Ẹnyene Eti Ibuot nte Utịt Asan̄ade Ekpere
1 Ikọ Abasi etịn̄ ediwak ini ete ke usen Jehovah edidi “nte inọ”—oro edi, ke mbuari, inikiet inikiet, ye ke ediyịp enyịn. (1 Thess. 5:2; Matt. 24:43; 2 Pet. 3:10; Edi. 3:3; 16:15) Jesus ọkọdọhọ ete: “Mmọdo . . . ẹben̄e idem; koro ke ini eke mbufo mîdorike enyịn, Eyen Owo eyedi.” (Matt. 24:44) Didie ke nnyịn ikeme ndidu ke mben̄eidem ke n̄kan̄ eke spirit nte utịt asan̄ade ekpere? Ẹkụt nte ẹkemede ndinam emi ke item eke odudu spirit emi: “Ẹnyene eti ibuot.”—1 Pet. 4:7.
2 Ndinyene eti ibuot abuana ndise n̄kpọ nte Jehovah esede. (Eph. 5:17) Enye anam nnyịn ifiọk ke nnyịn idi mme “odudụn̄ ye mbon isan̄” ke editịm n̄kpọ oro odude ke emi. (1 Pet. 2:11) Enye anam nnyịn ifiọk se inen̄erede idi akpan n̄kpọ, inịm mme ebeiso n̄kpọ, inyụn̄ inam nti ubiere.—Phil. 1:10.
3 Nịm Mme Utịtmbuba eke Spirit: Ndinịm nnyụn̄ nsịm mme utịtmbuba eke spirit ẹn̄wam nnyịn ndinyene eti ibuot. Nte afo emenyene mme utịtmbuba eke spirit oro ebịnede idahaemi? Nte afo omodomo ndikot Bible kpukpru usen, ndidụk kpukpru mbono esop Christian, ndikot kpukpru nsiondi Enyọn̄-Ukpeme ye Awake!, m̀mê ndisịn ini efen efen ke utom ukwọrọikọ fo? Edieke afo enịmde nti utịtmbuba, odomode ndisịm mmọ, onyụn̄ eben̄ede Jehovah ọdiọn̄ mme ukeme fo, mme utịp oro afo edinyenede ẹkeme ndikpa fi idem.
4 Ebiowo kiet ama obụp obufa mme ọdọ ndọ kiet aban̄a se idide mme utịtmbuba eke spirit mmọ. Mbụme emi ama anam mmọ ẹkụt ke edieke mmimọ idude mmemmem uwem inyụn̄ ifepde mbiomo edikama isọn, mmimọ imekeme ndisiak usụn̄. Mmọ ẹma ẹbiere ndinam oro edi utịtmbuba mmọ. Mmọ ẹma ẹsịn ukeme ẹkpe isọn mmọ ẹnyụn̄ ẹyom mme usụn̄ nditre mme edinam oro owo mînen̄ekede iyom emi ẹkedade ini ye odudu mmọ. Isua kiet ke ukperedem, mmọ ẹma ẹsịm utịtmbuba mmọ. Nso ikedi utịp? Ebe ọdọhọ ete: “Mîkpekedịghe ndinịm mme utịtmbuba, nnyịn ikpenyeneke se inyenede idahaemi. Nnyịn imenen̄ede ikop inemesịt. Uwem nnyịn etie emem emem onyụn̄ enen̄ede ọfọn. Enye enen̄ede enyene se ọwọrọde onyụn̄ enyene uduak.”
5 Nte nnyịn itiede ibet usen Jehovah, nnyịn ikpakam ika iso ndidu ke mben̄eidem ke n̄kan̄ eke spirit ebe ke ndinyene eti ibuot, iwụkde ntịn̄enyịn ke ndinam uduak Abasi.—Titus 2:11-13.