Jehovah—Abasi Emi Ọnọde Ukpep
“Abasi eyekpep mmọ kpukpru n̄kpọ.”—JOHN 6:45.
1. M̀mọ̀n̄ ke Jesus anam mme utịben̄kpọ, ndien nso ke enye anam do idahaemi?
NDONDO emi ke Jesus Christ anam utịben̄kpọ ndien ẹkụt idahaemi nte ekpepde n̄kpọ ke synagogue ke Capernaum, ekpere Inyan̄ Galilee. (John 6:1-21, 59) Ediwak owo inịmke ke akpanikọ ke ini enye ọdọhọde ete: “Nto ke heaven nsụhọde ndi.” Mmọ ẹkụni ẹte: “Nte emi idịghe Jesus, eyen Joseph, emi nnyịn idiọn̄ọde ete ye eka Esie? Enye anam didie ọdọhọ ndien ete, N̄koto ke heaven nsụhọde?” (John 6:38, 42) Ke asuade ọnọ mmọ, Jesus ọdọhọ ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi: ndien nyenam enye eset ke akpatre usen.”—John 6:44.
2. Nso isọn̄ idu ndinịm un̄wọn̄ọ Jesus aban̄ade ediset ke n̄kpa ke akpanikọ?
2 Nso utịbe utịbe un̄wọn̄ọ ke emi edi ntem—ndidi se ẹnamde eset ke akpatre usen, ke ini Obio Ubọn̄ Abasi akarade! Nnyịn imekeme ndinịm un̄wọn̄ọ emi ke akpanikọ sia edide Ete, kpa Jehovah Abasi, ọn̄wọn̄ọ. (Job 14:13-15; Isaiah 26:19) Ke akpanikọ, Jehovah, emi ekpepde ete ke mme akpan̄kpa ẹyeset, edi “n̄kponn̄kan andikpep oro akande kpukpru mme andikpep.” (Job 36:22, Today’s English Version) Ke owụkde ntịn̄enyịn ke ukpepn̄kpọ Ete, Jesus ndien ọdọhọ ete: “Ẹma ẹwet ke mme prọfet ẹte, Abasi eyekpep mmọ kpukpru n̄kpọ.”—John 6:45.
3. Mme mbụme ewe ke nnyịn idikere iban̄a?
3 Ke akpanikọ, edidi ifet ndidu ke otu mmọ oro emi prọfet Isaiah ekewetde ete: “Jehovah eyenyụn̄ eteme kpukpru nditọ fo.” (Isaiah 54:13) Nte ẹkeme ndikpep nnyịn? Mmanie ẹtie nte nditọ ẹnọ enye ẹkenyụn̄ ẹbọ mme ukpepn̄kpọ esie? Nso idi mme akpan ukpepn̄kpọ Jehovah oro anade nnyịn idiọn̄ọ inyụn̄ inam man ibọ edidiọn̄ esie? Didie ke Jehovah ọkọnọ ukpep ke ini edem, ndien nte enye ọnọ ukpep ke ukem usụn̄ oro mfịn? Mmọemi ẹdi mme mbụme oro nnyịn idikerede iban̄a.
Ete, Andikpep, Ebe
4. Mmanie ẹkedi akpa ke otu nditọ Jehovah ndibọ ukpep esie?
4 Jehovah ekebem iso edi Ete ye Andikpep ke ini enye okobotde ikpọn̄îkpọn̄ edibon Eyen esie, kpa Jesus emi okodude uwem mbemsio edide owo. Ẹkot enyeemi “Ikọ” koro enye edi Akpan Etịn̄ikọ ke ibuot Jehovah. (John 1:1, 14; 3:16) Ikọ okodu “[Ete] ke n̄kan̄ nte etubom anamutom” anam utom, ndien enye ama otịm ekpep n̄kpọ oto ukpepn̄kpọ Ete esie. (Mme N̄ke 8:22, 30, NW) Ke akpanikọ, enye ama akabade edi Isụn̄utom, m̀mê n̄kpọutom, emi ebede ke enye Ete obot kpukpru n̄kpọ eken, esịnede “nditọ Abasi” ẹdide spirit. Anaedi mmọ ẹkekop idatesịt didie ntem ndidi se Abasi ọnọde ukpep! (Job 1:6; 2:1; 38:7; Colossae 1:15-17) Ekem, ẹma ẹbot akpa owo, Adam. Enye n̄ko ekedi “eyen Abasi,” ndien Bible ayarade ete ke Jehovah ama eteme enye.—Luke 3:38; Genesis 2:7, 16, 17.
