Nam An̄wan̄wa Uyarade Kaban̄a Edinyan̄a
“Owo ekededi eke edisemede okot enyịn̄ Jehovah ọyọbọhọ.”—ROME 10:13.
1. Ke ofụri mbụk, nso ntọt ke ẹnọ?
MBỤK etịn̄ aban̄a ediwak “usen Jehovah.” Ukwọ eyo Noah, edisobo Sodom ye Gomorrah, ye nsobo Jerusalem ke 607 M.E.N. ye 70 E.N. ẹkedi ikpọ ye enyene-ndịk usen Jehovah. Mmọ ẹkedi mme usen ediwụt unenikpe ke idem mbon oro ẹkesọn̄de ibuot ye Jehovah. (Malachi 4:5; Luke 21:22) Ke mme usen oro, ediwak owo ẹma ẹtak ke ntak ndiọi ido mmọ. Edi ndusụk ẹma ẹbọhọ. Jehovah ama anam ẹnọ ntọt, ọtọtde ndiọi owo aban̄a nsobo oro akasan̄ade ekpere onyụn̄ ọnọde mbon nti esịt ifet ndiyom ubọhọ.
2, 3. (a) Nso ntịn̄nnịm ntọt ke ẹkekot ẹto ke Pentecost? (b) Ọtọn̄ọde ke Pentecost 33 E.N., nso ke ediseme n̄kot enyịn̄ Jehovah okoyom?
2 Nsobo Jerusalem ke 70 E.N. edi n̄wọrọnda uwụtn̄kpọ kaban̄a emi. Ke ndibem iso ntịn̄ mban̄a n̄kpọntịbe oro ke se ikperede isua 900 ke mbemiso, prọfet Joel ekewet ete: “Nyonyụn̄ nnọ mme utịben̄kpọ ke enyọn̄ ye ke isọn̄, iyịp, ye ikan̄, ye nsụn̄ikan̄ ebiet adaha. Utịn ayakabade edi ekịm, ọfiọn̄ oyonyụn̄ akabade edi iyịp, ke akwa usen Jehovah emi enyenede ndịk mîka idịghe.” Didie ke owo ekededi ekpekeme ndibọhọ utọ enyene-ndịk ini oro? Joel ekewet ke idak ndausụn̄ spirit ete: “Ama ekem, kpukpru owo eke ẹsemede ẹkot enyịn̄ Jehovah ẹyebọhọ: ndien mmọ eke ẹbọhọde ẹyedu ke obot Zion ye ke Jerusalem, kpa nte Jehovah ọkọdọhọde, ye ke otu mmọ eke ẹsụkde emi Jehovah okotde.”—Joel 2:30-32.
3 Ke Pentecost 33 E.N., apostle Peter ama etịn̄ ikọ ọnọ otu mme Jew ye mme okpono Abasi ke ido mme Jew ke Jerusalem onyụn̄ okot oto ntịn̄nnịm ikọ Joel, owụtde nte ke mme andikpan̄ utọn̄ nnọ enye ẹma ẹkeme ndidori enyịn ndikụt edisu ke eyo mmọ: “Nyọnọ mme utịben̄kpọ ke ikpaenyọn̄ ke enyọn̄, ye mme idiọn̄ọ ke isọn̄ ke idak; iyịp ye ikan̄ ye uye nsụn̄ikan̄: utịn ayakabade edi ekịm ọfiọn̄ oyonyụn̄ akabade edi iyịp, ndien akwa usen Jehovah emi ọwọrọde etop edidi: Ama ekem, ẹyenyan̄a kpukpru owo eke ẹsemede ẹkot enyịn̄ Jehovah.” (Utom 2:16-21) Ofụri otu owo ẹmi ẹkekpan̄de utọn̄ ẹnọ Peter ẹkedu ke idak Ibet Moses, ndien ke ntre mmọ ẹma ẹdiọn̄ọ enyịn̄ Jehovah. Peter ama anam an̄wan̄a nte ke, ọtọn̄ọde ke emi, ndikot enyịn̄ Jehovah ayabuana se ikande oro. Ke edide n̄wọrọnda, emi ama abuana ndina baptism ke enyịn̄ Jesus, enye emi ẹkewotde ndien ekem ẹnamde eset enyene uwem eke heaven eke mîkemeke ndikpa.—Utom 2:37, 38.
