Edinam Bible An̄wan̄a—Ke Odudu Anie?
UKABADE kiet ẹnọde ikọ oro “edinam an̄wan̄a” edi “ndikere ke un̄wana ọkpọkpọ edinịm ke akpanikọ, ubiere, m̀mê idaha.” (Webster’s Ninth New Collegiate Dictionary) Ntem, owo ndinam n̄kpọ ekededi an̄wan̄a esiwak ndikọn̄ọ ke idaha esie ke uwem, ifiọkn̄wed, ye nte ẹkebọkde enye.
Nte ededi, nso kaban̄a edinam Bible an̄wan̄a? Nte nnyịn imenyene unen ndinam mme ufan̄ikọ Bible ẹn̄wan̄a nte ekemde ye “edinịm ke akpanikọ, ubiere, m̀mê idaha” eke idem nnyịn? Nte ido edide, ata ediwak nditọ ukpepn̄kpọ Bible ẹsidọhọ ke mmimọ inamke ntre edi nte ke Abasi esinọ mmimọ ndausụn̄.
Uwụtn̄kpọ kiet edi se ẹtịn̄de ke ikọ idakisọn̄ John 1:1 ke A New Version of the Four Gospels, emi John Lingard okosiode ke 1836 ke idak enyịn̄ oro “Owo Catholic” emi mîdịghe ata enyịn̄. Enye ọdọhọ ete: “Mme owo ke kpukpru ndutịm ukpepn̄kpọ ido ukpono ẹnịm ke mmimọ imenyene nsọn̄ọ mme ọkpọkpọ ekikere mmimọ ke N̄wed Abasi: koro, ke akpanikọ, idịghe N̄wed Abasi asian mmọ, edi mmọ ẹkabade se usem N̄wed Abasi ọwọrọde ke idemmọ.”
Okposụkedi ikọ emi enende, nso ikedi uduak andiwet? Ikọ esie ekedi ndida nsọn̄ọ nte enye akanamde ufan̄ikọ oro an̄wan̄a, emi enye akakabarede ntem: “‘Ikọ’ okodu ke editọn̄ọ; ndien ‘ikọ’ okodu ye Abasi; ndien ‘ikọ’ ekedi Abasi,” orụk edikabade eke mme ekpep ukpepn̄kpọ Abasi-Ita-ke-Kiet.
Nso ikonụk andiwet ndikabade John 1:1 man ọnọ ukpepn̄kpọ Abasi-Ita-ke-Kiet ibetedem? Ndi “N̄wed Abasi asian” enye ndinam ntre? Oro ikemeke nditịbe, koro idụhe ebiet ndomokiet ke Bible oro ẹkụtde ukpepn̄kpọ Abasi-Ita-ke-Kiet. Tịm fiọk se The New Encyclopædia Britannica etịn̄de ke n̄kpọ emi: “Ikọ oro Abasi-Ita-ke-Kiet m̀mê in̄wan̄în̄wan̄ ukpepn̄kpọ ntre idụhe ke Obufa Testament.” Ke adianade do, E. Washburn Hopkins, prọfesọ Ufọkn̄wed Ntaifiọk Yale, ọkọdọhọ ete: “Jesus ye Paul nte an̄wan̄ade ikọfiọkke n̄kpọ ndomokiet iban̄a ukpepn̄kpọ abasi-ita-ke-kiet; . . . mmọ itịn̄ke n̄kpọ ndomokiet iban̄a enye.”
Nso, ndien, ke nnyịn ikeme ndibiere mban̄a mbon oro ẹnamde John 1:1 m̀mê ufan̄ikọ Bible en̄wen an̄wan̄a nte ukpepn̄kpọ Abasi-Ita-ke-Kiet? Ke ekikere Ete Lingard, “idịghe N̄wed Abasi asian mmọ, edi mmọ ẹkabade se usem N̄wed Abasi ọwọrọde ke idemmọ.”
Ke inemesịt, nnyịn imenyene Ikọ Abasi ndida nnyịn usụn̄ ke n̄kpọ emi. “Mbufo [ẹmefiọk] ke akpa itie,” ntem ke apostle Peter ọkọdọhọ, “ẹte, baba ikọ prophet kiet ke N̄wed Abasi idịghe se owo ekemede ndisiak ke usụn̄ esie mmọ. Koro akanam baba ikọ prophet itoho ke uduak owo: edi mme owo ẹtịn̄ ikọ eke otode Abasi, nte Edisana Spirit esịnde mmọ ẹtịn̄.”—2 Peter 1:20, 21.