5. Nso ọsọn̄urua ifet ke Adam akataba, edi mmanie ke Jehovah ọkọnọ ukpep, ndien ntak-a?
5 Ke mfụhọ, Adam, ebede ke enye ndikokoi nsọn̄ ibuot, ama ataba ifet edikaiso ndi eyen Abasi. Ke ntre, mme andito ubon esie ikemeke ndidọhọ ke imenyene itie ebuana edidi nditọ Abasi ke ntak emana kpọt. Edi, Jehovah ama ọnọ mme anana mfọnmma owo oro ẹyomde ndausụn̄ ẹto enye, ukpep. Ke uwụtn̄kpọ, Noah ama owụt ke imọ ikedi ‘edinen owo’ emi ‘akasan̄ade ye Abasi,’ ndien ke ntre Jehovah ama ọnọ Noah ukpep. (Genesis 6:9, 13–Ge 6:13 esịm 7:5) Ebede ke nsụkibuot esie, Abraham ama owụt ke imọ ikedi “Ufan Abasi,” ndien ke ntre Jehovah ama ọnọ enye n̄ko ukpep.—James 2:23; Genesis 12:1-4; 15:1-8; 22:1, 2.
6. Mmanie ke Jehovah ekedibat nte “eyen” esie, ndien nso utọ andikpep ke enye ekedi ọnọ mmọ?
6 Ke ata ukperedem, ke eyo Moses, Jehovah ama odụk itie ebuana ediomi ye idụt Israel. Nte utịp, idụt oro ama akabade edi ndimek ikọt esie ndien ẹkese nte “eyen” esie. Abasi ọkọdọhọ ete: “Israel edi eyen mi.” (Exodus 4:22, 23; 19:3-6; Deuteronomy 14:1, 2) Ọkọn̄ọde ke itie ebuana ediomi oro, nditọ Israel ẹma ẹkeme nditịn̄, nte prọfet Isaiah ekewetde, ẹte: “Afo, O Jehovah, edi ete nnyịn.” (Isaiah 63:16) Jehovah ama obiom mbiomo esie nte ete onyụn̄ ọnọ nditọ esie, Israel, ukpep ke ima ima usụn̄. (Psalm 71:17; Isaiah 48:17, 18) Ke akpanikọ, ke ini mmọ mîkanamke akpanikọ, enye ke mbọm ama ekpe ye mmọ ete: “Mbufo nditọ mfiakedem ẹfiak edem.”—Jeremiah 3:14.
7. Nso itie ebuana ke Israel ekenyene ye Jehovah?
7 Nte utịp itie ebuana ediomi emi ye Israel, Jehovah n̄ko ke ndamban̄a usụn̄ ama akabade edi Ebe idụt oro, ndien enye ama akabade edi ndamban̄a n̄wan esie. Prọfet Isaiah ekewet aban̄a enye ete: “Andibot fi [edi] uberi; Jehovah mme udịm edi enyịn̄ esie.” (Isaiah 54:5; Jeremiah 31:32) Okposụkedi Jehovah akanamde utom esie nte Ebe ke ukpono ukpono usụn̄, idụt Israel ama akabade edi n̄wan oro mînamke akpanikọ. Jehovah ọkọdọhọ ete: “Kpa nte n̄wan abian̄ade ebe esie ọkpọn̄ enye, kpasụk ntre ke mbufo, O ufọk Israel, ẹbian̄a mi.” (Jeremiah 3:20) Jehovah ama akaiso ndikpe ye nditọ n̄wan esie oro mîkanamke akpanikọ; enye ama akaiso ndidi “Akwa Anditeme” mmọ.—Isaiah 30:20, NW; 2 Chronicles 36:15.
