Yom Ata Emem Nyụn̄ Bịne Enye!
“Owo emi edimade uwem, edinyụn̄ oyomde ndikụt edifọn ini, . . . yak enye ọwọn̄ọde ọkpọn̄ idiọk, onyụn̄ anam eti; yak enye oyom emem, onyụn̄ ebịne enye.”—1 PETER 3:10, 11.
1. Mme ewe ikọ Isaiah oro ẹtịmde ẹdiọn̄ọ mîditreke ndikụt unen?
“MMỌ ẹyeda ofụt mmọ ẹdom n̄kpọ ufụn̄isọn̄, ẹda eduat mmọ ẹdom ikwa udiọn̄ vine: idụt idimenke ofụt itiene idụt, mmọ idinyụn̄ ikpepke aba ekọn̄.” (Isaiah 2:4) Okposụkedi ẹdiande uwetn̄kpọ emi ẹtịmde ẹdiọn̄ọ mi ekpere ibuot itieutom Edidiana Mme Idụt ke New York City, owo ikemeke ndidọhọ ke esop ererimbot emi anam mme ikọ ẹmi. Nte ededi, nte ubak ikọ Jehovah Abasi oro mîkemeke ndikpu, ikọ oro iditreke ndisu.—Isaiah 55:10, 11.
2. Nso inyene ‘nditịbe ke utịt eyo,’ nte ekemde ye Isaiah 2:2, 3?
2 Mme ikọ oro ẹkụtde ke Isaiah 2:4 ẹnen̄ede ẹdi ubak utịbe utịbe prọfesi, kpa prọfesi aban̄ade ata emem—ndien enye ke osu ke eyo nnyịn emi. Mbemiso atan̄ade aduai-owo-idem idotenyịn editre ekọn̄ nnyụn̄ nsobo mme n̄kpọekọn̄, prọfesi oro ọdọhọ ete: “Ama ekem ke utịt eyo, obot ufọk Jehovah oyowụhọ ke enyọn̄ ikpọ obot, onyụn̄ okon̄ akan n̄kpri obot; ndien kpukpru mme idụt ẹyebụn̄ọ ẹdụk ke esịt. Ndien ediwak obio ẹyeka ẹkedọhọ, ẹte, Mbufo ẹdi, nnyịn idọk ke obot Jehovah, ke ufọk Abasi Jacob; ndien enye eyekpep nnyịn ido esiemmọ, nnyịn iyonyụn̄ isan̄a ke usụn̄ esie: koro mme ewụhọ ẹyeto ke Zion, uyo Jehovah oyonyụn̄ oto ke Jerusalem.”—Isaiah 2:2, 3.
Mme Owo Ẹkeme Ndikabade Ndi Mme Anam Emem
3. Didie ke owo ekeme ndikpụhọde n̄kpọn̄ ndidi owo en̄wan n̄kabade ndi owo emem?
3 Tịm fiọk ete ke mbemiso mme owo ẹkeme ndibịne usụn̄uwem emem, ana ẹteme mmọ mme usụn̄ Jehovah. Edinam n̄kpọ mban̄a ukpepn̄kpọ Jehovah ekeme ndikpụhọde usụn̄ ukere n̄kpọ ye usụn̄ unam n̄kpọ owo, anamde owo oro ekedide owo en̄wan akabade edi anam emem. Didie ke ẹnam ukpụhọde emi? Rome 12:2 ọdọhọ ete: “Ẹkûnyụn̄ ẹkabade ẹbiet eyo emi, edi ẹyak mbufo ẹkpụhọde, oto ke edinam emi ẹnamde esịt mbufo ẹdi obufa, man mbufo ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.” Nnyịn inam esịt nnyịn okpụhọde, mîdịghe inụk enye anam n̄kpọ ke usụn̄ efen, ebe ke ndinam enye ọyọhọ ye mme edumbet ye usụn̄ edinam ẹtode Ikọ Abasi. Edikpep Bible ofụri ini an̄wam nnyịn ndinam ukpụhọde emi onyụn̄ anam nnyịn ifiọk se idide uduak Jehovah inọ nnyịn, ntre nnyịn imekeme ndikụt usụn̄ oro anade nnyịn isan̄a in̄wan̄în̄wan̄.—Psalm 119:105.