4. Nso etop ke mme Christian ẹkesuan?
4 Ọtọn̄ọde ke Pentecost ka iso, mme Christian ẹma ẹsuan etop aban̄ade Jesus emi ekesetde. (1 Corinth 1:23) Mmọ ẹma ẹnam ẹfiọk nte ke ẹkeme ndida ubonowo nnyene nte nditọ Jehovah Abasi eke spirit ẹnyụn̄ ẹkabade ẹdi ubak obufa “Israel Abasi,” idụt eke spirit emi ‘editan̄ade mme utịbe edinam Jehovah.’ (Galatia 6:16; 1 Peter 2:9) Mbon ẹmi ẹnamde akpanikọ tutu esịm n̄kpa ẹbọ uwem eke heaven eke mîkemeke ndikpa ẹnyene nte nsan̄a mme adiakpa ye Jesus ke Obio Ubọn̄ eke heaven esie. (Matthew 24:13; Rome 8:15, 16; 1 Corinth 15:50-54) Akande oro, akana mme Christian ẹmi ẹtan̄a edidi eke akwa ye enyene-ndịk usen Jehovah. Mmọ ẹkenyene nditọt ererimbot mme Jew nte ke enye oyokụt ukụt emi akande se ededi oro okotụkde Jerusalem ye mme owo oro ẹdọhọde ke idi ikọt Abasi tutu esịm ini oro. Nte ededi, mme andibọhọ ẹyedu. Mmanie? Mbon oro ẹsemede ẹkot enyịn̄ Jehovah.
“Ke Ukperedem Ini”
5. Ewe ntịn̄nnịm ikọ ẹsu mfịn?
5 Ke ediwak usụn̄, mme idaha ẹmi ẹkedude adan̄aoro ẹkeda ẹban̄a se nnyịn ikụtde mfịn. Ọtọn̄ọde ke 1914, ubonowo odu uwem ke san̄asan̄a ikpehe ini emi ẹtịn̄de ẹban̄a ke Bible nte “utịt ini,” “akpatre ini eyo emi,” ye “ukperedem ini.” (Daniel 12:1, 4; Matthew 24:3-8; 2 Timothy 3:1-5, 13) Ke isua ikie nnyịn, mme ibak ibak ekọn̄, anana-ukpan afai, ye usabade n̄kaowo ye n̄kann̄kụk ẹmenọ n̄wọrọnda edisu eke ntịn̄nnịm ikọ Bible. Kpukpru ẹmi ẹdi ubak idiọn̄ọ oro Jesus eketịn̄de prọfesi aban̄a, owụtde nte ke ubonowo ọmọn̄ okụt akpatre, enyene-iwụk ndịk ndịk usen Jehovah. Emi eyesịm utịt ke ekọn̄ Armageddon, ata-utịt “akwa ukụt, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.”—Matthew 24:21; Ediyarade 16:16.
6. (a) Didie ke Jehovah esinam n̄kpọ ndinyan̄a ndinen owo? (b) M̀mọ̀n̄ ke nnyịn ikụt item Paul ke nte ẹkpebọhọde?
6 Nte usen nsobo asan̄ade ekpere akan, Jehovah ke anam n̄kpọ aban̄a edinyan̄a mbon sụn̄sụn̄ ido. Ke “utịt ini” emi, enye amatan̄ nsụhọ Israel Abasi eke spirit obok onyụn̄ ọwọn̄ọde ntịn̄enyịn mme asan̄autom esie eke isọn̄, ọtọn̄ọde ke iduọk isua 1930 ka iso, ọnọ editan̄ “akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem” mbok. Nte otu, mmọ ẹmi ‘ẹto ke akwa ukụt ẹwọn̄ọ’ ye uwem. (Ediyarade 7:9, 14) Edi didie ke owo kiet kiet ekeme ndinam ubọhọ esie enyene nsọn̄ọ? Apostle Paul ọbọrọ mbụme oro. Ke Rome ibuot 10, enye ọnọ eti item kaban̄a ubọhọ—item emi ekenyenede n̄kpọ ndinam ke eyo esie onyụn̄ enyenede ndinam n̄ko ke eyo nnyịn.
