Mbiowo, Ẹkpe Edinen Ikpe

“Mbufo ẹkop ikọ nditọete mbufo, ẹnyụn̄ ẹkpe edinen ikpe.”—DEUTERONOMY 1:16.

1. Ke n̄kpọ aban̄ade ubiereikpe, ewe ediyak odudu nnọ ada itie, ndien nso ke emi oyom oto mme ebiereikpe ẹdide owo?

NTE Akakan Ebiereikpe, Jehovah amayak odudu ukpeikpe ọnọ Eyen esie. (John 5:27) N̄ko, nte Ibuot esop Christian, Christ ada otu asan̄autom emi anamde akpanikọ, onyụn̄ enyenede ọniọn̄ ye Otu Ukara esie ke ndimek mbiowo, ẹmi ke ndusụk ini esinade ẹnam n̄kpọ nte mme ebiereikpe. (Matthew 24:45-47; 1 Corinth 5:12, 13; Titus 1:5, 9) Nte mme ebiereikpe ke ukpụhọ, mmọemi ẹnyene mbiomo nditiene uwụtn̄kpọ Mme Ebiereikpe eke heaven, kpa Jehovah ye Christ Jesus, ketket.

Christ—Ebiereikpe Oro Odotde Ẹkpebe

2, 3. (a) Ewe prọfesi aban̄ade Messiah ayarade mme edu Christ nte Ebiereikpe? (b) Mme akpan n̄kpọ ewe akpan akpan ẹdot ẹtịm ẹfiọk?

² Kaban̄a Christ nte Ebiereikpe, ẹkewet ke ikọ prọfesi ẹte: “Spirit Jehovah eyedoro enye ke idem, spirit eti ibuot ye asian, spirit item ye odudu, spirit ifiọk ye uten̄e Jehovah: ndien uten̄e Jehovah eyenem enye esịt: ndien enye idikpehe ikpe nte esede ke enyịn, idinyụn̄ ibiereke ikọ nte okopde ke utọn̄: edi eyekpe ikpe mme ubuene esịn ke edinen, onyụn̄ ebiere ikọ nte enende ọnọ sụn̄sụn̄ mbio isọn̄.”—Isaiah 11:2-4.

³ Tịmfiọk ke prọfesi oro mme edu ẹmi ẹnamde Christ ekeme ‘ndikpe ikpe nnọ ererimbot ke edinen ido.’ (Utom 17:31) Enye ekpe ikpe nte ekemde ye spirit Jehovah, ọniọn̄, asian, item, ye ifiọk Abasi. Tịmfiọk, n̄ko, nte ke enye ekpe ikpe ke uten̄e Jehovah. Ntem, “itie ikpe Christ” ada ke ibuot “itie ikpe Abasi.” (2 Corinth 5:10; Rome 14:10) Enye odu ke ntịn̄enyịn ndikpe ikọ ke usụn̄ oro Abasi ekpede mmọ. (John 8:16) Enye ikpehe ikpe nte okụtde ke enyịn m̀mê nte okopde ke utọn̄. Enye ekpe ikpe nte enende ke ibuot mme sụn̄sụn̄ owo ye mme ubuene. Nso utịbe utịbe Ebiereikpe! Ndien nso utịbe utịbe uwụtn̄kpọ ke emi edi ntem ọnọ mme anana-mfọnmma owo ẹmi ẹmekde man ẹnam n̄kpọ ke itie ikpe mfịn!

Mme Ebiereikpe eke Isọn̄

4. (a) Nso ididi kiet ke otu utom owo 144,000 ke ini Ukara Tọsịn Isua eke Christ? (b) Ewe prọfesi owụt ete ke ẹyemek ndusụk Christian oro ẹyetde aran nte mme ebiereikpe ke adan̄aemi ẹsụk ẹdude ke isọn̄?