8. Okposụkedi Jehovah ekesịnde Israel nte idụt, nso mbiet ndamban̄a n̄wan ke enye enyene?
8 Ke ini Israel ekesịnde onyụn̄ owotde Eyen Esie, Jesus Christ, Abasi ama esịn enye ke akpatre. Ntre idụt mme Jew oro ikedịghe aba ndamban̄a n̄wan inọ enye, m̀mê enye ndidi Ete ye Andikpep nditọ nsọn̄ibuot esie. (Matthew 23:37, 38) Nte ededi, Israel ekedi mbiet, m̀mê ndamban̄a, n̄wan kpọt. Apostle Paul ama okot oto Isaiah 54:1, emi etịn̄de aban̄a “ada” emi okpụhọde onyụn̄ edide isio ye ‘n̄wan owo,’ kpa idụt Israel eke obụk. Paul ayarade ete ke mme Christian oro ẹyetde aran ẹdi nditọ “ada” oro, emi enye okotde “Jerusalem emi odude ke enyọn̄.” Esop Abasi eke heaven eke mme edibotn̄kpọ ẹdide spirit anam mbiet ndamban̄a n̄wan emi.—Galatia 4:26, 27.
9. (a) Jesus eketịn̄ aban̄a mmanie ke ini enye eketịn̄de aban̄a ‘nditọ fo oro Jehovah ọnọde ukpep’? (b) Ke nso isọn̄ ke mme owo ẹkabade ẹdi nditọ Abasi eke spirit?
9 Ntem, ke synagogue eke Capernaum, ke ini Jesus okokotde oto prọfesi Isaiah: “Jehovah eyenyụn̄ eteme kpukpru nditọ fo,” enye eketịn̄ aban̄a mmọ oro ẹdikabarede ẹdi “nditọ” “Jerusalem emi odude ke enyọn̄,” kpa esop Abasi mbiet-n̄wan eke heaven. Ebede ke ndinyịme ukpepn̄kpọ andida ke ibuot Abasi otode heaven, Jesus Christ, mme Jew oro ẹkekpan̄de utọn̄ ẹma ẹkeme ndikabade ndi nditọ-n̄wan Abasi eke heaven emi ke akpa ekedide ada ẹnyụn̄ ẹnam “edisana obio,” kpa “Israel Abasi” eke spirit. (1 Peter 2:9, 10; Galatia 6:16) Ke anamde akwa ifet emi Jesus akanamde odu ọnọ edikabade ndi nditọ Abasi eke spirit an̄wan̄a, apostle John ama ewet ete: “Enye ekedi ke ebiet Esiemmọ, edi mmọemi ẹdide iman Esiemmọ idarake Enye. Edi, kpukpru owo eke ẹdarade Enye, Enye ọnọ mmọ unen ndikabade ndi nditọ Abasi, kpa mmọemi ẹbuọtde idem ke enyịn̄ Esie.”—John 1:11, 12.
Mme Akpan Ukpepn̄kpọ Jehovah
10. Ke ndondo oro ẹkesọn̄de ibuot ke Eden, nso ke Jehovah ekekpep aban̄a “mfri,” ndien anie ke Mfri emi edi?
10 Jehovah, nte ima ima Ete, asian nditọ esie mme uduak esie. Ntem, ke ini ọsọn̄ibuot angel akatapde akpa owo iba oro ete ẹsọn̄ ibuot, ndondo oro Jehovah ama etịn̄ se enye edinamde man ọyọhọ uduak esie ndinam isọn̄ edi paradise. Enye ama ọdọhọ ete ke imọ iyesịn usua ke ufọt “akani urụkikọt,” emi edide Satan kpa Devil, “ye n̄wan.” Ekem enye ama anam an̄wan̄a nte ke “mfri” n̄wan eyenuak Satan idiọk idiọk, ‘ke ibuot.’ (Genesis 3:1-6, 15, NW; Ediyarade 12:9; 20:9, 10) Nte nnyịn ima ikokụt, n̄wan oro—emi ke ukperedem ẹkedide ẹdidiọn̄ọ nte “Jerusalem emi odude ke enyọn̄”—edi esop Abasi eke heaven eke mme edibotn̄kpọ ẹdide spirit. Edi anie edi “mfri” esie? Enye edi Eyen Abasi, Jesus Christ, enyeemi ẹkesiode ke heaven ẹdọn̄ ye enyeemi ke akpatre edisobode Satan.—Galatia 4:4; Mme Hebrew 2:14; 1 John 3:8.