Akam Kaban̄a Edinyan̄a
7. (a) Nso idotenyịn ke ẹnam ẹdiọn̄ọ ke Rome 10:1, 2? (b) Ntak emi Jehovah idahaemi ekemede ndinam ẹtan̄a “gospel” etịm atara?
7 Ke ini Paul ekewetde n̄wed mbon Rome, Jehovah ama esesịn Israel nte idụt. Edi, apostle oro ama ọsọn̄ọ etịn̄ ete: “Mmenyene udọn̄ ke esịt mi, nnyụn̄ mbọn̄ akam nnọ Abasi mban̄a Israel, nte, ẹnyan̄a mmọ.” Idotenyịn esie ekedi nte owo kiet kiet ke otu mme Jew ekpekeme ndinyene nnennen ifiọk uduak Abasi, adade ekesịm mmọ ndidi se ẹnyan̄ade. (Rome 10:1, 2) Akande oro, Jehovah oyom edinyan̄a ọnọ mbon oro ẹdude ke ofụri ererimbot ubonowo oro ẹbuọtde idem, nte ẹwụtde ke John 3:16: “Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye enye okûtak, edi enyene nsinsi uwem.” Uwa ufak Jesus ama eberede usụn̄ ọnọ akwa edinyan̄a oro. Nte ekedide ke eyo Noah ye mme usen ubiereikpe eken ẹmi ẹketienede, Jehovah anam ẹtan̄a “gospel,” anyande ubọk owụt usụn̄ edinyan̄a.—Mark 13:10, 19, 20.
8. Ke nditiene uwụtn̄kpọ Paul, mme ata Christian ẹnam mfọnido mmọ atara ekesịm mmanie mfịn, ndien didie?
8 Ndiwụt ke imenyene udọn̄ ke esịt imọ inọ mme Jew ye mme Gentile, Paul ama ọkwọrọ ikọ ke kpukpru ifet. Enye ama “an̄wana ndinam mme Jew ye mme Greek ẹnịm ke akpanikọ.” Enye ọkọdọhọ mbiowo Ephesus ete: “N̄kefeheke ndisian mbufo se ededi eke odorode mbufo n̄kpọ, mma nnyụn̄ n̄kpep mbufo n̄kpọ an̄wan̄wa, nnyụn̄ n̄kpep mbufo ke ufọk ke ufọk, n̄kwọrọ nnọ mme Jew ye mme Greek, nte mmọ ẹkabade esịt ẹtiene Abasi, ẹnyụn̄ ẹbuọt idem ye Ọbọn̄ nnyịn Jesus Christ.” (Utom 18:4; 20:20, 21) Ke ukem usụn̄ oro, Mme Ntiense Jehovah mfịn ẹsịn idem ke ukwọrọikọ, ikwọrọke inọ mme inua-okot Christian ikpọn̄îkpọn̄ edi ẹkwọrọ ẹnọ kpukpru owo, idem “tutu esịm utịt ererimbot.”—Utom 1:8; 18:5.
Ndiyarade “Ikọ Mbuọtidem”
9. (a) Nso orụk mbuọtidem ke Rome 10:8, 9 esịn udọn̄ ọnọ? (b) Ini ewe ndien didie ke nnyịn inyene ndinam uyarade mbuọtidem nnyịn?