⁴ N̄wed Abasi owụt ete ke ukeuke ibat mme Christian oro ẹyetde aran, ọtọn̄ọde ye mme apostle 12, ẹdidi nsan̄a mme ebiereikpe ye Christ Jesus ke Tọsịn Isua. (Luke 22:28-30; 1 Corinth 6:2; Ediyarade 20:4) Ẹma ẹkpe ikpe ẹnọ nsụhọ mme andibuana ke Israel eke spirit oro ẹyetde aran ẹmi ẹdude ke isọn̄ ẹnyụn̄ ẹfiak ẹtan̄ ẹbok ke 1918-1919. (Malachi 3:2-4) Kaban̄a edifiak ntan̄ emi ẹtan̄de Israel eke spirit ẹbok mi, ẹma ẹtịn̄ ke prọfesi ẹte: “Nnyụn̄ nnam mme ebiereikpe fo ẹfiak kpa nte ke akpa, ye mbon item fo, kpa nte ke editọn̄ọ.” (Isaiah 1:26) Ntem, kpa nte enye akanamde “ke editọn̄ọ” Israel eke obụk, Jehovah ọmọnọ nsụhọ oro ẹfiakde ẹtan̄ ẹbok ndinen ebiereikpe ye mbon item.

5. (a) Mmanie ke ‘ẹkenịm nte mme ebiereikpe’ ke ẹma ẹkefiak ẹwụk Israel eke spirit, ndien didie ke ẹwụt mmọ ke n̄wed Ediyarade? (b) Mmanie ẹn̄wam mme esenyịn oro ẹyetde aran idahaemi ke utom ikpe, ndien didie ke ẹnọ mmọemi ukpep ndikabade ndi nti ebiereikpe?

⁵ Ke akpa itie, kpukpru ‘mbon eti ibuot’ oro ‘ẹkenịmde nte mme ebiereikpe’ ẹkedi nyobiowo, m̀mê mbiowo, oro ẹyetde aran. (1 Corinth 6:4, 5, NW) Ẹwụt mme anam-akpanikọ esenyịn oro ẹyetde aran ẹmi ẹnọde ukpono ke n̄wed Ediyarade nte ẹdude ke ubọk nnasia Jesus, oro edi, ke idak edikara ye ndausụn̄ esie. (Ediyarade 1:16, 20; 2:1) Ọtọn̄ọde ke 1935 mbon oro ẹyetde aran ẹmebọ ibetedem akpanikọ ẹto “akwa otuowo” oro ẹkade-kaiso ndikọri, emi idotenyịn mmọ edide ndibọhọ “akwa ukụt” nnyụn̄ ndu uwem ke nsinsi ke paradise isọn̄. (Ediyarade 7:9, 10, 14-17) Nte “ndọ Eyenerọn̄” asan̄ade ekpere, Otu Ukara oro ẹyetde aran ke emek ediwak owo efen efen ke otu mmọemi ndinam utom nte mbiowo ye mme ebiereikpe ke se iwakde ikan esop Mme Ntiense Jehovah 66,000 ke ofụri isọn̄.a (Ediyarade 19:7-9) Ebede ke san̄asan̄a ufọkn̄wed, ẹmenọ mmọ ukpep ndibiom mbiomo ke n̄ka “obufa isọn̄.” (2 Peter 3:13) Ufọkn̄wed Utom Obio Ubọn̄, oro ẹkenịmde ke utịt utịt 1991 ke ediwak idụt, okodori nsọn̄uyo ke edise mban̄a ikpe nte enende. Mbiowo oro ẹnamde n̄kpọ nte mme ebiereikpe ẹnyene mbiomo ndikpebe Jehovah ye Christ Jesus, ẹmi ubiereikpe mmọ ẹdide akpanikọ onyụn̄ enende.—John 5:30; 8:16; Ediyarade 19:1, 2.