11, 12. Didie ke Jehovah akatat akpan ukpepn̄kpọ esie aban̄ade “mfri” oro?
11 Jehovah ama atat akpan ukpepn̄kpọ emi aban̄ade “mfri” oro ke ini enye ọkọn̄wọn̄ọde ọnọ Abraham ete: “Nyenyụn̄ nnam ubon [mfri,” NW] fo ẹwak etieti nte ntantaọfiọn̄ enyọn̄ . . . Kpukpru mme idụt ke ererimbot ẹyenyụn̄ ẹkụt mfọn eke otode ke ubon fo.” (Genesis 22:17, 18) Jehovah ama ada apostle Paul anam an̄wan̄a nte ke Jesus Christ edi Mfri Abraham oro ẹken̄wọn̄ọde edi nte ke mbon en̄wen n̄ko ẹyekabade ẹdi ubak “mfri” oro. Paul ekewet ete: “Edieke mbufo ẹdide eke Christ, mbufo ẹnyụn̄ ẹdi nditọ [“mfri,” NW] Abraham; nte un̄wọn̄ọ edide.”—Galatia 3:16, 29.
12 Jehovah ama ayarade n̄ko ete ke Christ, kpa Mfri oro, edito ubon ubọn̄ Judah ye nte ke “mme idụt ẹyenyụn̄ ẹkop ẹnọ enye.” (Genesis 49:10) Kaban̄a Edidem David eke esien Judah, Jehovah ọkọn̄wọn̄ọ ete: “Nyenyụn̄ nnịm ubon esie ke nsinsi, ye ebekpo esie nte mme usen heaven. Ubon esie eyedu ke nsinsi; ebekpo esie eyebịghi nte utịn ke iso mi.” (Psalm 89:3, 4, 29, 36) Ke ini angel Gabriel ọkọtọtde emana Jesus, enye ama anam an̄wan̄a ete ke eyen oro ekedi Andikara oro Abasi emekde, kpa Mfri David. Gabriel ọkọdọhọ ete: “Enye eyekpon, eyenyụn̄ ekere Eyen Andikon̄-n̄kan; Jehovah Abasi eyenyụn̄ ọnọ Enye ebekpo ete Esie David . . . Ubọn̄ Esie idinyụn̄ ikụreke.”—Luke 1:32, 33; Isaiah 9:6, 7; Daniel 7:13, 14.
13. Man ibọ edidiọn̄ Jehovah, didie ke ana nnyịn inam n̄kpọ iban̄a ukpepn̄kpọ esie?
13 Man ibọ edidiọn̄ Jehovah, ana nnyịn ifiọk inyụn̄ ida akpan ukpepn̄kpọ oro aban̄ade Obio Ubọn̄ Abasi isịn ke edinam. Ana nnyịn inịm ke akpanikọ nte ke Jesus okoto ke heaven osụhọde, nte ke enye edi Edidem oro Abasi emekde—kpa ubọn̄ ubọn̄ Mfri oro edisede aban̄a edifiak n̄wụk Paradise ke isọn̄—ye nte ke enye eyenam mme akpan̄kpa ẹset. (Luke 23:42, 43; John 18:33-37) Ke Capernaum ke ini Jesus eketịn̄de aban̄a edinam mme akpan̄kpa ẹset, akpakana ana in̄wan̄în̄wan̄ ọnọ mme Jew nte ke enye eketịn̄ akpanikọ. Kamse, urua ifan̄ kpọt ẹmi ẹkebede, eyedi kpa do ke Capernaum, enye ama anam eyenan̄wan ọbọn̄ synagogue emi ekedide isua 12 ke emana eset! (Luke 8:49-56) Ke akpanikọ nnyịn n̄ko imenyene kpukpru ntak ndinịm ke akpanikọ nnyụn̄ ndu uwem ke n̄kemuyo ye ukpepn̄kpọ Jehovah aban̄ade Obio Ubọn̄ esie oro ọnọde idotenyịn!