9 Oyom ọkpọsọn̄ mbuọtidem kaban̄a edinyan̄a. Ke okotde oto Deuteronomy 30:14, Paul ọkọdọhọ ete: “Ikọ emekpere fi, ke inua fo, ye ke esịt fo; oro edi, ikọ mbuọtidem eke nnyịn ikwọrọde.” (Rome 10:8) Nte nnyịn ikwọrọde “ikọ mbuọtidem” oro, enye etetịm otụk nnyịn ke esịt. Ekedi ntre ye Paul, ndien mme n̄kaiso ikọ esie ẹkeme ndisọn̄ọ ubiere nnyịn nditie nte enye ke ndibuana mbuọtidem oro ye mmọ en̄wen: “Edieke afo adade inua fo enyịme ete Jesus edi Ọbọn̄, onyụn̄ enịmde ke akpanikọ ke esịt fo ete, Abasi akanam enye eset ke n̄kpa, ọyọbọhọ.” (Rome 10:9) Owo inamke uyarade emi ke iso mbon efen ke ini baptism ikpọn̄ edi ana enye edi uyarade emi akade-ka iso, ifịk ifịk an̄wan̄wa ikọ ntiense aban̄ade kpukpru ikpọ ikpehe akpanikọ. Utọ akpanikọ oro owụhọ ke ọsọn̄urua enyịn̄ Jehovah Ọbọn̄ Andikara; ke Edidem Messiah ye Andifak nnyịn, Ọbọn̄ Jesus Christ; ye ke mme nyayama un̄wọn̄ọ Obio Ubọn̄.
10. Ke n̄kemuyo ye Rome 10:10, 11, didie ke ana nnyịn ikama “ikọ mbuọtidem” emi?
10 Edinyan̄a idụhe inọ owo ekededi emi mînyịmeke inyụn̄ ida “ikọ mbuọtidem” emi isịn ke edinam, nte apostle oro akade iso ndidọhọ ete: “Owo ada esịt enịm ke akpanikọ enyene edinen ido, onyụn̄ ada inua enyịme enyene edinyan̄a. Koro N̄wed Abasi ke ọdọhọ ete, Owo ekededi eke ọbuọtde idem ye Enye idikwe bụt.” (Rome 10:10, 11) Ana nnyịn inyene nnennen ifiọk “ikọ mbuọtidem” emi inyụn̄ ika iso ndibọk enye ke esịt nnyịn man onụk nnyịn nditịn̄ enye nnọ mbon en̄wen. Jesus ke idem esie eti nnyịn ete: “Owo ekededi eke okopde bụt ye Ami ye ikọ Mi ke idiọk emana use emi, Eyen Owo oyokop bụt ye enye, ke ini Enye edide ke ubọn̄ Ete Esie ye ndisana angel Esie.”—Mark 8:37.
11. Ẹnyene nditan̄a eti mbụk atara adan̄a didie, ndien ntak-a?
11 Nte prọfet Daniel ekebemde iso etịn̄, ke utịt ini emi, ẹkụt “mmọ eke ẹnyenede eti ibuot” nte ẹyayama “nte ikpaenyọn̄ ayamade,” nte ikọ ntiense Obio Ubọn̄ atarade esịm utịt isọn̄. Mmọ ‘ke ẹnam ediwak owo ẹkabade ẹdi edinen,’ ndien ata ifiọk okpon aka iso, koro Jehovah ke ọdọdiọn̄ esịn un̄wana ke mme prọfesi ẹban̄ade utịt ini emi. (Daniel 12:3, 4) Etop edinyan̄a emi edide akpan n̄kpọ kaban̄a ubọhọ kpukpru mmọ oro ẹmade akpanikọ ye edinen ido edi emi.
12. Didie ke Rome 10:12 enyene ebuana ye utom angel oro ẹtịn̄de ẹban̄a ke Ediyarade 14:6?
12 Apostle Paul aka iso ete: “Ubahade idụhe ke ufọt Jew ye Greek: koro Ọbọn̄ kiet edide Ọbọn̄ mmọ kpukpru, onyụn̄ enyene ọyọhọ mfọnido ye kpukpru mmọ eke ẹsemede ẹkot Enye.” (Rome 10:12) Ana ẹkwọrọ “gospel” mfịn idem ke udomo oro okponde akan ke ofụri ererimbot—ẹnọ kpukpru idụt, tutu esịm utịt isọn̄. Angel eke Ediyarade 14:6 aka iso ndife ke ufọt enyọn̄, ọnọde nnyịn “nsinsi gospel ete ikwọrọ inọ mmọ ẹmi ẹdụn̄de ke isọn̄, ye kpukpru idụt ye esien ye usem ye obio.” Didie ke emi edinyene ufọn ọnọ mbon oro ẹnamde n̄kpọ ẹban̄a?