Mme Ebiereikpe Ẹmi ‘Ẹdude Uwem ke Ndịk’

6. Ntak emi akpanade mbiowo ẹmi ẹdude ke kọmiti ukpeikpe “ẹdu uwem ke ndịk”?

⁶ Edieke Christ ke idemesie ebierede ikpe ke ndịk Jehovah ye ke un̄wam spirit Esie, adan̄a didie akan oro ke mme anana-mfọnmma mbiowo ẹkpenam ntre! Ke ini ẹmekde ndidu ke kọmiti ukpeikpe, oyom mmọ “ẹdu uwem ke ndịk,” ẹsemede “ẹkot Enye nte Ete, emi mîten̄eke owo enyịn” ndin̄wam mmọ ndibiere ikpe ke edinen ido. (1 Peter 1:17) Mmọ ẹkpenyene nditi nte ke mmimọ inam n̄kpọ ye uwem mme owo, “ukpọn̄” mmọ, nte mbon ẹmi ‘ẹdinamde ibat.’ (Mme Hebrew 13:17) Ye emi ke ekikere, ke akpanikọ mmọ ẹyenam ibat n̄ko ke iso Jehovah ẹban̄a ndudue ukpeikpe ekededi emi ẹkemede ndifep oro mmọ ẹnamde. Ke editịn̄ oro enye etịn̄de aban̄a N̄wed Hebrew 13:17, J. H. A. Ebrard ekewet ete: “Edi utom ekpemerọn̄ ndikpeme nyom ufọn ukpọn̄ ẹmi ẹkeyakde ẹsịn enye ke ubọk, ndien . . . ana enye anam ibat aban̄a kpukpru mmọ, eke mbon ẹmi ẹsopde n̄ko ke ntak ndudue esie. Emi edi ọkpọsọn̄ ikọ. Yak kpukpru asan̄autom ikọ emi ẹkere ẹban̄a, nte ke mmimọ ke unyịmesịt imọbọ enyene-ndịk itieutom emi.”—Men John 17:12; James 3:1 domo.

7. (a) Nso ke akpana mme ebiereikpe eyomfịn ẹti, ndien nso ikpedi uduak mmọ? (b) Mme ukpepn̄kpọ ewe ke mbiowo ẹkpekpep ẹto Matthew 18:18-20?

⁷ Mbiowo oro ẹdude ke itie ukpeikpe ẹkpenyene nditi nte ke mme ata Ebiereikpe eke ikọ kiet kiet ẹdi Jehovah ye Christ Jesus. Ti se ẹkesiande mme ebiereikpe ke Israel: “[Idịghe] owo ke mbufo ẹkpe ẹnọ, edi ẹkpe ẹnọ Jehovah, ndien enye odu ye mbufo ke ikọ ikpe. Ẹyak ndịk Jehovah odoro mbufo, . . . ẹnam ntem, ndien mbufo ididuehe.” (2 Chronicles 19:6-10) Ye ukpono ukpono ndịk, mbiowo ẹmi ẹkpede ikpe ẹkpenyene ndisịn ofụri ukeme mmọ ndikụt nte ke Jehovah ke akpanikọ ‘odu ye mmọ ke ikọ ikpe.’ Ubiere mmọ ekpenyene ndiwụt nnennen nnennen usụn̄ oro Jehovah ye Christ ẹkerede ẹban̄a n̄kpọ oro. Se mmọ ke ndamban̄a usụn̄ ‘ẹbọpde’ (ẹkụtde ndudue ẹnọ) m̀mê “ẹtatde” (ẹtebede ikpe) ke isọn̄ ekpenyene ndidi se ẹma ẹkebọbọp m̀mê ẹma ẹketatat ke heaven—nte se ẹwetde ke Ikọ Abasi eke odudu spirit ayararede. Edieke mmọ ẹbọn̄de akam ẹnọ Jehovah ke enyịn̄ Jesus, Jesus eyedu “ke ufọt mmọ” ndin̄wam mmọ. (Matthew 18:18-20, ikọ idakisọn̄ ke NW; Enyọn̄-Ukpeme, February 15, 1988, page 9) Idaha oro odude ke itie ikpe ekpenyene ndiwụt nte ke Christ ke akpanikọ odu ke otu mmọ.