4. Didie ke owo emen emem emem obufa edu esịne?
4 Idịghe usụn̄ ukere n̄kpọ nnyịn ikpọn̄ ke akpanikọ Bible okpụhọde edi n̄ko mme edinam ye eduuwem nnyịn. Enye an̄wam nnyịn ndinam se apostle Paul ọkọdọhọde: “Ẹsio akani owo ẹduọk, emi ekemde ye ido uwem mbufo ke eyo oko, onyụn̄ ọdiọn̄de-diọn̄ abiara oto ke editiene eke mbufo ẹtienede idiọkitọn̄ eke ẹbian̄ade owo; ẹnyụn̄ ẹkabade ẹdi obufa ke spirit eke odude ke esịt mbufo, ẹnyụn̄ ẹmen obufa owo ẹsịne, emi ẹbotde ebiet Abasi ke edinen ido ye edisana ido akpanikọ.” (Ephesus 4:22-24) Spirit emi odude ke esịt edi eke esịtidem. Enye okpụhọde onyụn̄ okop odudu etiene nte ima emi inyenede inọ Jehovah ye mme ibet esie ọkọride, ndien enye anam nnyịn idi mme owo ẹmi ikerede n̄kpọ eke spirit ye mme anam emem.
5. Didie ke “obufa ibet” oro Jesus ọkọnọde mme mbet esie etịp esịn ke emem emi odude ke otu mmọ?
5 Ẹkụt ufọn edinam ukpụhọde emi ke item oro Jesus ọkọnọde mme mbet esie ke utịt ini uwem esie ye mmọ: “Mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo. Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:34, 35) Ima unana ibụk emi ebietde eke Christ mi ọbọp mme mbet adian ọtọkiet ke mfọnmma edidianakiet. (Colossae 3:14) Sụk mbon oro ẹnyịmede ndibọ nnyụn̄ nda “obufa ibet” emi ndu uwem ẹdinyene emem oro Abasi ọn̄wọn̄ọde. Nte odu mme owo ekededi oro ẹnamde emi mfịn?
6. Ntak emi Mme Ntiense Jehovah ẹnyenede emem, ke okpụhọrede ye mbon ererimbot?
6 Mme Ntiense Jehovah ẹdomo ndiwụt ima ke itie nditọete ofụri ererimbot mmọ. Okposụkedi mmọ ẹtode kpukpru idụt ke ererimbot, mmọ isịnke idem ke mme eneni ererimbot, idem ke ini mmọ ẹsobode ọkpọsọn̄ mfịghe otode ukara ye ido ukpono. Nte mme owo oro ẹdianade kiet, Jehovah ọnọ mmọ ukpep, ndien mmọ ẹnyene emem. (Isaiah 54:13) Mmọ ẹda san̄asan̄a ke mme utọk ukaraidem, mmọ inyụn̄ ibuanake ke mme ekọn̄. Ndusụk owo ẹmi ẹketiede afai afai ke mbemiso ẹma ẹkpọn̄ usụn̄uwem oro. Mmọ ẹmekabade ẹdi mme Christian ẹmi ẹmade emem, ẹkpebede uwụtn̄kpọ Christ Jesus. Ndien mmọ ẹnam item Peter emi ke ofụri esit: “Owo emi edimade uwem, edinyụn̄ oyomde ndikụt edifọn ini, yak enye afara edeme esie ke idiọk, onyụn̄ ekpeme n̄kpọkinua esie okûbian̄a abian̄a. Yak enye ọwọn̄ọde ọkpọn̄ idiọk, onyụn̄ anam eti; yak enye oyom emem, onyụn̄ ebịne enye.”—1 Peter 3:10, 11; Ephesus 4:3.
Mbon Oro Ẹbịnede Emem
7, 8. Nọ uwụtn̄kpọ mme owo oro ẹkekpọn̄de un̄wana ekọn̄ ẹnyụn̄ ẹkabade ẹdi mme oyom emem. (Bụk mbon efen oro afo ọfiọkde.)