Ndiseme N̄kot Enyịn̄ Jehovah
13. (a) Nso idi ibuotikọ isua 1998 nnyịn? (b) Ntak ibuotikọ isua emi edide se idotde ikan mfịn-e?
13 Ke okotde oto Joel 2:32, Paul atan̄a ete: “Owo ekededi eke edisemede okot enyịn̄ Jehovah ọyọbọhọ.” (Rome 10:13) Odot didie ntem nte ke ẹmek mme ikọ oro nte ibuotikọ isua Mme Ntiense Jehovah eke 1998! Akananam ke mbemiso idụhe ini oro etịmde edi akpan n̄kpọ akan emi ndika iso ye mbuọtidem ke Jehovah, ẹnamde ẹdiọn̄ọ enyịn̄ esie ye ikpọ uduak emi enye adade ọnọ! Nte ekedide ke akpa isua ikie, ntre ke edi ke mme akpatre usen mbiara editịm n̄kpọ emi odude ke emi, ntọt oro osụk ọwọrọ: “Ẹnyan̄a idem mbufo ẹsio ke n̄kwan̄a emana emi.” (Utom 2:40) Enye edi ikot ebietde eke obukpon̄ emi ẹnọde kpukpru mme abak Abasi ke ofụri ererimbot ndiseme n̄kot enyịn̄ Jehovah ndinọ mmọ edinyan̄a ye mbon en̄wen n̄ko ẹmi ẹkpan̄de utọn̄ ẹnọ an̄wan̄wa edikwọrọ eti mbụk mmọ.—1 Timothy 4:16.
14. Ewe Akwa Itiat ke ana nnyịn iseme ikot kaban̄a edinyan̄a?
14 Nso iditịbe ke ini akwa usen Jehovah ọtọn̄ọde ke isọn̄ emi? Ediwak owo ididorike enyịn ke Jehovah kaban̄a edinyan̄a. Ubonowo ke ofụri ofụri ẹyenyụn̄ “ẹdọhọ ikpọ obot ye ikpọ itiat ẹte, Ẹduọ ẹfụk nnyịn, ẹnyụn̄ ẹdịp nnyịn, man nnyịn ibọhọ iso Anditie ke ebekpo ye iyatesịt Eyenerọn̄.” (Ediyarade 6:15, 16) Idotenyịn mmọ edidi ke mme n̄ka ye mme otu eke editịm n̄kpọ emi oro ẹbietde ikpọ obot. Ọkpọfọn didie, nte ededi, edieke mmọ ẹkpebuọtde idem ye n̄kukụre n̄kponn̄kan Akwa Itiat, Jehovah Abasi! (Deuteronomy 32:3, 4) Kaban̄a enye, Edidem David ọkọdọhọ ete: “Jehovah edi akwa itiat mi, ye ufọk ekọn̄ mi ye andinyan̄a mi.” Jehovah edi “akwa itiat edinyan̄a nnyịn.” (Psalm 18:2; 95:1) Enyịn̄ esie edi “ọkpọsọn̄ tower,” n̄kukụre “tower” emi ọsọn̄de ekem ndikpeme nnyịn ke ini afanikọn̄ emi edide. (Mme N̄ke 18:10) Ntre, edi akpan n̄kpọ nte ẹnọ adan̄a ediwak owo nte ẹkekeme ke otu se ikperede ndisịm biliọn itiokiet oro ẹdude ke isọn̄ mfịn ukpep ndiseme n̄kot enyịn̄ Jehovah ke edinam akpanikọ ye ke ofụri esịt.