Mme Ekpemerọn̄ Ofụri-Ini

8. Nso idi akpan mbiomo oro mbiowo ẹnyenede kaban̄a otuerọn̄, nte Jehovah ye Jesus Christ ẹnịmde uwụtn̄kpọ? (Isaiah 40:10, 11; John 10:11, 27-29)

⁸ Mbiowo isikpehe ikpe kpukpru ini. Mmọ ẹdi mme ekpemerọn̄ ofụri-ini. Mmọ ẹdi mme ọkọkudọn̄ọ, idịghe mme ọnọ ufen. (James 5:13-16) Akpan ekikere oro odude ke ikọ Greek oro adade ọnọ esenyịn (e·piʹsko·pos) edi eke ukpeme ye edise enyịn. Theological Dictionary of the New Testament ọdọhọ ete: “Ke ndida ekpemerọn̄ [ke 1 Peter 2:25], ikọ oro [e·piʹsko·pos] ọnọ ekikere aban̄a utom ubọkerọn̄ oro edide ndise enyịn m̀mê ndikpeme.” Ih, akpan mbiomo mmọ edi ndise erọn̄ enyịn nnyụn̄ n̄kpeme mmọ, ndinam mmọ edu ke esịt otuerọn̄.

9, 10. (a) Didie ke Paul okodori nsọn̄uyo ke akpa utom mbiowo, ntre ewe mbụme ke ẹkpekeme ndibụp? (b) Nso ke mme ikọ Paul ke Utom Mme Apostle 20:29 ọwọrọ, ntre didie ke mbiowo ẹkpedomo ndisụhọde ibat ikpe?

⁹ Ke etịn̄de ikọ ọnọ mbiowo esop Ephesus, apostle Paul ama odori nsọn̄uyo ke ebiet oro odotde ete: “Ẹtịm ẹse idem mbufo, ye ofụri otuerọn̄, emi edisana spirit okonịmde mbufo ke mme andikpeme mmọ, ete ẹbọk mbonufọk Abasi, emi Enye ekedepde ke iyịp [Eyen] Esie.” (Utom 20:28) Paul okosio edikpeme erọn̄ owụt, idịghe edinọ ufen. Ndusụk mbiowo ẹkeme ndinam ọfọn ndikere mban̄a mbụme oro etienede mi: ‘Nte nnyịn imekeme ndibọk ini oro okponde ekem oro ẹsiyomde ẹda ẹdụn̄ọde ikọ ẹnyụn̄ ẹkpe ikpe edieke nnyịn isịnde ini ye ukeme oro okponde akan ke ndida nnam utom ubọkerọn̄?’

¹⁰ Edi akpanikọ, Paul ama odụri owo utọn̄ aban̄a “mme idiọk unam.” Edi nte enye ikasuaha inọ mmọemi sia ‘mîkatuaha otuerọn̄ mbọm’? (Utom 20:29) Ndien ke adan̄aemi enye ọkọdọhọde ete yak mme esenyịn oro ẹnamde akpanikọ ẹbịn “mme idiọk unam” ẹmi ẹfep, nte ikọ esie iwụtke ite ke mbiowo ẹkpenyene ndinam n̄kpọ ye mme andibuana eken ke otuerọn̄ ke “mbọm”? Ke ini erọn̄ okopde mmemidem ke n̄kan̄ eke spirit onyụn̄ etrede ndinam n̄kpọ Abasi, nso ke enye oyom—umia m̀mê ukọkudọn̄ọ, ufen m̀mê edibọk? (James 5:14, 15) Ke ntre, mbiowo kpukpru ini ẹkpenyene ndidiomi ini nnọ utom ubọkerọn̄. Emi ekeme ndida inem inem utịp ndi ke ndisụhọde ini oro ẹbiatde ke ndikpe ediwak ikpe emi ẹbuanade mme Christian oro idiọkn̄kpọ ama akakan ubọk. Ke akpanikọ, akpa n̄kpọ oro mbiowo ẹkpekerede ẹban̄a ekpedi ubọhọ ye nduọkodudu, ke ntem ẹsịnde udọn̄ ẹnọ emem, nsụkesịt, ye ifụre ke otu ikọt Jehovah.—Isaiah 32:1, 2.