7 Ke uwụtn̄kpọ, odu Rami Oved, akani owo ke otu mbon oro ẹtịmde ẹnyene ifiọk ke ndibiọn̄ọ edinam mbon oyomonsia. Ẹkenọ enye ukpep ndiwot mme asua. Enye ama enen̄ede enịm ufreidụt Israel esie ke akpanikọ tutu ke usen oro enye ọkọfiọkde ete ke mme rabbi ikoyomke imọ idọ n̄wan emi imọ ikamade n̄kukụre koro enye ekedide eyen Asia, kpa owo Gentile. Enye ama ọtọn̄ọ ndiyom akpanikọ ke Bible. Ekem enye ama edisobo ye Mme Ntiense Jehovah. Enye ndikpep Bible ye Mme Ntiense Jehovah ama anam enye enịm nte ke imọ ikemeke aba ndidi owo ifiopesịt ufreidụt. Ima Christian ọkọwọrọ ndikpọn̄ ekọn̄ ye mme n̄kpọekọn̄ nnyụn̄ n̄kpep ndima mme owo ẹtode kpukpru orụk. Idem akakpa enye didie ntem ke ini enye ọkọbọde leta mfọnido ye mme ntọn̄ọikọ ẹmi, “Eyenete Mi Rami”! Nso ikedi ata esen n̄kpọ iban̄a oro? Andiwet ekedi Ntiense otode Palestine. Rami ọdọhọ ete: “N̄kekere ke oro ikemeke nditịbe, sia mbon Palestine ẹkedide mme asua mi, ndien mi owo mmọ kiet okokot mi ‘Eyenete Mi.’” Rami ye n̄wan esie idahaemi ke ẹbịne emem ke usụn̄ Abasi.
8 Uwụtn̄kpọ efen edi eke Georg Reuter, emi akanamde utom ye udịmekọn̄ Germany oro akadade ekọn̄ odụk Russia ke ini Ekọn̄ Ererimbot II. Ikebịghike enye ama okop idiọkesịt aban̄a ọkpọsọn̄ uduak Hitler ndikara ererimbot. Ke ini enye ọkọnyọn̄de ekọn̄ oro edi, enye ama ọtọn̄ọ ndikpep Bible ye Mme Ntiense Jehovah. Enye ekewet ete: “Ke akpatre, n̄kpọ ẹma ẹtọn̄ọ ndin̄wan̄a mi. Mma mfiọk nte ke ikanaha ẹduọhọ Abasi kaban̄a ofụri uduọkiyịp emi . . . Mma n̄kpep nte ke uduak esie ekedi ndiwụk paradise emi asan̄ade ye mme nsinsi edidiọn̄ ke ofụri isọn̄ nnọ mme okopitem ubonowo. . . . Hitler ama anam inua aban̄a ‘Ukara ọ-Tọsịn-Isua’ esie edi akakara ke [isua] 12 kpọt—ndien oro akasan̄a ye enyene-ndịk utịp didie ntem! Edi Christ utu ke Hitler . . . edi enyeemi ekemede edinyụn̄ owụkde ukara tọsịn isua ke ofụri isọn̄.” Ke n̄kpọ nte isua 50 idahaemi, Georg ke anam utom nte isụn̄utom ata emem ke utom ukwọrọikọ uyọhọ ini.
9. Didie ke ifiọkutom Mme Ntiense Jehovah ke Nazi eke Germany owụt ete ke mmọ ẹdi mbon uko edi kpa ye oro ẹdi mbon emem?
9 Nsọn̄ọnda ye edida san̄asan̄a Mme Ntiense Jehovah ke Germany ke ini ukara Nazi aka iso ndinọ ikọ ntiense mban̄a ima emi mmọ ẹnyenede ẹnọ Abasi ye emem idem idahaemi, ke isua 50 ẹma ẹkebe. Ekpri n̄wed oro United States Holocaust Memorial Museum ke Washington, D.C. ekewetde, ọdọhọ ete: “Mme Ntiense Jehovah ẹma ẹyọ ọkpọsọn̄ ukọbọ ke idak ukara Nazi. . . . Uko oro ata ediwak mmọ ẹkewụtde ke ndisịn [ndikan̄ ido ukpono mmọ], ke ini ẹsobode ndutụhọ, idiọk ukama ke mme itienna ekikere, ye n̄kpa ke ndusụk ini, ama anam ediwak owo oro ẹkedude ke ini mmọ ẹnọ mmọ ukpono.” Ndien enye adian ete: “Ke ini ẹkesion̄ode mme owo ke mme itienna oro, Mme Ntiense Jehovah ẹma ẹka iso ke utom mmọ, ẹbuahade ke otu mbon oro ẹkebọhọde, ẹnamde mme owo ẹkabade esịt.”
Ata Akamba Ukpụhọde
10. (a) Nso akwa ukpụhọde ke oyom ẹnam man ata emem edi? (b) Didie ke ẹkewụt emi ke n̄wed Daniel?
