsio utom spirit ke idem mbon oro ẹdidade heaven ẹnyene?
◻ Nso n̄kpet n̄kpet itie ebuana ke mbon oro ẹyetde aran ẹnyene ye Jehovah? ye Jesus?
◻ Didie ke ẹtịn̄ ẹban̄a esop mme Christian oro ẹyetde aran ke Bible?
◻ Ke ewe isọn̄ emi ekemde ye ibet ke ẹketọn̄ọ Israel Abasi?
◻ Mme ewe ifetutom eke heaven ẹna ẹbet mme Christian oro ẹyetde aran?
[Ndise ke page 10]
Ke ufan̄ ikpehe ini ekperede ndisịm tọsịn isua iba, Jehovah ama emek mbon oro ẹdikarade ke Obio Ubọn̄ heaven