Ndinam Utom Nte Mme Ekpemerọn̄ ye Ebiereikpe Oro Ẹnọde Ufọn

11. Ntak emi mbiowo ẹmi ẹdude ke kọmiti ukpeikpe ẹyomde unana editen̄e owo enyịn ye “eti ibuot emi otode ke enyọn̄”?

¹¹ Ọkpọsọn̄ utom ubọkerọn̄ efen efen mbemiso Christian odụkde idiọk usụn̄ ekeme ndisụhọde ibat ikpe mfọn mfọn ke otu ikọt Jehovah. (Men Galatia 6:1 domo.) Edi, ke ntak idiọkn̄kpọ ye unana mfọnmma eke owo, mme esenyịn Christian ke ini ke ini ẹkeme ndise mban̄a mme ikọ oro ẹban̄ade idiọk edinam. Mme edumbet ewe ẹkpeda mmọ usụn̄? Mmọemi ikpụhọkede toto ke eyo Moses m̀mê eke mme akpa Christian. Mme ikọ ẹmi Moses eketịn̄de ọnọ mme ebiereikpe ke Israel ẹsụk ẹnyenyene odudu: “Mbufo ẹkop ikọ nditọete mbufo, ẹnyụn̄ ẹkpe edinen ikpe . . . Mbufo ẹkûten̄e owo enyịn ke ikpe.” (Deuteronomy 1:16, 17) Unana editen̄e owo enyịn edi edu “eti ibuot emi otode ke enyọn̄,” kpa eti ibuot emi edide ata akpan n̄kpọ ọnọ mbiowo oro ẹdude ke mme kọmiti ukpeikpe. (James 3:17; Mme N̄ke 24:23) Utọ eti ibuot oro eyen̄wam mmọ ndifiọk ukpụhọde oro odude ke ufọt mmeme ye ukwan̄ido.

12. Ke nso usụn̄ifiọk ke oyom mme ebiereikpe ẹkûdi ndinen owo ikpọn̄îkpọn̄ edi ẹdi nti owo?

¹² Ana mbiowo “ẹkpe edinen ikpe,” nte ekemde ye mme edumbet Jehovah kaban̄a eti ye idiọk. (Psalm 19:9) Edi, ke adan̄aemi ẹn̄wanade ndidi ndinen owo, akpana mmọ n̄ko ẹdomo ndidi nti owo, ke usụn̄ aban̄ade ukpụhọde oro Paul esịnde ke N̄wed Mbon Rome 5:7, 8. Ke etịn̄de aban̄a mme ufan̄ikọ ẹmi ke ibuotikọ esie oro aban̄ade “Edinen Ido,” n̄wed oro Insight on the Scriptures ọdọhọ ete: “Edida oro ẹdade ikọ Greek oro owụt ete ke owo oro ẹtịmde ẹfiọk, m̀mê ọwọrọde etop, ke ntak eti ido edi owo oro enyenede ntatido (oyomde ndinam eti m̀mê adade ufọn ọsọk mbon efen) onyụn̄ ọfọnde mfọn (owụtde utọ eti ido oro ifịk ifịk). Se ibehede enye idịghe ikpîkpu edinam se unenikpe oyomde edi aka anyan akan emi, edide se eti edikere mban̄a mbon efen ye udọn̄ ndiyom ufọn mmọ nnyụn̄ n̄n̄wam mmọ onụkde.” (Eboho 2, page 809) Mbiowo oro mîdịghe ndinen owo ikpọn̄îkpọn̄ edi n̄ko edide nti owo eyenam n̄kpọ ye mme anamidiọk ke ima ye eti edikere mban̄a. (Rome 2:4) Akpana mmọ ẹwụt mbọm ye ima. Mmọ ẹkpenyene ndinam se mmọ ekemede ndin̄wam anamidiọk okụt ufọn edikabade esịt, idem okposụkedi enye ke akpa ekemede nditie nte inamke n̄kpọ iban̄a mme ukeme mmọ.