14, 15. (a) Obio Ubọn̄ Jehovah edi akpan n̄kpọ adan̄a didie ọnọ Jesus? (b) Oyom nso aban̄ade Obio Ubọn̄ Jehovah an̄wan̄a nnyịn inyụn̄ ikeme ndinam an̄wan̄a?
14 Jesus ama ayak uwem esie eke isọn̄ esịn ke ndikpep owo n̄kpọ mban̄a Obio Ubọn̄ Jehovah. Enye akanam oro edi ibuotikọ utom ukwọrọikọ esie, ndien enye ama akam eteme mme anditiene enye ete ẹbọn̄ akam ẹben̄e enye. (Matthew 6:9, 10; Luke 4:43) Mme Jew eke obụk ẹkedu ke udịm ndidi “nditọ Obio Ubọn̄,” edi ke ntak unana mbuọtidem, ata ediwak mmọ ẹma ẹtaba ifet oro. (Matthew 8:12; 21:43) Jesus ama ayarade ete ke edi “ekpri otuerọn̄” kpọt ẹbọ ifet edikabade ndi “nditọ Obio Ubọn̄.” “Nditọ” ẹmi ẹkabade ẹdi ‘mme andisan̄a ye Christ nnyene udeme’ ke Obio Ubọn̄ esie eke heaven.—Luke 12:32; Matthew 13:38; Rome 8:14-17; James 2:5.
15 Nsan̄a mme andida obio ubọn̄ nnyene ifan̄ ke Christ edida ika heaven man ẹkekara isọn̄ ye enye? Owo 144,000 kpọt, nte Bible ọdọhọde. (John 14:2, 3; 2 Timothy 2:12; Ediyarade 5:10; 14:1-3; 20:4) Edi Jesus ama ọdọhọ ke imenyene “mme erọn̄ en̄wen,” emi ẹdidide mme andidu ke idak ukara Obio Ubọn̄ oro ke isọn̄. Mmọemi ẹyenyene mfọnmma nsọn̄idem ye emem ke nsinsi ke paradise isọn̄. (John 10:16; Psalm 37:29; Ediyarade 21:3, 4) Oyom ukpepn̄kpọ Jehovah aban̄ade Obio Ubọn̄ an̄wan̄a nnyịn inyụn̄ ikeme ndinam enye an̄wan̄a.
16. Ewe akpan ukpepn̄kpọ Jehovah ke oyom nnyịn ikpep inyụn̄ inam?
16 Apostle Paul ama ọdiọn̄ọ akpan ukpepn̄kpọ Jehovah efen. Enye ọkọdọhọ ete: “Abasi ke Idemesie ke ekpep mbufo ndima kiet eken.” (1 Thessalonica 4:9) Man inem Jehovah esịt, oyom nnyịn iwụt utọ ima oro. Bible ọdọhọ ete: “Abasi edi ima,” ndien ana nnyịn ikpebe uwụtn̄kpọ esie ke ndiwụt ima. (1 John 4:8; Ephesus 5:1, 2) Ke mfụhọ, ata ediwak owo ẹmekpu idiọk idiọk ndikpep ndima ekemmọ owo nte Abasi ekpepde nnyịn ete inam. Nso kaban̄a nnyịn? Nte nnyịn imanam n̄kpọ iban̄a ukpepn̄kpọ Jehovah emi?
