Mark Asɛmpa

4 Na ɔhyɛɛ ase bio kyerɛkyerɛe wɔ mpoano, na nyimpadɔm pii botwaa no ho hyiae. Ntsi ɔfoow hɛmba bi kɛtsenaa mu, na wopiaa no fii daadze ma ɔkɔr ekyir kakra wɔ po no do, naaso nyimpadɔm no dze, nna hɔn nyina wɔ mpoano hɔ. 2 Na ɔhyɛɛ ase dze mfatoho kyerɛkyerɛɛ hɔn ndzɛmba pii, na aber a ɔrekyerɛkyerɛ hɔn no, ɔkaa kyerɛɛ hɔn dɛ: 3 “Hom ntsie. Hwɛ, okuafo bi kɔr dɛ orukogu n’aba. 4 Na aber a orugu aba no, bi koguu kwan nkyɛn, na nnoma bae bɔsosɔwee. 5 Bi so koguu abotan do, hɔ dze nna dɛtse pii nnyi hɔ. Na osiandɛ dɛtse a ɔwɔ hɔ no suar ntsi, ntsɛmara na ofifirii. 6 Naaso aber a ewia puei no, ɔhyee no, na osiandɛ onnyi ndwow ntsi ɔkyenkyenee. 7 Aba no bi so koguu nsoɛ mu, na nsoɛ no nyinii na omiaa no, na woenntum annsow aba. 8 Na bi so koguu asaase pa mu, na onyinii yɛɛ akɛse, na ɔhyɛɛ ase soow aba. Bi soow aba a woduae no mbɔho 30, bi mbɔho 60, na bi so mbɔho 100.” 9 Afei ɔdze kaa ho dɛ: “Ma obi a ɔwɔ asowa a ɔdze betsie no ntsie.”

10 Na aber a ɔkaa nanko no, hɔn a wɔka no ho no nye Duebien no hyɛɛ ase bisabisaa no mfatoho no ho asɛm. 11 Nna ɔkaa kyerɛɛ hɔn dɛ: “Hom na wɔdze ama hom dɛ hom ntse esumasɛm krɔnkrɔn a ɔfa Nyankopɔn n’Ahendzi ho no ase. Naaso hɔn a wɔaka no dze, mfatoho na wɔdze kasa kyerɛ hɔn. 12 Ntsi ɔwɔ mu dɛ wɔbɔhwɛ dze, naaso worunnhu, na ɔwɔ mu dɛ wɔbɛtse dze, naaso wɔrenntse ase na wɔrennsesa da ma wɔmmfa hɔn bɔn nnkyɛ hɔn.” 13 Bio so ɔkaa kyerɛɛ hɔn dɛ: “Hom nntse dɛm mfatoho yi ase, ntsi ɔbɛyɛ dɛn na hom aatse mfatoho a aka no so ase?

14 “Okuafo no gu asɛm no. 15 Ntsi iyinom nye dza okoguu kwan kyɛn wɔ beebi a woduaa asɛm no; hɔn na wɔtse asɛm no ara pɛ a, nna Satan ebeyi asɛm a woedua no wɔ hɔn mu no. 16 Na iyinom so nye dza okoguu abotan do no; hɔn na sɛ wɔtse asɛm no ara pɛ a, wɔdze enyigye gye to mu ntsɛmara. 17 Naaso wonnyi ndwow biara wɔ hɔn mu ntsi, asɛm no tsena hɔn mu kakra, na sɛ asɛm no ntsi wohu amandze anaa wɔtan hɔn enyi ara pɛ a, ɔto hɔn fintsidua. 18 Bi so wɔ hɔ a okoguu nsoɛ mu. Iyinom nye hɔn a wɔtse asɛm no, 19 naaso wiadze yi* mu dadwen nye ahonyadze ndaadaa nye ndzɛmba afofor ho akɔndɔ wura hɔn akoma mu, na omia asɛm no ma dɛm ntsi ɔnnsow aba. 20 Afei so dza okoguu asaase pa mu no nye hɔn a wotsie asɛm no, na wɔgye no fɛw do na wɔsow aba. Bi sow aba a woduae no mbɔho 30, bi mbɔho 60, na bi so mbɔho 100.”