Nnennen Edu ke Itie Ikpe

13. (a) Ke ini ebiowo anamde n̄kpọ nte ebiereikpe, nso ke enye mîtreke ndidi? (b) Ewe item Paul abuana n̄ko ke itie ikpe?

¹³ Ke adan̄aemi idaha oro odude oyomde ẹkpe ikpe, mme esenyịn ikpenyeneke ndifre nte ke mmimọ isụk idi mme ekpemerọn̄, inamde n̄kpọ ye erọn̄ Jehovah, ke idak “eti ekpemerọn̄.” (John 10:11) Item oro Paul ọkọnọde aban̄a un̄wam oro ẹkpenọde mme erọn̄ oro ẹdude ke mfịna kpukpru ini abuana ukem ukem ke itie ikpe. Enye ekewet ete: “Nditọete, edieke ẹkụtde owo ke ndudue ekededi, mbufo, ẹmi ẹdide mbon spirit, ẹsan̄a ke spirit ifụre ifụre ido, ẹda enye ẹfiak ẹsịn ke itie; nyụn̄ kpeme idem, mbak ẹdidomo fi n̄ko. Ẹbiom mbiomo kiet eken; ntem ke mbufo ẹdinịm ibet Christ.”—Galatia 6:1, 2.b

14. Didie ke mme esenyịn ẹkpese mme ikọ ikpe, ndien nso ikpedi edu mmọ kaban̄a anamidiọk?

¹⁴ Utu ke ndikere mban̄a idemmọ nte ẹdide etubom mme ebiereikpe ẹmi ẹsopde idem ndinọ ufen, mbiowo ẹmi ẹdude ke kọmiti ukpeikpe ẹkpenyene ndise ikpe oro nte ikpehe utom ubọkerọn̄ efen oro mmọ ẹnyenede. Kiet ke otu erọn̄ Jehovah odu ke mfịna. Nso ke mmọ ẹkeme ndinam man ẹnyan̄a enye? Nte ini ebe akaha ndin̄wam erọn̄ oro ama okoyo ọkpọn̄ otuerọn̄ mi? Nnyịn ikpebiereke ntre. Mbiowo ẹkpenyene ndinyene in̄wan̄în̄wan̄ ekikere kaban̄a ediwụt mbọm ke ebiet emi odotde. Idịghe nte ke mmọ ẹkpenyene ndisụhọde mme edumbet Jehovah edieke edide ẹma ẹnam akwa idiọkn̄kpọ. Edi mmọ ndidu ke edidemede mban̄a mme ukeuke idaha ekededi eyen̄wam mmọ ndiwụt mbọm ke ebiet ẹkemede. (Psalm 103:8-10; 130:3) Edi n̄kpọ mfụhọ nditịn̄, ndusụk mme anamidiọk ẹsisọn̄ ibuot etieti ke edu mmọ tutu obiomo mbiowo ndiwụt nsọn̄ọnda, nte ededi idịghe nsọn̄ido.—1 Corinth 5:13.