10 Ndi emi ọwọrọ ke Mme Ntiense Jehovah ẹnịm ke akpanikọ ẹte ke mmimọ imekeme ndida emem nsọk ofụri ererimbot ebe ke ndikabade akpakịp owo esịt ẹdi mme andinịm edida san̄asan̄a Christian ke akpanikọ? Baba! Man ẹfiak ẹwụk emem ke isọn̄, oyom ata akamba ukpụhọde. Nso idi oro? Ana ukara owo oro ọyọhọde ye ubahade, ufịk, ye afai ayak ufan̄ ọnọ ukara Obio Ubọn̄ Abasi, emi Jesus ekekpepde mme mbet esie ndibọn̄ akam mban̄a. (Matthew 6:9, 10) Edi oro edisan̄a didie ada itie? Ke ndap eke odudu spirit oro Abasi ọkọnọde, prọfet Daniel ama ọfiọk ete ke ukperedem ini, Obio Ubọn̄ Abasi, ukem nte akamba itiat emi ‘mîdịghe ubọk owo asiak osio,’ ayanuak akamba mbiet oro adade ọnọ ukara ukaraidem ubonowo ke isọn̄. Ekem enye ọdọhọ ete: “Ke eyo ndidem oro, Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt ẹmi, ndien enye ayada ke nsinsi.”—Daniel 2:1-44.
11. Ebede ke nso ke Jehovah edida ukpụhọde oro oyomde ẹnam kaban̄a emem edi?
11 Ntak emi akwa ukpụhọde emi edidade itie ke idaha ererimbot? Koro Jehovah ọmọn̄wọn̄ọ ke imọ iyọsọhi kpukpru mbon oro ẹsabarede ẹnyụn̄ ẹsobode isọn̄ ifep. (Ediyarade 11:18) Ukpụhọde emi edida itie ke edinen ekọn̄ oro Jehovah edin̄wanade ye Satan ye idiọk ererimbot esie. Nnyịn ikot ke Ediyarade 16:14, 16 ite: “Mmọ [oro edi, mme ndek ndek ikọ odudu spirit] ẹdi spirit mme demon ẹmi ẹnamde mme idiọn̄ọ, ẹmi ẹnyụn̄ ẹwọn̄ọde ẹka ke ọtọ ndidem kpukpru ekondo, nditan̄ mmọ mbok ọtọ kiet ẹdi ekọn̄ akwa usen Abasi, Andikara kpukpru n̄kpọ. Ẹnyụn̄ ẹtan̄ mmọ oro ẹkebok ke ebiet emi ẹkotde ke usem Hebrew, ẹte, Har–Magedon.”
12. Armageddon editie didie?
12 Armageddon editie didie? Enye ididịghe nsobo nuclear m̀mê afanikọn̄ emi mme owo ẹdide ntak. Baba, enye edi ekọn̄ Abasi ndida utịt nsọk kpukpru ekọn̄ ubọk owo nnyụn̄ nsobo kpukpru mbon oro ẹsịnde udọn̄ ẹnọ mme utọ ekọn̄ oro. Enye edi ekọn̄ Abasi ndida ata emem nsọk mbon oro ẹmade emem. Ih, Armageddon ọmọn̄ edi nte Jehovah akaduakde. Enye idibịghike. Ẹma ẹnọ prọfet esie Habakkuk odudu spirit ndiwet: “N̄kukụt [ana] kan̄a ọnọ ini emi ẹnịmde; ndien enye oyosioro uyo ke utịt, idinyụn̄ isụhọ nsu: enye ama ebịghi, bet enye; koro enye mîditreke ndidi, mîdinyụn̄ ibehe ini.” (Habakkuk 2:3) Ke ntak mme ntụk nnyịn nte owo, ẹkeme nditie nte enye ebịghi, edi Jehovah enyene ndutịm esie. Armageddon ayasiaha ke hour oro Jehovah ekemekde enịm.