15. Nso ke Rome 10:14 owụt kaban̄a mbuọtidem?
15 Nte odotde, apostle Paul aka iso obụp ete: “Edi mmọ ẹdinam didie ẹseme ẹkot Enye emi mmọ mîkọbuọtke idem ye Enye?” (Rome 10:14) Akwa udịm owo ẹdu ẹmi ẹsụk ẹkemede ndin̄wam ndinam “ikọ mbuọtidem” edi eke mmọ, man ẹseme ẹkot Jehovah kaban̄a edinyan̄a. Mbuọtidem enen̄ede edi akpan n̄kpọ. Paul etịn̄ ke leta efen ete: “Ke mbuọtidem mîdụhe, owo ikemeke ndinem Abasi esịt; koro owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọ ẹmi ẹyomde Enye utịp.” (Mme Hebrew 11:6) Didie, ndien, ke ediwak miliọn owo efen efen ẹdidi ẹdibuọt idem ye Abasi? Ke leta ọkọnọde ẹsọk mbon Rome, Paul obụp ete: “Mmọ ẹdinyụn̄ ẹnam didie ẹbuọt idem ye Enye emi mmọ mîkokopke iban̄a?” (Rome 10:14) Nte Jehovah ọmọnọ usụn̄ mmọ ndikop? Ke akpanikọ enye ọnọ! Kpan̄ utọn̄ ke n̄kaiso ikọ Paul: “Mmọ ẹdinyụn̄ ẹnam didie ẹkop ke ọkwọrọ ikọ mîdụhe?”
16. Ke ndutịm Abasi, ntak emi ẹyomde mme ọkwọrọikọ?
16 Otode ke mfan̄a Paul, enen̄ede ana in̄wan̄în̄wan̄ nte ke ẹyom mme ọkwọrọikọ. Jesus ama owụt nte ke emi edidi ntre, idem “tutu esịm utịt ererimbot.” (Matthew 24:14; 28:18-20) Ukwọrọikọ edi akpan ikpehe ndutịm Abasi ndin̄wam mme owo ndiseme n̄kot enyịn̄ Jehovah man ẹbọhọ. Idem ke Christendom n̄wakn̄kan owo inamke n̄kpọ ndomokiet ndikpono ọsọn̄urua enyịn̄ Abasi. Ediwak owo ye unana idotenyịn ẹmetịmede Jehovah ye enyịn̄ iba efen ke ukpepn̄kpọ Abasi-Ita-ke-Kiet emi owo mîkemeke ndinam an̄wan̄a. N̄ko, ediwak owo ẹsịne ke otu ẹmi ẹtịn̄de ẹban̄a ke Psalm 14:1 ye Ps 53:1 ẹte: “Ndisịme owo ọdọhọ ke esịt esie, ete, Abasi idụhe.” Oyom mmọ ẹfiọk nte ke Jehovah edi odu uwem Abasi, ndien ana mmọ ẹfiọk ofụri se enyịn̄ esie adade ọnọ edieke anade mmọ ẹbọhọ akwa ukụt oro asan̄ade ekpere.
‘Ndiye Ikpat’ Mme Ọkwọrọikọ
17. (a) Ntak odotde Paul ndikot nto prọfesi edifiak n̄wụk? (b) Nso ibuana ke ndinyene ‘ndiye ikpat’?