Uduak Ikpe

15. Ke ini akwa mfịna adahade ada ke ufọt mme owo, nso ikpedi akpa n̄kpọ oro ẹkpebierede?

¹⁵ Ke ini akwa mfịna adahade ada ke ufọt mme owo, mbiowo oro ẹnyenede eti ibuot ke akpa ẹyebiere m̀mê mbon oro ẹbuanade ẹma ẹdomo ndibiere mfịna oro ke idemmọ, ke usụn̄ oro ẹwụtde ke Matthew 5:23, 24 m̀mê Matthew 18:15. Edieke edide emi ama okpu, iso-ọfọn item oro ebiowo kiet m̀mê iba ẹnọde eyekem. Edinam ikpe edi se ẹyomde n̄kukụre edieke edide ẹma ẹnam akwa idiọkn̄kpọ oro ekemede ndida n̄kosịm edisio mfep. (Matthew 18:17; 1 Corinth 5:11) Ana eti isọn̄ N̄wed Abasi odu ke ndimek kọmiti ukpeikpe. (Se Enyọn̄-Ukpeme, September 15, 1989, page 18.) Ke ini ẹmekde, ẹkpenyene ndisio mbiowo oro ẹdotde ẹkan ndise mban̄a ikpe oro.

16. Nso ke mbiowo ẹsidomo ndisịm ke itie ikpe?

¹⁶ Nso ke mbiowo ẹsidomo ndisịm ke ikpe? Akpa, owo ikemeke ndikpe edinen ikpe ibọhọke ẹfiọk akpanikọ. Nte ekedide ke Israel, ana ‘ẹtịm ẹdụn̄ọde’ ikpọ mfịna. (Deuteronomy 13:14; 17:4) Ntre uduak kiet ke ndikop ikọ edi ndifiọk mme akpanikọ ẹban̄ade n̄kpọ oro. Edi ẹkeme, ndien ẹkpenyene ndinam emi ke ima. (1 Corinth 13:4, 6, 7) Ndondo oro ẹfiọkde mme akpanikọ ẹmi, mbiowo ẹyenam sededi oro ẹyomde man ẹkpeme esop ẹnyụn̄ ẹmụm n̄kokon̄ edumbet Jehovah ẹkama ye ifụre ifụre edinam spirit esie. (1 Corinth 5:7, 8) Nte ededi, kiet ke otu uduak edikop ikọ edi ndinyan̄a anamidiọk oro odude ke afanikọn̄, edieke ẹkemede.—Men Luke 15:8-10 domo.

17. (a) Didie ke ẹkpenam n̄kpọ ye owo oro etiede ke ikpe, ndien ye nso uduak? (b) Nso ke emi oyom oto mme andibuana ke kọmiti ukpeikpe?

¹⁷ Owo ikpenyeneke ndinam n̄kpọ ye owo oro etiede ke ikpe ke usụn̄ efen n̄kan nte ẹnamde ye erọn̄ Abasi. Ẹkpenyene ndinam n̄kpọ ye enye ke ima. Edieke edide ama anam idiọkn̄kpọ (m̀mê mme idiọkn̄kpọ), uduak ndinen ebiereikpe edidi ndin̄wam anamidiọk oro ndinam edinen̄ede, ndifiọk idiọk usụn̄ esie, ndikabade esịt, ndien ke ntem ẹwamarede ẹsio ke ‘afia Satan.’ Emi eyeyom “edikpep,” “ata nsụkesịt.” (2 Timothy 2:24-26; 4:2) Nso edieke anamidiọk oro ndien okụtde ete ke imọ imanam idiọkn̄kpọ, esịt amiade enye ke akpanikọ, onyụn̄ oyomde edifen oto Jehovah? (Men Utom 2:37 domo.) Edieke kọmiti emi okụtde ete enye ke esịt akpanikọ oyom un̄wam, nte ido edide ufọn idụhe ndisio enye mfep.—Se Enyọn̄-Ukpeme, March 15, 1985, page 30, ikpehe ekikere 4.

18. (a) Ini ewe ke kọmiti ukpeikpe okpowụt nsọn̄ọnda ke ndisio anamidiọk mfep? (b) Ke ẹkerede ẹban̄a mfụhọ mfụhọ idaha ewe ke mbiowo ẹkpenyene ndisịn̄ede idemmọ ke ibuot mme erọn̄ oro ẹyode?