13. Abasi edinam n̄kpọ didie ye ata abiatibet oro, Satan kpa Devil?
13 Enyene-iwụk edinam emi ọyọdiọn̄ usụn̄ ọnọ ata emem! Edi man ẹnen̄ede ẹnyene ata emem, ana ẹnam n̄kpọ efen—ẹsio owo emi edide ntak ubahade, usua, ye en̄wan ẹfep. Ndien oro akam edi nnennen se Bible etịn̄de prọfesi aban̄a nte n̄kpọ efen oro edidade itie—edisịn Satan ke editụn̄ọ ukpe, kpa esịn nsọk nnọ ekọn̄ ye ete nsu. Apostle John ama okụt n̄kpọntịbe emi ke n̄kukụt prọfesi, nte ẹwetde ke Ediyarade 20:1-3: “Ekem n̄kụt angel otode ke heaven osụhọde, akama ukpọhọde editụn̄ọ ukpe ye akwa n̄kpọkọbi ke ubọk. Enye onyụn̄ omụm dragon, akani urụkikọt, emi edide Andidori ikọt Abasi ikọ ye Satan, onyụn̄ ọkọbi enye ke tọsịn isua, onyụn̄ otop enye esịn ke editụn̄ọ ukpe, onyụn̄ ọkọbi ukpe, onyụn̄ esịri abaha enye, enịm ufịkn̄kpọ ke esịt, man okûbian̄a aba mme idụt tutu tọsịn isua ẹbe.”
14. Didie ke ẹkeme nditịn̄ mban̄a edinam edikan oro Jehovah edikande Satan?
14 Emi idịghe ndap; edi un̄wọn̄ọ Abasi—ndien Bible ọdọhọ ete: ‘Abasi ikemeke ndisu nsu.’ (Mme Hebrew 6:18) Ntem Jehovah ama etịn̄ ebe ke prọfet esie Jeremiah ete: “Ami Jehovah [nnam] mfọnido, ye ikpe, ye edinen ido ke ererimbot: koro n̄kpọ ẹmi ẹnemde mi esịt: uyo Jehovah edi emi.” (Jeremiah 9:24) Jehovah anam n̄kpọ ke unenikpe ye edinen ido, ndien enye okop idatesịt ke emem oro enye edidade ọsọk isọn̄.
Ukara ke Ubọk Ọbọn̄ Emem
15, 16. (a) Anie ke Jehovah emek man akara nte Edidem? (b) Didie ke ẹtịn̄ ẹban̄a ukara oro, ndien mmanie ẹdibuana ke enye?
15 Man okụt ete ke kpukpru mbon oro ẹdude ke idak ndutịm Obio Ubọn̄ esie ẹnyene ata emem, Jehovah ayak itie edikara esịn ata Ọbọn̄ Emem, kpa Jesus Christ, ke ubọk, nte ẹkebemde iso ẹtịn̄ ke Isaiah 9:6, 7: “Eyen [amana] ọnọ nnyịn, ẹnọ nnyịn eyeneren: ubọn̄ onyụn̄ odoro enye ke afara; ẹnyụn̄ ẹsio enye enyịn̄, Utịbe, Ọnọitem, Ọkpọsọn̄ Abasi, Nsinsi Ete, Ọbọn̄ Emem. Ubọn̄ ye emem ididopke ndikọri . . . Ufụp Jehovah mme udịm ayanam n̄kpọ emi.” Andiwet psalm n̄ko ama ewet ke prọfesi aban̄a emem emem ukara Messiah ete: “Edinen owo ayafiari ke eyo esie; ye ediwak emem n̄ko tutu ọfiọn̄ okụre.”—Psalm 72:7.
16 Ke adianade do, nditọete Christ 144,000 oro ẹyetde aran ẹyekara ye enye ke heaven. Mmọemi ẹdi nsan̄a mme ada udeme nnyene ye Christ emi Paul ekewetde aban̄a ete: “Ndien ibịghike-bịghi Abasi emem eyedịghi Satan anuak ke idak ikpat mbufo. Mfọn Ọbọn̄ nnyịn Jesus akpakam odu ye mbufo.” (Rome 16:20) Ih, mmọemi ke heaven ẹyetiene ẹbuana ke edikan oro Christ edikande andisịn nsọk nnọ ekọn̄ oro, Satan kpa Devil!
