NTE ỌKPỌTỌN̄ỌDE NNEME
UKPEPN̄KPỌ 4
Sụhọde Idem
Se Bible Etịn̄de: “Ẹda nsụhọdeidem ẹbat ẹte mbon en̄wen ẹfọn ẹkan mbufo.”—Phil. 2:3.
Se Paul Akanamde
1. Se VIDIO emi, mîdịghe kot Utom 26:2, 3. Ekem bọrọ mme mbụme emi:
Didie ke Paul okowụt ke imosụhọde idem ke nte enye eketịn̄de ikọ ye Edidem Agrippa?
Didie ke Paul okowụt ke se imọ itịn̄de oto Jehovah ye Bible ke idịghe ikọ idem imọ?—Se Utom 26:22.
Nso ke Ikpep Ito Paul?
2. Edieke isitịn̄de ikọ ukpono ukpono inyụn̄ isụhọrede idem oro ayanam se itịn̄de enem mme owo ndikop.
Kpebe Paul
3. Tịn̄ ikọ ukpono ukpono. Kûnam nte ọmọdiọn̄ọ kpukpru n̄kpọ, ke mbon en̄wen idiọn̄ọke n̄kpọ. Tịn̄ ikọ ukpono ukpono ye mme owo.
4. Nam mme owo ẹdiọn̄ọ ke se etịn̄de oto Bible. Se Bible etịn̄de esinen̄ede otụk mme owo. Ima ida se itịn̄de ito Bible, oro ayanam mme owo ẹnen̄ede ẹbuọt idem ye Abasi.
5. Tie ifụre ifụre. Kûdomo ndiwụt ke emenen. Nnyịn iyomke ndifan̄a n̄kpọ ye owo. Wụt ke omosụhọde idem, tie sụn̄sụn̄ nyụn̄ diọn̄ọ ini emi ọkpọkpọn̄de ufọkowo. (N̄ke 17:14; Titus 3:2) Edieke anamde n̄kpọ sụn̄sụn̄, oro ekeme ndinam owo ama ndikop se editịn̄de ini en̄wen.