¹⁸ Ke n̄kan̄ eken, ke ini mme andibuana ke kọmiti ukpeikpe ẹsobode in̄wan̄în̄wan̄ idaha nsọn̄ibuot oro editua n̄kpọfiọk mîdụhe, edikokoi nsọn̄ ibuot ye ibet Jehovah, m̀mê in̄wan̄în̄wan̄ ukwan̄ido, utom mmọ edi ndikpeme mme andibuana eken ke esop ke ndisio anamidiọk oro mîkabakede esịt do mfep. Ibiomoke komiti ukpeikpe ke idem ndisobo ye anamidọk oro ndien ndien m̀mê ndisian enye se ekpetịn̄de, edieke anade in̄wan̄în̄wan̄ nte ke enye anana mfụhọ owo Abasi.c Ke mme isua ndondo emi edisio mfep ke ofụri ererimbot emekpere ndisịm mbahade 1 eke ikie ke otu mme asuanetop. Oro ọwọrọ ete ke n̄kpọ nte mme erọn̄ ikie ẹmi ẹdude ke otuerọn̄, kiet omosop—ke nsụhọde n̄kaha ke ekpri ibio ini. Ke ikerede iban̄a ini ye ukeme oro adade ke ndida owo kiet ndisịn ke otuerọn̄, nte enye idịghe ata n̄kpọ mfụhọ ndifiọk nte ke ẹsifiak ẹyak ediwak tọsịn ke mme itie duop “ẹnọ Satan” kpukpru isua?—1 Corinth 5:5.

19. Nso ke mbiowo oro ẹdude ke kọmiti ukpeikpe mîkpedehede ifre, ntre nso ididi uduak mmọ?

¹⁹ Mbiowo ẹmi ẹtọn̄ọde ndikpe ikpe ẹkpenyene nditi nte ke ata ediwak idiọkn̄kpọ ke esop abuana mmeme, idịghe ukwan̄ido. Mmọ ikpedehede ifre n̄ke Jesus oro aban̄ade erọn̄ emi okosopde, emi enye ekeberide ye mme ikọ ẹmi: “Ndọhọ mbufo nte, Kpasụk ntre ke idara edidu ke heaven aban̄a idiọkowo kiet emi akabarede esịt, akan nti owo anan̄ ye efụtenan̄ ẹmi mînyeneke se ẹkabarede esịt ẹban̄a.” (Luke 15:7) Ke akpanikọ, “Ọbọn̄ [“Jehovah,” NW] . . . iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Ye un̄wam Jehovah, mme kọmiti ukpeikpe ke ofụri ererimbot ẹkpekam ẹsịn ofụri ukeme mmọ ndinam idara odu ke heaven ke ndin̄wam mme anamidiọk ẹkụt ufọn edikabade esịt nnyụn̄ mfiak nsan̄a ke mfafaha usụn̄ oro adade osịm nsinsi uwem.—Matthew 7:13, 14.

[Mme Ikọ idakisọn̄]

Mme Mbụme Ndụn̄ọde

◻ Ke nditiene uwụtn̄kpọ Akwa Ekpemerọn̄ ye Eti Ekpemerọn̄, nso ikpedi akpan n̄kpọ udọn̄ mbiowo?

◻ Ke nso usụn̄ ke mbiowo ẹkeme ndin̄wana ndisụhọde ibat ikpe?

◻ Ke nso usụn̄ifiọk ke oyom mme ebiereikpe ẹkûdi ndinen owo ikpọn̄îkpọn̄ edi ẹdi nti owo n̄ko?

◻ Didie ke ẹkpenam n̄kpọ ye anamidiọk ke ini ikpe, ndien ye nso uduak?

◻ Ntak emi edisio mfep edide akpatre n̄kpọ ndinam?

[Ndise ke page 16]

Ke ini ẹbemde iso ẹnam utom ubọkerọn̄, ẹkeme ndifep ediwak ikpe

[Ndise ke page 18]

Idem ke itie ikpe, mbiowo ẹkpedomo ndinen̄ede anamidiọk ke ata nsụkesịt