21 Na ɔkaa kyerɛɛ hɔn dɛ: “Nkyɛ wɔnnsɔ kandzea mmfa nnhyɛ kɛntsɛn* anaa mpa ase, anaa moboa? Nnyɛ kandzeadua do na wɔdze si bi a? 22 Na biribiara nnyi hɔ a wɔdze esuma a wɔrennda no edzi; na biribiara nnyi hɔ a wɔdze esie fee a ɔremmbɛda gua. 23 Obiara a ɔwɔ asowa a ɔdze betsie no, ma ontsie.”

24 Ɔsanee kaa kyerɛɛ hɔn dɛ: “Hom nkyɛn hom aso ntsie nsɛm yi yie. Na esusudze a hom dze susu ma nkorɔfo no, ɔno ara so na wɔdze bosusu ama hom, nyew, wɔdze pii bɛka ho ama hom. 25 Na obiara a ɔwɔ bi* no, wɔbɛma no pii aka ho, naaso obi a onnyi bi no dze, kakra* a ɔwɔ no mpo, wɔbɛgye efi ne nsamu.”

26 Ɔtoaa do kaa kyerɛɛ hɔn dɛ: “Nyankopɔn n’Ahendzi no tse dɛ ber a ɔbarimba bi gu aba wɔ asaase do. 27 Ɔda anafua na ɔsoɛr anapa, na aba no fifir na onyin yɛ atsentsen. Naaso onnyim kwan a aba no fa do fifir na onyin. 28 Nkakrankakra asaase no ankasa sow aba, na oyiyi bɛtsem, afei edziban ba bɛtsem no ho. 29 Na sɛ ndɔbaa no nyin ara pɛ a, ɔtwe ne sekan* to mu, osiandɛ no twaber edu.”

30 Na ɔtoaa do kaa dɛ: “Ebɛnadze na yebotum dze Nyankopɔn n’Ahendzi no atoto ho, na ebɛn mfatoho na yebotum dze akyerɛkyerɛ mu? 31 Ɔtse dɛ sinapi aba. Sɛ worudua no wɔ famu a, osuar sen aba biara a ɔwɔ asaase do. 32 Naaso sɛ wodua a, onyin bɛyɛ kɛse kyɛn nduadzewa nyina, na oyiyi nkorbata akɛse, dɛm ntsi wimu nnoma begyinagyina ase gye nwin.”

33 Ɔdze mfatoho a ɔtsetse dɛm pii kaa asɛm no kyerɛɛ hɔn wɔ kwan bi do a ɔbɛma wɔatse ase. 34 Nokwasɛm nye dɛ, ɔannkasa annkyerɛ hɔn a ɔannyɛ mfatoho. Naaso sɛ ɔka ɔno na n’esuafo no nkotsee a nna ɔakyerɛkyerɛ mu akyerɛ hɔn.

35 Na dɛm da no n’ewimbir no, ɔkaa kyerɛɛ hɔn dɛ: “Hom mma yentwa nkɔ nsu no n’ekyir.” 36 Afei aber a wogyaa nyimpadɔm no kwan wiei no, ɔanngye n’ahom* mpo na wɔdze no tsenaa hɛmba bi mu dɛ wɔrokɔ. Nna hɛmba afofor bi so ka ho ma wɔrokɔ. 37 Afei ehum kɛse bi a n’ano yɛ dzen tui, na asorɛkye bui baa hɛmba no mu ma ɔkaa kakraabi nkyɛ hɛmba no reyɛ amem. 38 Naaso ɔno dze nna ɔada sundze bi do wɔ hɛmba no n’ekyir. Ntsi wonyaan no na wɔkaa kyerɛɛ no dɛ: “Kyerɛkyerɛnyi, ntsi yerubowuwu yi ɔmmfa wo ho a?” 39 Nna ɔsoɛree, na ɔtseaa ehum no na ɔkaa kyerɛɛ po no dɛ: “Hei! Taa dzinn!” Na ehum no gyaae, na po no taa dzinn koraa. 40 Ntsi obisaa hɔn dɛ: “Ebɛnadze ntsi na hom akoma etu* dɛm yi? Ntsi hom da ho ara nnyi gyedzi a?” 41 Naaso suro kyekyeer hɔn, na wɔkekaa kyerɛɛ hɔnho dɛ: “Woana koraa nye yi? Ehum na po mpo tsie no.”