17 Apostle Paul enyene akpan mbụme kiet efen: “Mmọ ẹdinyụn̄ ẹnam didie ẹkwọrọ, ke mîbọhọke ẹdọdọn̄ mmọ? kpa nte ẹwetde ẹte, Ikpat mmọ ẹmi ẹdade etop nti n̄kpọ ẹye adan̄a didie!” (Rome 10:15) Paul mi okot oto Isaiah 52:7, emi edide ubak prọfesi edifiak n̄wụk emi enyenede n̄kpọ ndinam toto ke 1919. Ini kiet efen, mfịn, Jehovah ọmọdọn̄ “owo eti mbụk, . . . eke ọkwọrọde emem, eke obụkde eti n̄kpọ, eke ọkwọrọde edinyan̄a.” Ke n̄kopitem, “mbon ukpeme” Abasi ẹmi ẹyetde aran ye nsan̄a mmọ ẹka iso ndifiori idara idara. (Isaiah 52:7, 8) Ikpat mmọ oro ẹkwọrọde edinyan̄a mfịn ekeme ndimem, idem etiede ntọn̄ ntọn̄, nte mmọ ẹsan̄ade ke ufọk ke ufọk, edi iso mmọ esiyama ye idara didie ntem! Mmọ ẹdiọn̄ọ ẹte ke Jehovah ọdọn̄ mmimọ utom editan̄a eti mbụk emem nnyụn̄ ndọn̄ mme atua eyet esịt, in̄wamde mmọ ẹmi ndiseme n̄kot enyịn̄ Jehovah ye edinyan̄a ke ekikere.
18. Nso ke Rome 10:16-18 etịn̄ aban̄a akpatre utịp edikwọrọ eti mbụk?
18 Ke edide mme owo ‘ẹnịm mbụk nnyịn ke akpanikọ’ m̀mê mmọ ẹmek ndisọn̄ ibuot, mme ikọ Paul ẹdi akpanikọ: “Nte mmọ ikokopke? Ke akpanikọ mmọ ẹma ẹkop. Uyom mmọ ọmọwọrọ ke ofụri isọn̄, ikọ mmọ ẹsịm utịt ererimbot.” (Rome 10:16-18) Ukem nte ‘mme heaven ẹbụkde ubọn̄ Abasi,’ nte ẹwụtde ke mme utom obot esie, ntre ana Mme Ntiense esie ke isọn̄ ẹkwọrọ “isua mfọnido Jehovah, ye usen usiene Abasi nnyịn . . . [ẹdọn̄] kpukpru mme atua eyet esịt.”—Psalm 19:1-4; Isaiah 61:2.
19. Nso ididi utịp inọ mbon oro ‘ẹsemede ẹkot enyịn̄ Jehovah’ mfịn?
19 Akwa ye enyene-ndịk usen Jehovah ke asan̄a ekpere akan. “Mbọm usen oro! koro usen Jehovah emekpere, enye oyonyụn̄ edi nte nsobo eke otode ata ọkpọsọn̄.” (Joel 1:15; 2:31) Edi akam nnyịn nte akwa udịm owo efen efen ẹkpenam n̄kpọ usọp usọp ẹban̄a eti mbụk, ẹbụn̄ọ ẹdụk esop Jehovah. (Isaiah 60:8; Habakkuk 2:3) Ti nte ke mme usen Jehovah eken ẹma ẹda nsobo ẹsọk ndiọi owo—ke eyo Noah, ke eyo Lot, ye ke eyo ọsọn̄ibuot Israel ye Judah. Nnyịn idahaemi ida ke mben n̄kponn̄kan akwa ukụt, ke ini oyobio Jehovah edikpọride idiọkido ke iso isọn̄ emi efep, eberede usụn̄ ọnọ paradise nsinsi emem. Nte afo eyedi kiet emi ‘esemede okot enyịn̄ Jehovah’ ke edinam akpanikọ? Ke edide ntre, dara! Afo emenyene un̄wọn̄ọ Abasi nte ke afo eyedi se ẹnyan̄ade.—Rome 10:13.
Didie ke Afo Ọkpọbọrọ?
◻ Nso mbufa n̄kpọ ke ẹketan̄a ke Pentecost 33 E.N. ebede?
◻ Didie ke mme Christian ẹkpekpan̄ utọn̄ ẹnọ “ikọ mbuọtidem”?
◻ Nso ke ọwọrọ ‘ndiseme n̄kot enyịn̄ Jehovah’?
◻ Ke nso usụn̄ifiọk ke mme isụn̄utom Obio Ubọn̄ ẹnyene ‘ndiye ikpat’?
[Mme ndise ke page 18]
Ikọt Abasi ke ẹtan̄a utịbe utom esie ke Puerto Rico, Senegal, Peru, Papua New Guinea—ih, ke ofụri ererimbot