17. Nso ke ana nnyịn inam man inyene ata emem?
17 Ntre kemi mbụme edi, Nso ke ana afo anam man enyene ata emem? Ata emem ekeme ndidi ke usụn̄ Abasi kpọt, ndien man enyene enye ana afo anam n̄kpọ ke usụn̄ oro enyenede iwụk. Ana afo enyịme Ọbọn̄ Emem onyụn̄ ọwọn̄ọde etiene enye. Emi ọwọrọ ete ke ana afo enyịme Christ ke udeme esie nte Andinyan̄a ye Andifak anamidiọk ubonowo. Jesus ke idemesie ama etịn̄ mme ikọ ẹmi ẹtịmde ẹmehe mi: “Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Nte afo emenyịme ndibuọt idem ye Christ Jesus nte Isụn̄utom Abasi ndida ata emem ye edinyan̄a ndi? Idụhe enyịn̄ efen ke idak enyọn̄ emi ekemede ndida emem ndi nnyụn̄ nnọ ubiọn̄ mban̄a enye. (Philippi 2:8-11) Ntak-a? Koro Jesus edi Enyeoro Abasi Emekde. Enye edi akakan isụn̄utom emem oro akanam odude ke isọn̄. Nte afo ayakpan̄ utọn̄ ọnọ Jesus onyụn̄ etiene uwụtn̄kpọ esie?
18. Nso ke nnyịn inyene ndinam ke ndinam n̄kpọ mban̄a mme ikọ Jesus oro ẹwetde ke John 17:3?
18 Jesus ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3) Ini edi emi ndinyene nnennen ifiọk ebe ke ndidụk mme mbonoesop eke Mme Ntiense Jehovah kpukpru ini ke Ufọkmbono Obio Ubọn̄. Mme mbonoesop unọ ukpep ẹmi ẹyenụk fi ndibuana ifiọk ye idotenyịn oro afo enyenede ye mbon en̄wen. Afo n̄ko emekeme ndikabade ndi isụn̄utom emem Abasi. Afo emekeme ndidara emem idahaemi ebe ke ndibuọt idem ye Jehovah Abasi, nte ẹwetde ke Isaiah 26:3, nte ekemde ye New International Version: “Afo ayakama owo emi esịt esie ọsọn̄ọde ada ke mfọnmma emem, koro enye ọbuọtde idem ye afo.” Afo ọkpọbuọt idem ye anie? “Mbufo ẹbuọt idem mbufo ye Jehovah ke nsinsi; koro Jah Jehovah edide nsinsi itiat.”—Isaiah 26:4.
19, 20. Nso ina ibet mbon oro ẹyomde emem ẹnyụn̄ ẹbịnede enye mfịn?
19 Sọn̄ọ da idahaemi kaban̄a nsinsi uwem ke emem emem obufa ererimbot Abasi. Ke Ediyarade 21:3, 4, Ikọ Abasi ọn̄wọn̄ọ ọnọ nnyịn ete: “Sese, ebietidụn̄ Abasi omodu ye owo. Enye oyonyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie oyonyụn̄ odu ye mmọ, onyụn̄ edi Abasi mmọ. Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” Ndi oro idịghe emem emem ini iso emi afo oyomde?
20 Do ti se Abasi ọkọn̄wọn̄ọde. “Mbon nsụkidem ẹyeda isọn̄ ẹnyene; ediwak emem oyonyụn̄ enem mmọ esịt. Tịn̄ enyịn ke owo eke ọfọnde ama, nyụn̄ se edinen owo: koro eti utịt anade ọnọ owo emem.” (Psalm 37:11, 37) Ke ini inem inem usen oro edidide, nnyịn ikpakam itịn̄ ye esịtekọm ite, “Ata emem ke akpatre! Ekọm enyene Jehovah Abasi, kpa ebiet emi ata emem otode!”
Nte Afo Emekeme Ndinam An̄wan̄a?
◻ Nso ikeme ndin̄wam owo anam mme ukpụhọde ke ekikere ye edinam?
◻ Didie ke Mme Ntiense Jehovah, nte owo kiet kiet ye nte otu, ẹwụt ima oro mmọ ẹmade ata emem?
◻ Didie ke Jehovah edinam n̄kpọ ye mbon oro ẹsịnde udọn̄ ẹnọ usua ye ekọn̄?
◻ Nso ke ukara Ọbọn̄ Emem edinam ọnọ ubonowo?
[Ndise ke page 14]
Idịghe UN osu mme ikọ Isaiah, edi edi mbon oro ẹnamde n̄kpọ ẹban̄a ukpepn̄kpọ Jehovah
[Mme ndise ke page 15]
Owo iba ẹmi ẹma ẹnam mme ukpụhọde man ẹbịne emem
Rami Oved
Georg Reuter
[Ndise ke page 16]
Ata emem ayakan ke idak ukara Ọbọn̄ Emem