17. Edu mmanie ke nnyịn ikpekpebe?
17 Edi akpan n̄kpọ nte nnyịn ikpan̄ utọn̄ inọ kpukpru ukpepn̄kpọ Jehovah. Akpakam edu nnyịn edi eke mme andiwet psalm eke Bible ẹmi ẹkewetde ẹte: “Wụt mi usụn̄ fo, O Jehovah; teme mi ido fo. Nam mi nsan̄a ke akpanikọ fo, nyụn̄ teme mi.” “Kpep mi ewụhọ fo. Kpep mi mfọn ibuot ye ifiọk . . . Kpep mi mme ikpe fo.” (Psalm 25:4, 5; 119:12, 66, 108) Edieke ekikere fo ẹdide ukem nte eke mme andiwet psalm oro, afo emekeme ndisịne ke akwa udịmowo oro Jehovah ọnọde ukpep.
Akwa Otuowo Ẹdide Mmọemi Ẹnọde Ukpep
18. Nso ke prọfet Isaiah ekebem iso etịn̄ nte editịbede ke eyo nnyịn?
18 Prọfet Isaiah ama ebemiso etịn̄ se iditịbede ke eyo nnyịn ete: “Ama ekem ke utịt eyo, obot ufọk Jehovah eyewụhọ ke enyọn̄ ikpọ obot . . . Ndien ediwak obio ẹyeka ẹkedọhọ, ẹte, Mbufo ẹdi, nnyịn idọk ke obot Jehovah, ke ufọk Abasi Jacob; ndien enye eyekpep nnyịn ido esiemmọ.” (Sịghisịghi ubọkn̄wed edi eke nnyịn.) (Isaiah 2:2, 3; Micah 4:2) Mmanie ẹdi mmọemi Jehovah ọnọde ukpep mi?
19. Mmanie mfịn ẹsịne ke otu mmọ oro Jehovah ọnọde ukpep?
19 Mmọemi ẹsịne mmọ en̄wen ke ẹsiode mmọ oro ẹdikarade ke heaven ye Christ ẹfep. Nte ima ikebemiso ikụt, Jesus ọkọdọhọ ke imenyene “mme erọn̄ en̄wen”—mme andidu ke idak Obio Ubọn̄ ke isọn̄—ke adianade ye “ekpri otuerọn̄” nsan̄a mme andida Obio Ubọn̄ nnyene. (John 10:16; Luke 12:32) “Akwa otuowo,” oro ẹbọhọde “akwa ukụt,” ẹdu ke otu mme erọn̄ en̄wen, ndien mmọ ẹnyene idaha oro ẹnyịmede ke iso Jehovah ke isọn̄ mbuọtidem mmọ ke iyịp Jesus oro ẹkeduọkde. (Ediyarade 7:9, 14) Idem okposụkedi mme erọn̄ en̄wen mîsịneke nnennen nnennen ke otu “nditọ” oro ẹketịn̄de ẹban̄a ke Isaiah 54:13, ẹdiọn̄ mmọ ke Jehovah ndinọ mmọ ukpep. Ke ntre, mmọ nte odotde ẹkot Abasi “Ete” koro enye, ke nditịm ntịn̄, edidi Eteete mmọ ebe ke “Nsinsi Ete,” kpa Jesus Christ.—Matthew 6:9; Isaiah 9:6.
Nte Jehovah Ọnọde Ukpep
20. Ke mme usụn̄ ewe ke Jehovah ọnọ ukpep?
20 Jehovah ọnọ ukpep ke ediwak usụn̄. Ke uwụtn̄kpọ, enye anam ntre ebe ke mme edibotn̄kpọ esie, emi ẹtiede ntiense ẹban̄a edidu esie ye akwa ọniọn̄ esie. (Job 12:7-9; Psalm 19:1, 2; Rome 1:20) Ke adianade do, enye ọnọ ukpep ebe ke nnennen edinyene nneme, nte enye akanamde ke nditeme Jesus mbemiso enye amanade nte owo. Ukem ntre, ke idaha ita oro ẹwetde ẹnịm, enye ama etie ke heaven etịn̄ ikọ nnennen nnennen ọnọ mme owo ke isọn̄.—Matthew 3:17; 17:5; John 12:28.
21. Ewe angel ke Jehovah akada akpan akpan nte andida ke ibuot esie, edi nnyịn isan̄a didie ifiọk ke ẹma ẹda mmọ en̄wen?
21 Jehovah ada n̄ko mme andida ke ibuot oro ẹdide mme angel ọnọ ukpep, esịnede Akpan esie, kpa “Ikọ.” (John 1:1-3) Okposụkedi Jehovah ekpekekemede nditịn̄ ikọ nnennen nnennen ye mfọnmma eyen esie edide owo, Adam, ke in̄wan̄ Eden, anaedi enye akada Jesus mbemiso amanade nte owo nditịn̄ ikọ ke ibuot Esie. (Genesis 2:16, 17) Anaedi enyeemi ekedi “angel Abasi emi ebemde mme udịm Israel iso” ye enyeemi Jehovah okowụkde ete: “Kop uyo esie.” (Exodus 14:19; 23:20, 21) Eyịghe idụhe nte ke Jesus mbemiso amanade nte owo ekedi n̄ko “etubom mbonekọn̄ Jehovah” emi okowụtde Joshua idem man ọsọn̄ọ enye idem. (Joshua 5:14, 15) Jehovah ama ada mme angel efen n̄ko ndinọ mme ukpepn̄kpọ esie, utọ nte mmọ oro enye akadade ọnọ Moses Ibet esie.—Exodus 20:1; Galatia 3:19; Mme Hebrew 2:2, 3.
22. (a) Mmanie ke isọn̄ ke Jehovah ada ndinọ ukpep? (b) Nso idi akpan usụn̄ emi Jehovah etemede mme owo mfịn?
22 Ke adianade do, Jehovah Abasi esida mme andida ke ibuot ẹdide owo ndinọ ukpep. Mme ete ye eka ke Israel ẹkenyene ndinọ nditọ mmọ ukpep; mme prọfet, mme oku, mbọn̄, ye mme Levite ẹma ẹkpep idụt oro Ibet Jehovah. (Deuteronomy 11:18-21; 1 Samuel 12:20-25; 2 Chronicles 17:7-9) Jesus ekedi akpan Anditịn̄ ikọ ke ibuot Abasi ke isọn̄. (Mme Hebrew 1:1, 2) Jesus ama esitịn̄ ediwak ini ete ke se imọ ikekpepde ekedi nnennen se imọ ikekpepde ito Ete, ntre, ke nditịm ntịn̄, Jehovah ọkọnọ mme andikpan̄ utọn̄ nnọ enye ukpep. (John 7:16; 8:28; 12:49; 14:9, 10) Jehovah ama anam ẹwet mme ikọ esie, ndien ke eyo nnyịn enye ekpep mme owo n̄kpọ akpan akpan ebe ke N̄wed Abasi eke odudu spirit ẹmi.—Rome 15:4; 2 Timothy 3:16.
23. Mme mbụme ewe ke ẹdikere ẹban̄a ke udiana ibuotikọ?
23 Nnyịn idu uwem ke akpan ini, sia N̄wed Abasi ọn̄wọn̄ọ ete ‘ke utịt eyo [emi nnyịn idude uwem ke esịt], ẹyeteme ediwak owo ẹban̄a mme usụn̄ Jehovah.’ (Isaiah 2:2, 3) Didie ke ẹnọ item emi? Nso ke ana nnyịn inam man ibọ ufọn ito, inyụn̄ ibuana ke, akwa ndutịm unọ ukpep Jehovah oro odude ke edinam idahaemi? Nnyịn iyekere iban̄a mme utọ mbụme oro ke udiana ibuotikọ.
Didie ke Afo Ọkpọbọrọ?
◻ Didie ke Jehovah ekedidi Ete, Andikpep, ye Ebe?
◻ Nso ke Jehovah ekpep aban̄a “mfri”?
◻ Ewe akpan ukpepn̄kpọ oro Abasi ọnọde ke ana inanam?
◻ Didie ke Jehovah ọnọ ukpep?
[Ndise ke page 10]
Ndinam eyenan̄wan Jairus eset ama ọnọ isọn̄ ndinịm un̄wọn̄ọ Jesus kaban̄a ediset ke n̄kpa